བོད་འབྲེལ་སྨྱན་སྦྱོར་གྱིས་བོད་འབྲེལ་ཁུལ་གྱི་གཏམ་རྒྱུད་གླེང་བ།

       ཉེ་ཆར་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན་དང་། སི་ཁྲོན་རླུང་འཕྲིན་བརྙན་འཕྲིན་ལས་ཁུངས་མི་རིགས་འཕྲིན་ལམ། མཚོ་སྔོན་རླུང་འཕྲིན་བརྙན་འཕྲིན་ལས་ཁུངས་བོད་སྐད་རླུང་འཕྲིན། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་རླུང་འཕྲིན་བརྙན་འཕྲིན་ལས་ཁུངས། ཡུན་ནན་བདེ་ཆེན་བོད་རིགས་རང་སྐྱོང་ཁུལ་རླུང་འཕྲིན་བརྙན་འཕྲིན་ལས་ཁུངས་བཅས་ཀྱིས་མཉམ་འབྲེལ་ཐོག་གཉེར་བའི་བོད་འབྲེལ་སྨྱན་སྦྱོར་གྱི་བཅར་འདྲིའི་བྱེད་སྒོ་ཆེ་གྲས་གངས་ལྗོངས་ཀྱི་རྒྱང་སྐྱོད་གསར་པ་ཞེས་པའི་བཅར་འདྲིའི་ཚོ་ཆུང་དང་པོ་སྟེ། དཀར་མཛེས་བོད་རིགས་རང་སྐྱོང་ཁུལ་དང་བདེ་ཆེན་བོད་རིགས་རང་སྐྱོང་ཁུལ་གྱི་བཅར་འདྲི་ཚོ་ཆུང་གི་བཅར་འདྲིའི་ལས་འགན་ཡིད་བཞིན་ལེགས་གྲུབ་བྱུང་ཡོད་པ་རེད།

       ཤེས་རྟོགས་བྱུང་བར་གཞིགས་ན། གོང་གསལ་གྱི་རླུང་འཕྲིན་དང་བརྙན་འཕྲིན་ལས་ཁུངས་ཁག་གི་གསར་འགོད་པ་ཉི་ཤུ་ལྷག་ཙམ་གྱིས་དུས་ཡུན་ཉིན12རིང་ལམ་ཐག་སྤྱི་ལེ3000ལྷག་བསྐྱོད་དེ་སི་ཁྲོན་དཀར་མཛེས་བོད་རིགས་རང་སྐྱོང་ཁུལ་གྱི་ཉག་ཆུ་རྫོང་དང་། ཕྱག་ཕྲེང་རྫོང་། སྡེ་རོང་རྫོང་། ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་བདེ་ཆེན་རྫོང་སོགས་ཀྱི་ཤང་དང་གྲོང་ཚོ་མང་པོར་ཟབ་སྐྱོད་ཀྱིས་ས་གནས་དེ་དག་གི་མི་རིགས་ཁག་གི་མང་ཚོགས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པའི་རྣམ་པ་གསར་པ་དང་། ཉམས་སྣང་གསར་པ། དེ་བཞིན་རྒྱང་སྐྱོད་ཀྱི་ལམ་བུ་གསར་པའི་ཐོག་མི་རིགས་ཁག་གི་མི་དམངས་ཀྱིས་མཐུན་སྒྲིལ་རྡོག་རྩ་གཅིག་སྒྲིལ་དང་ནུས་ཤུགས་ཡོད་རྒུས་ཤང་གྲོང་དར་རྒྱས་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གསར་འགྱུར་གྱི་ཁུངས་སྣེ་སྣ་ཚོགས་ལ་གཞིགས་ནས་བཅར་འདྲི་གཏིང་ཟབ་བྱས་པ་དང་། སྐད་འཕྲིན་སྤྱི་སྟེགས་ཐོག་གི་ཡིག་རིས་གསར་འགྱུར་དང་། འཁྱུག་དབྱིངས་བརྙན་སྟེགས་ཐོག་བརྙན་མཐོང་གསར་འགྱུར། སྐད་འཕྲིན་བརྙན་སྟེགས་ཐོག་གི་བརྙན་མཐོང་གསར་འགྱུར། དེ་བཞིན་རླུང་འཕྲིན་ཐོག་གི་སྒྲ་ལྡན་གསར་འགྱུར་སོགས་སྣ་མང་སྨྱན་སྦྱོར་ལམ་དང་། དབུས་སྐད་དང་། ཨམ་སྐད། ཁམས་སྐད་སོགས་བོད་སྐད་ཀྱི་ཡུལ་སྐད་ཆེན་པོ་གསུམ་གྱི་ཐོག་ནས་གསར་འགྱུར་ཁག100ལྷག་ཙམ་འགོད་སྤེལ་བྱས་ནས་སི་ཁྲོན་དང་ཡུན་ནན་གྱི་བོད་འབྲེལ་ས་ཁུལ་ཁག་གཅིག་གི་ཆབ་སྲིད་དང་། དཔལ་འབྱོར། སྤྱི་ཚོགས། རིག་གནས་སོགས་ཁྱབ་ཁོངས་མང་པོའི་གསར་འགྱུར་སྣ་ཚོགས་དང་། དེ་བཞིན་ཡུལ་ཁམས་སོ་སོའི་ཡུལ་སྲོལ་གོམས་གཤིས་དང་། རང་བྱུང་མཛེས་ལྗོངས་སོགས་གསོན་ཉམས་དོད་པོའི་ཐོག་ནས་མི་རྣམས་ཀྱི་སྤྱན་ལམ་དུ་བཤམས་པར་ས་ཕྱོགས་ཁག་གི་གསན་གཟིགས་གནང་མཁན་ཚོའི་དགའ་བསུ་ཆེན་པོ་ཐོབ།

