༄༅།།ས་དགའ་རྫོང་སྟེང་དཀར་རྒྱ་གཞས།

༄༅། །བོད་མི་རིགས་ནི་སྒྱུ་རྩལ་ལ་དགའ་བའི་མི་རིགས་ཤིག་ཡིན་ལ། བོད་ཁུལ་ལ་གླུ་གར་གྱི་རྒྱ་མཚོ་ཞེས་འབོད་སྲོལ་ཡོད་པ་བཞིན། དུས་ཡུན་རིང་བའི་ལོ་རྒྱུས་ནང་བོད་རིགས་མི་དམངས་ཚོས་རང་རང་སོ་སོའི་ས་གནས་ཀྱི་ཁྱད་ཆོས་ལྡན་པའི་གླུ་གར་གྱི་རྣམ་པ་སྣ་ཚོགས་གསར་གཏོད་དང་རྒྱུན་འཛིན་གནང་ཡོད་པ་ལས། གཞིས་རྩེ་ས་ཁུལ་ས་དགའ་རྫོང་སྟེང་དཀར་ཤང་དུ་དར་ཁྱབ་རབ་ཏུ་ཆེ་བའི་རྒྱ་གཞས་ནི་བོད་མི་རིགས་ཀྱི་གླུ་གར་རྒྱ་མཚོ་ལས་དྲག་ཏུ་འཕྱུར་བའི་རླབས་ཕྲེང་ཞིག་རེད། 
ས་དགའ་རྫོང་སྟེང་དཀར་ཤང་གི་རྒན་གཞོན་ཕོ་མོ་རིས་སུ་མ་ཆད་པས་མི་རབས་ནས་མི་རབས་སུ་རྒྱ་གཞས་འཁྲབ་ཤེས་ཀྱི་ཡོད་ལ། དེའི་རྒྱ་གཞས་ནི་གཙང་ཕྱོགས་སུ་སྙན་གྲགས་ཤིན་ཏུ་ཆེ་བས། མི་ཚོས་ས་དགའ་རྫོང་སྟེང་དཀར་ཤང་ནི་རྒྱ་གཞས་ཀྱི་ཕ་ཡུལ་ལྟ་བུར་ངོས་འཛིན་གྱིན་ཡོད་པར་མ་ཟད། ༢༠༠༡ལོར་བོད་རང་སྐྱོང་ལྗོངས་ནས་ས་དགའ་རྫོང་སྟེང་དཀར་ཤང་ལ་རྒྱ་གཞས་སྒྱུ་རྩལ་གྱི་ཕ་ཡུལ་ཞེས་པའི་མཚན་སྙན་གནང་། སྟེང་དཀར་རྒྱ་གཞས་ཀྱི་གཞས་དཔོན་བཀྲ་ཤིས་ཀྱིས་ངོ་སྤྲོད་གནང་བ་ལྟར་ན། སྟེང་དཀར་རྒྱ་གཞས་ཐོག་མར་གཞིས་རྩེ་ས་ཁུལ་གཉའ་ལམ་རྫོང་བུ་རོང་ཤང་ནས་འདི་ཕྱོགས་སུ་དར་བར་བཤད་དེ། དེ་ཡང་སྟེང་དཀར་ཤང་གི་བོན་པོ་དགོན་པའི་བུ་དགོན་ཞིག་བུ་རོང་ཤང་ཁོངས་སུ་ཡོད་པ་དང་། བུ་དགོན་གྱི་ཡོན་བདག་དང་གྲྭ་བཙུན་རྣམས་ལོ་རེ་བཞིན་སྟེང་དཀར་མ་དགོན་དུ་ལས་སྣ་ཞབས་ཞུར་ཡོང་དགོས་པ་རེད། ཁོ་ཚོས་ལས་ཀའི་བར་གསེང་དུ་སྟེང་དཀར་མང་ཚོགས་ལ་རྒྱ་གཞས་བསླབས་ཏེ། དེ་ནས་བཟུང་བུ་རོང་རྒྱ་གཞས་སྟེང་དཀར་དུ་དར་ཁྱབ་བྱུང་ཞིང་སྟེང་དཀར་དམངས་ཁྲོད་གླུ་གར་དང་ཟུང་དུ་འབྲེལ་ནས་ས་གནས་དེ་གའི་ཐུན་མོང་མ་ཡིན་པའི་སྟེང་དཀར་རྒྱ་གཞས་ཀྱི་རྣམ་པ་འདི་གྲུབ་པར་གྲགས་སོ། ། རྒྱ་གཞས་ཞེས་པའི་རྒྱ་ནི་རྒྱས་པའམ་གཟབ་ཅིང་རྒྱ་ཆེ་བའི་དོན་ཡིན། དེ་ནི་མང་ཚོགས་ཐུན་མོང་དུ་འཁྲབ་སྟོན་བྱེད་པའི་གཞས་ཤིག་ཡིན། རྒྱ་གཞས་ཀྱི་འབྱུང་ཁུངས་སྐོར་ཤོད་སྲོལ་གསུམ་སྣང་སྟེ། ལ་ལས་དེ་ནི་བོད་གོར་དམག་འཁྲུག་སྐབས་བོད་རིགས་དཔོན་དམག་རྡོག་རྩ་གཅིག་ཏུ་བསྒྲིལ་ནས་གོར་ཁའི་བཙན་འཛུལ་དམག་ལས་གཡུལ་དུ་རྒྱལ་ཁ་ཐོབ་པ་ལ་མང་ཚོགས་ཀྱི་དགའ་སྟོན་བྱེད་པའི་གླུ་གར་ཞིག་ཡིན་ཟེར། ལ་ལས་གླུ་གར་འགྲན་བསྡུར་ལ་རྒྱལ་ཁ་ཐོབ་པའི་དགའ་སྟོན་གྱི་གཞས་ཡིན་ཟེར། ལ་ལས་རྒྱ་བཟའ་ཀོང་ཇོ་ལ་དགའ་བསུ་ཞུ་བའི་གཞས་ཡིན་ཟེར་རོ། ། ང་ཚོས་དཔྱད་ན། རྒྱ་གཞས་ནི་གཙང་ཕྱོགས་ཀྱི་ཆེས་སྔ་མོའི་དམངས་ཁྲོད་གླུ་གར་དེ་ཚོའི་ཁྲོད་ནས་བྱུང་བ་ཞིག་ཡིན་ངེས། དེས་གནའ་བོའི་གླུ་གར་དེ་དག་གི་སྒྱུ་རྩལ་རྣམ་པ་དང་རིག་གནས་དོན་སྙིང་རྣམས་དང་ལེན་ཐོག མི་རབས་རིམ་བྱུང་གིས་བཟོ་བཅོས་བྱས་ནས་ས་གནས་ཀྱི་བྲོ་བ་ལྡན་པའི་མི་རིགས་ཀྱི་དམངས་ཁྲོད་གཞས་ཤིག་ཏུ་ཆགས་པར་ངེས། ད་ལྟ་རྒྱ་གཞས་ནི་སྟེང་དཀར་ཤང་ལྟེ་བར་བྱས་པའི་ས་གནས་ཀྱི་རིག་གནས་རྣམ་པ་ཞིག་ཏུ་ཆགས་ཡོད། 
སྟེང་དཀར་རྒྱ་གཞས་ནི་ལོ་ལྟར་བོད་ལོ་གསར་གྱི་ཚེས་གསུམ་ནས་ཚེས་ལྔ་བར་འཁྲབ་པ་སྟེ། ཚེས་གསུམ་ལ་རྟ་རྒྱུགས་འགྲན་བསྡུར་ཡོད་ཅིང་། དེའི་ཐོག་རྟའི་བང་རྩལ་དང་འགྲོས་མགྱོགས་ལོད་དང་རྟ་ཕོའི་ཉམས་ཤེད་སོགས་འགྲན་པར་མ་ཟད། རྟ་ཐོག་ནས་མདའ་དང་མེ་མདའ་འཕེན་པ་དང་ཁ་དར་ལེན་པ་སོགས་འགྲན་བསྡུར་སྣ་ཚོགས་ཡོད། དགོང་མོར་མི་རྣམས་ལྷན་དུ་འཛོམས་ནས་རྒྱ་གཞས་འཁྲབ་སྲོལ་ཡོད། དེ་བཞིན་ཚེས་བཞི་