ལྷོ་ནུབ་མི་རིགས་སློབ་ཆེན་དུ་ཁ་ལོ་སློབ་གསོའི་ཐེབས་རྩ་བཙུགས་པ།

       བོད་ཀྱི་གསོ་རིག་རྒྱུན་འཛིན་དང་བོད་ཀྱི་གསོ་རིག་བྱ་གཞག་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བར་སྐུལ་འདེད་གཏོང་ཆེད། ཟླ4པའི་ཚེས7ཉིན་གྱི་སྔ་དྲོར། ལྷོ་ནུབ་མི་རིགས་སློབ་ཆེན་དུ“ཁ་ལོ་སློབ་གསོའི་ཐེབས་རྩ”བཙུགས་ནས་ཞལ་འདེབས་འབུལ་བའི་མཛད་སྒོ་བསྡུས་པ་དང་མི་རིགས་གསོ་རིག་གླེང་སྟེགས་བྱ་འགུལ་སྤེལ།

       མཛད་སྒོའི་སྟེང་དུ། རང་རེ་མཚོ་སྔོན་ཞིང་ཆེན་གྱི་སྨན་པ་གྲགས་ཅན་ཁ་ལོ་ལགས་ཀྱིས“ཁ་ལོ་སློབ་གསོའི་ཐེབས་རྩ”ལ་སྒོར་ས་ཡ་གཅིག་ཞལ་འདེབས་སུ་ཕུལ་ཞིང་། ཞལ་འདེབས་དེ་ནི་སྦྱངས་འབྲས་ཕུལ་དུ་བྱུང་བའི་སློབ་མར་གཟེངས་བསྟོད་དང་འབྲེལ་ཡོད་རིག་ཚན་སྒྲིག་འཛུགས་སོགས་སུ་སྤྱོད་རྒྱུ་རེད།

       སྨན་པ་ཁ་ལོ་ལགས་ཀྱིས་སྔ་རྗེས་སུ་མགོ་ལོག་ཁུལ་བོད་ལུགས་སྨན་ཁང་གི་ཡོན་ཀྲང་དང་། མཚོ་སྔོན་ཞིང་ཆེན་བོད་སྨན་ཁང་གི་ཡོན་ཀྲང་། མཚོ་སྔོན་ཞིང་ཆེན་བོད་ལུགས་གསོ་རིག་སློབ་གླིང་གི་ཏང་ཨུའི་ཧྲུའུ་ཅི། ཀྲུང་གོ་མི་རིགས་གསོ་རིག་སློབ་ཚོགས་ཀྱི་ལས་འཛིན། མཚོ་སྔོན་ཞིང་ཆེན་བོད་ལུགས་གསོ་རིག་སློབ་ཚོགས་ཀྱི་རྒྱུན་ལས་ལས་འཛིན་གཞོན་པ་སོགས་ཀྱི་འགན་བཞེས་པ་དང་། རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་དང་ངལ་རྩོལ་མི་དོན་པུའུ། ཀྲུང་གོ་ཚན་རྩལ་མཐུན་ཚོགས་བཅས་ཀྱིས་གྲངས་ཉུང་མི་རིགས་ས་ཁུལ་གྱི་ཚན་རིག་ལག་རྩལ་བྱ་གཞག་ལ་བྱས་རྗེས་འཇོག་མཁན་གྱི་བྱ་དགའ་གནང་ཞིང་། འཕྲོད་བསྟེན་པུའུ་ཡིས་རྒྱལ་ཡོངས་འཕྲོད་བསྟེན་སྡེ་ཁག་གི་སྔོན་ཐོན་ལས་དོན་པའི་བྱ་དགའ་གནང་བ་དང་། རྒྱལ་སྲིད་སྤྱི་ཁྱབ་ཁང་གིས་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་མི་སྒེར་གྱི་བྱ་དགའ་གནང་མྱོང་། ཁོང་ནི་རྒྱལ་ཡོངས་ཀྱི་ཁག་དང་པོའི(བོད་སྨན)ཀྲུང་ལུགས་གསོ་རིག་སྨན་རྒན་རིག་གཞུང་ཉམས་མྱོང་རྒྱུན་འཛིན་གྱི་སློབ་དཔོན་དང་། རྒྱལ་སྲིད་སྤྱི་ཁྱབ་ཁང་གི་དམིགས་བསལ་ཕོགས་ཐོབ་ལོངས་སུ་སྤྱོད་མཁན་བཅས་ཡིན་ལ། 2022ལོར་ཁོང་གིས་རྒྱལ་ཡོངས་ཀྲུང་ལུགས་སྨན་པ་གྲགས་ཅན་གྱི་མཚན་སྙན་བཞེས།