༄༅།།བོད་ལྗོངས་ཀྱིས་ལོ་གསར་གྱི་རོལ་དབྱངས་འདུ་ཚོགས་འཚོགས་པ།

སྤྱི་ཟླ12པའི་ཚེས30ཉིན། བོད་རང་སྐྱོང་ལྗོངས་ཏང་ཨུ་དྲ་འཕྲིན་གཞུང་ལས་ཁང་དང་། བོད་རང་སྐྱོང་ལྗོངས་རིག་གནས་ཐིང་། བོད་ལྗོངས་རླུང་འཕྲིན་བརྙན་འཕྲིན་ལས་ཁུངས་ཀྱིས་གཙོ་གཉེར་བྱས་ཤིང་། བོད་རང་སྐྱོང་ལྗོངས་གླུ་གར་ཚོགས་པས་གཉེར་འགན་འཁུར་བའི་བོད་རང་སྐྱོང་ལྗོངས་ཀྱི2020ལོའི་ལོ་གསར་གྱི་རོལ་དབྱངས་འདུ་ཚོགས་ལྷ་ས་གྲོང་ཁྱེར་དུ་ངོ་མཚར་ཆེ་བའི་འཁྲབ་སྟོན་བྱས་པ་རེད།
རོལ་དབྱངས་འདུ་ཚོགས་ཀྱིས་ཏང་ལ་བསྟོད་གླུ་འབུལ་བ་དང་། མི་དམངས་ལ་བསྟོད་གླུ་འབུལ་བ་། དུས་རབས་ལ་བསྟོད་གླུ་འབུལ་བ། དཔའ་བོར་བསྟོད་གླུ་འབུལ་བ། དེ་བཞིན་མི་རིགས་མཐུན་སྒྲིལ་ལ་ཤུགས་སྣོན་དང་། མཛེས་སྡུག་ལྡན་པའི་བོད་ལྗོངས་འཛུགས་སྐྲུན་ཞེས་པ་བརྗོད་དོན་གལ་ཆེན་དུ་བྱས་ནས། རོལ་དབྱངས་སྒྱུ་རྩལ་གྱི་རྣམ་པའི་ཐོག་ནས་དགའ་སྤྲོ་དང་། བཀྲ་ཤིས། བདེ་སྐྱིད། དྲིན་ཚོར། འབད་བརྩོན་བཅས་ཀྱི་རིག་གནས་རྣམ་པ་གང་ལེགས་མཚོན་པར་བྱས་ཏེ། བོད་ལྗོངས་ཀྱི་མི་རིགས་ཁག་གི་མི་དམངས་ཀྱིས་2020ལོར་རྒྱལ་ཡོངས་མི་དམངས་དང་མཉམ་དུ་ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་གྱི་དཔའ་སེམས་དང་ཆོད་སེམས་བརྟན་པོ་མཚོན་པར་བྱས་ཡོད་པ་རེད།  
ངོ་སྤྲོད་བྱས་པར་གཞིགས་ན། ཐེངས་འདིའི་ལོ་གསར་གྱི་རོལ་དབྱངས་འདུ་ཚོགས་དེ་ཟླ12ཚེས29ཉིན་ཐོག་མར་འཁྲབ་སྟོན་བྱས་པ་དང་། འབུད་དཀྲོལ་རོལ་མོ་དང་། མཉམ་གཞས། རྐྱང་གཞས་སོགས་ཀྱི་རྣམ་པའི་ཐོག་ནས་སྲོལ་རྒྱུན་དང་དེང་རབས་ཟུང་འབྲེལ་བྱས་ཏེ།  གཟིགས་མོ་བ་རྣམས་ལ་བོད་ལྗོངས་ཀྱི་འགྱུར་ལྡོག་ཆེན་པོ་དང་མི་རིགས་ཁག་གི་མི་དམངས་ཀྱིས་ཐུན་མོང་ཐོག་འབྱོར་འབྲིང་སྤྱི་ཚོགས་ཕྱོགས་སུ་བསྐྱོད་པའི་དགའ་སྤྲོའི་རྣམ་པ་མངོན་པར་བྱས་ཡོད་པ་རེད།