མི་རིགས་མཐུན་སྒྲིལ་རྟགས་མའི་སྒྲ་སྙན་རྡུང་ལེན་འགྲན་སྡུར་སྐབས་བདུན་པ་བདེ་བླག་ངང་མཇུག་འགྲིལ་བ།

      ཐེངས་འདིའི་འགྲན་སྡུར་ནི་མཚོ་སྔོན་ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་དང་། མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ལྷན། མཚོ་སྔོན་ཞིང་ཆེན་རིག་གནས་དང་ཡུལ་སྐོར་ཐིང་། མཚོ་སྔོན་ཞིང་ཆེན་རྒྱང་སྒྲོག་བརྙན་འཕྲིན་ཅུས། མཚོ་སྔོན་རྒྱང་སྒྲོག་བརྙན་འཕྲིན་ཁང་བཅས་ཀྱིས་མཉམ་འབྲེལ་ཐོག་གཙོ་གཉེར་དང་། མཚོ་སྔོན་བོད་སྐད་རླུང་འཕྲིན་དང་། ཨ་མདོ་བརྙན་འཕྲིན། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། མཚོ་སྔོན་ཞིང་ཆེན་མི་རིགས་སྐད་ཡིག་གློག་བརྙན་འཕྲིན་སྒྱུར་བསྐྲུན་ལྟེ་གནས་བཅས་ཀྱིས་སྒྲུབ་འགན་འཁུར་ནས2020ལོའི་སྤྱི་ཟླ6ཚེས18ཉིན་མཚོ་སྔོན་ཞིང་ཆེན་གྱི་ཟི་ལིང་འགྲན་ཁུལ་ནས་ཐོག་མར་མགོ་ཚུགས་ཤིང་། རིམ་བཞིན་དུ་མཚོ་ལྷོ་འགྲན་ཁུལ་དང་། རྨ་ལྷོ་འགྲན་ཁུལ། ཀན་སུའུ་ཞིང་ཆེན་གྱི་གཙོད་གྲོང་ཁྱེར་དང་། ཀླུ་ཆུ། སི་ཁྲོན་ཞིང་ཆེན་གྱི་རྔ་བ་བཅས་ཞིང་ཆེན་གསུམ་གྱི་འགྲན་ཁུལ་དྲུག་ནས་དམངས་ཁྲོད་ཀྱི་འགྲན་ཞུགས་རྡུང་ལེན་པ 400ལ་ཉེ་བ་འགྲན་སྡུར་ཐོག་མའི་ཁྲོད་ཞུགས། སྤྱི་ཟླ7ཚེས30ཉིན་ཐོག་མའི་འགྲན་སྡུར་གྱི་ཡོངས་འདེམས་ལེགས་པར་གྲུབ་ཅིང་འགྲན་ཞུགས་པ76བསྐྱར་འགྲན་ཁྲོད་ཞུགས། སྤྱི་ཟླ10ཚེས17ཉིན་ནས་ཚེས19ཉིན་བར་འགྲན་ཞུགས་པ60ཟི་ལིང་དུ་བསྐྱར་འགྲན་ནང་ཞུགས་པ་དང་།དེ་ལས་འགྲན་ཞུགས་པ20བདམས་ནས་རྟིང་རྩོད་འགྲན་སྡུར་ནང་ཞུགས། ཟླ11ཚེས14ཉིན་ནས་ཚེས16ཉིན་བར་རྟིང་རྩོད་འགྲན་སྡུར་ཐེངས་གསུམ་བརྒྱུད་ཀན་ལྷོ་བོད་རིགས་རང་སྐྱོང་ཁུལ་རྨ་ཆུ་རྫོང་གི་འགྲན་ཞུགས་པ་སྐལ་བཟང་བཀྲ་ཤིས་ཀྱིས་ཨང་དང་པོ་བླངས་པ་དང་། ཚེས17ཉིན་ནས་ཚེས19ཉིན་བར་གྱི་དྲ་ལམ་གྱི་འདེམ་ཤོག་འཕེན་པའི་བྱེད་སྒོའི་ཁྲོད་འགྲན་ཞུགས་པ་སྐལ་བཟང་རྣམ་གྲོལ་ལ་འདེམ་ཤོག434345ཐོབ་སྟེ་དྲ་ལམ་གྱི་ཆེས་དགའ་བསུ་ཐོབ་པའི་སྒྲན་སྙན་རྡུང་ལེན་པ་ཨང་དང་པོར་གྱུར། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་རྨ་ཆུ་རྫོང་གི་དཀོན་མཆོག་སྐྱབས་དང་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་སོག་རྫོང་གི་བསམ་ཁོ་གཉིས་ཀྱིས་ཨང་གཉིས་པ་བླངས་པ་དང་། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་གི་རྟ་མགྲིན་རྡོ་རྗེ་དང་། མཚོ་སྔོན་ཞིང་ཆེན་འབའ་རྫོང་གི་འཕགས་མོ་སྒྲོལ་མ། རྐང་ཚ་རྫོང་གི་དཔའ་ཆེན་རྡོ་རྗེ་བཅས་ཀྱིས་ཨང་གསུམ་པ་བླངས་ནས་སྡོམ་པའི་འགྲན་ཞུགས་པ་བདུན་ལ་བྱ་དགའ་རག་ཡོད་པ་རེད།       