གཞས་པ་སངས་རྒྱས་ཚེ་རིང་ལ་མཚན་སྙན་འདི་འདྲ་ཞིག་ཐོབ།

       རོལ་དབྱངས་ཕན་ཚུན་སློབ་སྦྱོང་དང་ཕན་ཚུན་དཔྱད་གཞིར་འཛིན་པ། ཐུན་མོང་འཕེལ་རྒྱས་ཀྱི་ལས་སྟེགས་བསྐྲུན་ནས་ཨེ་ཤེ་ཡའི་རོལ་དབྱངས་པའི་གསར་གཏོད་ཀྱི་གསོན་ཤུགས་འཕེལ་བར་བྱ་ཆེད། ཟླ11པའི་ཚེས20ཉིན། 2023ལོའི་ཨེ་ཤེ་ཡའི་དར་ཁྱབ་ཆེ་བའི་རོལ་དབྱངས་ཕྱོགས་བསྡུས་སྒྱུ་རྩལ་འགྲེམས་ཚོགས་སི་ཁྲོན་ཁྲིན་ཏུའུ་རུ་འཚོགས་པ་དང་། རྨ་ལྷོ་ཁུལ་གཅན་ཚ་རྫོང་གི་ན་གཞོན་གཞས་པ་སངས་རྒྱས་ཚེ་རིང་ལ“ལོ་འཁོར་མོའི་སྙན་པ་གྲགས་པའི་གཞས་པའི་བྱ་དགའ”ཐོབ།

       སངས་རྒྱས་ཚེ་རིང་། བོད་རིགས། གཅན་ཚ་གླེ་གཞུག་སྡེ་བའི་མི་ཡིན། མཚོ་སྔོན་མི་རིགས་སློབ་ཆེན་ནས་སློབ་མཐར་ཕྱིན་ལ། 2012ལོར་མཚོ་སྔོན་མི་རིགས་སློབ་ཆེན་གྱི་སློབ་རའི་ཕུལ་བྱུང་གཞས་པ་བཅུའི་འགྲན་བསྡུར་ཁྲོད་ཨང་དང་པོ་ཐོབ། «ཚེ་སྲོག་གི་འབོད་སྐུལ»དང«བདེ་སྐྱིད་གྲོང་ཚོ» «སེམས་ཀྱི་མི» «ཀ་དག་གཞིས་ཀ» «གཡང་མདའ» «ཕ་ཡུལ་གཅན་ཚ»སོགས་འགྲེམས་སྤེལ་བྱས་ལ། 2021ལོར་པེ་ཅིང་དེང་རབས་རོལ་དབྱངས་སློབ་གླིང་གི་གླུ་གཞས་འགྲན་བསྡུར་ཁྲོད་ཨང་དང་པོ་ཐོབ་པ་དང་། 2022ལོར་ཧའེ་ནན་གླིང་ཕྲན་གྱི་རྒྱལ་སྤྱིའི་གློག་བརྙན་དུས་ཆེན་སྐབས་བཞི་པའི་རོལ་དབྱངས་སྡེ་ཁག་ཁྲོད“ལོ་འཁོར་མོའི་རེ་བ་ཆེ་ཤོས་ཀྱི་གཞས་པའི་མཚན་སྙན”ཐོབ་ཅིང་། ལོ་དེར་ཁམས་པའི་བརྙན་འཕྲིན་ཁང་དུ་མི་སྒེར་གྱི་ཆེད་སྒྲིག་ཡོངས་བསྒྲགས་ཚོགས་འདུ་འཚོགས་ལ། 2023ལོར་ཀྲུང་གོའི་ཧྲེན་ཀྲེན་གྱི་རོལ་དབྱངས་གསར་པའི་ཁྲོད«སེམས་ཀྱི་མི»ཞེས་པར“ལོ་འཁོར་མོའི་ཀུན་གྱིས་དོ་སྣང་བྱེད་པའི་གླུ་གཞས་རྐྱང་པའི་བྱ་དགའ”ཐོབ་པ་དང་། ལོ་དེར་ཨ་མདོ་བརྙན་འཕྲིན་ལས“གངས་རིའི་སྐར་རྒྱན”མི་སྒེར་གྱི་གླུ་གཞས་དགོང་ཚོགས་འཚོགས།

       རོལ་དབྱངས་ཕྱོགས་བསྡུས་སྒྱུ་རྩལ་འགྲེམས་ཚོགས་ཐོག་སངས་རྒྱས་ཚེ་རིང་གིས“ཡིད་འོང་གཅན་ཚ”ཞེས་པའི་གླུ་དབྱངས་བླངས་པ་དང་། ཁོའི་དམིགས་བསལ་གྱི་འགྱུར་ཁུག་ལ་བརྟེན་ནས་ལྟད་མོ་བའི་ཡིད་དབང་རབ་ཏུ་བཀུག་ཅིང་། ཡུལ་དངོས་ཀྱི་རྣམ་པར་འདུ་འཛིའི་ཡོ་ལང་རྣམ་པར་རྒྱས། མ་འོངས་པར་གཅན་ཚའི་ན་གཞོན་གཞས་པ་སངས་རྒྱས་ཚེ་རིང་གི་གླུ་གཞས་སྒྱུ་རྩལ་གྱི་ལམ་ཁ་སྔར་ལས་ཡངས་པར་ཤོག