གནའ་དེང་ཟུང་འབྲེལ་བྱས་པའི་བུད་མེད་རི་མོ་བ། ཁ་གྱའི་ཀུ་ལ་ཡག

        རི་མོ་བ། ཀརྨ་སྒར་བྲིས་ལུགས་ཀྱི་རྒྱུད་འཛིན་པ། ༡༩༩༦ལོར་མཚོ་སྔོན་ཞིང་ཆེན་མཚོ་ལྷོ་ཁུལ་མང་རྗོང་ཁ་གྱ་སྡེ་བར་སྐྱེས་པ་དང་། མོ་རང་ཆུང་དུས་ནས་རི་མོ་འབྲི་རྒྱུར་ཧ་ཅང་དགའ་བས། སློབ་གྲྭ་ཆུང་འབྲིང་འགྲིམས་ཞོར་དུ་རི་མོའི་རིགས་སྣ་ཚོགས་བྲིས་ཏེ་སྔ་ཕྱིར༼ཀྲུང་གོ་བོད་ཀྱི་དྲ་བ༽དང༼གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བ༽བོད་ཀྱི་རི་མོའི་ལོ་དེབ་ཐོག་མ༼མེ་ལོང༽དུས་དེབ་དང༼མང་རྫོང་སློབ་གསོ༽དུས་དེབ་དང་ཚགས་པར་སོགས་སུ་བརྩམས་ཆོས་མང་བོ་བཀོད་མྱོང་། ༢༠༡༡ལོར་མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་རི་མོ་ཆེད་སྦྱོང་འཛིན་གྲྭར་ཞུགས་ཏེ་སློབ་མཐར་ཕྱིན་པ་དང་། ༢༠༡༣ལོ་ནས་ཁ་ན་ཏའི་རི་མོ་བ་གྲགས་ཅན་བསྟན་འཛིན་སྒྲོལ་མའི་དྲུང་དུ་བགྲང་བྱ་ལྔའི་དུས་ཡུན་ནང་ནུབ་ལུགས་དངོས་བྲིས་རི་མོ་གཙོས་རི་མོའི་རིགས་སྣ་ཚོགས་ལ་སྦྱངས་ཏེ༢༠༡༨ལོར་སློབ་མཐར་ཕྱིན། ༢༠༡༩ལོར་ལྷ་ས་གྲོང་ཁྱེར་དུ་བོད་ཀྱི་ལྷ་རིས་པ་གྲགས་ཅན་དགེ་རྒན་ཆེན་མོ་ཀ་ཤོད་བསྟན་དགའ་ལགས་ཀྱི་དྲུང་དུ་ཀརྨ་སྒར་བྲིས་ལུགས་ཀྱི་ཐང་ག་འབྲི་སྦྱོང་གི་ལས་ཞུགས་ཏེ་སློབ་གཉེར་བྱས། ༢༠༡༩ལོའི་ལོ་མཇུག་ལ་ཟི་ལིང་མཚོ་བོད་མི་རིགས་ཚོང་རྭར་གཟུགས་འདུས་སྒྱུ་རྩལ་ལས་ཤག་བཙུགས། ༢༠༢༡ལོའི་ཟླ༥བརUniversity of Virginiaཨ་རིའི་ཧྥོར་ཅི་ནས་ཡ་སློབ་ཆེན་གྱི་རྒྱལ་སྤྱིའི་ལས་སྒོ་གསར་སྤེལ་རྣམ་གྲངས་ལ་ཞུགས། ༢༠༢༡ལོའི་ཟླ་༡༠བར་ངེད་གཟུགས་འདུས་སྒྱུ་རྩལ་ལས་ཤག་གིས་བོད་ལྗོངས་ལྷ་སར་ནུབ་ལུགས་དངོས་བྲིས་རི་མོའི་འགྲེམ་སྟོན་བྱས།
