མཚོ་ལྷོ་ཁུལ་གྱིས“ཡུས་ལུང་བུམ་པ”རྟགས་མའི་བོད་ཀྱི་ལ་གཞས་འགྲན་བསྡུར་གྱི་བྱ་འགུལ་སྤེལ།

       ཟླ12པའི་ཚེས18ཉིན་གྱི་དགོང་མོའི་དུས་ཚོད་བརྒྱད་ཀྱི་སྟེང་། མཚོ་ལྷོ་ཁུལ་གྱི“ཡུས་ལུང་བུམ་པ”རྟགས་མའི་བོད་ཀྱི་ལ་གཞས་འགྲན་བསྡུར་གྱི་མགོ་རྩོམ་མཛད་སྒོ་དེ་གུང་ཧོ་རྫོང་མདའ་འཕེན་ཁང་དུ་བསྡུས་ཤིང་། རྫོང་ལྔ་ནས་ཡོང་བའི་གླུ་བ་གླུ་མ100ལྷག་ཐེངས་འདིའི་འགྲན་བསྡུར་ལ་ཞུགས་ཡོད། ཁོ་ཚོའི་སྙན་འཇེབས་ཀྱི་འགྱུར་ཁུགས་རེ་རེ་ལས་བོད་ཀྱི་དམངས་གླུའི་སྒྱུ་རྩལ་གྱི་རིན་ཐང་རྟོགས་ཐུབ།

       ཐེངས་འདིའི་འགྲན་བསྡུར་ལས་བོད་འབྲེལ་ས་ཁུལ་གྱི་སྲོན་རྒྱུན་ལ་གཞས་སྒྱུ་རྩལ་གྱི་རིན་ཐང་མངོན་པར་བཏོད་པ་མ་ཟད། ས་གནས་སོ་སོའི་དམངས་ཁྲོད་གླུ་གཞས་ཀྱི་འཕེལ་རྒྱས་དང་མི་རིགས་སོ་སོའི་རིག་གནས་རྒྱུན་འཛིན། ཀྲུང་ཧྭ་མི་རིགས་ཀྱི་ཕུལ་བྱུང་རིག་གནས་དང་སྔོན་ཐོན་རིག་གནས་དར་སྤེལ་བཅས་ལ་སྐུལ་འདེད་བཏང་སྟེ། མི་དམངས་མང་ཚོགས་ཀྱི་རིག་གནས་ཀྱི་འཚོ་བ་ཕུན་སུམ་ཇེ་ཚོགས་སུ་གཏོང་བ་དང་ས་གནས་རིག་གནས་ཀྱི་སྤུས་རྟགས་བཏོད་པ། ཕུལ་དུ་བྱུང་བའི་གཟུགས་འདས་ཤུལ་བཞག་རིག་གནས་སྲུང་སྐྱོང་དང་དར་སྤེལ་གཏོང་བར་དོན་སྙིང་གལ་ཆེན་ལྡན་ནོ། །