ཨ་མདོ་བརྙན་འཕྲིན་གྱི་བོད་རབ་རྒྱན་ཆུ་མོ་ཡོས་ལོའི་ལོ་སར་གླུ་གཞས་སྤྲོ་ཚོགས་ཆེན་མོ«ཁྲི་གཤོག་རྒྱལ་མོའི་རླབས་ཕྲེང»ཞེས་པ་བརྙན་ཕབ་ལེགས་འགྲུབ་བྱས།

       ཨ་མདོ་བརྙན་འཕྲིན་གྱི་ལོ་སར་གླུ་གཞས་སྤྲོ་ཚོགས«ཁྲི་གཤོག་རྒྱལ་མོའི་རླབས་ཕྲེང»ནི་ཉིས་སྟོང་ཉེར་གཉིས་ལོར་ཐོག་མར་སྒྲུབ་མགོ་བཙུགས་པའི་རིག་རྩལ་སྤྲོ་ཚོགས་ཆེན་མོ་ཞིག་ཡིན་ཞིང་། ལོ་རེའི་བོད་ལུགས་ལོ་སར་བསུ་བའི་གླུ་གཞས་སྤྲོ་ཚོགས་ཤིག་ཏུ་ཆེད་དམིགས་ཀྱིས་བསྟུད་མར་སྡུད་འཆར་ཡོད་པའི་རིག་རྩལ་སྤྲོ་ཚོགས་གསར་བ་ཞིག་ཀྱང་ཡིན་པ་རེད། ད་ལོའི་བོད་ཀྱི་ལོ་སར་བསུ་བའི་གླུ་གཞས་སྤྲོ་ཚོགས་ཆེན་མོ«ཁྲི་གཤོག་རྒྱལ་མོའི་རླབས་ཕྲེང»གིས“དུས་རབས་གསར་བའི་བཀའ་དྲིན་ཚོར། འཐབ་ལམ་གསར་བར་འབད་པས་བསྐྱོད།”ཅེས་པ་བརྗོད་དོན་གཙོ་བོར་བཟུང་ནས། རླབས་ཆེ་བའི་ཀྲུང་གོ་གུང་ཁྲན་ཏང་གི་ཡང་དག་པའི་དབུ་ཁྲིད་འོག རྒྱལ་ཡོངས་རིགས་སོ་སོའི་མི་དམངས་འཆམ་མཐུན་མཉམ་གནས་ངང་མཐུན་སྒྲིལ་འབད་བརྩོན་གྱིས་ཡར་རྒྱས་གོང་འཕེལ་སྙེག་པའི་དུས་རབས་གསར་བའི་སྣང་ཚུལ་ཉམས་དགའ་བ་དེ་ལ་བསྔགས་བརྗོད་དང་བསྟོད་གླུ་བླངས་ཡོད་པ་རེད།

