ཉེ་སྔོན་ཆེད་མཁས་པ་སྐོར་ཞིག་གིས་རིག་སྨོན་གྲོང་རྡལ་འཁྱམས་རུ་རབ་འོག་མ་སྡེ་བར་གསར་རྙེད་བྱུང་བའི་གནའ་བོའི་བྲག་བརྐོས་རི་མོར་ཡུལ་དངོས་བརྟག་དཔྱད་བྱས།

        སྤྱི་ལོ༢༠༢༢ལོའི་ཟླ༧ཚེས༢༣ཉིན། ཧི་པའེ་དགེ་ཐོན་སློབ་ཆེན་གྱི་དགེ་རྒན་ཆེན་མོ་འཛམ་གླིང་བྲག་རིས་ཨུ་ཡོན་ལྷན་ཁང་གི་ལས་འཛིན་ཨུ་ཡོན་ཐང་ཧུའེ་ཧྲང་། སི་ཁྲོན་སློབ་ཆེན་ལོ་རྒྱུས་རིག་གནས་སློབ་གླིང་གི་དགེ་རྒན་ཆེན་མོ་ལེ་ཡུང་ཞན། བོད་སྡོད་ཀྲུང་དབྱང་བརྙན་འཕྲིན་ལས་ཁུངས་ཀྱི་ཀྲན་ཀྲང་ཁྲང་ཁྲིན་ཆིན། ཡུལ་ཤུལ་ལོ་རྒྱུས་རིག་གནས་ཞིབ་འཇུག་གླིང་གི་འཇམ་དབྱངས་ཉི་མ། མཚོ་སྔོན་ནང་བསྟན་སློབ་གྲྭ་ཆེན་མོའི་སློབ་སྟོན་ཁང་གི་ཀྲུའུ་རེན་སྒོ་མེ་མགོན་པོ་ཚེ་རིང་སོགས་གུང་ཧོ་རྫོང་ནོར་སྲིད་ཅུའུ་ཡི་ནོར་བུ་ལྷུན་གྲུབ་ཀྱིས་མཐུན་རྐྱེན་དང་རོགས་འདེགས་བྱས་པ་དང་། ས་གནས་དེ་གའི་ཞིབ་འཇུག་སློབ་མ་རྨོག་རུ་མཁར་རྒྱལ་བྱམས་ཀྱི་སྣེ་ཁྲིད་འོག་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་རིག་སྨོན་གྲོང་རྡལ་འཁྱམས་རུ་རབ་འོག་མ་སྡེ་བའི་རུ་ཁག་གསུམ་པ་དང་ལྔ་པར་བསྐྱོད་དེ་གནས་དེར་གསར་རྙེད་བྱུང་བའི་གནའ་བོའི་བྲག་བརྐོས་རི་མོ་ཁག་ཅིག་ལ་ཡུལ་དངོས་ནས་བརྟག་དཔྱད་དང་ཞིབ་འཇུག་བྱས།

        གུང་ཧོ་རྫོང་གི་བྲག་བརྐོས་རི་མོ་ནི་གསེར་ཆེན་རི་བོའི་ལྷོ་ཕྱོགས་ཀྱི་གུང་ཧོ་གཞོང་ས་དང་། མཚོ་སྔོན་པོའི་འགྲམ་རྒྱུད་སོགས་ཀྱི་ཆུ་བོའི་བཞུར་རྒྱུད་དང་རི་ཁུག་སོགས་སུ་ཁྱབ་ཡོད། ཉེ་བའི་ལོ་འགའི་རིང་གནའ་དཔྱོད་རིག་པས་རྟོག་དཔྱོད་དང་བསྟུན་ཏེ། རང་རེའི་གུང་ཧོ་རྫོང་གི་མངའ་ཁོངས་སུ་བྲག་བརྐོས་རི་མོའི་ས་ཚིགས5ལྷག་ཤེས་རྟོགས་བྱུང་སྟེ་ཁྱབ་བསྒྲགས་བྱས་ཡོད། 

        ཐེངས་འདིའི་རྟོག་ཞིབ་བྱ་ཡུལ་གྱི་བྲག་བརྐོས་རི་མོ་ནི་རྨ་ཆུའི་མགོ་ཁུངས་དང་འབབ་རྒྱུད་ཀྱི་བྲག་བརྐོས་རི་མོའི་གྲས་སུ་གཏོགས་ཤིང་། བྱང་ཕྱོགས་འབྲོག་པའི་རིག་གནས་ཀྱི་ཁྱད་ཆོས་དང་འབྲི་ཆུའི་མགོ་ཁུངས་དང་འབབ་རྒྱུད་ཀྱི་བྲག་བརྐོས་རི་མོའི་ཁྱད་ཆོས་དང་གཞི་རྩའི་ཆ་ནས་གཅིག་མཐུན་དུ་གྲུབ་ཡོད། ནང་དོན་ལ་གཙོ་བོ་འབྲོང་གཡག་དང་ཤྭ་བ། རྔོན་ལས་བྱེད་པའི་རྣམ་པ་གཙོ་བོར་མཚོན་ཡོད། རིག་དངོས་འདི་དག་ནི་མིའི་རིགས་ཀྱི་རིག་གནས་འཕོ་འགྱུར་ལ་ཞིབ་འཇུག་བྱེད་པར་གལ་ཆེའི་ཁུངས་སྣེ་ཞིག་ཡིན་པ་དང་། ལོ་རྒྱུས་རིག་པ་དང་མཛེས་དཔྱོད་རིག་པའི་རིན་ཐང་སོགས་ལྡན་པར་མ་ཟད། རིག་དངོས་སྲུང་སྐྱོབ་དང་ཞིབ་འཇུག་གི་རིན་ཐང་ཡང་ཆེར་ལྡན་ཡོད། གཞན་བྲག་བརྐོས་རི་མོ་འདི་དག་བྱུང་བའི་དུས་ཚོད་ཀྱི་ཆ་ནས་ཕལ་ཆེར་ལོ་༢༥༠༠ནས༣༠༠༠ཡས་མས་སུ་བྱུང་བར་ཚོད་དཔག་བྱེད་བཞིན་ཡོད་ཅེས་ཞིབ་འཇུག་པ་རྨོག་རུ་མཁར་རྒྱལ་བྱམས་ཀྱིས་བརྗོད།