ལྷ་མོའི་ཟློས་གར«ཚེ་རིང་ལྷ་མོ»ལ་བྱ་དགའ་ཆེན་པོ་ཐོབ་འདུག

       ཉིན་ཤས་གོང་། སྐབས25པའི་ཚའོ་ཡུས་ཟློས་གར་རྩོམ་རིག་བྱ་དགའི་གསར་འགྱུར་ཡོངས་བསྒྲགས་ཚོགས་འདུ་ཀོང་ཀྲོའུ་རུ་འཚོགས་ཤིང་། སྐབས་དགུ་པའི་ཀྲུང་གོའི་ཟློས་གར་བྱ་དགའ། ཚའོ་ཡུས་འཁྲབ་གཞུང་བྱ་དགའི་བྱ་དགའ་ཐོབ་པའི་བརྩམས་ཆོས་དང་མིང་འདོན་བརྩམས་ཆོས་ཀྱི་མིང་ཐོ་ཁྱབ་བསྒྲགས་བྱས་པ་རེད། དེའི་ནང་བོད་ཀྱི་ཟློས་གར་མཐུན་ཚོགས་ཀྱིས་བདམས་སྐྱེལ་བྱས་པའི་བསོད་ནམས་དགྲ་འདུལ་གྱིས་འཁྲབ་ཁྲིད་བྱས་པ་དང་། རྣམ་རྒྱལ་བསྟན་འཛིན་གྱིས་འཁྲབ་གཞུང་བརྩམས་པའི་ལྷ་མོའི་ཟློས་གར«ཚེ་རིང་ལྷ་མོ»ཞེས་པར་ཐེངས་དང་པོ་བྱ་དགའ་དེའི་མིང་འདོན་བྱ་དགའ་ཐོབ་ཡོད།

       ཚའོ་ཡུས་འཁྲབ་གཞུང་བྱ་དགའ་ནི་ཀྲུང་དབྱང་དྲིལ་བསྒྲགས་པུའུ་ཡིས་ཆོག་མཆན་སྤྲད་པ་དང་། ཀྲུང་གོ་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་དང་ཀྲུང་གོ་ཟློས་གར་མཐུན་ཚོགས་ཀྱིས་མཉམ་དུ་གཙོ་གཉེར་བྱས་པའི་རྒྱལ་ཡོངས་རང་བཞིན་གྱི་ཟློས་གར་ཆེད་ལས་ཀྱི་བྱ་དགའ་མཐོ་ཤོས་དེ་རེད། མིག་སྔར། ཀྲུང་གོའི་ཟློས་གར་ཁྱབ་ཁོངས་ནང་འཁྲབ་གཞུང་རྩོམ་མཁན་ཚོར་ཆེད་དུ་བཙུགས་པའི་རྒྱལ་ཁབ་རིམ་པའི་བྱ་དགའ་ཞིག་ཀྱང་རེད། སྐབས་འདིའི་ཚའོ་ཡུས་འཁྲབ་གཞུང་བྱ་དགའི་ཁྲོད་འཁྲབ་གཞུང20མཐའ་མའི་དཔྱད་བསྡུར་ནང་ཚུད་པ་དང་། དེའི་ཁྲོད«ཚེ་རིང་ལྷ་མོ»ཚུད་པའི་འཁྲབ་གཞུང5ལ་མིང་འདོན་བྱ་དགའ་ཐོབ་པ་རེད།

       ཤེས་རྟོགས་བྱུང་བར་གཞིགས་ན། གསར་དུ་བརྩམས་པའི་དངོས་ཡོད་བརྗོད་གཞིའི་ལྷ་མོའི་ཟློས་གར་བརྩམས་ཆོས«ཚེ་རིང་ལྷ་མོ»ཞེས་པ་དེ་ནི་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཀྲུང་གོ་གསར་པ་དབུ་བརྙེས་ནས་ལོ་ངོ70འཁོར་བ་དང་བོད་དུ་དམངས་གཙོ་བཅོས་སྒྱུར་བྱས་ནས་ལོ་ངོ60འཁོར་བར་རྟེན་འབྲེལ་ཟབ་རྒྱས་ཞུས་པའི་བརྗོད་དོན་གཙོ་བོའི་ལེགས་འབུལ་འཁྲབ་ཚན་ཞིག་རེད། འཁྲབ་ཚན་དེར་ལེའུ་བདུན་ཡོད་པ་དང་། དེའི་ནང་ཚེ་རིང་ལྷ་མོ་དང་རྒྱ་ཆེའི་ཞིང་བྲན་རྣམས་ཀྲུང་གོ་གུང་ཁྲན་ཏང་གི་དབུ་ཁྲིད་འོག་མུན་ནག་ནས་འོད་སྣང་གི་ཕྱོགས་སུ་སྐྱོད་པའི་སྐོར་བཀོད་ཡོད།

       འཁྲབ་གཞུང་དེར་སྔ་རྗེས་སུ་བོད་རང་སྐྱོང་ལྗོངས་རིག་རྩལ་གསར་རྩོམ་རོགས་སྐྱོར་རྣམ་གྲངས་དང་། རིག་གནས་ཡུལ་སྐོར་པུའི་ཏང་དབུ་བརྙེས་ནས་ལོ100འཁོར་བར་རྟེན་འབྲེལ་ཞུ་བའི་གར་སྟེགས་སྒྱུ་རྩལ་གསར་རྩོམ་རྣམ་གྲངས་ཀྱི་གཙོ་གནད་རོགས་སྐྱོར་བརྩམས་ཆོས་ཀྱི་མིང་ཐོ། རིག་གནས་ཡུལ་སྐོར་པུའི་ནུབ་རྒྱུད་དང་དེ་བཞིན་གྲངས་ཉུང་མི་རིགས་ས་ཁུལ་གྱི་གཙོ་གནད་གསར་རྩོམ་འཁྲབ་ཚན་གྱི་རིགས་གཅིག་མཁས་ཅན་གྱི་རྒྱབ་སྐྱོར་རྣམ་གྲངས་དང་སྐབས་བཅུ་བདུན་པའི་ཀྲུང་གོའི་ཟློས་གར་དུས་ཆེན་གྱི་དཔྱད་འདེམས་ནང་ཞུགས་པའི་འཁྲབ་ཚན་སོགས་གཟི་བརྗིད་མཚན་སྙན་ཐོབ་ཡོད། བྱ་དགའ་འདི་ཐོབ་པ་དེས་རྒྱལ་ཡོངས་སུ་ལྷ་མོའི་ཟློས་གར་གྱི་གསར་གཏོད་ཐོག་མའི་བརྩམས་ཆོས་མེད་པའི་ལོ་རྒྱུས་ལ་རྫོགས་ཚིག་བཀོད་ཅིང་། བོད་རང་སྐྱོང་ལྗོངས་ལྷ་མོའི་ཟློས་གར་ཚོགས་པ་བཙུགས་ནས་ལོ63འཁོར་ཚུན་གྱི་སྟོང་ཆ་བསྐངས་ཡོད།