མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་གིས་བོད་རབ་རྒྱན་ཆུ་ཕོ་སྟག་ལོའི་ལོ་སར་དགོང་ཚོགས«ལོ་གཡང་ཐིག་ལེ་རང་འཁྱིལ»བརྙན་ཕབ་ལེགས་འགྲུབ་བྱུང་།

        ལོ་ཟླའི་འཁོར་འགྲོས་མདུན་དུ་བསྐྱོད་པའི་དུས་ཚིགས་རེ་རེ་ནི་དགའ་སྐྱོ་ཟུང་དུ་སྡེབ་པའི་དྲན་འཛིན་གྱི་རི་མོ་རེ་རེ་ཡིན་ལ། དཔྱིད་ཀྱི་དུས་ཚིགས་ནོར་འཛིན་སྒེག་མོའི་ཕང་བ་ནས་འཛུམ་དུས་སྐྱེ་བོ་ཀུན་ཀྱང་རེ་བ་དང་སྤྲོ་དགས་ཁེངས་བཞིན་ལོ་ཟླ་གསར་བ་ཞིག་གི་དབུ་ཁྱུད་སེམས་སུ་བྲིས་ཏེ། དཔྱིད་ཐོག་མའི་རྟེན་འབྲེལ་མགོ་ནས་བསྒྲིགས་ཤིང་དུས་གསར་བའི་དགའ་སྟོན་གཡང་ལ་འདྲེན་བཞིན་ལོ་སར་གྱི་མཆོད་པ་ངག་གི་འགྱུར་ཁུགས་དང་ལུས་ཀྱི་ཉམས་འགྱུར་ལ་དྲངས་ནས་དགའ་སྟོན་གྱི་ཡོ་ལང་རྩེན་པར་མཆིས། 

        དེ་ལས་ཀྱང་ཡུལ་ལུང་མི་འདྲ་བའི་རིག་གནས་སྡེ་ཁག་དང་བརྙན་འཕྲིན་ལས་ཁུངས་སོ་སོས་གླུ་གར་གྱི་ལེགས་སྐྱེས་གྱ་ནོམ་པ་ཞིག་མནབས་ཏེ་རང་ཡུལ་ལུང་པའི་སྤུན་ཟླ་ཀུན་ལ་ལོ་སར་གྱི་འཚམས་ཞུ་གནང་གིན་འདུག་ཅིང་། མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་གིས་ཀྱང་སྤྱི་ཟླ་དང་པོའི་ཚེས་ཉི་ཤུ་ཉིན་གྱི་དགོང་མོར་བོད་རབ་རྒྱན་ཆུ་ཕོ་སྟག་ལོའི་ལོ་སར་གྱི་ལེགས་སྐྱེས་སུ«ལོ་གཡང་ཐིག་ལེ་རང་འཁྱིལ»ཞེས་པའི་གླུ་གར་བྲོ་གསུམ་གྱི་དགོང་ཚོགས་བསྡུས་ཤིང་། དེ་ནི་མཚོ་སྔོན་ཞིང་ཆེན་མི་རིགས་གློག་བརྙན་འཕྲིན་སྒྱུར་སྐྲུན་ལྟེ་གནས་དང་ཀྲུང་གུང་མཚོ་ལྷོ་ཁུལ་ཨུའི་དྲིལ་བསྒྲགས་པུའུ། མཚོ་ལྷོ་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་བཅས་ཀྱིས་གཙོ་སྒྲུབ་བྱས་ཤིང་མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་གིས་འགན་སྒྲུབ་གནང་། ཞིང་ཆེན་ཕྱི་ནང་ནས་ཡོང་བའི་ཆེད་ལས་འཁྲབ་སྟོན་པ་དང་དམངས་ཁྲོད་ཀྱི་སྒྱུ་རྩལ་པ་བརྒྱ་ལྷག་ལ་ཉེ་བས་གླུ་གར་གྱི་མཆོད་པ་དང་དམངས་སྲོལ་རིག་གནས་ཀྱི་དགའ་སྟོན་གྱ་ནོམ་པ་ཞིག་ཀུན་གྱི་སྤྱན་ལམ་དུ་ཕུལ་བ་མ་ཟད་བརྙན་རིས་ཕབ་སྐྲུན་ཀྱང་ལེགས་པར་གྲུབ། 

        འཁྲབ་སྟོན་གྱི་འཁྲབ་ཚན་མི་འདྲ་བ་ལས་ཉམས་འགྱུར་སྟོང་གིས་ཕྱུག་པའི་ཕོ་རྒོད་ཚོའི་གར་སྟབས་དང་སྒེག་ལྡན་བུ་མོའི་འཛུམ་གར། ཁུ་བྱུག་རྒྱུད་མངས་ཀྱི་སྒྲ་དབྱངས་སྙན་པར་དཀྲོལ་བའི་རྡུང་ལེན་མཐུད་ལེན་གྱི་སྙན་འགྱུར། དམངས་ཁྲོད་ཟློས་གར་གྱི་དབྱངས་རྟས་མངོན་པར་བརྒྱན་པའི་བྱིས་གླུ་ངག་གི་དྲུག་འགྱུར། ཁ་ལྕེ་བན་མ་རང་དུ་གྲོལ་བའི་བག་རས་མཐོང་བ་འཛུམ་ཤོར། གཡང་དྲུང་ལུ་གུ་རྒྱུད་ལ་བསྟར་འདྲའི་བྱིས་བྲོ་ལྡེམ་པ་རང་འགྲུབ། དེ་མིན་ངག་གི་གདངས་དབྱངས་སྤྲིན་དཀར་གྱི་བང་རིམ་བརྡོལ་བའི་ཞང་མ་ལ་དང་བཀྲ་ཤིས་མཆོད་དབྱངས་སོགས་གླུ་གར་གྱི་མཆོད་པས་ལྟད་མོ་བ་ཀུན་གྱི་མིག་དབང་ཅིག་གྱུར་ཏུ་འཕྲོག

         ལོ་སར་དགའ་སྟོན་གྱི་ཡོ་ལང་འདི་ནི་རེ་བ་དང་ཡིད་ཀྱིས་མཚོན་པའི་སྨོན་འདུན་གྱི་དྭངས་མ་དེ་ཡིན་ལ། མདུན་བསྐྱོད་ཀྱི་སྤོབས་པས་བརྟས་པའི་དྲན་སྐུལ་གྱི་འཕར་སྒྲ་དེའང་མཚོན་ངེས་པས། ཀྲུང་གུང་ཚོགས་ཆེན་ཉི་ཤུ་བ་དང་ཞིང་ཆེན་གྱི་ཏང་འཐུས་ཚོགས་ཆེན་ཐེངས་བཅུ་བཞི་བ་རྒྱལ་བའི་ངང་འཚོགས་པར་བསུ་མ་བྱེད་པ་དང་མི་དམངས་ཀྱི་བསམ་བློའི་རིག་གནས་ཀྱི་དགོས་འདོད་སྐོང་བ། སྤྱི་ཚོགས་དཔལ་ཡོན་གྱི་འཕེལ་ཁ་དར་བའི་སྨོན་འདུན་དང་དྲི་མེད་ལྷ་དར་ཡུག་ཅིག་གི་ཚབ་ཏུ་ཕུལ་བའི་ལེགས་སྐྱེས་དེ་ཡིན་ནོ། །