༄༅། །ཞིན་ཧེ་རྫོང་གིས་རིག་གནས་འཛུགས་སྐྲུན་གྱི་དར་ཆ་མཐོན་པོར་སྒྲེང་།

        གཞན་ཡང་ཞིན་ཧེ་རྫོང་མི་རིགས་སྐད་ཡིག་བྱ་བའི་ལྟེ་གནས་ཀྱིས་དུས་དང་རྣམ་པ་ཀུན་ཏུ«མཚོ་ལྷོ་བོད་རིགས་རང་སྐྱོང་ཁུལ་གྱི་བོད་སྐད་ཡིག་བྱ་བའི་སྲོལ་ཡིག»དང«མཚོ་ལྷོ་བོད་རིགས་རང་སྐྱོང་ཁུལ་རང་སྐྱོང་སྲོལ་ཡིག»དོན་འཁྱོལ་མཐར་ཕྱིན་བྱས་པའི་རྨང་གཞིའི་སྟེང་། རང་རྫོང་གི་མི་རིགས་མཐུན་སྒྲིལ་དང་གྲོང་གསེབ་དར་སྤེལ་གྱི་ལས་དོན་ཁག་སྐུལ་འདེད་གཏོང་བར་གཞོགས་འདེགས་བྱས་ཏེ། རྫོང་ཡོངས་ཀྱི་མི་རིགས་སྐད་ཡིག་བཀོལ་སྤྱོད་ཚད་ལྡན་དུ་བཏང་ཤིང་། ཁྱད་ཆོས་ལྡན་པའི་རིག་གནས་ཁོར་ཡུག་གི་རྣམ་པ་ཞིག་མངོན་པར་བྱས་ཡོད། འདྲ་མཉམ་དང་མཐུན་སྒྲིལ། ཕན་ཚུན་རོགས་རེས། འཆམ་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་དང་འཕེལ་རྒྱས་སུ་གཏོང་ཆེད། རྒྱ་ཆེའི་ཞིང་འབྲོག་མང་ཚོགས་ཀྱི་ཁེ་ཕན་དང་འབྲེལ་བ་དམ་ཟབ་ཡོད་པའི་སྲིད་ཇུས་དང་ཁྲིམས་སྲོལ། ཡིག་ཆ་གལ་ཆེན་བཅས་ཀྱི་ཡིག་སྒྱུར་བྱ་བ་ལས་འགན་གལ་ཆེན་དུ་བཟུང་སྟེ། ཏང་སྲིད་སྡེ་ཁག་སོ་སོའི་ཡིག་ཆ་དང་ས་གནས་ཀྱི་སྲིད་ཇུས། ཁེ་ལས་དང་བྱ་ལས་སྡེ་ཚན་གྱི་རྒྱུན་སྤྱོད་ཀྱི་གཞུང་ཡིག་རིགས། སྤྱི་ཚོགས་སྤྱོད་ཡིག་དང་ལས་ཁུངས་ཡིག་ཆའི་མགོ་བྱང་། གཞུང་ཐམ། འཕྲེད་འགེལ་སྦྱར་ཚིག སྒོ་བྱང་སོགས་ཀྱི་ཡིག་སྒྱུར་ལས་འགན་ཧུར་ཐག་གིས་སྒྲུབ་ཀྱིན་ཡོད།         མཉམ་འདྲེས་སྨྱན་བྱད་ལྟེ་གནས་འདིས་སྨྱན་བྱད་ཀྱི་ནུས་པ་འདོན་སྤེལ་གང་ལེགས་བྱས་ཏེ། གཏིང་ཟབ་པའི་སྒོ་ནས་གསར་འགྱུར་སྟེགས་བུ་གསར་སྐྲུན་ལག་བསྟར་བྱེད་པ་དང་མཉམ་དུ། སྨྱན་བྱད་ཀྱི་ཁྱབ་སྤེལ་བྱེད་ཚད་དང་ཤུགས་རྐྱེན་ཐེབས་ཚད། ཡིད་རྟོན་བྱེད་ཚད་ཇེ་དྲག་ཏུ་བཏང་སྟེ་སྔར་ལས་ལྷག་པའི་སྒོ་ནས་མང་ཚོགས་ལ་ཁྲིད་སྟོན་དང་མང་ཚོགས་ལ་ཞབས་ཞུ་བྱེད་པ་དམིགས་ཡུལ་དུ་བཟུང་བ་དང་། ཏང་གི་ལོ་རྒྱུས་སློབ་གསོ་སློབ་སྦྱོང་དང་དམངས་འཚོའི་ལམ་བུ། བྲག་དཀར་གཏམ་རྒྱུད་སོགས་ཁྱད་ཆོས་ལྡན་པའི་ཆེད་དོན་ལེ་ཚན་སྐོར་སྒྲོག་གཏོང་བྱེད་བཞིན་ཡོད་ལ། ཆེད་དོན་ལེ་ཚན་གྱིས་སྨྱན་བྱད་ཀྱི་ལེགས་ཆ་བེད་སྤྱད་དེ་དུས་ཐོག་ཏུ་རྫོང་ཡོངས་ཀྱི་ལས་ཁུངས་སོ་སོར་བརྗོད་དོན་སློབ་གསོའི་བྱ་བའི་གྲུབ་འབྲས་དང་ཁྱད་ཆོས་བཅས་དྲིལ་སྒྲོག་བྱས་ཏེ། བརྗོད་དོན་སློབ་གསོའི་ཁོར་ཡུག་ལེགས་པོ་ཞིག་བསྐྲུན། དམངས་འཚོའི་ལམ་བུའི་ལེ་ཚན་གྱིས་ཁ་པར་དང་དྲ་ལམ་བརྒྱུད་ནས་མང་ཚོགས་ཀྱིས་བཏོན་པའི་གླེང་ཕྱོགས་གཙོ་བོ་དག་དྲིལ་སྒྲོག་བྱས་པས། གནད་དོན་ཐག་གཅོད་དང་སྤྱི་ཚོགས་ཞབས་ཞུའི་ཐད་ནུས་པ་ཆེན་པོ་ཐོན་པ་དང་། བྲག་དཀར་གཏམ་རྒྱུད་དང་འབྲེལ་བའི་ཆེད་དོན་ལེ་ཚན་གྱིས་གནས་འདིའི་ཐུན་མིན་ཐོན་ཁུངས་ཁྱད་སྟོབས་བེད་སྤྱད་དེ་རྫོང་ཡོངས་ཀྱི་རང་བྱུང་མཛེས་ལྗོངས་ཀྱི་ཁྱད་ཆོས་དང་ལོ་རྒྱུས་རིག་གནས། ཡུལ་སྲོལ་གོམས་གཤིས་སོགས་སྔོག་འདོན་དྲིལ་སྒྲོག་བྱས་ཏེ། ས་གནས་རང་གི་རིག་གནས་ཡུལ་སྐོར་ལས་དོན་འཕེལ་རྒྱས་སུ་འགྲོ་བར་དྲིལ་སྒྲོག་གི་ནུས་ཤུགས་མི་དམན་པ་བཏོན་ཡོད།
        མཉམ་འདྲེས་སྨྱན་བྱད་འདིས་བོད་རྒྱ་སྐད་གཉིས་ཀྱི་གསར་འགྱུར་དྲིལ་སྒྲོག་དང་། སྐད་འཕྲིན་སྤྱི་སྟེགས་སོགས་བེད་སྤྱད་དེ་ཏང་གི་ལོ་རྒྱུས་ལ་སློབ་སྦྱོང་སློབ་གསོ་སོགས་བརྗོད་དོན་སློབ་གསོའི་བྱ་བའི་ཐད་ནས་བླངས་པའི་གྲུབ་འབྲས་དང་ཁྱད་ཆོས། བྱེད་ཐབས་དང་མཉམ་མྱོང་བཟང་པོ་དྲིལ་སྒྲོག་བྱས་པར་མང་ཚོགས་ཀྱི་དགའ་བསུ་ཆེན་པོ་ཐོབ་ཡོད་པར་མ་ཟད། ཁས་ལེན་ཡང་ཆེན་པོ་ཐོབ་ཡོད།
        ཉེ་བའི་ལོ་འདི་གའི་རིང་ལ། ཞིན་ཧེ་རྫོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བསམ་བློར་སློབ་སྦྱོང་དང་ཏང་གི་ཚོགས་ཆེན་ཐེངས་བཅུ་དགུ་བའི་དགོངས་དོན་ལག་ལེན་གཏིང་ཟབ་དང་། རིག་གནས་སྲུང་སྐྱོབ་རྒྱུད་འཛིན་བྱེད་པ། སྤུན་ཟླ་རྫོང་ཁག་བར་རིག་གནས་བསམ་བློ་བརྗེ་རེས་བྱེད་པ་བརྒྱུད་དེ། མི་དམངས་མང་ཚོགས་ཀྱི་རིག་གནས་རང་རྟོན་དང་། རིག་གནས་འཚོ་བ་ཕུན་སུམ་ཇེ་ཚོགས་སུ་བཏང་སྟེ། དུས་རབས་གསར་བའི་དཔལ་ཡོན་ལག་ལེན་ལྟེ་གནས་དང་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས། མི་རིགས་སྐད་ཡིག་བྱ་བའི་ལྟེ་གནས། ཉི་ཟེར་སྲིད་དོན། ཞིན་ཧེ་རྫོང་མཉམ་འདྲེས་སྨྱན་སྦྱོར་ལྟེ་གནས་བཅས་སྡེ་ཁག་མི་འདྲ་བ་དག་གིས་དམངས་ཕན་སྲིད་ཇུས་དྲིལ་སྒྲོག་དང་། གཟུགས་འདས་ཤུལ་བཞག་རིག་གནས་སོགས་དམངས་ཁྲོད་ཀྱི་རིག་གནས་སྣ་ཚོགས་སྔོག་འདོན་དང་རྒྱུད་འཛིན་བྱས་ཏེ་ཞང་སྡེ་དར་སྤེལ་དང་འཛུགས་སྐྲུན། ཕྱོགས་ཡོངས་ནས་རིག་གནས་འཕེལ་རྒྱས་སུ་གཏོང་བར་རྨང་གཞི་བརྟན་པོ་བཏིངས།