ལྔའི་ཉིན་མོར་ཡང་རྒྱ་གཞས་འཁྲབ་སྟོན་བྱེད་ཅིང་ས་གནས་མང་ཚོགས་གྲྭ་བཙུན་དང་བཅས་པར་ཕེབས་ནས་ཤིན་ཏུ་མཉེས་པོ་གནང་། སྔོན་གྱི་དུས་སུ་སྟེང་དཀར་རྒྱ་གཞས་དུམ་བུ་སུམ་ཅུ་ནས་སོ་ལྔ་ཙམ་ཡོད་པས་ཉིན་གཉིས་ནས་གསུམ་བར་འཁྲབ་སྟོན་བྱེད་སྲོལ་ཡོད་པར་གྲགས་མོད། ད་ལྟ་དུམ་བུ་བཅུ་ལྷག་ལས་ཤེས་མཁན་མེད། གཞས་འཁྲབ་དུས་མི་གྲངས་ལ་ངེས་བཟུང་མེད་པར་གཞས་གཏོང་ཤེས་ལ་འཁྲབ་ཤེས་ཤིང་རྒྱན་ཆས་འཛོམས་ན་ཕོ་མོ་རིས་སུ་མ་ཆད་པས་འཁྲབ་ཆོག་པར་མ་ཟད། འགྲོ་འདུག་རང་མོས་ཡིན་པས་སྒྱུ་རྩལ་འདི་ནི་དངོས་གནས་མང་ཚོགས་རང་མོས་ལྡན་པའི་དམངས་ཁྲོད་གླུ་གར་ཞིག་ཡིན་ནོ། །
སྟེང་དཀར་རྒྱ་གཞས་གྱི་འཁྲབ་སྟོན་གྱི་གོ་རིམ་མམ་འཁྲབ་ཚན་ལ་འདི་ལྟར་སྣང་སྟེ། ༡ སྒོ་གཞས། ༢ ག་ནས་ཡིན་པ་གསུང་བྱུང་། ༣ ཡར་གྱི་གངས་སྟོད་མཐོན་པོ། ༤ མཇལ་དར་འཕུལ་བ། ༥ གངས་སྟོད་ཡར་ལ་རྫོང་ཆགས། ༦ ཨ་ཁུ་རྒྱལ་བ། ༧ ཀོང་པོ་རྒྱལ་མོ་རོང་ལ། ༨ བདག་ཚོའི་ལུང་པའི་སྟོད་ལ། ༩ རྒྱ་མཚོའི་དཀྱིལ་ནས་ཐོན་པའི་མཆོད་རྟེན་དཀར་པོ། ༡༠ ཉ་མོ་འཁྱུག་འཁྱུག ༡༡ རྒོད་པོ་བདེ་མོ། ༡༢ ཤ་བ་པུས་བཙུགས། ༡༣ གྲི་རྩེད། ༡༤ བཀྲ་ཤིས་གསོལ་བ་བཅས་སོ། །སྟེང་དཀར་རྒྱ་གཞས་འཁྲབ་དུས་གཞས་དཔོན་ཕོ་མོ་རེ་རེ་དང་གཞས་ཀྱི་ཨ་མ་ཟེར་བ་གཅིག་དགོས། གཞས་དཔོན་གྱི་ལས་འགན་ནི་གཞས་སློབ་པ་དང་གཞས་སྣ་འཁྲིད་རྒྱུ་ཡིན། གཞས་ཀྱི་ཨ་མས་གཞས་ར་བསྲུང་རྒྱུ་དང་གཟིགས་མོ་བར་སྐུ་རྩེད་ཞུས་པ་ཙམ་ལས་འཁྲབ་སྟོན་གྱི་ལས་འགན་དམིགས་གསལ་མེད། མི་སྣ་དེ་གསུམ་ལ་སྒྱུ་རྩལ་གྱི་བྱང་ཚད་ངེས་ཅན་ཞིག་མངའ་དགོས། གཞས་མ་འཁྲབ་གོང་དུ་རྔ་པས་རང་གི་ཁྱིམ་ནས་རྔ་རྡུང་ཞིང་གྲོང་ནང་དུ་རྒྱུ་དུས་མི་ཚང་སུའི་སྒོ་འགྲམ་དུ་སླེབས་པ་ན་དེ་ཚང་གི་གཞས་པ་ཕྱིར་ཐོན་ཅིང་རྔ་པ་དང་མཉམ་དུ་རྔ་རྡུང་ཞོར་དུ་གཞས་འཁྲབ་ཅིང་འགྲོ་དགོས། གཟིགས་མོ་བ་ཚོས་རྒྱན་གོས་གསོལ་ཞིང་ཞལ་ཟས་སྣ་ལྔ་བསྣམས་ནས་དེའི་རྗེས་སུ་འབྲངས་ཏེ་གཞས་འཁྲབ་སྟོན་བྱེད་སར་འབྱོར། དེ་ནས་ངལ་སོས་རྗེས་འཁྲབ་སྟོན་དངོས་སུ་འགོ་བཙུགས་པའོ། །རྒྱ་གཞས་འཁྲབ་དུས་ཕྲེང་སྒོར་མོར་བསྒྲིགས་པའམ་ཕྲེང་ཉིས་བསྒྲིགས་བྱེད་པ་ཅི་རིགས་སྣང་། ཉིས་བསྒྲིགས་སྐབས་མོ་སྔོན་ཕོ་རྗེས་དང་། སྒོར་སྒོར་བྱེད་དུས་ཕོ་མོས་ཕྱེད་ཕྱེད་དུ་བསྒྲིགས་དགོས། གཞས་འཁྲབ་དུས་ཕོ་མོ་རེས་སུ་ཕྱེ་ནས་གླུ་ལེན་པའི་ཞོར་དུ་གཞས་མཁན་རྣམས་ཞབས་བྲོ་རྒྱག་ཅིང་གཡས་ཕྱོགས་སུ་བསྐོར་བསྐྱོད་བྱེད་དགོས། གཞས་ཉམས་ནི་ཐོག་མར་དལ་ཞིང་རིམ་གྱིས་འཚུབ་པར་འགྱུར་རོ། །རྔ་པ་གཞས་རའི་དཀྱིལ་དུ་བཞུགས་ནས་གཞས་དཔོན་གྱི་བཀོད་འདོམས་ལ་ཉན་གྱིན་རྔ་རྡུང་ཞིང་། གཞས་མཁན་ཚོའི་གོམ་སྟབས་རྔ་རྡུང་གི་འགྲོས་དང་མཉམ་དགོས་པའོ། ། རྒྱ་གཞས་འཁྲབ་སྟོན་གྱི་རྒྱན་ཆས་ཕལ་ཆེར་དར་དང་གོས་ཆེན་གྱིས་བཟོས་པ་ཡིན་ལ། ཕོ་གསར་ཚོའི་གྱོན་ཆས་ཚོས་མདོག་དམར་སེར་ཤས་ཆེ་བས་གཟབ་རྒྱས་དང་གཡང་ཆགས་པའི་ཉམས་དོད་པོ་ཡོད་པ་དང་། ཞྭ་མོ་ཆེ་ཞིང་སྒོར་ལ་ཚར་ལོ་འཕྱང་བ་གོན་ནས་མགོ་བོ་ཡོམ་ཡོམ་གནས་བས་སེང་གེའི་འགྱིང་ཉམས་དང་ལྡན། དོར་མ་ཤིན་ཏུ་རྒྱ་ཆེ་བ་ཤམ་ཐབས་དང་འདྲ་པོ་ཡོད། སྐེད་པར་རལ་གྲི་དང་རྟ་ལྕག་དང་གློ་གྲི་གྲི་ཤུབ་བཅས་པ་བཏགས། འཚུབ་ཆ་དོད་ཅིང་བག་ཡངས་པའི་གཞས་ཉམས་སྟེང་ནས་བོད་རིགས་མི་དམངས་ཚོའི་ལས་ལ་བརྩོན་ཞིང་དཔའ་ངར་ཆེ་བའི་གཤིས་རྒྱུད་མཚོན་གྱི་ཡོད། བུ་མོ་ཚོས་མགོ་ལ་བྱུ་རུའི་གཙུག་རྒྱན་དང་ལུས་ལ་གཙང་ཕྲུག་ཕྱུ་པ་ནག་པོ་གོན། སྐེད་ལ་ཆབ་མ་དང་མདུན་དུ་པང་གདན་དང་སྐེ་ལ་གའུ་འདོགས་པ་སོགས་རྒྱན་གོས་དེ་དག་ལས་ཀྱང་རྒྱ་གཞས་ཀྱི་ཐུན་མོང་མ་ཡིན་པའི་ཁྱད་ཆོས་མངོན་འདུག་གོ ། 
