འདམ་གཞུང་དུར་ཚོགས་སྔོག་འདོན་བྱེད་སྐབས་མཆོང་དང་གཡུ་སོགས་ཐོན་པ།

        ཉེ་ཆར། གསར་འགོད་པ་ཡིས་བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་ནས་ཤེས་རྟོགས་བྱུང་བ་ལྟར་ན། 2021ལོ་འཁོར་དུ་འདམ་གཞུང་དུར་ཚོགས་ཀྱི་བང་སོ31ལ་སྔོག་འདོན་བྱས་ནས་ལེགས་གྲུབ་བྱུང་བ་རེད།

        འདམ་གཞུང་དུར་ཚོགས་ནི2021ལོ་འཁོར་གྱི་རྒྱལ་ཡོངས་གནའ་རྫས་རྟོག་ཞིབ་ཀྱི་གསར་རྙེད་ཆེན་པོ་བཅུ་ཡི་འོས་འདེམས་རྣམ་གྲངས་ནང་དུ་ཚུད་ཅིང་། དེ་ནི་ལྷ་ས་གྲོང་ཁྱེར་འདམ་གཞུང་རྫོང་འདམ་ཆུ་ཁ་གྲོང་རྡལ་གྱི་འདམ་ཆུ་ཁ་གྲོང་ཚོ་ན་ཡོད་པ་དང་། མཚོ་འཕགས་ལ་སྨི4300ཙམ་ཡོད། འདམ་གཞུང་དུར་ཚོགས་ལ་ལྷོ་བྱང་ཁུལ་གཉིས་སུ་དབྱེ་ཞིང་། ལྷོ་ཁུལ་དུ་བང་སོ་ཆེན་པོ6དང་བྱང་ཁུལ་དུ་བང་སོ་ཆུང་ཆུང47ཡོད།

        བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་གི་རིག་རྟེན་ཡིག་མཛོད་པ(文博馆员)བཀྲ་ཤིས་ཚེ་རིང་གིས་མཚམས་སྦྱོར་བྱས་ན། རྒྱལ་ཁབ་རིག་དངོས་ཅུས་ཀྱིས་ཆོག་མཆན་གནང་བ་དང་བོད་རང་སྐྱོང་ལྗོངས་རིག་དངོས་ཅུས་ཀྱིས་བཀོད་སྒྲིག་བྱས་པ་ལ་གཞིགས་ཏེ། 2020ལོའི་སྔོག་འདོན་བྱ་བ་ཡི་རྒྱུན་བསྐྱང་ཆེད། བོད་རང་སྐྱོང་ལྗོངས་རིག་དངོས་ཅུས་ཀྱིས་ཀྲེ་ཅང་ཞིང་ཆེན་རིག་དངོས་གནའ་རྫས་རྟོག་ཞིབ་ཞིབ་འཇུག་ཁང་ལ་མཉམ་འབྲེལ་བྱས་ཏེ2021ལོའི་ཟླ7པ་ནས་ཟླ10པའི་བར་དུ། འདམ་གཞུང་དུར་ཚོགས་སུ2021ལོ་འཁོར་གྱི་མྱུར་སྐྱོབ་རང་བཞིན་གྱི་གནའ་རྫས་སྔོག་འདོན་བྱ་བ་བསྒྲུབས་པ་དང་། ཁྱོན་བསྡོམས་བང་སོ31ལ་གཙང་སྦྲ་བྱས་ཤིང་། དེའི་ནང་དུ་བང་སོ་ཆེན་པོ་གཅིག་དང་བང་སོ་ཆུང་ཆུང30འདུས་པ་རེད།

        བང་སོ་ཆེན་པོ་དེ་ནི་ས་ངོས་ཀྱི་དེའུ་འབུར་དང་ས་འོག་གི་དུར་ཁང་གཉིས་ཀྱིས་གྲུབ་ཅིང་། དེའུ་འབུར་ནི་ཟླུམ་དབྱིབས་འདྲ་བར་སྣང་བ་དང་། དུར་ཁང་གི་བཟོ་བཀོད་ནི་ཟླུམ་དབྱིབས་གནམ་འདེགས་ཀྱི་རྡོ་སྒྲོམ་ཡིན། དུར་ཁང་ནས་མིའི་ཀེང་རུས་ཁ་ཤས་དང་རྫ་ཆས་ཆག་རོ་གསུམ་རྙེད་པ་རེད།