       གཞན་ཡང་གསར་འགྱུར་འགོད་སྤེལ་བྱེད་པའི་བརྒྱུད་རིམ་ཁྲོད་ས་གནས་མི་འདྲ་བ་ནས་ཡོང་བའི་འགོད་པ་ཚོས་ཕན་ཚུན་སློབ་སྦྱོང་དང་ཉམས་མྱོང་སྤེལ་རེས་བྱས་ཤིང་། ལྷག་པར་དུ་སྨྱན་སྦྱོར་གསར་པའི་དུས་རབས་ནང་བོད་འབྲེལ་གཙོ་རྒྱུག་སྨྱན་སྦྱོར་ཚན་པ་ཁག་གིས་ཕན་ཚུན་ཉམས་མྱོང་སྤེལ་རེས་དང་། བཟང་ཆ་གསབ་རེས། ཐོན་ཁུངས་མཉམ་སྤྱོད་བཅས་བྱས་ཐོག ཏང་དང་རྒྱལ་ཁབ་ནས་སྤྲད་པའི་འཕྲིན་སྤེལ་གྱི་ལས་འགན་ཆེན་པོ་དག་ལེགས་པར་བསྒྲུབ་རྒྱུ་དང་། བོད་འབྲེལ་ས་ཁུལ་ཁག་གི་མང་ཚོགས་ལ་ཆ་འཕྲིན་གྱི་ཞབས་ཞུ་ཡག་པོ་བསྒྲུབ་རྒྱུའི་ཐད་ཐབས་ལམ་འཚོལ་ཞིབ་དང་བསམ་ཚུལ་བརྗེ་རེས་བྱས་ཡོད་པ་རེད།

       མི་རིང་བར་གངས་ལྗོངས་ཀྱི་རྒྱང་སྐྱོད་གསར་པ་ཞེས་པའི་ཆེད་དོན་བཅར་འདྲི་ཚོ་ཆུང་གཉིས་པ་དང་གསུམ་པས་ཀན་སུའུ་ཞིང་ཆེན་དང་མཚོ་སྔོན་ཞིང་ཆེན་གྱི་བོད་འབྲེལ་ཁུལ་དང་རྫོང་ཁག་ཏུ་ཟབ་འཇུག་གིས་མུ་མཐུད་བཅར་འདྲིའི་བྱེད་སྒོ་སྤེལ་རྒྱུ་ཡིན་པས་རྒྱ་ཆེའི་དྲ་གྲོགས་ལྷན་རྒྱས་ནས་འབྲེལ་ཡོད་སྨྱན་སྦྱོར་སྟེགས་བུ་ཁག་ལ་མུ་མཐུད་དོ་སྣང་ཡོད་པ་ཞུ།

       དེ་མིན་འདི་ག་ལས་ཁུངས་ཀྱི་ཐེངས་འདིའི་གངས་ལྗོངས་ཀྱི་རྒྱང་སྐྱོད་གསར་པ་ཞེས་པའི་བཅར་འདྲིའི་བྱེད་སྒོའི་ལེ་ཚན་རྒྱས་པ་ཁག་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན་གྱི་རླུང་འཕྲིན་འཕྲིན་ལམ་དང་སྨྱན་སྦྱོར་གསར་པའི་སྟེགས་བུ་ཁག་གི་ཐོག་སྤྱི་ཟླ8པའི་ཟླ་འགོ་ནས་ཟླ་མཇུག་བར་གཅིག་སྡུད་ཐོག་གཏོང་སྤེལ་བྱ་རྒྱུ་ཡིན་པས་ལྷན་རྒྱས་ནས་དོ་ཁུར་གནང་རྒྱུའི་རེ་བ་ཡོད།