སྟེང་དཀར་རྒྱ་གཞས་ལ་ཁྱད་ཆོས་གཙོ་བོ་གང་ཡོད་ཅེ་ན། གཅིག་ནས་འཁྲབ་སྟོན་གྱི་རྣམ་པ་སྣ་མང་ལྡན་པ་སྟེ། གཞས་ཚིག་གི་ནང་དོན་ཕུན་སུམ་ཚོགས་པ། འཁྲབ་སྟོན་གྱི་དུས་ཡུན་རིང་ཐུང་གང་རུང་ཆོག་པའོ། ། གཉིས་ནས་འཁྲབ་སྟོན་མགོ་མཇུག་ཆ་ཚང་བ་ཡོད་པ་སྟེ། གཞས་ཀྱི་སྒྲིག་གཞིའམ་གྲུབ་ཚུལ་དང་། དབྱངས་ཀྱི་འགྱུར་ཁུག་དང་འཁྲུག་ཆ། ལག་པའི་ཕྱག་རྒྱ་དང་ཞབས་ཀྱི་འདེགས་འཇོག འཁྲབ་སྟོན་གྱི་འགྲོས་དལ་ལྷོད་སོགས་ལ་ཆོས་ཉིད་ངེས་ཅན་ལྡན་ཡོད། གསུམ་ནས་འཁྲབ་ཆས་ཐུན་མོང་མ་ཡིན་པ་སྟེ། དེའི་རྒྱན་གོས་ཕལ་ཆེ་བར་གོང་ཐང་ཆེ་བའི་དར་དང་གོས་ཆེན་གྱིས་བཟོས་པ་དང་། ཚོས་གཞི་དམར་སེར་གཉིས་ཤས་ཆེ། ཕོ་སར་ཚོས་སྐེད་པར་རལ་གྲི་ལེབ་ཆེན་དང་རྟ་ལྕག་དང་གློ་གྲི་ཆུང་ཆུང་བཏགས་ནས་ཆེ་ཉམས་དང་རྫིག་ཉམས་ཤིག་མངོན་ཐབས་བྱེད། ལྷག་པར་དུ་ཚར་ལོ་ཧྲུག་ཧྲུག་ཏུ་འཕྱང་བའི་ཞྭ་མོ་ཆེ་ཞིང་དབྱིབས་སྒོར་བ་གོན་ཡོད་པ་དེ་ནི་ས་ཁུལ་གཞན་དག་གི་གཞས་དང་ཐུན་མོང་མ་ཡིན་པ་ཞིག་ཏུ་སྣང་། དེ་བཞིན་བུ་མོ་ཚོའི་བྱུ་རུའི་གཙུག་སོགས་ལས་ཀྱང་ས་གནས་ཀྱི་ཁྱད་ཆོས་མངོན་པར་གསལ། 
སྟེང་དཀར་རྒྱ་གཞས་ནི་བོད་རིགས་ཀྱི་ཕུལ་བྱུང་གི་སྲོལ་རྒྱུན་རིག་གནས་ཤིག་ཡིན་པས། དེའི་རིན་ཐང་སྔོག་འདོན་དང་སྒྱུ་རྩལ་དེ་མྱུར་སྐྱོབ་དང་སྲུང་སྐྱོབ་བྱེད་པས་བོད་མི་རིགས་ཡོངས་ཀྱི་རིག་གནས་འཕེལ་རྒྱས་ལ་སྐུལ་འདེད་ཐེབས་ཐུབ་པར་མ་ཟད། ས་གནས་དང་རྒྱལ་ཡོངས་ཀྱི་བསམ་པའི་དཔལ་ཡོན་འཛུགས་སྐྲུན་དང་མི་དམངས་མང་ཚོགས་ཀྱི་རིག་གནས་འཚོ་བ་ཕུན་སུམ་ཚོགས་པར་གཏོང་བ་དང་མི་དམངས་ཀྱི་བྱང་ཚད་མཐོར་འདེགས་དང་སྤྱི་ཚོགས་རིང་ལུགས་ཀྱི་འཆམ་མཐུན་སྤྱི་ཚོགས་འཛུགས་སྐྲུན་བཅས་པར་སྐུལ་འདེད་ཀྱི་ནུས་པ་ངེས་ཅན་ཐོན་ཐུབ་ངེས་རེད། འོན་ཀྱང་སྲོལ་རྒྱུན་གྱི་གཟུགས་མེད་རིག་གནས་ཤུལ་ནོར་སྤྱི་དང་འདྲ་བར། སྟེང་དཀར་རྒྱ་གཞས་ཀྱི་སྲུང་སྐྱོབ་དང་རྒྱུན་འཛིན་ལའང་དཀའ་ངལ་མི་ཉུང་བ་འཕྲད་བཞིན་ཡོད། གཅིག་ནས་ད་ལྟའི་གཞོན་རབས་ཚོའི་རིན་ཐང་ལྟ་བ་དང་མཛེས་དཔྱོད་ལྟ་བ་ལ་འགྱུར་ལྡོག་བྱུང་ནས། སྲོལ་རྒྱུན་དང་གནའ་ཉམས་དོད་པའི་གླུ་གར་འཁྲབ་སྟོན་བྱེད་འདོད་མེད་པ་དང་། སྒྱུ་རྩལ་དེ་སྦྱང་འདོད་མཁན་དེ་བས་ཉུང་དུ་འགྲོ་བཞིན་ཡོད་པས། སྟེང་དཀར་རྒྱ་གཞས་ཀྱི་རྒྱུན་འཛིན་མི་སྣ་ནི་དཀའ་གནད་ཆེ་ཤོས་ཤིག་རེད། གཉིས་ནས་རྒྱ་གཞས་སྒྱུ་རྩལ་གྱི་ཉམས་མྱོང་ཕྱུག་པའི་གཞས་མཁན་ཕལ་ཆེར་ད་ལྟར་དགོང་ལོ་བགྲེས་ཤིང་དབང་པོ་མི་གསལ་བར་འགྱུར་བ་དང་། སྒྱུ་རྩལ་དེའི་སྐོར་ཡིག་ཐོག་ཏུ་འཁོད་པའི་དཔྱད་གཞིའི་རྒྱུ་ཆ་ཤིན་ཏུ་ཉུང་བ་སོགས་ཀྱི་རྐྱེན་པས་རྒྱ་གཞས་རྒྱུན་འཛིན་དང་སྲུང་སྐྱོབ་ལས་དོན་ནི་ཉིན་རེ་བཞིན་ཛ་དྲག་ཆེ་བའི་གནས་ཚུལ་ཞིག་ཏུ་གྱུར། གསུམ་ནས་དེང་རབས་ཚན་རྩལ་འཕེལ་རྒྱས་སོང་བའི་འགྲོས་དང་བསྟུན་ནས་སྲོལ་རྒྱུན་གྱི་སྒྱུ་རྩལ་རྣམ་པ་མང་པོ་ཞིག་ཉམ་རྒུད་དུ་སོང་བ་དང་། དེང་རབས་ཀྱི་དུས་སྟོན་མང་པོ་བོད་དུ་དར་ཞིང་སྲོལ་རྒྱུན་གྱི་དུས་ཆེན་མང་པོ་ཞིག་ཉམ་མེད་དུ་སོང་བས་སྲོལ་རྒྱུན་སྒྱུ་རྩལ་དེ་དག་སྤྱི་ཚོགས་ཐོག་ཏུ་གསལ་བར་སྟོན་པའི་སྡིང་ཆའམ་ཤིན་ཏུ་དོག་པོར་འགྱུར། ལྷག་པར་དུ་དཔལ་འབྱོར་འཛམ་གླིང་ཅན་དུ་འགྱུར་བ་དང་མང་ཚོགས་ཀྱི་འཚོ་གནས་གྲོང་འཁྱེར་ཅན་དུ་བསྒྱུར་བའི་བརྒྱུད་རིམ་ཁྲོད། དེང་དུས་སུ་རྒྱུག་ཆེ་བའི་རིག་གནས་སྒྱུ་རྩལ་གྱི་རྣམ་པ་སྣ་ཚོགས་བོད་ཁུལ་དུའང་དར་ནས། བོད་ཀྱི་སྲོལ་རྒྱུན་རིག་གནས་ཉམ་རྒུད་དུ་འགྲོ་བར་ཤུགས་རྐྱེན་ཆེན་པོ་ཐེབས་བཞིན་མཆིས། དེ་བཞིན་མི་རྣམས་ཀྱི་དེང་རབས་ཀྱི་རིག་གནས་འཚོ་བ་གསར་པ་ཞིག་དང་མཛེས་དཔྱོད་ལྟ་བ་གསར་བ་ཞིག་གི་མདུན་དུ་སྟེང་དཀར་རྒྱ་གཞས་དེ་ཉིད་རྒྱ་ཆེ་བའི་གྲོང་གསེབ་ཏུ་འཁྲབ་སྟོན་བྱེད་པའི་གོ་སྐབས་ཇེ་ཉུང་དུ་སོང་ནས། སྒྱུ་རྩལ་འདི་ཉིད་མྱུར་སྐྱོབ་དང་སྲུང་སྐྱོབ་མི་བྱེད་ཐབས་མེད་ཀྱི་གནས་སུ་ལྷུང་ཡོད་དོ། །
སྟེང་དཀར་རྒྱ་གཞས་ཀྱི་སྲུང་སྐྱོབ་དང་རྒྱུན་འཛིན་གྱི་དཀའ་གནད་དེ་དག་ལ་དམིགས་ནས་འབྲེལ་ཡོད་སྡེ་ཁག་ནས་སྲུང་སྐྱོབ་ཀྱི་ལག་ལེན་རབ་དང་རིམ་པར་སྤེལ་ཡོད་པ་སྟེ། གཅིག་ནས་ཆེད་ལས་མཁས་དབང་རྩ་འཛུགས་བྱས་ཏེ་རྒྱ་གཞས་ཀྱི་འབྲེལ་ཡོད་དཔྱད་གཞི་འཚོལ་བསྡུ་དང་སྒྲ་བརྙན་ཕབ་ལེན་བྱས། གཉིས་ནས་༢༠༠༣ལོའི་ཟླ་༥པ་ནས་༢༠༠༤ལོའི་ཟླ་༤པའི་བར། གཞིས་རྩེ་ས་ཁུལ་རིག་གནས་ཅུས་ཀྱིས་བོད་སྐྱོར་ལས་གཞིའི་བརྒྱུད་ལམ་ནས་མ་དངུལ་བཙལ་ཏེ། ས་ཁུལ་ཡོངས་ཀྱི་རྫོང་ཁག་བཅོ་བརྒྱད་ཀྱི་དམངས་ཁྲོད་རིག་གནས་སྐོར་གཤམ་སྐྱོད་ལས་འགུལ་སྤེལ་ནས་ཅུང་ཆ་ཚང་བའི་སྒྲ་བརྙན་ཕབ་ལེན་དང་ཡིག་ཐོག་བཀོད་པ་རེད། གསུམ་ནས་༢༠༠༦ལོའི་ཟླ༡༡པར་ས་ཁུལ་ཡོངས་ཀྱི་གཟུགས་མེད་རིག་གནས་ཤུལ་ནོར་གྱི་ལས་དོན་ཚོགས་འདུ་འཚོགས་ཏེ་ཕྱོགས་ཡོངས་ནས་སྲུང་སྐྱོབ་ལས་དོན་བཀོད་སྒྲིག་བྱེད། བཞི་ནས་དམངས་ཁྲོད་གླུ་གར་ཀྱི་རྒྱུ་ཆ་སྔོག་འདོན་དང་དམངས་ཁྲོད་སྒྱུ་རྩལ་གྱི་ནང་དོན་རྒྱུན་འཛིན་བྱེད་ཅིང་། ས་གནས་ཀྱི་དམངས་ཁྲོད་གཞས་མཁན་དང་རྒྱ་གཞས་ལ་དགའ་པོ་བྱེད་མཁན་རྩ་འཛུགས་བྱས་ཏེ་ཤང་དང་རྫོང་ཕྱི་ནང་དུ་དམངས་ཁྲོད་གླུ་གར་འཁྲབ་སྟོན་གྱི་བྱེད་སྒོ་སྣ་མང་སྤེལ་ནས་སྟེང་དཀར་རྒྱ་གཞས་ཀྱི་ཉམས་འགྱུར་ཕྱི་ཕྱོགས་སུ་ཁྱབ་བསྒྲགས་གང་ལེགས་བྱས་ཡོད། གཞན་ཡང་དཔལ་འབྱོར་འགྲོ་སོང་གི་ཐོག་ལ་༢༠༠༣ནས་༢༠༠༤ལོའི་བར་ས་ཁུལ་རིག་གནས་ཅུས་ཀྱིས་སྔ་ཕྱིར་སྒོར་ཁྲི་ལྔ་ལྷག་དང་། ༢༠༠༥ལོ་ནས་ད་བར་མི་དམངས་ཤོག་སྒོར་འབུམ་གཅིག་ལྷག་རྒྱ་གཞས་སྒྱུ་རྩལ་སྲུང་སྐྱོབ་ཀྱི་ལས་དོན་ཆེད་དུ་འགྲོ་སོང་བཏང་ཡོད་དོ། །སྔར་ཡོད་ཀྱི་སྲུང་སྐྱོབ་ལས་དོན་གྱི་རྨང་གཞིའི་ཐོག རྒྱ་གཞས་སྒྱུ་རྩལ་སྲུང་སྐྱོབ་གོམ་གང་མདུན་དུ་སྤོ་བའི་ཆེད། འབྱུང་འགྱུར་གྱི་སྲུང་སྐྱོབ་ནང་དོན་གཙོ་བོ་འདི་ལྟར་བྱ་རྒྱུ་སྟེ། ༡ ཆེད་ལས་མི་སྣ་གཞི་རིམ་དུ་བཏང་ནས་དེང་རབས་སྔོན་ཐོན་ལག་རྩལ་བེད་སྤྱད་དེ་རྒྱ་གཞས་སྒྱུ་རྩལ་གྱི་དཔྱད་གཞིའི་རྒྱུ་ཆ་དངོས་རྣམས་སྒྲ་བརྙན་དུ་ཕབ་པ་དང་ཡིག་ཐོག་ཏུ་བཀོད་ཅིང་རིགས་དབྱེ་ལེགས་བསྒྲིགས་ཀྱི་ལས་དོན་གང་ལེགས་སྤེལ་ནས་ཅུང་འཐུས་སྒོ་ཚང་བའི་རྒྱུ་ཆ་གསོག་འཇོག་བྱ་རྒྱུ། ༢ སྒྱུ་རྩལ་དེའི་ལོ་རྒྱུས་འཕེལ་རིམ་དང་རིག་གནས་ཀྱི་དོན་སྙིང་ལ་ཞིབ་འཇུག་གཏིང་ཟབ་བྱས་ཏེ་རྒྱུན་མཐའ་བསྲིངས་ཐུབ་པའི་སྲུང་སྐྱོབ་བྱེད་ཐབས་ཆགས་པར་བྱ་རྒྱུ། ༣ ཉམས་མྱོང་ཅན་གྱི་གཞས་མཁན་རྒན་རབས་ལ་སྲུང་སྐྱོབ་དང་རྒྱབ་སྐྱོར་བྱས་ཏེ་ཁོ་ཚོའི་སྒྱུ་རྩལ་རྒྱུན་སྤེལ་གྱི་ནུས་པ་འདོན་སྤེལ་བྱ་རྒྱུ། ༤ འབྲེལ་ཡོད་འཁྲས་ཆས་བཟོ་སྐྲུན་ལག་རྩལ་སྲུང་སྐྱོབ་བྱ་རྒྱུ། ༥ ལོ་རེའི་གཞིས་རྩེ་ཇོ་མོ་གླང་མའི་སྒྱུ་རྩལ་དུས་ཆེན་དང་ལྗོངས་ཡོངས་ཀྱི་རིག་རྩལ་བྱེད་སྒོ་བརྒྱུད་སྟེང་དཀར་རྒྱ་གཞས་འཁྲབ་སྟོན་དང་ཁྱབ་བསྒྲགས་བྱ་རྒྱུ་བཅས་སོ། །