        བང་སོ་ཆུང་ཆུང་རྣམས་ནི་གྲལ་བསྟར་སྒྲིག་པ་ནང་བཞིན་ཡོད་ཀྱང་། གཤིན་རྫས་ཧ་ཅང་ཉུང་སྟབས། ཟངས་ཆས་དང་ལྕགས་ཆས་འགའ་དང་། རྫ་ཆས་ཆག་རོ་དང་བྱུ་རུ་སོགས་རྒྱན་ཆ་ཉུང་ངུ་ལས་ཅི་ཡང་རྙེད་མེད་པ་རེད།

        བང་སོ་ནས་རྙེད་པའི་མིའི་ཀེང་རུས་ནི་ཐར་ཐོར་ཡིན་ཞིང་ཆ་མི་ཚང་སྟབས། དེ་ནི་གཤིན་པོའི་རུས་པ་བསྡུས་ནས་དུར་འཇུག་ཐེངས་གཉིས་པ་བྱས་པ་ཞིག་ཡིན་པར་འདོད་པ་དང་། དུར་སྒམ་གྱི་རྗེས་ཤུལ་གསལ་བོ་མེད། གཤིན་རྫས་ཀྱི་ཁྲོད་དུ་ཁྱི་དང་རྟ། ལུག་སོགས་སྲོག་ཆགས་ཀྱི་རུས་པ་མང་པོ་ཡོད་པ་རེད།

        འདམ་གཞུང་དུར་ཚོགས་ལ2020ལོ་དང2021ལོ་གཉིས་སུ་གནའ་རྫས་རྟོག་ཞིབ་སྔོག་འདོན་བྱེད་སྐབས། གསར་རྙེད་བྱུང་བའི་དངོས་པོ་གཙོ་བོ་ནི་གསེར་ཆས་དང་དངུལ་ཆས། རང་བྱུང་གསེར་ལེབ།(狗头金) མུ་མེན། མཆོང་། བྱུ་རུ། གཡུ། རྫ་ཆས། ཟངས་ཆས། ལྕགས་ཆས་ཆག་རོ། ཚོན་བྱུགས་དངོས་པོའི་ཆག་དུམ། འགྲོན་བུའི་དངོས་རྫས། ཚ་ཚ། འཐག་དངོས། ད་དུང་འགྲིག་རྡེའུ་དཀར་ནག་སོགས་ཡིན། ཚད་འཇལ་དུ་བླངས་པའི་མ་དཔེ་ཡི་ཁྲོད་དུ་མིའི་ཕུང་བོ40དང་སྲོག་ཆགས100 ལོ་བརྟག50 སའི་མ་དཔེ80བཅས་ཡོད།

        འདམ་གཞུང་དུར་ཚོགས་ལ་གནའ་རྫས་རྟོག་ཞིབ་སྔོག་འདོན་བྱས་པ་ནི་བོད་ལྗོངས་ཁོངས་གཏོགས་ཀྱི་བང་སོའི་ཚོགས་ལ་གཞི་རྒྱ་ཆེ་བའི་གནའ་རྫས་རྟོག་ཞིབ་སྔོག་འདོན་ཐེངས་དང་པོར་བྱེད་པའི་བྱ་བ་ཞིག་ཡིན་ཞིང་། དུར་ཁང་གི་བཟོ་བཀོད་དང་དུར་ཁང་ནས་ཐོན་པའི་དངོས་པོ་ཚང་མ་རུ་བོད་བཙན་པོའི་དུས་ཀྱི་རིག་གནས་ཁྱད་ཆོས་ཡོད་པ་དང་། 2020ལོར་ཐཱན་བཅུ་བཞིའི་ལོ་བརྟག་བྱས་པའི་གཞི་གྲངས་ལ་ཟུང་འབྲེལ་བྱས་ན། བང་སོའི་ལོ་ཚིགས་ནི་དུས་རབས7པ་ནས9པའི་བར་ཡིན་སྟབས། བོད་བཙན་པོའི་དུས་ཀྱི་རིག་གནས་ཤུལ་བཞག་ལ་གཏོགས་པ་རེད། དུས་མཚུངས་སུ། ཀྲུང་ཡོན་ས་ཆ་དང་ཉེ་འཁོར་ས་ཁུལ་རིག་གནས་བར་གྱི་སྔ་དུས་སྤེལ་རེས་འགྲོ་འོང་མཉམ་འདྲེས་བྱུང་བའི་གནས་ཚུལ་ཡང་མངོན་འདུག་ཅེས་བཀྲ་ཤིས་ཚེ་རིང་གིས་བསྟན།