མཚོ་ལྷོའི་མཐོ་འབྲིང་འདི་ནུབ་བྱང་མི་རིགས་སློབ་ཆེན་གྱི་ཕུལ་བྱུང་སློབ་མའི་ཐོན་ཁུངས་གཙོ་གྲས་སུ་བདམས་འདུག

       ཉེ་ཆར། ནུབ་བྱང་མི་རིགས་སློབ་ཆེན་གྱིས་ཕུལ་བྱུང་སློབ་མའི་ཐོན་ཁུངས་ཀྱི་རྟེན་གཞི་འཛུགས་སྐྲུན་སྐོར་གྱི་བགྲོ་གླེང་ཚོགས་འདུ་བསྡུས། བགྲོ་གླེང་ཚོགས་འདུ་འདི་ནི་ནུབ་བྱང་མི་རིགས་སློབ་གྲྭ་ཆེན་མོ་བཙུགས་ཚུན་དུ་སློབ་མའི་ཐོན་ཁུངས་འཕེལ་རྒྱས་དང་མཐོར་འདེགས་ཐད་ཆེད་དམིགས་ཀྱིས་བསྡུས་པའི་བགྲོ་གླེང་ཚོགས་འདུ་ཐེངས་དང་པོ་ཡིན་པས་ཧ་ཅང་གཙིགས་ཆེན་དང་གཟབ་རྒྱས་ངང་སྤེལ། ཐེངས་འདིར་ནུབ་བྱང་མི་རིགས་སློབ་ཆེན་གྱི་སློབ་བསྡུ་ཁང་གིས་ལོ་རེའི་སློབ་བསྡུའི་གནས་ཚུལ་ཏེ། སློབ་བསྡུའི་མི་གྲངས་དང་སློབ་མའི་ཕྱོགས་ཡོངས་ཀྱི་ཆུ་ཚད་བཅས་ལ་དཔྱད་བསྡུར་བྱས་ནས། རྒྱལ་ཡོངས་ཀྱི་མཐོ་འབྲིང་བཅུ་བདམས་ཏེ་བགྲོ་གླེང་ཚོགས་འདུ་བསྡུས་ཤིང་། དེའི་ཁྲོད་ཀྱི་སློབ་གྲྭ་བཞི་ལ་ཕུལ་བྱུང་སློབ་མའི་ཐོན་ཁུངས་ཀྱི་རྟེན་གཞིའི་མཚན་བྱང་གནང་། དགའ་འོས་པ་ཞིག་ལ་མཚོ་ལྷོ་བོད་རིགས་རང་སྐྱོང་ཁུལ་མི་རིགས་མཐོ་རིམ་སློབ་འབྲིང་དང་པོ་ལའང་ཕུལ་བྱུང་སློབ་མའི་ཐོན་ཁུངས་ཀྱི་རྟེན་གཞིའི་མཚན་བྱང་བསྩལ་ཅིང་། འདི་ནི་ཐེངས་འདིའི་ཕུལ་བྱུང་སློབ་མའི་ཐོན་ཁུངས་ཀྱི་གྲས་སུ་ཚུད་པའི་བོད་ཀྱི་མཐོ་འབྲིང་གཅིག་པུར་ཆགས་ཡོད།