        སྔ་ཕྱིར་སློབ་ཞོར་དུ་ཟི་ལིང་དང་བླ་བྲང་སོགས་སུ་ཁོ་མོའི་དགེ་རྒན་དང་ལྷན་དུ་ལོ་རེར་རི་མོའི་གསོ་སྦྱོང་འཛིན་གྲྭ་བསྒྲུབས་པར་མ་ཟད། པེ་ཅིན་དང་ཟི་ལིང་གྲོང་ཁྱེར་སོགས་སུ་སྒྱུ་རྩལ་བརྩམས་ཆོས་སྐོར་གྱི་གསོ་སྦྱོང་འཛིན་གྲྭར་ཞུགས་མྱོང་བ་དང་ཁྱིམ་ཞུས་དགེ་རྒན་དུ་ཕྱིན་པ། ཕ་ཡུལ་དུ་རི་མོ་གསོ་སྦྱོང་འཛིན་གྲྭ་སྒྲུབ་པ། འཕྲོད་བསྟེན་རྒྱུན་ཤེས་ཁྱབ་བསྒྲགས་བྱེད་པ་སོགས་ཀྱི་ལས་ཀ་གཉེར་ཏེ་སྤྱི་ཚོགས་ཀྱི་ལས་སྒོ་སོ་སོ་ནས་སློབ་སྦྱོང་མང་དུ་གནང་མྱོང་། འདྲ་པར་མཁོ་སྤྲོད་པ། ཀུ་ལ་ཡག
བཅར་འདྲི་མཁན། ཕུར་སྲུང་སྐྱབས།
རྩོམ་སྒྲིག་པ། ཕུར་སྲུང་སྐྱབས།

སློབ་སྦྱོང་གི་བརྒྱུད་རིམ།
        སློབ་གྲྭ་ཆུང་འབྲིང་འགྲིམས་རྗེས༢༠༡༡ལོར་མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའི་རི་མོ་ཆེད་སྦྱོང་འཛིན་གྲྭར་ཞུགས་ཏེ་སློབ་མཐར་ཕྱིན་པ་དང་། ༢༠༡༣ལོ་ནས་ཁ་ན་ཏའི་རི་མོ་བ་གྲགས་ཅན་དགེ་རྒན་བསྟན་འཛིན་སྒྲོལ་མའི་དྲུང་དུ་བགྲང་བྱ་ལྔའི་དུས་ཡུན་ནང་ནུབ་ལུགས་དངོས་བྲིས་རི་མོ་གཙོས་རི་མོའི་རིགས་སྣ་ཚོགས་དང་ནུབ་ལུགས་རི་མོའི་ལོ་རྒྱུས། དབྱིན་ཡིག་བཅས་ལ་སྦྱངས་ཏེ༢༠༡༨ལོར་སློབ་མཐར་ཕྱིན། ༢༠༡༩ལོར་ལྷ་ས་གྲོང་ཁྱེར་དུ་བོད་ཀྱི་ལྷ་རིས་པ་གྲགས་ཅན་དགེ་རྒན་ཆེན་མོ་ཀ་ཤོད་བསྟན་དགའ་ལགས་ཀྱི་དྲུང་དུ་ཀརྨ་སྒར་བྲིས་ལུགས་ཀྱི་ཐང་ག་འབྲི་སྦྱོང་གི་ལས་ཞུགས་ཏེ་སློབ་གཉེར་བྱས།         རི་མོ་འབྲི་སྦྱོང་བྱེད་དུས་འཕྲད་པའི་དཀའ་ཁག་གཙོ་བོ་དུས་ཚོད་དང་ནུས་ཤུགས་གང་ཡོད་བཏོན་ནས་བྲིས་པའི་རི་མོས་རང་གི་ཡིད་མི་ཚིམས་པ་དེ་དང་། རི་མོ་འབྲི་སྦྱོང་གི་གོ་རིམ་ཁྲོད་ཆེས་བརྗེད་ཐབས་བྲལ་བ་ནི། ཕ་མ་གཉིས་གཙོས་ནང་མའི་རྒྱབ་སྐྱོར་གནང་བ་དེ་ཡིན། འབྲོག་ཁུལ་ལ་མཚོན་ན་རི་མོ་འབྲི་བྱེད་གྱི་རྒྱུ་ཆ་ཉོ་རྒྱུ་ནི་ཅུང་དཀོན་པོ་ཞིག་ཡིན་ཡང་། ཨ་ཕས་ང་ལ་དུས་རྒྱུན་ཚོན་སྨྱུག་ཧ་ཅང་མང་བོ་ཉོས་ཡོད་སྟབས་སློབ་ཆུང་དུས་ཀྱི་རི་མོའི་སློབ་ཁྲིད་སྐབས་སློབ་གྲོགས་མང་པོས་ང་ལ་ཚོན་སྨྱུག་གཡར་བའི་རྣམ་པ་དེ་འང་བརྗེད་མི་སྲིད་ལ། རང་གི་བརྩམས་ཆོས་ཞིག་ཐོག་མར༼མེ་ལོང༽དུས་དེབ་སྟེང་བཀོད་པའི་དགའ་ཚོར་དེའང་རྟག་ཏུ་དྲན་གྱིན་འདུག
