བོད་ལྗོངས་སློབ་ཆེན་གྱི་དགེ་རྒན་ཉི་མ་བཀྲ་ཤིས་ཀྲུང་གོ་བཟོ་སྐྲུན་ཁང་གི་ཡོའན་ཧྲིར་བདམས་འདུག

       ཟླ11པའི་ཚེས22ཉིན། ཀྲུང་གོ་བཟོ་སྐྲུན་ཁང་གི་དྲ་ཚིགས་ཐོག་སྤྱི་བསྒྲགས་སྤེལ་ནས། ཀྲུང་གོ་བཟོ་སྐྲུན་ཁང་གི2023ལོའི་གསར་སྣོན་ཡོའན་ཧྲིའི་མིང་ཐོ་ཁྱབ་བསྒྲགས་བྱས་པ་དང་། དེའི་ནང་བོད་ལྗོངས་སློབ་ཆེན་གྱི་དགེ་རྒན་ཉི་མ་བཀྲ་ཤིས་ཀྲུང་གོ་བཟོ་སྐྲུན་ཁང་གི་ཡོའན་ཧྲིར་བདམས་ཐོན་བྱུང་ཡོད།

       ཉི་མ་བཀྲ་ཤིས། འབུམ་རམས་པ། དགེ་རྒན་ཆེ་མོ་བ། འབུམ་རམས་པའི་སློབ་དཔོན། རང་རྒྱལ་གྱི་བོད་ཡིག་ཆ་འཕྲིན་མ་ལག་ཁྱབ་ཁོངས་ཀྱི་རིག་གཞུང་སྣེ་ཁྲིད་པ་དང་། བོད་ཡིག་རིག་ནུས་ཆ་འཕྲིན་ཐག་གཅོད་དང་བེད་སྤྱོད་རྒྱལ་ཁབ་གཙོ་གནད་ཚོད་ལྟ་ཁང་གི་ཀྲུའུ་རེན་གཞོན་པ། བོད་ཡིག་ཆ་འཕྲིན་ལག་རྩལ་སློབ་གསོ་པུའི་ལས་གྲྭ་ཞིབ་འཇུག་ལྟེ་གནས་ཀྱི་ཀྲུའུ་རེན་བཅས་ཡིན། 1988ལོར་བོད་ལྗོངས་སློབ་ཆེན་དུ་ལས་ཞུགས་བྱས་ནས་རྩིས་འཁོར་དང་བོད་ཡིག་ཆ་འཕྲིན་མ་ལག་གི་ལག་རྩལ་ཞིབ་འཇུག་དང་ལས་གྲྭའི་ཐད་ཕྱག་ལས་གནང་ནས་ལོ35འགོར་ཡོད། རྩིས་འཁོར་གྱི་བོད་ཡིག་ཨང་སྒྲིག་གི་རིགས་པའི་གཞུང་ལུགས་བྱ་ཐབས་དང་། བོད་ཡིག་ཨང་སྒྲིག་གི་ཚད་གཞིར་གཞིགས་པའི་ཆ་འཕྲིན་ཐག་གཅོད་དང་། བཀོལ་སྤྱོད་མ་ལག་གི་བོད་ཡིག་ཐག་གཅོད་ལག་རྩལ་བྱ་ཐབས། བོད་ཡིག་རྩིས་རྒྱག་སྐད་བརྡ་རིག་པའི་རིགས་པའི་གཞུང་ལུགས་བྱ་ཐབས། བོད་ཡིག་གི་གནའ་གཞུང་དང་ཚད་ལྡན་ཡིག་ཆ་གྲངས་འཛིན་ཅན་དུ་འགྱུར་བའི་ལག་རྩལ་སོགས་ཀྱི་ཁྱབ་ཁོངས་སུ་མ་ལག་རང་བཞིན་གྱི་གྲུབ་འབྲས་རབ་དང་རིམ་པ་ཐོབ་ཡོད་ཅིང་། རང་རྒྱལ་གྱི་བོད་ལྗོངས་དང་བོད་འབྲེལ་ཁུལ་དང་རྫོང་གི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཁྲོད་ཀྱི་ཆ་འཕྲིན་ཅན་གྱི་དགོས་མཁོ་གལ་ཆེན་སྐོང་བ་དང་། རྒྱལ་ཁབ་ཀྱི་སྐད་ཡིག་ཆ་འཕྲིན་མ་ལག་གི་ལག་རྩལ་ཡར་ཐོན་ལ་སྐུལ་འདེད་གཏོང་ཆེད་ལེགས་སྐྱེས་མངོན་གསལ་དོད་པོ་ཕུལ་ཡོད།

       ཁོང་ལ་སྔ་རྗེས་སུ་རྒྱལ་ཁབ་ཚན་རྩལ་ཡར་ཐོན་གྱི་བྱ་དགའ་ཨང་གཉིས་པ་དང་། རྒྱལ་ཡོངས་ཀྱི་གསར་གཏོད་དང་སྔོན་ཐོན་བརྩོན་ལེན་གྱི་གཟེངས་བསྟོད་ལག་ཁྱེར། བོད་རང་སྐྱོང་ལྗོངས་ཚན་རིག་ལག་རྩལ་གྱི་ཕུལ་བྱུང་ལེགས་སྐྱེས་བྱ་དགའ། ཧོ་ལིའང་ཧོ་ལི་ཐེབས་རྩའི་ཚན་རིག་དང་ལག་རྩལ་གསར་གཏོད་ཀྱི་བྱ་དགའ། ཀྲུང་གོའི་ཚད་ལྡན་གསར་གཏོད་ ལེགས་སྐྱེས་བྱ་དགའ་ཨང་དང་པོ། བོད་རང་སྐྱོང་ལྗོངས་ཀྱི་ཚན་རིག་ལག་རྩལ་བྱ་དགའི་བྱ་དགའ་ཨང་དང་པོ3དང་བྱ་དགའ་ཨང་གཉིས་པ2 བོད་རང་སྐྱོང་ལྗོངས་ཀྱི་སྐབས་དང་པོའི་གཞོན་ནུའི་ཚན་རྩལ་བྱ་དགའ་བཅས་ཐོབ་པ་དང་། རྒྱལ་ཁབ་མི་དོན་པུའུ་ཡི་བྱས་རྗེས་རིམ་པ་དང་པོ་ཐོབ་ཡོད། གཞན་ད་དུང་སྔ་རྗེས་སུ་རྒྱལ་ཡོངས་ཀྱི་ཕུལ་བྱུང་དགེ་རྒན་དང་། སློབ་གསོ་པུའུ་ཡི་སྐབས་དང་པོའི་ན་གཞོན་དགེ་རྒན་གྱི་བྱ་དགའ། པའོ་ཀང་སློབ་གསོའི་བྱ་དགའ་དང་ཕུལ་བྱུང་དགེ་རྒན་གྱི་དམིགས་བསལ་བྱ་དགའ། རྒྱལ་ཡོངས་ཀྱི་ཕུལ་བྱུང་ཆེད་ལས་ལག་རྩལ་ཤེས་ལྡན་མི་སྣ། རྒྱལ་ཡོངས་ཀྱི་ལྔ་གཅིག་ངལ་རྩོལ་གཟེངས་རྟགས་སོགས་གཟི་བརྗིད་མཚན་སྙན་མང་པོ་ཐོབ་ཡོད།