ཁམས་པའི་བརྙན་འཕྲིན་ཁང་གི་བོད་ཀྱི་ལོ་སར་སྤྲོ་ཚོགས་བརྙན་ཕབ་ལེགས་གྲུབ་བྱུང་།

       སྤྱི་ཟླ1པོའི་ཚེས13ཉིན། སི་ཁྲོན་རྒྱང་བསྒྲགས་བརྙན་འཕྲིན་ཁང་ཁམས་པའི་བརྙན་འཕྲིན་དང་མི་རིགས་རླུང་འཕྲིན། ཀྲུང་གུང་གསེར་རྟ་རྫོང་ཨུ། གསེར་རྟ་རྫོང་མི་དམངས་སྲིད་གཞུང་གིས་མཉམ་འབྲེལ་སྒོས་གཙོ་སྒྲུབ་བྱས་པའི་བོད་རབ་རྒྱན་ཤིང་ཕོ་འབྲུག་ལོའི་ལོ་སར་སྤྲོ་ཚོགས«གཡུ་འབྲུག་དགྱེས་སྟོན»ཞེས་པ་སི་ཁྲོན་རྒྱང་བསྒྲགས་བརྙན་འཕྲིན་ཁང་གི་འཁྲབ་གཏོང་ཁང་ནས་བརྙན་ཕབ་ལེགས་གྲུབ་བྱུང་།

       ཐེངས་འདིའི་ལོ་སར་སྤྲོ་ཚོགས་ཐོག དུས་རབས་གསར་པའི་མཐོ་སྒང་གི་ཡར་ངོའི་ཟླ་ལྟར་འཕེལ་བའི་བདེ་སྐྱིད་འཚོ་བ་མཚོན་པ་དང་། སྣ་མང་ཕུན་སུམ་ཚོགས་པའི་མི་རིགས་རིག་གནས་དང་དེང་རབས་སྒྱུ་རྩལ་མཉམ་འདྲེས་བྱས་ཤིང་། དུས་རབས་ཀྱི་འགྲོས་དང་བསྟུན་ཞིང་སྲོལ་རྒྱུན་རིག་གནས་ཀྱི་བཅུད་ཀྱིས་བལྟམས་ཡོད། ལོ་སར་སྤྲོ་ཚོགས་ཐོག་ཁམས་པའི་བརྙན་འཕྲིན་ཁང་གི་མདོ་འཛིན་པ་བཞིས་གཙོ་བྱས་པ་དང་། བོད་ལྗོངས་བརྙན་འཕྲིན་ཁང་དང་ཨ་མདོ་བརྙན་འཕྲིན་ཁང་། སི་ཁྲོན་རྒྱང་བསྒྲགས་བརྙན་འཕྲིན་ཁང་བོད་སྐད་རླུང་འཕྲིན་གྱི་མདོ་འཛིན་པ། སི་ཁྲོན་བརྙན་འཕྲིན་ཁང་གི་མདོ་འཛིན་པ་བཅས་ཀྱིས་རྒྱ་བོད་དབྱིན་གསུམ་གྱི་ལམ་ནས་གཙོ་སྐྱོང་བྱས་ཡོད་ལ། སྙན་མོའི་ངག་དང་ལྡེམ་མྱུར་གར་གྱི་སྟངས་སྟབས་ཁྲོད་ནས་གནམ་ལོ་གསར་པར་བསུ་མ་ཞུས།

       དགའ་སྟོན་རྟེན་འབྲེལ་འགྲིག་པའི་ཉིན་འདི་ལ། མཚོ་སྔོན་ཞིང་ཆེན་མཚོ་བྱང་གི་ཨོ་རྩལ་འགྲན་ཚོགས་གཉིས་ཀྱི་གསེར་གྱི་བྱ་དགའ་ཐོབ་མཁན་ཆོས་དབྱིངས་སྐྱིད་དང་། བོད་ལྗོངས་ཆབ་མདོའི་རྒྱལ་སྨན་སློབ་དཔོན་ཆེན་མོ་གོ་འཇོ་དབང་འདུས། སི་ཁྲོན་དཀར་མཛེས་ཀྱི་ཚན་རིག་པ་ཚེ་རིང་སྒྲོལ་མ་སོགས་དུས་རབས་ཀྱི་སྟོབས་ཤུགས་མཚོན་པའི་རླབས་ཆེན་གྱི་མི་སྣ་གསུམ་གྱིས་བརྙན་ལམ་ནས་གནམ་ལོ་གསར་པའི་བཀྲ་ཤིས་སྨོན་འདུས་ཞུ་རྒྱུ་རེད། དེ་མིན་ཤེར་བསྟན་དང་ཚེ་དབང་ལྷ་མོ། འཇམ་དབྱངས་སྒྲོལ་མ། སྒྲོལ་མ་སྐྱབས། རིག་དགའ། དར་མཚོ། ལྷ་སྐྱིད་སོགས་བོད་ཀྱི་གཞས་པ་གཞས་མ་མང་པོས་གླུ་ངག་གི་མཆོད་པ་འབུལ་བ་དང་། ལྷག་པར་དུ་རྒྱལ་ཕྱི་ནང་ལ་སྙན་གྲགས་ཀྱི་བ་དན་འཕྱོ་བའི་བོད་ཀྱི་གཞོན་སྐྱེས་ལི་ཐང་བསྟན་འཛིན་གྱིས་ཀྱང་ལོ་སར་གྱི་ལེགས་སྐྱེས་གྱ་ནོམ་པ་གྲ་སྒྲིག་བྱས་འདུག །མདོ་འཛིན་པ་གྲགས་ཅན་བྱམས་པ་རྡོ་རྗེ་དང་དྲ་གྲགས་ཚོགས་པ་ཨ་ཁུ་བསྟན་པ་བཅས་ཀྱིས་ཁ་ཤགས་ཀྱི་ལམ་ནས་མཐོ་སྒང་གི་འཕོ་འགྱུར་མཚོན་ཡོད། ལྷག་པར་གསེར་རྟ་དང་རྨ་ཆུ་སོགས་བོད་འབྲེལ་ས་ཁུལ་གྱི་ཕུལ་བྱུང་སྲོལ་རྒྱུན་སྒྱུ་རྩལ་གང་མང་ཞིག་ཀྱང་སྐྱེས་སུ་འབུལ་བ་རེད།

       རྒྱུས་ལོན་བྱས་པ་ལྟར་ན། ཐེངས་འདིའི་ལོ་སར་སྤྲོ་ཚོགས་ཐོགXRདངARསོགས་རྟོག་བཟོའི་མཐོང་ཚོར་ལག་རྩལ་དང3Dལག་རྩལ་སོགས་བེད་སྤྱོད་བཏང་ནས། སྲོལ་རྒྱུན་གྱི་གླུ་གར་ལ་དེང་རབས་ཀྱི་གཤོག་པ་བསྩལ་བ་རེད། དེ་ཡང་ཁམས་པའི་བརྙན་འཕྲིན་ཁང་གི་བོད་རབ་རྒྱན་ཤིང་ཕོ་འབྲུག་ལོའི་ལོ་སར་སྤྲོ་ཚོགས«གཡུ་འབྲུག་དགྱེས་སྟོན»ཞེས་པ་དེ་ཉིད་སྤྱི་ཟླ2པའི་ཚེས10ཉིན་སྟེ། ལོ་སར་ཚེས་གཅིག་གི་སྔ་དྲོའི་ཆུ་ཚོད་དགུ་པའི་ཐོག་ཁམས་པའི་བརྙན་འཕྲིན་ཐོག་ནས་གཏང་རྒྱུ་རེད།