ཞོལ་ལུང་རྒྱུད་དབྱངས།

       རྒྱུད་དབྱངས་ཞེས་བྱ་བ་དེ་ནི་སྡེ་རོང་རྫོང་ཞོལ་ལུང་ཤང་གི་ཁོངས་སུ་སྔར་ནས་དར་བའི་དམངས་ཁྲོད་གླུ་གར་གྱི་རྣམ་པ་ཞིག་ཡིན་པ་དང་། གང་དེ་མིག་སྔར་སི་ཁྲོན་ཞིང་ཆེན་རིམ་པའི་མངོན་མིན་རིག་གནས་ཤུལ་བཞག་གི་ཁོངས་སུ་ཚུད་ཡོད། རྒྱུད་དབྱངས་ཀྱི་འཁྲབ་སྟོན་རྣམ་གྲངས་ནང་རྒྱུད་དབྱངས་དཀྲོལ་ལེན་དང་། རྒྱུད་དབྱངས་ཞབས་བྲོ། རྒྱུད་དབྱངས་མཛའ་གཞས་སོགས་ཡོད་ཅིང་། རྒྱུད་དབྱངས་ཀྱི་ཁྱད་ཆོས་མངོན་གསལ་དོད་ཤོས་ནི་རྒྱུད་དབྱངས་གླུ་གཞས་ལེན་པའམ་ཞབས་བྲོ་འཁྲབ་སྐབས་རམ་དཀྲོལ་རོལ་ཆར་ཡུལ་དེའི་ཐུན་མོང་མ་ཡིན་པའི་སྒྲ་སྙན་ཞིག་སྤྱོད་པ་དེ་རེད། ཡུལ་དེའི་སྒྲ་སྙན་དེ་བོད་ཀྱི་རྒྱུད་དཀྲོལ་རོལ་ཆ་སྒྲ་སྙན་གྱི་ཁོངས་སུ་གཏོགས་པ་གང་ཞིག དེའི་མིང་དུའང་ཡུལ་དེའི་མི་རྣམས་ནས་སྒྲ་སྙན་ཞེས་འབོད། ཡིན་ནའང་སྒྲ་སྙན་དེའི་བཟོ་དབྱིབས་གྲུབ་གཞི་དང་། སྒྲ་སྒྲིག་སྟངས། སྒྲ་སྐྱེད་ཁྱད་ཆོས། རོལ་དབྱངས་ཀྱི་ཉམས་ཆོས་སོགས་གང་ཅིའི་ཐད་ནས་དབུས་གཙང་དང་ཨ་མདོ་སོགས་སུ་དར་བའི་སྒྲ་སྙན་དང་ཁྱད་པར་ཆེན་པོ་འདུག        གོང་དུ་སྐལ་བཟང་ནོར་བུ་ལགས་ནས་སྒྲ་སྙན་དེ་བཟོ་བར་ཤིང་མ་གཅིག་ཤིང་སྣ་གསུམ་དགོས་ཞེས་པ་དེ་ནི། སྒྲ་སྙན་དེའི་ལྷུ་ལག་ཁག་ཤིང་མི་འདྲ་བ་སྤྱད་ནས་བཟོ་བ་སྟེ། ཤིང་སྟག་མ་དང་། ཤུག་པ། གླང་མ་བཅས་སྤྱད་ནས་བཟོ་བའི་དོན་དང་། དབྱིབས་མ་གཅིག་དབྱིབས་སྣ་གསུམ་ཞེས་པ་ནི། སྒྲ་སྙན་དེའི་གྲུབ་ཆ་ཁག་གི་བཟོ་དབྱིབས་མི་འདྲ་བར་གཞིགས་ནས་མིང་མི་འདྲ་བ་བཏགས་པ་ཞིག་སྟེ། དེ་ཡང་རྫིང་ཆེན་གྱི་མིང་དུ་རྒྱ་མཚོ་ཆེན་མོའི་ཆགས་སྟངས་ཞེས་བྱ་བ། རྫིང་ཆུང་གྲུ་བཞི་ནར་རིང་དེའི་སྨད་ཆའི་གཞོགས་གཉིས་ཀྱི་ཤིང་སྒོར་དབྱིབས་དེར་ས་གཞི་གསེར་གྱི་མེ་ལོང་གི་ཆགས་སྟངས་ཞེས་ཟེར་བ། རྫིང་ཆུང་གྲུ་བཞི་ནར་རིང་གི་སྟོད་ཆའི་གཞོགས་གཉིས་ཀྱི་ཤིང་རྩེ་སྙུང་བཞི་པོར་ས་གཞི་པདྨ་འདབ་བརྒྱད་ཀྱི་ཆགས་སྟངས་ཞེས་ཟེར་བའི་དོན་ཡིན་པ། ད་དུང་སྒྲ་མ་གཅིག་སྒྲ་སྣ་གསུམ་ཞེས་པ་དེ་ནི་སྒྲ་སྙན་དེའི་རྒྱུད་སྐུད་ཀྱི་སྒྲ་མཐོ་དམན་ལ་དབྱེ་ན་ཕོ་སྐད་དང་། མོ་སྐད། འབྲིང་སྐད་ཅེས་པ་སྟེ། སྒྲ་དམའ་བ་དང་། མཐོ་བ། འབྲིང་བ་བཅས་ཡོད་པའི་དོན་ཡིན།