སློབ་ཐུན་མཚམས་བཞག་ཀྱང་སློབ་སྦྱོང་མཚམས་མི་འཇོག་པའི་མཐོ་སྒང་གི་སྙིང་སྟོབས།

        ད་ལོ་ནད་ཡམས་ཀྱི་རྐྱེན་པས་རྒྱལ་ནང་གི་ཡུལ་གྲུ་སོ་སོ་འཇགས་རྣམ་དུ་གནས་ཤིང་། རང་རེའི་ཞིང་ཆེན་དང་ཁུལ། རྫོང་རིམ་པར་ཡང་ཚད་མི་འདྲ་བའི་ཡམས་ཀྱིས་གཙེས་པའི་དེ་རིང་། བྲག་དཀར་རྫོང་མི་རིགས་སློབ་འབྲིང་དང་པོའི་དགེ་སློབ་ཐུན་མོང་ཡང་གཞིས་ཁྱིམ་ལྟ་བུའི་སློབ་ར་གཅིག་ཏུ་འཛོམས་ཏེ་སློབ་སྦྱོང་བྱེད་པའི་བསྐལ་བ་གནས་སྐབས་སུ་ཆད་པ་ནི་སློབ་གསོའི་གྱོང་གུད་ཅིག་ཏུ་ངེས་མོད། ཡིན་ཡང་མཐོ་སྒང་ལ་མཐོ་སྒང་གི་སྙིང་སྟོབས་ཡོད་དགོས་ལ། མཐོ་སྒང་གི་བུ་དང་བུ་མོ་ཚོར་ཡང་དཀའ་ཁག་ལ་གདོང་གཏད་པའི་སྙིང་སྟོབས་ཡོད་དགོས་པ་སློབ་གྲོགས་རེ་རེའི་སེམས་རྒྱུད་ལ་འཇགས་འདུག
         ཟླ༩བའི་ཚེས༡ནས་བྲག་དཀར་རྫོང་མི་རིགས་སློབ་འབྲིང་དང་པོས་ཀྱང་གོང་རིམ་འགོ་ཁྲིད་དག་གི་དགོངས་དོན་དང་རིག་པའི་བུ་སློབ་ཚོར་ཤེས་བྱའི་ལམ་རྒྱགས་སྩོལ་བའི་གོམ་མཚམས་མི་འཇོག་པའི་རྩ་དོན་ལྟར་དྲ་ལམ་སློབ་ཁྲིད་ལ་ཞུགས་པ་ཡིན། ཀུན་ཀྱིས་མཁྱེན་གསལ་ལྟར་དུ་རང་རེའི་རྫོང་གི་རོང་འབྲོག་མང་ཚོགས་བརྒྱ་ཆའི་བཞི་བཅུ་ལྷག་རྫོང་མཁར་དང་བར་ཐག་སྤྱི་ལེ་ལྔ་བརྒྱ་དྲུག་བརྒྱའི་མཚམས་སུ་གནས་ཤིང་། དྲ་རྒྱ་དང་བརྡ་རྟགས་ཀྱི་འབྲེལ་ལམ་ཡོངས་སུ་ཆད་པའི་སྣང་ཚུལ་མང་དུ་མཆིས་ནའང་། དགེ་རྒན་རྣམ་པས་སློབ་གྲྭ་རང་ཁྱིམ་དང་སློབ་ཕྲུག་རང་གི་བུ་ཕུག་ཡིན་པའི་ཡིད་ཆེས་དང་བརྩེ་བས་སློབ་ཁྲིད་མཉེན་ཆས་ཀྱི་མ་ལག་མང་པོར་སྐད་ཀྱི་གདངས་ལ་བརྩེ་བའི་འགྲོས་བསྲེས་ཏེ། དུངས་པའི་མིག་ལ་སྤྲོ་བའི་སེམས་བསྐྱིལ་ཏེ་སློབ་ཁྲིད་ཀྱི་ཆུ་རྒྱུན་ཆད་མེད་དུ་བཞུར་དུས། སློབ་གྲོགས་སྐོར་ཞིག་གིས་ཀྱང་དགེ་རྒན་གྱི་གསུང་གི་བདུད་རྩི་འཐུང་འདོད་ཀྱི་ཧམ་སེམས་ཤིན་ཏུ་ཆེ་བས་རི་སྒང་དང་། བྲག་གཟར། ནགས་ཚལ་དང་གཙང་འགྲམ་སོགས་འགྲིམས་ཏེ་བརྡ་རྟགས་འཚོལ་བའི་སློབ་སྦྱོང་གི་སྙིང་སྟོབས་དང་མཐོ་སྒང་གི་སྙིང་སྟོབས་མངོན་པ་ནི་ཤིན་ཏུ་སྙིང་དུ་སྡུག་པའི་རྣམ་འགྱུར་ཞིག་རེད་ལ། བྱ་སྤྱོད་འདི་དག་གིས་སྤྱི་ཚོགས་ཀྱི་ཡས་སྣེ་མས་སྣེ་གང་རུང་ལ་སེམས་འགུལ་གྱི་མཆི་མ་མང་དུ་བསྐྱིལ་ཡོད་ཚོད་རེད།