མཚོ་ལྷོའི་གླུ་བ་ནོར་བུ་དབང་རྒྱལ་གྱིས་ཨང་གཉིས་པའི་བྱ་དགའ་བླངས།

       ཉིན་ཤས་སྔོན། འབའ་ཡུལ་རྫོང་རུ་རྟགས་མའི་བོད་ཀྱི་སྒྲ་སྙན་རྡུང་ལེན་འགྲན་སྡུར་སྐབས་བརྒྱད་པའི་བྱ་དགའ་གནང་བའི་དགོང་ཚོགས་འབའ་ཐང་ལུ་གུའི་རྩེད་ཐང་དུ་བསྡུས། ཐེངས་འདིའི་འགྲན་བསྡུར་ནི་མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དང་ཨ་མདོ་བརྙན་འཕྲིན། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། ཐུན་ཏེ་རྫོང་ཨུ་དང་རྫོང་མི་དམངས་སྲིད་གཞུང་བཅས་ཀྱིས་མཉམ་འབྲེལ་སྒོས་བསྒྲུབས་པ་ཞིག་ཡིན།

       ད་ཐེངས་ཀྱི་འགྲན་བསྡུར་ནི་གཞི་ཁྱོན་སྔར་ལས་ཆེ་ཞིང་ཤུགས་རྐྱེན་སྔར་ལས་ཆེ་བས་བོད་འབྲེལ་ས་ཁུལ་ཁག་ནས་ཕེབས་པའི་འགྲན་ཞུགས་པ་ལྔ་བརྒྱ་ལྷག་འདུས་ཡོད། དེའི་ནང་མཚོ་ལྷོའི་གླུ་བ་ནོར་བུ་དབང་རྒྱལ་གྱིས་ལག་སོར་མོའི་རྩལ་དྲུག་དང་ངག་སྙན་མོའི་འགྱུར་ཁུག དེ་མིན་རང་གི་ལྷན་སྐྱེས་སུ་མངའ་བའི་ཐུན་མིན་ཁྱད་ཆོས་སོགས་གར་སྟེགས་ལས་མངོན་པར་བྱས་ཏེ་ཛ་དྲག་གི་འགྲན་བསྡུར་རབ་དང་རིམ་པ་བརྒྱུད་མཇུག་མཐར་བྱ་དགའ་ཨང་གཉིས་པ་ཐོབ།

       འདི་ནི་གླུ་བ་ནོར་བུ་དབང་རྒྱལ་གྱིས་ཡུན་རིང་འབད་བརྩོན་དང་དོན་གཉེར་ལྷོད་མེད་བྱས་པའི་གྲུབ་འབྲས་ལས་མངོན་པའི་འབྲས་བུ་ཡིན་པ་གདོན་མི་ཟ་ལ། མཚོ་ལྷོ་ཁུལ་མི་རིགས་གླུ་གར་ཚོགས་པའི་ཤེས་ལྡན་མི་སྣ་གསོ་སྐྱོང་ཐད་ཐོབ་པའི་གྲུབ་འབྲས་མངོན་གསལ་དོད་པོ་དང་སྒྱུ་རྩལ་གྱི་སྟོབས་ཤུགས་གང་ལེགས་ལྡན་པ་མངོན་པར་མཚོན་ཡོད། འབྱུང་འགྱུར་མཚོ་ལྷོ་ཁུལ་མི་རིགས་གླུ་གར་ཚོགས་པར་ནོར་བུ་དབང་རྒྱལ་ལྟ་བུའི་ཕུལ་བྱུང་འཁྲབ་སྟོན་པ་སྔར་བས་མང་པོ་གསོ་སྐྱོང་དང་མཚོ་ལྷོ་ཁུལ་གྱི་མི་རིགས་གླུ་གར་བྱ་གཞག་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་རྒྱུར་རྒྱུན་ཆད་མེད་པར་སྐུལ་འདེད་བཏང་ཡོད་དོ། །