logo

དཔའ་རིས་བོད་རང་སྐྱོང་རྫོང་བོད་སྐད་ཡིག་ཁྲིད་སྟོན་ལྟེ་བས་དཔའ་རིས་དམངས་གླུ་སློབ་གྲྭར་སྤེལ།

རྩོམ་པ་པོ།:མི་གསལ། ཡོང་ཁུངས།:མཚོ་སྔོན་པོའི་དྲ་བ། དུས་ཚོད།:2019-11-29 ཀློག་གྲངས།:
     སྤྱི་ཟླ11པའི་ཚེས22ཉིན་ལ། ཀན་སུའུ་ཞིང་ཆེན་ཝུའུ་ཝའེ་གྲུང་ཁྱེར་དཔའ་རིས་བོད་རང་སྐྱོང་རྫོང་བོད་སྐད་ཡིག་ཁྲིད་སྟོན་ལྟེ་བས་རྫོང་འདིའི་བཀྲ་ཤིས་ཕྱུག་ལུང་གྲོང་རྡལ་ཕུང་ནག་རིལ་སློབ་ཆུང་དུ་ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་ཞེས་པའི་དགོངས་དོན་ལྟར། རིག་གནས་གཞི་རིམ་ལ་བསྐྱལ་བ་དང་རྒྱལ་ཁབ་རིམ་པའི་གཟུགས་འདས་རིག་གནས་ཤུལ་བཞག་དཔའ་རིས་དམངས་གླུ་སློབ་གྲྭར་སྤེལ་བའི་ལས་འགུལ་སྤེལ།
     དེ་ཡང་སྐྱེས་དངོས་མཐའ་དག་བག་ལ་ཉལ་ཞིང་ནོར་འཛིན་སྒེག་མོར་ཁ་བའི་མེ་ཏོག་གོས་རྒྱན་བཀླུབས་ཡོད་པའི་དགུན་གྱི་མགོ་མ་འདིར། བཀྲ་ཤིས་ཕྱུག་ལུང་ཕུང་ནག་རིལ་སློབ་ཆུང་གི་དགེ་སློབ་ལྔ་བཅུ་དང་མཐའ་འཁོར་གྱི་ཁྱིམ་པ་སུམ་ཅུ་ལྷག  རྒྱལ་ཁབ་རིམ་པའི་གཟུགས་འདས་རིག་གནས་ཤུལ་བཞག་དཔའ་རིས་དམངས་གླུའི་ཞིང་ཆེན་དང་གྲོང་ཁྱེར། རྫོང་རིམ་པའི་རྒྱུད་འཛིན་པ་བདུན། དེ་མིན་རྫོང་བོད་སྐད་ཡིག་ཁྲིད་སྟོན་ལྟེ་བའི་ལས་བྱེད་པ་སོགས་བསྡོམས་པའི་མི་གྲངས་བརྒྱ་ལྷག་ཅིག་སློབ་གྲྭར་འདུས་ཡོང་ནས་ཀྲུང་གུང་དཔའ་རིས་རྫོང་ཨུ་དང་རྫོང་སྲིད་གཞུང་གི་དགོངས་དོན་ལྟར། སློབ་མའི་སྲོལ་རྒྱུན་རིག་གནས་རྩ་བ་དང་བསླབ་བྱའི་ཟུར་ཁྲིད་ནང་དོན་ཇེ་ཕྱུག་ཇེ་མོད་འགྱུར་སླད། ཆུང་དུས་ནས་བོད་ཀྱི་དམངས་སྲོལ་རིག་གནས་ལ་རྒྱུས་ལོན། རྒྱུད་འཛིན་དང་གོང་སྤེལ་གྱི་འདུ་ཤེས་རྒྱུད་ལ་བསྐྱེད་པར་དམིགས་ནས་ལས་འགུལ་འདི་སྤེལ་བ་རེད།
