བོད་རང་སྐྱོང་ལྗོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གི་ཕུལ་བྱུང་གྲུབ་འབྲས་བྱ་དགའི་གཟེངས་བསྟོད་ཚོགས་ཆེན་སྐབས་དང་པོ་ལྷ་སར་འཚོགས།

       གསར་འགོད་པས་གཟེངས་བསྟོད་ཚོགས་ཆེན་ཐོག་རྒྱུས་ལོན་བྱུང་བ་ལྟར་ན། 2021ལོའི་ཟླ10པའི་ཚེས12ཉིན་བོད་རང་སྐྱོང་ལྗོངས་མི་དམངས་སྲིད་གཞུང་གཞུང་སྒྲུབ་ཐིང་གིས«བོད་རང་སྐྱོང་ལྗོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གི་ཕུལ་བྱུང་གྲུབ་འབྲས་བྱ་དགའི་བྱ་ཐབས»དཔར་འགྲེམ་བྱས། «བྱ་ཐབས»ནང་བོད་རང་སྐྱོང་ལྗོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གི་ཕུལ་བྱུང་གྲུབ་འབྲས་བྱ་དགའ་ནི་རང་སྐྱོང་ལྗོངས་མི་དམངས་སྲིད་གཞུང་གིས་སྤྲད་པའི་ལྗོངས་ཡོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་ཞིབ་འཇུག་ཁྱབ་ཁོངས་ཀྱི་བྱ་དགའ་མཐོ་ཤོས་ཡིན་པ་དང་། བྱ་དགའི་དཔྱད་བསྡུར་ལས་དོན་ལོ་གཉིས་རིང་ཐེངས་གཅིག་སྤེལ་བ་དང་། བྱ་དགའ་གསུང་རྩོམ་གྱི་རིགས་དང་། དཔྱད་རྩོམ་གྱི་རིགས། སྙན་ཞུའི་རིགས་བཅས་སུ་དབྱེ་ཡོད་ཅིང་། སོ་སོར་བྱ་དགའ་ཨང་དང་པོ་དང་ཨང་གཉིས་པ། ཨང་གསུམ་པ་བཀོད་སྒྲིག་བྱས་ཡོད། རིག་ཚན་མ་ལག་དང་རིག་གཞུང་མ་ལག སྐད་བརྡའི་མ་ལག་བཅས་འཛུགས་སྐྲུན་ལ་སྐུལ་འདེད་གཏོང་བའི་ཐད་བྱས་རྗེས་འབུར་ཐོན་ཡོད་པའི་གྲུབ་འབྲས་ལ་ཁྱད་འཕགས་བྱ་དགའ་སྤྲོད་རྒྱུ་གཏན་འབེབས་བྱས་ཡོད།        རྒྱུས་ལོན་བྱུང་བ་ལྟར་ན། ཐེངས་འདིར་བྱ་དགའ་ཐོབ་པའི་གྲུབ་འབྲས་དཔལ་འབྱོར་དང་ཆབ་སྲིད། རིག་གནས། སློབ་གསོ། དམངས་འཚོ། མི་རིགས། ཆོས་ལུགས། སྤྱི་ཚོགས་བཅས་ཀྱི་ཕྱོགས་སོ་སོར་འབྲེལ་ཡོད་ལ། བོད་ལྗོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་ཞིབ་འཇུག་གི་མ་ལག་རང་བཞིན་དང་སྒྲིག་གཞི་རང་བཞིན། འཐུས་ཚང་རང་བཞིན་གྱི་ཁྱད་ཆོས་མཚོན་ཡོད་པ་དང་། རིག་གཞུང་ཚན་ཁག་མ་ལག་འཛུགས་སྐྲུན་ལ་སྐུལ་འདེད་བཏང་ཡོད། ཐེངས་འདིར་བྱ་དགའ་ཐོབ་པའི་གྲུབ་འབྲས་བོད་ལྗོངས་ཀྱི་སྲོལ་རྒྱུན་རིག་གནས་ཕྱོགས་མང་པོའི་ཞབ་འཇུག་དང་འབྲེལ་ཡོད་ཅིང་། གྲུབ་འབྲས་འདི་དག་གིས་ཡིག་ཚགས་དང་ལོ་རྒྱུས་ཀྱི་དཔྱད་ཡིག