༄༅།།ཐང་དཀར་རོལ་ཚོགས་ཀྱི་གླུ་གཞས་ཆེད་བསྒྲིགས《ཐང་དཀར》ཞེས་པ་དངོས་སུ་བཀྲམ།

སྤྱི་ཟླ12པའི་ཚེས25ཉིན། མདོ་སྨད་ཆོས་ཀྱི་ཞིང་ས། དམངས་ཁྲོད་རིག་གནས་ཀྱི་ཚན་ཁ་འབར་སའི་ཉི་མ་བླ་བྲང་གི་ཕང་བ་དྲོན་མོར། སྲོལ་རྒྱུན་རིག་གནས་ལ་དུངས་བ་ཆེ་ཞིང་། རྒྱུད་འཛིན་དར་སྤེལ་ལ་འབད་པ་རྩེ་གཅིག་ཏུ་གཞོལ་བའི་ཐང་དཀར་རོལ་ཚོགས་ཀྱིས་རི་ཁ་བའི་ལྗོངས་ཀྱི་མི་རབས་བརྒྱུད་པའི་དབྱངས་རྟ་སྙན་མོ་འགའ་དང་། ཁོང་ཅག་རོལ་ཚོགས་ཀྱིས་གསར་རྩོམ་གནང་པའི་གཞས་གསར་འགའ་ཕྱོགས་གཅིག་ཏུ་དྲིལ་ནས། ཐང་དཀར་ཞེས་པའི་གླུ་གཞས་ཆེད་སྒྲིག་ཅིག་གྲུབ་སྟེ། ཨ་ལོང་སྒྲ་མཛོད་སོགས་དྲ་བའི་སྨྱན་བྱད་ཁྲོད་བཀྲམས་པ་ལ་རྟེན་འབྲེལ་ཞུ། རོལ་ཚོགས་འདི་ནི་བོད་ཀྱི་རོལ་མོ་བའམ་རྡུང་ལེན་པ་ཁོ་བསྟན་དང་། རམ་དཀྲོལ་བ་བན་དེ་སྒོམ། རྡུང་ལེན་པ་རྡོ་རྗེ་ཚེ་བརྟན།  གཞས་པ་མགོན་པོ།  ཞབས་བྲོ་མཁན་གསང་བདག་བཅས་མི་ལྔས་གྲུབ་པ་ཞིག་ཡིན། རོལ་ཚོགས་ཀྱི་ཁྱད་ཆོས་ནི་སྲོལ་རྒྱུན་དབྱངས་རྟ་དུ་མར་བོད་ཀྱི་རོལ་ཆས་གཙོ་བྱས་ཏེ་རོལ་མོ་གསར་བཟོ་དང་། སྡེབ་སྦྱོར་གསར་སྒྲིག་བྱེད་ཀྱིན་ཡོད་པ་དེ་ཡིན།
རོལ་ཚོགས་ཀྱི་སྐད་ཆར།  ངེད་ཅག་ནི་བོད་ཀྱི་སྒྲ་སྙན་རྡུང་ལེན་གྱི་རྗེས་འཇུག་པ་རྐྱང་བ་ཡིན། སྒྲ་སྙན་རྡུང་ལེན་ནི་གཙང་བོ་རེད་ལ་རྒྱ་མཚོ་ཡང་རེད་པས། ང་ཅག་ནི་གསེར་ཉ་དང་དུང་ཉ་རེད་ལ། སྒྲ་སྙན་རྡུང་ལེན་ནི་ས་གཞི་རེད་ལ་རི་རབ་ཀྱང་རེད་པས། ངེད་ཅག་ནི་གསེར་བྱ་དང་དུང་བྱ་ཡང་རེད་འདུག མདོར་ན། སྒྲ་སྙན་རྡུང་ལེན་ལ་ཟུར་བརྒྱ་དང་བརྒྱད་ཡོད་པར་བྱས་ན། ངེད་ཅག་ནི་ཕྱོགས་བཞི་མཚམས་བརྒྱད་གང་རུང་ཞིག་གི་ཟུར་ཁ་དེ་རེད་འདོད། མི་ལ་རས་པའི་རྣམ་མགུར།
གར་ལ་འགྲོ།
ཁ་བ་གངས་ཀྱི་མེ་ཏོག
ཆང་གཞས།
ཆོས་ལ་བཟང་པོ།
ཨེ་མ་ཡང་གཅིག་སོ།
ཤར་ཕྱོགས་རྒྱ་མཚོའི་གླིང་ནས།
རི་ཡག་པ།
དུང་རིའི་གནས་མགུར།
ལྡ་མ་ལ་ལྡེམ།
ཨ་རིག་མ།
སྐྱེས་སྐར་བསུ་གླུ།
ཐང་དཀར་རྒོད་པོ། གསོན་དང་ལགས།  
རྒྱལ་ཁམས་ཆུ་བཞིན་ཉུལ་བ་ཡི།།
བླ་གཟུགས་ཀ་ཝ་བྷ་དྲ་ངས།།
བཞོན་པའི་ལུས་པོ་ནག་པ་འདིས།
ཆོས་ཉིད་འགྱུར་བ་མེད་པར་མཚོན།།

གསོན་དང་ལགས། 
རྨིག་བཞི་དུང་ལྟར་དཀར་བ་འདིས།།
སེམས་ཉིད་ལྷག་བསམ་དཀར་བ་མཚོན།།
འགྲོས་ལྡན་རྟ་ལ་ཞོན་པ་འདིས།།
དུང་རིར་མྱུར་ཏུ་མཇལ་འདོད་མཚོན།།

གསོན་དང་ལགས།  
མཚོན་པ་གསུམ་གྱི་གླུ་ཆུང་འདི།།
དེ་རིང་བློ་ལ་ཤར་ནས་བླངས།།
དཀོན་མཆོག་གསུམ་དང་གནས་ཀྱི་མཐུས།།
ཚེ་ལྷག་དོན་ལྡན་ཡོང་བར་སྨོན།།