ཟི་ལིང་དུ་མཚོ་བོད་མི་རིགས་ཚོང་རར་གཟུགས་འདུས་སྒྱུ་རྩལ་ལས་ཤག་འཛུགས་པའི་དམིགས་ཡུལ་དང་འཛུགས་དུས་ཀྱི་དཀའ་ངལ།
        ངས་ཟི་ལིང་གྲོང་ཁྱེར་བདམས་ནས་གཟུགས་འདུས་སྒྱུ་རྩལ་ལས་ཤག་བཙུགས་པའི་དམིགས་ཡུལ་གཙོ་བོ་ནི། རང་གི་དགའ་ཕྱོགས་རྒྱུན་བསྐྱངས་ནས་ལོ་མང་བོར་བྲིས་པའི་ཆེད་ལས་རང་བཞིན་གྱི་རི་མོ་སྣ་ཚོགས་ཕྱིར་འཚོང་བྱས་ཏེ་འཛད་སྤྱོད་པའི་དགོས་མཁོ་སྐོང་རྒྱུ་དང་། རང་གི་ལས་རིགས་དང་ཁ་མ་བྲལ་བའི་སྒོ་ནས་འཚོ་གནས་ལ་རེ་བ་རྒྱབ་པ་ཙམ་ཡིན། སྐབས་དེ་དུས་ཀྱི་དཀའ་ཁག་གཙོ་བོ་ནི། རང་ཉིད་ལ་ཆིག་ཐུབ་ཀྱི་མ་རྩ་ཅི་ཡང་མེད་པར་ཡང་བསྐྱར་ཕ་མ་དང་ཡུལ་མི་ཉེ་འབྲེལ་དག་གི་རྒྱབ་སྐྱོར་ལ་བསྟེན་ནས་བཙུགས་པ་དེའོ། །         སློབ་སྦྱོང་གི་ཉམས་མྱོང་ཁྲོད་གསར་རྩོམ་ལ་ཐེབས་པའི་ཤུགས་རྐྱེན་ནི། ངས་བོད་རང་གི་སྲོལ་རྒྱུན་རི་མོ་དང་ནུབ་ལུགས་དངོས་བྲིས་རི་མོ་གཉིས་ལ་སྦྱངས་པ་བྱས་རྐྱེན། གསར་རྩོམ་རི་མོ་ལ་ལུགས་གཉིས་ཟུང་འབྲེལ་གྱི་རྣམ་པ་དང་ནུབ་ཕྱོགས་ཀྱི་བསམ་བློའི་ཤུགས་རྐྱེན་ཐེབས་ཡོད།
        བོད་ཀྱི་སྲོལ་རྒྱུན་རི་མོའི་ཐེབས་པའི་ཤུགས་རྐྱེན་ནི། གཙོ་ཆེར་འབྲི་ཐབས་ལ་ཞིབ་ཚགས་ཆེ་བ། བརྗོད་བྱའི་གནད་ལ་བསམ་བློ་གཏོང་བ། ནང་དོན་ལ་ཆོས་ལུགས་ཀྱི་མཚོན་ཐབས་དང་འགྲེལ་ཤུགས་ཆེ་བ་བཅས་སོ། །
ཁྱེད་ཀྱིས་ཐོག་མར་བོད་རང་གི་སྲོལ་རྒྱུན་ཐང་ག་འབྲི་སྦྱོང་བྱས་པ་ཡིན་ནམ། ཡང་ན་སྣུམ་ཚོན་རི་མོ་དང་ནུབ་ལུགས་རི་མོ་འབྲི་སྦྱོང་བྱས་པ་ཡིན།         ངའི་བརྩམས་ཆོས་ལ་རི་མོ་བ་གཞན་དག་གི་ཐེབས་པའི་ཤུགས་རྐྱེན་ནི་གཙོ་ཆེར་དགེ་རྒན་དག་གི་ཤུགས་རྐྱེན་ཐེབས་པ་མང་ཤོས་དང་བག་ཆགས་ཟབ་ཤོས་ཡིན་ལ། དེ་དག་ལས་གཞན་ཧྥ་རན་སིའི་རི་མོ་བ་གྲགས་ཅན་གནའ་གཞུང་རིང་ལུགས་གསར་པའི་རི་མོའི་གྲུབ་མཐའི་རྨང་འདིང་མཁན་ཏ་ཝེ་སྒྲུDavidཡིན་ལ་གཙོ་བོ་ཁོང་གིས་རི་མོ་སྒྱུ་རྩལ་བེད་སྤྱོད་བྱེད་སྟངས་ཀྱིས་དོན་དངོས་མང་ཚོགས་ཀྱི་འཚོ་བར་འགན་ཁུར་ཡོད་པས་ཡིན།