       མཚོ་ལྷོ་བོད་རིགས་རང་སྐྱོང་ཁུལ་མི་རིགས་མཐོ་རིམ་སློབ་འབྲིང་དང་པོ་ལ་འདི་ལྟའི་ངོམ་དུ་རུང་བའི་གཟིགས་བཟོས་དང་མཚན་སྙན་ཐོབ་པ་ནི་གཅིག་ཏུ་ན་གོང་རིམ་འབྲེལ་ཡོད་དབུ་ཁྲིད་ཀྱི་ཐུགས་ཁུར་དང་རྒྱབ་སྐྱོར་དང་འབྲལ་ཐབས་མེད་ལ། གཉིས་སུ་ན་སློབ་གྲྭའི་དབུ་ཁྲིད་དང་དགེ་སློབ་རབ་དང་རིམ་པའི་དཀའ་བ་གདོང་བསུ་ཡི་སྙིང་སྟོབས་དང་། ཞུམ་མེད་འབད་བརྩོན་གྱི་གཤིས་སྤྱོད་འབའ་ཞིག་གིས་བསྐྲུན་པ་ཡིན། ལོ་རེའི་མཐོ་རྒྱུགས་ཀྱི་འཕྲོད་ཚད་ཀྱང་མཚོ་སྔོན་ཞིང་ཆེན་སྤྱིའི་མི་རིགས་སློབ་གྲྭའི་སློབ་བསྡུའི་མི་གྲངས་ཀྱི་གསུམ་ཆའི་གཅིག་ཡན་ཟིན་པས་མཚོ་སྔོན་ཞིང་ཆེན་གྱི་མི་རིགས་མཐོ་འབྲིང་ཐམས་ཅད་ལས་སྐད་གྲགས་ཆེ་ཞིང་གྲུབ་འབྲས་གཟེངས་སུ་ཐོན་པར་གྱུར་ལ། ཞིང་ཆེན་གྱི་རྩིས་ཚན་དང་རིག་ཚན་གཉིས་ཀའི་རྒྱུགས་འབྲས་ཨང་དང་པོ་ལོན་པའི་སློབ་མ་མང་དུ་བྱུང་ཞིང་། སྔ་ཕྱིར་རྒྱལ་ཡོངས་ཀྱི་སློབ་གསོའི་སྡེ་ཁག་གི་སྔོན་ཐོན་སློབ་གྲྭ་དང་རྒྱལ་ཡོངས་ཀྱི་དཔལ་ཡོན་ལྡན་པའི་སློབ་གྲྭ་བཅས་ཀྱིས་མཚོན་པའི་རྒྱལ་ཁབ་རིམ་པའི་བྱ་དགའ་ཉེར་གསུམ་དང་། ཞིང་ཆེན་རིམ་པའི་བྱ་དགའ་ཞེ་ལྔ། ཁུལ་རིམ་པའི་བྱ་དགའ་ང་བརྒྱད་བཅས་ཀྱི་གཟེངས་རྟགས་ཀྱང་བླངས་ཡོད།

       དེ་བཞིན་ཐེངས་འདིའི་ཕུལ་བྱུང་སློབ་མའི་ཐོན་ཁུངས་ཀྱི་རྟེན་གཞི་འཛུགས་སྒྲུབ་དང་འབྲེལ་ཏེ། ཕུལ་བྱུང་སློབ་ཆེན་གྱི་སློབ་སྒྲུབ་མིག་རྒྱང་དང་བསླབ་ཁག་སོ་སོའི་ཆེད་མཁས་ཀྱི་མཛུབ་སྟོན། དེ་བཞིན་ཕུལ་བྱུང་སློབ་མའི་དངོས་སྦྱོང་གི་རྒྱབ་དཔུང་བཅས་ལ་བརྟེན་ནས་མཐོ་རྒྱུགས་བཅོས་སྒྱུར་གྱི་གོ་རིམ་དུ་ཐེམ་པ་སྔ་བརྒལ་བྱ་ཆེད། སློབ་གྲྭའི་ཚོགས་ཞུགས་འཐུས་མི་གཉིས་ནས་ཀྱང་ནུབ་བྱང་མི་རིགས་སློབ་ཆེན་གྱི་འབྲེལ་ཡོད་འགོ་ཁྲིད་ཁག་ལ་མཐོ་འབྲིང་སློབ་མའི་སློབ་གཉེར་དང་ལས་རིགས་འཆར་འགོད་སྐོར་གྱི་མཛུབ་སྟོན་བྱ་བ། ཆེད་ལས་ཁག་གི་ཕུལ་བྱུང་སློབ་མའི་དངོས་སྦྱོང་སློབ་མ་ཆེད་མངགས་ཀྱིས་དཔུང་རོགས་བྱ་བ། དེ་བཞིན་ནུབ་བྱང་མི་རིགས་སློབ་ཆེན་གྱི་ཚོད་ལྟའི་འཛིན་གྲྭ་འཛུགས་སྒྲུབ་བྱ་བ་ལ་སོགས་པའི་གྲོས་འཆར་བགྲོ་གླེང་མཛད་དེ་གྲོས་ཆིངས་བཀོད་ཅིང་། འདིས་སློབ་གྲྭ་གཉིས་ཀྱི་འབྲེལ་འདྲིས་སྔར་ལས་གཏིང་ཟབ་ཏུ་གཏང་བར་རྨང་གཞི་བཟང་བོ་བཏིང་བ་ལ། མི་རིགས་སློབ་གསོའི་ཁུར་ཆེན་དང་དུ་བླངས་པའི་ཀ་ཆེན་ལྟ་བུའི་སློབ་གྲྭ་འདི་གའི་མ་འོངས་པའང་རེ་བ་དང་ཡིད་ཆེས་ཀྱིས་བརྟས་ཡོད་པ་རྟོགས་ནུས་སོ། །