དྲུག་གཅིག་དུས་སྟོན་བསུ།

མཛེས་སོང་། མཛེས་སོང་།
ཉི་རྩེ་ས་ལ་ཕོགས་ནས།
སྤྲོ་སེམས་འཁོལ་བའི་ངང་དུ།
དྲུག་གཅིག་དུས་སྟོན་ཚེས་བྱུང་།
ང་ཚོ་ལོ་ཆུང་བྱིས་པ།
མཛེས་པའི་མེ་ཏོག་ཡིན་སོང་།
 
འཛོམས་སོང་། འཛོམས་སོང་།
ཟོལ་མེད་ངག་གི་མཆོད་པ།
ལྡེམ་མྱུར་གར་གྱི་སྟངས་སྟབས།
དྲུག་གཅིག་དགའ་སྟོན་བསུས་བྱུང་།
ང་ཚོ་ལོ་ཆུང་བྱིས་པ།
འཛོམས་པའི་སྐལ་བ་ཡག་སོང་།
 
སྐྱིད་བྱུང་། སྐྱིད་བྱུང་།
དགའ་སྤྲོའི་ཡོ་ལངས་ཁྲོད་དུ།
སྣང་བ་ཨ་སྔོན་སྤྲིན་དཀར།
དྲུག་གཅིག་དུས་སྟོན་ཚེས་བྱུང་།
ང་ཚོ་ལོ་ཆུང་བྱིས་པ།
སྐྱིད་པའི་རྟེན་འབྲེལ་འགྲིག་སོང་།