རང་ཉིད་ཀྱི་རི་མོའི་ཐུན་མོང་མ་ཡིན་པའི་ཁྱད་ཆོས།         རང་གི་བསམ་ཚུལ་ལ་རི་མོ་བ་ཞིག་ཡིན་ན་གཙོ་བོ་ལག་ཤེས་ཁོ་ན་མ་ཡིན་པར་ཤེས་བྱ་སྣ་མང་ཤེས་པ། སྤྱི་ཚོགས་འཚོ་བར་རྒྱུས་མངའ་ཡོད་ཅིང་རིགས་ཀྱི་འགན་འཁྲིའི་འདི་ཤེས་ཡོད་པ་ཞིག་ཡིན་དགོས་པར་སེམས།
རི་མོ་ཞིག་འབྲི་བའི་གོ་རིམ་ཁྲོད་གཙོ་བོ་ཕྱོགས་གང་གནད་ལ་བཟུང་ན་རི་མོ་ཡག་པོ་ཞིག་འབྲི་ཐུབ་བམ།
        རང་གི་བསམ་ཚུལ་ལ། རི་མོ་འབྲི་བའི་གོ་རིམ་ཁྲོད་གཙོ་བོ་འབྲི་བྱའི་རི་མོའི་ནང་དོན་གནད་དུ་འཛིན་དགོས་པ་དང་། དེ་མཚོན་བྱེད་ཀྱི་ཁ་དོག་དང་དབྱིབས་རིས་གང་ཡིན་མངོན་གསལ་ཐོན་དགོས་པར་སེམས་སོ། །
རི་མོ་འབྲི་སྦྱོང་བྱས་པའི་ཉམས་མྱོང་སྐོར་ནས་མཉམ་སྤྱོད་རེ་གནང་རོགས།
        གཅིག རང་སེམས་ཀྱི་དགའ་སྐྱོ་ཆགས་སྡང་གི་རྣམ་པ་ཡོད་ཚད་རི་མོའི་ལམ་དུ་མངོན་ཆོག་པས་རི་མོ་ནི་ཕུལ་དུ་བྱུང་བའི་སྒྱུ་རྩལ་བརྩམས་ཆོས་ཞིག་ཏུ་ངོས་འཛིན་བྱས་ཡོད།
        གཉིས། རི་མོ་བ་ཞིག་ལ་མཚོན་ན། བརྩོན་པ་རྒྱུན་རིང་བསྟེན་དགོས་པ་ལས། འབྲས་བུ་མྱུར་དུ་ཐོབ་འདོད་ཀྱི་ཧམ་སེམས་ཡོད་མི་རུང་བར་འདོད།         མ་འོངས་པའི་འཆར་གཞི་ནི། ནུབ་ལུགས་དངོས་བྲིས་རི་མོ་དང་སྲོལ་རྒྱུན་རི་མོ་ཟུང་འབྲེལ་གྱི་རིག་ལམ་གསར་བ་ཞིག་གམ་འབྲི་ཐབས་གསར་བ་ཞིག་ལ་ཚོད་བལྟ་བྱེད་བཞིན་པའི་སྐབས་ཡིན། ལན་རེར་རི་མོའི་སྒྱུ་རྩལ་ནི་མ་མཐའི་འཚོ་བ་ཡང་ཐག་གཅོད་དཀའ་བའི་ལས་རིགས་ཞིག་ཡིན་མོད།  རང་ཉིད་རི་མོའི་སྒྱུ་རྩལ་ལ་དགའ་བའི་དབང་གིས་སྒྱུ་རྩལ་གྱི་ལམ་ཁ་འདིར་འཇུས་ཏེ་རིགས་ཀྱི་འགན་འཁྲི་ཐེག་པའི་སྒྱུ་རྩལ་བ་ཆུང་ཆུང་ཞིག་བྱེད་འདོད་པ་དེའོ། །