གནའ་རྫས་དཔྱད་ཞིབ། རིག་གནས་དམངས་སྲོལ། དངོས་རྫས་ཉར་འཇོག་སོགས་ཕྱོགས་མང་པོའི་ཁུངས་སྐྱེལ་དཔེ་མཚོན་ལ་ཟུང་འབྲེལ་བྱས་ཡོད་པས། ཀྲུང་ཧྭའི་དཔལ་ཡོན་གྱི“དམིགས་བསལ་རང་བཞིན་ལྔ”བོད་ལྗོངས་ཀྱི་ཕུལ་བྱུང་སྲོལ་རྒྱུན་རིག་གནས་ཁྲོད་ཀྱི་ཞིབ་ཕྲའི་མཚོན་ཚུལ་གསོན་ཉམས་ལྡན་པའི་སྒོ་ནས་འཆད་འགྲེལ་བྱས་ཡོད་ཅིང་། བོད་ལྗོངས་འདི་ཉིད་ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་བྱ་ཡུལ་ཡིན་པའི་ཡིད་དབང་འགུག་ཤུགས་གང་ལེགས་མངོན་པ་དང་། རིག་གཞུང་ལ་བརྟེན་ནས་ཀྲུང་གོའི་བོད་ལྗོངས་ཀྱི་གཏམ་རྒྱུད་ལེགས་པོར་བཤད་པའི་དམིགས་ཚད་དང་རྒྱལ་ཁབ་ཕྱི་ནང་གི་བོད་རིག་པའི་ལས་རིགས་སུ་ཤུགས་རྐྱེན་ངེས་ཅན་ཐེབས་པའི་ཚད་དུ་སླེབས་ཏེ། སྐད་བརྡའི་མ་ལག་འཛུགས་སྐྲུན་ལ་སྐུལ་འདེད་བཏང་ཡོད།
       མཚན་ཉིད་རིག་པ་དང་སྤྱི་ཚོགས་ཚན་རིག་གི་བྱ་གཞག་ནི་ཏང་དང་མི་དམངས་ཀྱི་བྱ་གཞག་གལ་ཆེན་དང་། མཚན་ཉིད་རིག་པ་དང་སྤྱི་ཚོགས་ཚན་རིག་གི་འཐབ་ཕྱོགས་ནི་ཏང་དང་མི་དམངས་ཀྱི་འཐབ་ཕྱོགས་གལ་ཆེན་རེད། ཚོགས་འདུའི་ཐོག་གཟེངས་བསྟོད་ཐོབ་པའི་ཕུལ་བྱུང་གྲུབ་འབྲས་ཀྱི་རྩོམ་པ་པོས་མཚན་སྙན་ལ་གཅེས་སྤྲས་དང་ཡང་འབད་བསྐྱར་འབད་ཀྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་དོན་འཁྱོལ་བྱས་ཏེ། བོད་ལྗོངས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་ཞིབ་འཇུག་ཁྱབ་ཁོངས་ཀྱི་དཔེ་སྟོན་སྣེ་ཁྲིད་ཀྱི་ནུས་པ་གང་ལེགས་བཏོན་ནས། ལྗོངས་ཡོངས་ཀྱི་རྒྱ་ཆེའི་མཚན་ཉིད་རིག་པ་དང་སྤྱི་ཚོགས་ཚན་རིག་ལས་དོན་པ་དཔའ་མཛངས་རྟུལ་ཕོད་ཀྱིས་མདུན་དུ་སྐྱོད་པ་དང་། གྲུབ་འབྲས་མང་པོ་དང་བཟང་པོ་ཐོན་པར་སྣེ་ཁྲིད་བྱ་རྒྱུའི་བླང་བྱ་བཏོན། །