     སློབ་རིམ་ལྔ་བའི་སློབ་མ་དཔལ་མོ་མཚོས་བཀྲ་ཤིས་པའི་ཁ་གཡང་སྨོན་ཚིག་ཅིག་ལ་སྙན་པའི་དབྱངས་བཀུག་ནས་ཐེངས་འདིའི་ལས་འགུལ་མགོ་བརྩམས་བྱུང་། ན་གཞོན་སློབ་མ་དག་གི་གླུ་གར་གྱི་རྩེད་འཇོས་དམངས་ཁྲོད་སྒྱུ་རྩལ་བ་རྣམས་ཀྱི་ཡིད་དབང་འཕྲོག་ནས་རང་མོས་རང་འདོད་ཀྱིས་གླུ་སྙན་མོ་དབྱངས་ལ་གྱེར། ནང་སྒོས་སུ་ཕུང་ནག་རིལ་སློབ་ཆུང་གི་དགེ་རྒན་སྒྲོལ་མ་མཚོ་དང་ཐེངས་འདིའི་དཔའ་རིས་དམངས་གླུའི་མཛུབ་ཁྲིད་དགེ་རྒན་སྐར་མ་གཉིས་ཀྱིས་ཤགས་ལེན་གྲི་ཡི་ཁ་རྩེར་སླེབས་ནས་དགུན་གྲང་ངར་ཁེངས་པའི་ཕུང་ནག་རིལ་སློབ་ཆུང་འདིར་དྲོ་ཉི་མའི་འོད་སྟོང་སྦྱིན་ཏེ་ཀུན་གྱི་ཡིད་ལ་སྤྲོ་སྣང་བསྩལ།
     ལས་འགུལ་འདིའི་བསླབ་སྦྱང་གི་བརྒྱུད་རིམ་ལྟར་རང་རེའི་ལས་ཁུངས་དྲངས་ཡོང་བའི་རྒན་སྐར་མས་རི་རྩེ་གསུམ་ལ་མཆོད་རྟེན་གསུམ་དང་གླུ་སྒོ་འབྱེད་པའི་ལྡེ་མིག་ལ་ཞེས་པའི་དམངས་གླུ་གཉིས་སློབ་ཁྲིད་ཀྱི་བཀོད་སྟངས་ལྟར་དེར་འདུས་པའི་རྒན་དར་གཞོན་གསུམ་ལ་དམར་ཁྲིད་བྱས་ཟིན། 
     ཡུལ་གྲུ་འདིར་མི་རབས་མི་ཐོག་ནས་མཆེད་ཡོང་བའི་དཔའ་རིས་དམངས་གླུ་ས་ཁྱབ་རྡོ་ཁྱབ་དུ་དར་བཞིན་པའི་སྣང་ཚུལ་མཚོན་ཡོད་ལ། རིག་གནས་འདི་ཉིད་དཔའ་རིས་པའི་ཕ་སྐད་བརྗོད་སྟངས་སམ་བསམ་པའི་འདུ་ཤེས་དང་ཡུལ་སྲོལ་གོམས་གཤིས། འཚོ་བའི་རེ་འདུན་སོགས་མཚོན་ཐུབ་པ་ཞིག་ཀྱང་རེད། ཐེངས་འདིའི་ལས་འགུལ་སྤེལ་ནས་ན་ཆུང་སློབ་མ་དག་ཆུང་དུས་ནས་རང་མི་རིགས་ཀྱི་དམངས་ཁྲོད་རིག་གནས་ཀྱི་རིན་ཐང་ལ་བག་ཆགས་རེ་འཇོག་ཐུབ་པ་དང་། ཁོ་ཚོའི་རྒྱུད་ལ་ཕ་མེས་ཡང་མེས་ནས་བརྒྱུད་ཡོང་བའི་དམངས་ཁྲོད་རིག་གནས་ཤུལ་བཞག་འདིའི་དབྱངས་ཀྱི་འགྱུར་ཁུག་དང་ཚིག་གི་སྒྲིག་སྟངས་སོགས་ལ་རྒྱུས་ལོན་དང་དེ་ལ་དགའ་ཞེན་གྱི་ཀུན་སློང་རེ་སློང་ཅི་ཐུབ་ནི་ངེད་ཅག་གི་དམིགས་བྱ་གཙོ་བོ་ཡིན། 
     མཇུག་མཐར་བོད་སྐད་ཡིག་ཁྲིད་སྟོན་ལྟེ་བས་སློབ་མ་རེ་རེར་དཔའ་རིས་ངག་གི་རོལ་མཚོ་ཞེས་པའི་རྒྱ་བོད་ཤན་སྦྱར་གྱི་བསླབ་དེབ་ཅིག་དང་། འབྲི་དེབ། ཞ་སྨྱུག་དང་བཅས་པ་སྦྱིན་ནས་སྙིང་ནས་འཕྲལ་ཕུགས་ཀྱི་རེ་སྨོན་བཅིངས་ནས་མཇུག་རྫོགས་སོང་།
འབྲེལ་ཡོད་འོས་སྦྱོར།