«ཛམ་ལྷ་དགྱེས་པའི་གཡང་ལོ»ཞེས་པ་ཕབ་སྐྲུན་ལེགས་འགྲུབ་བྱུང་།

       ཟླ1ཚེས22ཉིན་གྱི་དགོང་མོར། རྔ་བའི་བོད་སྐད་འཕྲིན་ལམ་གྱི2024ལོའི་ལོ་སར་དགོང་ཚོགས«ཛམ་ལྷ་དགྱེས་པའི་གཡང་ལོ»ཞེས་པ་འཛམ་ཐང་རྫོང་གི་སྒྱུ་རྩལ་ཕོ་བྲང་དུ་ཕབ་སྐྲུན་ལེགས་འགྲུབ་བྱུང་། ཞིང་ཆེན་ཕྱི་ནང་ནས་ཕེབས་པའི་འཁྲབ་སྟོན་པ་དང་དམངས་ཁྲོད་སྒྱུ་རྩལ་བ68ཀྱིས་ལྟད་མོ་བ་དག་ལ་ཁྱད་ཆོས་ལྡན་པའི་རིག་གནས་ཀྱི་ལྟད་མོ་གཟབ་རྒྱས་ཤིག་ལོ་སར་གྱི་ལེགས་སྐྱེས་སུ་ཕུལ།

       འཁྲབ་སྟོན་ཡུལ་དངོས་སུ། དབུ་འབྱེད་གླུ་གར་བཀྲ་ཤིས་པའི་འབྲུག་ལོ་ཞེས་པས་དགོང་ཚོགས་ཀྱི་ཡོལ་བ་ཡོངས་སུ་ཕྱེས། ཐེངས་དེའི་དགོང་ཚོགས་ཀྱི་བརྗོད་དོན་ནི«ཛམ་ལྷ་དགྱེས་པའི་གཡང་ལོ»ཞེས་པ་ཡིན་ལ། སྐྱེས་པའི་ཞབས་བྲོ་ཛམ་བྷ་ལའི་རེ་སྨོན་དང་རྡུང་ལེན་མཉམ་ལེན་བཀྲ་ཤིས་པའི་ལོ་སར། བུད་མེད་ཀྱི་ཞབས་བྲོ་ལྕི་ཁུར་བུ་མོ། ཕོ་མོའི་མཉམ་བྲོ་སེམས་ཀྱི་རི་མོ་སོགས་འཛམ་ཐང་གི་ཁྱད་ཆོས་མངོན་པར་གསལ་བའི་ལེ་ཚན་རེ་རེ་འཁྲབ། ས་གནས་ཀྱི་ཁྱད་ཆོས་ལྡན་པའི་གླུ་བྲོ་དང་དམངས་གླུ། ཟློས་གར་སོགས་མི་རིགས་ཀྱི་དམངས་ཁྲོད་སྒྱུ་རྩལ་སྲོག་ཤིང་དུ་བཟུང་ཞིང་བོད་ཀྱི་དམངས་ཁྲོད་སྒྱུ་རྩལ་གྱི་སྣ་མང་རང་བཞིན་དང་ཕུན་སུམ་ཚོགས་པའི་ཐུན་མིན་གྱི་འགུག་ཤུགས་ངོམ་སྟེ། འཛམ་ཐང་གིས་མི་རིགས་སོ་སོའི་མི་དམངས་དང་མཉམ་དུ་དུས་རབས་ཀྱི་མདུན་སྐྱོད་གླུ་རུ་བླངས་ཤིང་། ཏང་གི་དབུ་ཁྲིད་འོག་དྲིན་ཚོར་ཡར་བརྩོན་དང་བསམ་ཤེས་འཆམ་མཐུན། ལས་ལ་བརྩོན་པའི་དུས་རབས་ཀྱི་རང་མདངས་བཅས་མཚོན་པར་བྱས།

       ལྟད་མོ་བའི་དགའ་འབོད་ཁྲོད་བོད་ཀྱི་གླུ་བ་བཀྲ་ཤིས་ཉི་མ་སོགས་གར་སྟེགས་སུ་ཕེབས་པ་དང་། སྙན་པའི་གླུ་སྐད་རེ་རེས་ལྟད་མོ་བ་ཚོའི་ཡིད་སེམས་འཕྲོག་པར་བྱས་ནས་ཤིང་། རོལ་མོའི་རླབས་རྒྱུན་ཁྲོད་ཡུལ་དངོས་སུ་དགའ་འབོད་ཀྱེས་ཁེང་པར་བྱས།

       རྒྱུས་ལོན་པ་ལྟར་ན། ཐེངས་དེའི་དགོང་ཚོགས་འཚོགས་ཆེད། འཛམ་ཐང་རྫོང་གིས་ད་ལོའི་ཟླ་དང་བོའི་ཚེས་མགོ་ནས་ལས་བཟོ་བ་རྩ་འཛུགས་བྱས་ཤིང་། བརྗོད་དོན་ཛམ་ལྷ་དགྱེས་པའི་གཡང་ལོ་ལ་དམིགས་ནས་རྔ་བ་ཁུལ་གསར་འགྱུར་སྨྱན་སྦྱོར་ལྟེ་གནས་ཀྱིས་ནན་ཏན་སྒོས་ལེ་ཚན་ཇུས་འགོད་དང་གླུ་བ་གདན་འདྲེན། བརྩམས་ཆོས་ལེགས་འདེམས། སྔོན་སྦྱོང་ཕབ་སྐྲུན་སོགས་བྱས་ནས་ལོ་སར་གྱི་ལེགས་སྐྱེས་གྱ་ནོམ་པ་ཞིག་ཕུལ་རྒྱུ་རེད།