མཚོ་ལྷོ་ཁུལ་གྱི་བོད་ཀྱི་དམངས་གླུའི་དགོང་ཚོགས་སྐབས་ལྔ་བ།

       ཇི་སྐད་དུ«རོལ་བསྟན»ལས། འགའ་ཞིག་འགའ་ལ་མི་མཛེས་ཤིང་། །ལ་ལ་གཞན་ལ་མཛེས་མ་ཡིན། །མཁས་རྨོངས་སྐྱེས་པ་བུད་མེད་སོགས། །ཀུན་ལ་མཛེས་པ་རོལ་མོ་ཡིན། །ཞེས་པ་ལྟར། འཚོ་བའི་མཐོང་ལུགས་དང་རང་གཤིས་ཀྱི་དགའ་ཚོར་སོགས་ལ་ལྟ་བ་འདྲ་མིན་ཅི་རིགས་སུ་སྣང་ཡང་། ཀུན་ལ་ཐུན་མོང་གིས་གྲུབ་ཡོད་པ་ནི་རོལ་མོ་དང་གླུ་གར་ལ་དགའ་བ་དེ་ཡིན་ལ། དགའ་སྟོན་གྱི་ཡུལ་དུས་གང་དུ་ཡང་རོལ་མོའི་བྱེ་བྲག་དང་གར་གྱི་སྟངས་སྟབས་སྣ་ཚོགས་ཀུན་གྱི་སྤྱན་ལམ་དུ་འབུལ་བར་བྱ་བ་ནི་མིའི་རིགས་སྤྱིའི་ཐུན་མོང་གི་རང་གཤིས་ཤིག་ཡིན་པར་མ་ཟད། མིའི་ཡིད་ཁམས་གསོ་བྱེད་ཀྱི་ཐབས་ཤེས་མཆོག་ཏུ་གྱུར་བ་ཞིག་ཀྱང་ཡིན་པ་ལགས་ན། ད་རེས་མཚོ་ལྷོ་ཁུལ་གྱིས་ཕྱོགས་བཞིའི་གླུ་མཁན་རྣམས་ཀྱི་ངག་གི་གདངས་དབྱངས་ཆབ་འགག་གསེར་ལྡན་ཡུལ་དུ་གདན་དྲངས་ཏེ། རང་ཁུལ་གྱི་རིགས་གཅིག་སྤུན་ཟླ་ཀུན་ལ་ལོ་སར་གྱི་དགའ་སྟོན་དུ་ཕུལ་གྲབས་འདུག་གོ །