དགོང་ཚོགས་སུ་མཚོ་སྔོན་ཞིང་ཆེན་ཏང་ཨུའི་དྲིལ་སྒྲོག་པུའུ་ཡི་པུའུ་ཀྲང་གཞོན་པ་ཀའོ་པོ་དང་། མཚོ་སྔོན་ཞིང་ཆེན་དམངས་འཐུས་ཚོགས་ཆེན་སློབ་གསོ་ཚན་རིག་རིག་གནས་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་གཞོན་པ་མགོན་པོ་ཚེ་རིང་། མཚོ་སྔོན་ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ་དཔལ་ཕྱུག མཚོ་སྔོན་ཞིང་ཆེན་རིག་གནས་ཡུལ་སྐོར་ཐིང་གི་རིམ་པ་དང་པོའི་སྐོར་ཞིབ་པ་དང་ཐིང་ཀྲང་གཞོན་པ་ལོས་ཞཱ། མཚོ་སྔོན་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ་ཚེ་མགོན་དང་། གུང་གཞོན་ཚོགས་པ་མཚོ་སྔོན་ཞིང་ཆེན་ཨུ་ཡོན་ལྷན་ཁང་གི་ཧྲུའུ་ཅི་གཞོན་པ་བསོད་ནམས་བདེ་སྐྱིད། མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་བདེ་མཚོ། མཚོ་སྔོན་ཞིང་ཆེན་རྒྱང་སྒྲོག་བརྙན་འཕྲིན་ཅུའུ་ཡི་ཅུའུ་ཀྲང་གཞོན་པ་སྒྲོལ་མ་ཚེ་རིང་། མཚོ་སྔོན་རྒྱང་སྒྲོག་བརྙན་འཕྲིན་ཁང་གི་ཐེ་ཀྲང་གཞོན་པ་བློ་བཟང་སོགས་དགོང་ཚོགས་སུ་ཕེབས་པ་མ་ཟད། བྱ་དགའ་ཐོབ་མཁན་གྱི་འགྲན་ཞུགས་པ་རྣམས་ལ་བྱ་དགའ་གནང་བ་དང་། རྒན་པདྨ་ལགས་དང་རྒན་དཔལ་མགོན་རྣམ་གཉིས་ལ་ཚེ་ནོམ་གཟེངས་རྟགས་གནང་།        ཐེངས་འདིའི་འགྲན་ཞུགས་པ་རྣམས་ཀྱིས་ལག་སོར་རྩལ་གྱི་རྩེ་མོ་བཏོན་ཞིང་། གྲེ་འགྱུར་ངག་གི་གསུང་སྙན་སྒྲོག་བཞིན་དུས་རབས་གསར་པ་དང་བསམ་བློ་གསར་པ། མདུན་ལམ་གསར་པོའི་འོག་གི་བོད་ཁམས་ཡོངས་ལ་སྒྲ་སྙན་རིག་གནས་དང་སྒྲ་སྙན་སྒྱུ་རྩལ་གྱི་རྣམ་པ་གསར་པ་ཞིག་དང་འཕེལ་སྟངས་གསར་པ། འགྱུར་ལྡོག་གསར་པ་ཞིག་སྤྱན་སྔར་ངོམ་བྱུང་བ་མ་ཟད། ལོ་རྒྱུས་ཀྱི་ཆུ་རྒྱུན་རིང་དུ་བབས་པའི་སྲོལ་རྒྱུན་གྱི་སྒྱུ་རྩལ་རིག་གནས་འདི་མ་ཉམས་དར་སྤེལ་དང་ཕུན་སུམ་ཇེ་ཚོགས་སུ་གཏོང་བར་ལག་རྗེས་མི་དམན་པ་བཞག །        ད་ཐེངས་ཀྱི་འགྲན་བསྡུར་ཆེན་མོ་འདིའི་འགྲན་བསྡུར་ཧྲིལ་པོ་དྲ་རྒྱའི་དྲིལ་སྒྲོག་དང་དྲ་རྒྱའི་ཐད་གཏོང་ གཙོ་བྱས་ནས་སྤེལ་ཡོད་པ་དང་། དྲ་ཐོག་རྡེབ་ཚད་མི་ཐེངས་ཁྲི་1000ཙམ་ཟིན་ཡོད་པས། མཚོ་སྔོན་གྱི་མི་རིགས་མཐུན་ཡར་ཐོན་སྔོན་སྤེལ་ཞིང་ཆེན་གསར་འཛུགས་ལ་སྐུལ་འདེད་ཀྱི་ནུས་པ་གལ་ཆེན་ཐོན་ཡོད་པར་མ་ཟད། མཚོ་སྔོན་ཞིང་ཆེན་གྱི་སྤྱི་ཚོགས་བརྟན་བརླིང་དང་ཡུན་རིང་བདེ་འཁོད་ལ་དོན་སྙིང་གལ་ཆེན་ལྡན་པ་རེད།