བློ་བསྟན་ལཊ་ཀྱིས་ཕོ་བྲང་པོ་ཏ་ལར་རིག་དངོས༡༧༦ཞབས་འདེབས་སུ་ཕུལ་བ།

        སྤྱི་ཟླ༦པའི་ཚེས༡༥ཉིན་གྱི་སྔ་དྲོ་བོད་རང་སྐྱོང་ལྗོངས་རིག་དངོས་ཅུས་སུ་སྐུ་ཞབས་བློ་བཟང་བསྟན་འཛིན་ལགས་ཀྱིས་ཕོ་བྲང་པོ་ཏ་ལའི་དོ་དམ་ཁྲུའུ་ལ་ཁོང་མི་སྒེར་གྱིས་ཉར་ཚགས་གནང་བའི་རིག་དངོས་ཞབས་འདེབས་སུ་འབུལ་བའི་མཛད་སྒོ་གཉེར་ཡོད།

        སྐུ་ཞབས་བློ་བཟང་བསྟན་འཛིན་ལགས་ཀྱིས་ཞབས་འདེབས་སུ་ཕུལ་བའི་རིག་དངོས་ཁ་གྲངས༡༧༦གི་ཁྲོད། ཐང་ག་དང་། ཆོས་གོས། གསེར་ཟངས་སོགས་ཀྱི་སྐུ་འདྲ། འཇིམ་སྐུ། རྡོ་བརྐོས། དཔེ་རྙིང་། ཆོས་ཆས། རིང་བསྲེལ་སོགས་སྣེ་རིགས་ཁག་བཅུ་ལྷག་ཙམ་ཡོད། དེ་དག་ཁྲོད་དུས་རབས༡༥པར་བཞེངས་པའི་ཞལ་ཐང༼སངས་རྒྱས་མི་བསྐྱོད་པ༽ཞེས་པ་དེ་རྒྱལ་ཁབ་ཀྱི་རིམ་པ་དང་པོའི་རིག་དངོས་ཡིན་པ་དང་། ཞལ་ཐང་དེ་ནི་ཐང་གའི་ལུགས་ལྔའི་ཁྲོད་ཀྱི་སྨན་ཐང་ལུགས་ཀྱི་སྲོལ་འབྱེད་པ་དང་མཁྱེན་རྩེ་ལུགས་ཀྱི་སྲོལ་འབྱེད་པའི་ཐུན་མོང་གི་དགེ་རྒན་མདོ་པ་བཀྲ་ཤིས་རྒྱལ་པོ་སྐུ་ངོ་མས་བཞེངས་པ་ཞིག་ཡིན་ཞིང་། གང་དེ་རྙེད་པ་དེ་ཐང་གའི་ལོ་རྒྱུས་དང་། རིག་གཞུང་། སྒྱུ་རྩལ་བཅས་རྒྱུན་འཛིན་དང་གོང་འཕེལ་གཏོང་བའི་ཐད་ནས་བཤད་ན་ཞིབ་འཇུག་གི་རིན་ཐང་གལ་ཆེན་ལྡན་པ་ཞིག་རེད།

        བོད་རང་སྐྱོང་ལྗོངས་རིག་གནས་ཐིང་གི་ཏང་ཙུའི་ཧྲུའུ་ཅི་ཤའོ་ཁྲོན་ཅང་གིས། སྐུ་ཞབས་བློ་བཟང་བསྟན་འཛིན་ལགས་མི་སྒེར་གྱིས་ཉར་ཚགས་གནང་བའི་རིག་དངོས་ཁ་གྲངས༡༧༦ཕོ་བྲང་པོ་ཏ་ལ་དོ་དམ་ཁྲུའུ་ལ་ཞལ་འདེབས་སུ་ཕུལ་བ་དེས་ཕོ་བྲང་པོ་ཏ་ལས་ཉར་ཚགས་བྱས་པའི་རིག་དངོས་ཀྱི་གྲངས་འབོར་དང་སྣེ་རིགས་དེ་བས་ཕུན་སུམ་ཚོགས་སུ་བཏང་ཡོད་པ་དང་། དེ་ཐོག་ནས་སྐུ་ཞབས་ཁོང་ལ་སྤྱི་ཚོགས་འགན་སེམས་ཆེན་པོ་ལྡན་པ་དང་། རྒྱལ་ཁབ་དང་ཁྱིམ་གཞིས་ལ་བརྩེ་བ་ཆེན་པོ་ལྡན་པ་མངོན་ཡོད་ལ། ཁོང་གི་མཚན་བོད་ལྗོངས་ཀྱི་རིག་དངོས་བྱ་གཞག་གོང་འཕེལ་གྱི་ལོ་རྒྱུས་དེབ་ཐེར་ཐོག་འཁོད་ངེས་རེད་ཅེས་གསུངས་པ་དང་། ཁོང་གིས། བོད་རང་སྐྱོང་ལྗོངས་རིག་དངོས་ཅུས་ཀྱིས་ངེས་པར་དུ་རིག་དངོས་དེ་དག་ཉར་ཚགས་ཡག་པོ་དང་སྲུང་སྐྱོང་ཡག་པོ། ཞིབ་འཇུག་ཡག་པོ་བཅས་བྱས་ནས། རྩ་ཆེའི་ཤུལ་བཞག་ལ་མི་ཚང་མས་གཅེས་སྤྲས་དང་མི་རབས་ནས་མི་རབས་བར་རྒྱུན་འཛིན་ཐུབ་པ་བྱེད་དགོས་ཞེས་གསུངས་པ་རེད།

        བློ་བཟང་བསྟན་འཛིན་ལགས་ཀྱིས། ང་རང་ཆུང་དུས་ནས་བོད་ཀྱི་རི་མོ་མཁས་ཅན་ཡེ་ཤེས་ཤེས་རབ་སོགས་ཀྱི་དྲུང་དུ་སློབ་སྦྱོང་བྱེད་པ་དང་དགེ་རྒན་རྣམ་པའི་བཀའ་སློབ་ལ་ཉན་པའི་སྐལ་བ་བཟང་པོ་ཐོབ་བྱུང་། ཁོང་རྣམ་པས་ང་ལ་མེས་རྒྱལ་ལ་དགའ་ཞེན་དང་མེས་པོའི་རྩ་ཆེའི་ཤུལ་བཞག་ལ་སྲུང་སྐྱོང་བྱེད་དགོས་པའི་བཀའ་སློབ་མཛད་པ་དག་དུས་ད་ལྟའང་ངས་སེམས་ལ་བརྟན་པོར་ངེས་ཡོད། ད་ཐེངས་ངས་རིག་དངོས་ཁ་གྲངས༡༧༦ཚང་མ་ཕོ་བྲང་པོ་ཏ་ལའི་དོ་དམ་ཁྲུའུ་ལ་ཞལ་འདེབས་བརྒྱབ་པ་ཡིན། ཕོ་བྲང་པོ་ཏ་ལ་ནི་འཛམ་གླིང་ཐོག་སྐད་གྲགས་ཆོད་པའི་ནོར་བུའི་བང་མཛོད་ཅིག་ཡིན་ལ། ཕོ་བྲང་པོ་ཏ་ལའི་དོ་དམ་ཁྲུའུ་ཡི་རིག་དངོས་ཉར་ཚགས་ཀྱི་ཁོར་ཡུག་དང་དོ་དམ་བྱེད་སྟངས་ཤིན་ཏུ་ཚད་ལྡན་དང་ཞིབ་ཚགས་ཡིན་པས། ཕོ་བྲང་པོ་ཏ་ལའི་རིག་དངོས་དོ་དམ་ཁྲུའུ་ཡིས་རིག་དངོས་དེ་དག་ཉར་ཚགས་ཡག་པོ་དང་། ཞིབ་འཇུག་ནན་ཏན། བེད་སྤྱོད་ལུགས་མཐུན་བཅས་བྱེད་ཐུབ་ངེས་ཡིན་པར་ང་ལ་ཡིད་ཆེས་ཆེན་པོ་ཡོད་ཅེས་གསུངས་པ་རེད།

        ངོ་སྤྲོད་བྱས་པར་གཞིགས་ན། ད་ཐེངས་ཞལ་འདེབས་སུ་ཕུལ་བའི་རིག་དངོས༡༧༦དེ་དག་ཁྲོད་རྒྱལ་ཁབ་རིམ་པ་དང་པོའི་རིག་དངོས༤དང་། རིམ་པ་གཉིས་པའི་རིག་དངོས༢༡ རིམ་པ་གསུམ་པའི་རིག་དངོས༣༥ སྤྱིར་བཏང་གི་རིག་དངོས༡༡༠ རིམ་པ་གཏན་འཁེལ་བྱས་མེད་པའི་རིག་དངོས༣བཅས་ཚུད་ཡོད་པ་རེད།