       གླུ་གཞས་སྤྲོ་ཚོགས་ཆེན་མོ་དེ་དུས་ཆེན་གྱི་སྤྲོ་དགའི་རྣམ་པ་རབ་ཏུ་མངའ་བའི་མགོ་རྩོམ་པའི་གླུ་གཞས«བཀྲ་ཤིས་གནམ་ལོ་གསར་པ»ཞེས་པས་སྤྲོ་ཚོགས་མགོ་རྩོམ་པའི་ཡོལ་བ་ངང་གིས་ཕྱེ་བའི་མོད་ལ། ཨ་མདོ་བརྙན་འཕྲིན་གྱི་སྙན་སྒྲོན་པ་དང་མདོ་འཛིན་པ་མི་བཅུ་གསུམ་གྱིས་གྲུབ་པའི་སྤྲོ་ཚོགས་ཀྱི་མདོ་འཛིན་པ་རྣམས་ཀྱིས་རྒྱ་ཆེའི་བོད་རིགས་སྤུན་ཟླ་ཡོངས་ལ་གནམ་ལོ་གསར་ཚེས་ཀྱི་འཚམ་འདྲི་དང་བཀྲ་ཤིས་ཁ་གཡང་གི་སྨོན་ཚིག་བརྗོད་ནས་དགོང་ཚོགས་ཀྱི་སྒོ་འཕར་གཞི་ནས་ཕྱེ་སྟེ། རྒྱལ་ཡོངས་ལ་མིང་དུ་གྲགས་པའི་གླུ་མ་འཇམ་དབྱངས་སྒྲོལ་མ་དང་། བཀྲ་ཤིས་ཕུན་ཚོགས། བསྟན་འཛིན་ཉི་མ། གཡང་ཕྱུག་མཚོ། དབྱངས་ཅན་ལྷ་མཛེས། བཀྲ་ཤིས་ཉི་མ། པདྨ་བསམ་འགྲུབ་སོགས་དང་། དེ་མིན་བོད་འབྲེལ་ས་གནས་ཁག་ནས་ཆེས་དགའ་བསུ་བྱེད་པའི་གླུ་བ་སྒྲོལ་མ་སྐྱབས་དང་། བདེ་སྐྱིད་ཚེ་རིང་། བསམ་འགྲུབ་ཚེ་རིང་། གདུགས་དཀར་ཡག རྟ་མགྲིན་ཚེ་རིང་། བསམ་ཁོ། བསོད་བཀྲ། ཨ་བསམ། སངས་རྒྱས་ཚེ་རིང་སོགས་དང་། གཞན་ན་གཞོན་གཞས་མ་མིང་གྲགས་ཅན་ཚེ་དབང་ལྷ་མོ་དང་། ནམ་མཁའ་མཚོ། ལྷ་སྐྱིད། རིག་འཛིན་སྒྲོལ་མ། ཀླུ་མོ་མཚོ། དེ་མིན་ཐང་དཀར་རོལ་ཚོགས་དང་ཉི་མ་རོལ་ཚོགས། སམྦྷོཊ་ཚན་སྡེབ། ཁ་བའི་མེ་ཏོག་ཚན་སྡེབ། དུང་དཀར་རོལ་ཚོགས་སོགས་ལས་གྱུར་བའི་བོད་འབྲེལ་ཞིང་ཆེན་སོ་སོ་ནས་ཡོང་བའི་གཞས་པ་གཞས་མ་དྲུག་ཅུ་ལྷག་སྔ་ཕྱིར་གར་སྟེགས་ལ་བུད་ནས་མཚོ་ཆེན་ཁྲི་ཤོར་རྒྱལ་མོའི་རླབས་ཕྲེང་གི་དྭངས་གཙང་ལ་བརྒྱུས་པའི་སྙན་མོ་གླུ་ཡི་འགྱུར་ཁུགས་ཀྱིས་བོད་རབ་རྒྱན་ཆུ་མོ་ཡོས་ལོའི་གནམ་ལོ་གསར་ཚེས་ལ་སྙན་འགྱུར་ངག་གི་མཆོད་པ་ཕུལ་ཡོད་པ་རེད།

       ད་ལོའི་བོད་ཀྱི་ལོ་སར་བསུ་བའི་གླུ་གཞས་སྤྲོ་ཚོགས་དེ་བོད་རྩིས་ཀྱི་གནམ་གང་དགོང་མོ་སྟེ། སྤྱི་ཟླ2པའི་ཚེས20དགོང་མོའི་ཆུ་ཚོད20:00སྟེང་། ཨ་མདོ་བརྙན་འཕྲིན་འཁོར་སྐར་འཕྲིན་ལམ་དང་ཨ་མདོ་བརྙན་འཕྲིན་གྱི་སྐད་འཕྲིན་བརྙན་ལམ། ཨ་མདོ་བརྙན་འཕྲིན་གྱི་དུས་དབྱངས་འཕྲིན་སྟེགས་བཅས་ནས་དུས་མཉམ་དུ་གཏང་རྒྱུ་ཡིན་པས་དུས་ལྟར་གཟིགས་པར་དགའ་བསུ་ཞུ།