སྟོན་འབྲས་བསྣམས་པའི་དབྱུག་རྩལ་རུ་ཁག

ཞིན་ཧེ་རྫོང་མི་རིགས་སློབ་འབྲིང་དང་པོའི་དབྱུག་རྩེད་སྤོ་ལོའི་རུ་ཁག་གིས་རྒྱལ་ཡོངས་མཚོ་འགག་ངོགས་གཉིས་ཀྱི་དབྱུག་རྩེད་སྤོ་ལོའི་འགྲན་སྡུར་ཁྲོད་ཨང་བདུན་པའི་གྲུབ་འབྲས་བླངས།
 

       སྟོན་གྱི་འབྲས་བཟང་སྨིན་པའི་དགའ་སྟོན་གྱིས་མདུན་བསུས་ཏེ“གཞོན་བཟང་ཨ་མའི་བུ་རྒོད་ཀྱིས། །མཐུན་སྒྲིལ་དཔུང་བས་འབྱུང་འགྱུར་བསུ། །”ཞེས་པ་བརྗོད་གཞི་ཡིན་པའི་རྒྱལ་སྤྱིའི་ལོ་ཆུང་གཞོན་ནུའི་དབྱུག་རྩལ་འགྲན་སྡུར་དེ་ཧྥུའུ་ཅན་ཞིང་ཆེན་ལུས་རྩལ་ར་བ་ནས་ལེགས་པར་སྤེལ། ཐེངས་འདིར་ཐའེ་ཝན་དང་། ཧྥུའུ་ཅན། ཀོང་ཏུང་། ཧུའུ་པེ། ཧོ་པེ། ཐེན་ཅིན། ཅང་སུའུ། མཚོ་སྔོན་བཅས་སྐམ་ས་ཆེན་མོའི་སྤོ་ལོ་རུ་ཁག་མི་འདྲ་བ12དང་། ཐའེ་ཝན་ས་ཁུལ་གྱི་སྤོ་ལོ་རུ་ཁག8བཅས་བསྡོམས་པའི་མི484ཐེངས་འདིའི་འགྲན་སྡུར་ལ་ཞུགས།

       ཞིན་ཧེ་རྫོང་མི་རིགས་སློབ་འབྲིང་དང་པོའི་དགེ་རྒན་བན་མ་ཚེ་རིང་དང་། དོན་འགྲུབ་རྒྱལ་གཉིས་ཀྱིས་སྣེ་ཁྲིད་པའི་དགེ་སློབ་ཉེར་ལྔ་ཡི་གྲུབ་པའི་དབྱུག་རྩལ་སྤོ་ལོ་རུ་ཁག་གིས་དུས་ཡུན་ཟླ་གཅིག་ལྷག་གི་སྦྱོང་བརྡར་གྱི་གྲུབ་འབྲས་བསྣམས་ཏེ་འགྲན་སྡུར་ལ་ཞུགས་ཤིང་། འདི་ནི་མཚོ་འཕགས་སྨི3924ལས་མཐོ་བའི་མཚོ་སྔོན་གྱི་འགྲན་ཞུགས་རུ་ཁག་གཅིག་པུ་དང་། གྲངས་ཉུང་མི་རིགས་ཀྱི་འགྲན་ཞུགས་རུ་ཁག་ཁོ་ནར་གྱུར།

       སློབ་བུ་ཚོས་གཞོན་པའི་སྟོབས་ཀྱི་ཆོད་སེམས་སྙིང་ལ་བཅངས་ཏེ། མཛའ་བརྩེ་དང་པོ་དང་འགྲན་སྡུར་གཉིས་པའི་རྩ་དོན་དང་། འགྲན་སྡུར་འདི་རྒྱལ་ཕམ་གྱི་དོན་ཙམ་མ་ཡིན་པར་སྔར་མེད་ཀྱི་སློབ་སྦྱོང་ཐེངས་ཤིག་དང་། ན་མཉམ་མང་པོ་ཞིག་དང་མཉམ་དུ་སེམས་དཔངས་བསྟོད་པའི་གོ་སྐབས་ཤིག་ཏུ་བསྒོམས་ཏེ་སློབ་ར་ལས་བརྒལ་བའི་སློབ་སྦྱོང་ཐེངས་གཅིག་ཡིན་པའི་བསམ་འདུན་གྱིས་འགྲན་སྡུར་ལ་ཞུགས་ཤིང་། མཇུག་མཐར་ཨང་བདུན་པའི་གྲུབ་འབྲས་དང་། U15ལུས་རྩལ་ཀུན་སྤྱོད་དར་སྲོལ་གྱི་བྱ་དགའ་གཉིས་ཐོབ་པ་འདི་ཡང་སློབ་གྲྭ་ཞིག་དང་ས་གནས་ཤིག་གི་གཟི་བརྗིད་ཀྱི་དཔང་རྟགས་ཤིག་ཏུ་བསྒྲེངས་ཆོག་ལ། ཞིན་ཧེ་རྫོང་མི་རིགས་སློབ་འབྲིང་དང་པོའི་དབྱུག་རྩལ་རུ་ཁག་རྒྱལ་སྤྱིའི་གར་སྟེགས་སུ་འབུད་པའི་ཐོག་མའི་དབུ་ཁྱུད་ཀྱང་དངོས་སུ་བྲིས་པ་ཡིན་ནོ། །