འབའ་རྫོང་ནག་བཟའི་བྲག་བརྐོས་རི་མོ་གླེང་བ།

དང་པོ། འབའ་རྫོང་ནོར་ལུང་ཞེས་པའི་གནས་ཡུལ་ངོ་སྤྲོད། གཉིས་པ། བྲག་བརྐོས་རི་མོའི་གནས་ཡུལ་དང་དེ་རྣམས་ཀྱི་སྤྱིའི་རྣམ་པ།
       ས་བབ་ཀྱི་མཐོ་ཚད་ལ་མཚོ་འཕགས་སྨི3430གིས་ཆོད་པའི་འབའ་རྫོང་ནག་བཟའ་སྡེ་བའི་ནོར་ལུང་མདོའི་ཚན་པ་ལྔ་ཡིས་གྲུབ་པའི་བྲག་བརྐོས་རི་མོ་འདི་ནི། དུས་ནམ་ཞིག་ལ་དབྱར་ཁའི་ཆུ་ལོག་ཅིག་གིས་ས་རྡོ་རྣམས་ཆུས་བྲུས་ཏེ། མཐོ་ཚད་ལ་རྨིད་ལྔ་དྲུག་ཙམ་གྱི་ས་འོག་ནས་ཕྱིར་མངོན་པའི་བྲག་བརྐོས་རི་མོ་ཁག་ཅིག་རེད། སྤྱིའི་ཆ་ནས་རི་མོའི་གྲངས་ཀ་ཉེར་ལྔ་ཙམ་དངོས་སུ་མཐོང་ཐུབ། རི་མོ་འདི་ནི་ང་ཚོ་མཚོ་བོད་མཐོ་སྒང་གི་ཆེས་གནའ་བོའི་བྲག་བརྐོས་རི་མོ་ལས་མཚོ་སྔོན་གྱི་བྲག་བརྐོས་རི་མོའི་ཁོངས་སུ་གཏོགས་པ་རེད། ལོ་འགའི་ཡར་སྔོན་དུ་རི་མོ་འདི་རྣམས་ཡུལ་འདིའི་ན་གཞོན་ཤེས་ལྡན་པ་ཞིག་གིས་ཡིག་ཐོག་ཏུ་བཀོད་དེ་ཡིག་ལམ་ལ་བཀྲམས་མྱོང་བར་བཤད་ཅིང་། མི་མང་པོ་ཞིག་གི་མཐོང་ལམ་དུ་དར་ཁྱབ་ཆེན་པོ་མ་སོང་བའི་རྐྱེན་གྱིས་ས་གནས་ཀྱི་མི་མང་པོ་ཞིག་ལའང་གསལ་ཆ་ཆེར་མེད་པའི་གནས་སུ་གྱུར་ཡོད། དེའི་སྟབས་ཀྱིས་ང་ཚོས་མུ་མཐུད་ནས་བྲག་བརྐོས་རི་མོ་འདི་རྣམས་ལ་སྲུང་སྐྱོབས་དང་། འདི་ལ་ཞིབ་འཇུག་བྱས་ཏེ་ཆེས་རྩ་ཆེ་བའི་གནའ་ཤུལ་འདིའི་རིགས་མཚན་མོའི་རྨི་ལམ་བཞིན་དུ་ཡལ་མི་འགྲོ་བར་ཁག་ཐེག་བྱ་དགོས་པར་སེམས་སོང་།
གསུམ་པ། བྲག་བརྐོས་རི་མོ་དང་རྫོང་རུའི་གནའ་ཤུལ་བར་གྱི་འབྲེལ་བ།
       རྨ་ཆུའི་སྟོད་རྒྱུད་དུ་གནས་པའི་འབའ་རྫོང་ནག་བཟའི་ས་ཁུལ་གྱི་ཆེས་གནའ་བོའི་བྲག་བརྐོས་རི་མོ་འདི་ལ་གཞན་ལས་ཁྱད་དུ་འཕགས་པའི་རིན་ཐང་ཆེན་པོ་ཞིག་ལྡན་པའི་རྒྱུ་མཚན་ནི། བྲག་བརྐོས་རི་མོ་ཡོད་ས་ནས་མདུན་ཕྱོགས་སུ་སྤྱི་ལེ་བཅུ་ཡས་མས་ཀྱི་མཚམས་ན། ས་འཁོབས་ཀྱི་རྒྱ་ཁྱོན་ལ་ཧ་ལམ་སྤྱི་ལེ་ལྔའི་ཁྱབ་ཁོངས་སུ་ངོས་འཛིན་གནང་བཞིན་ཡོད་པའི་རྫོང་རུའི་གནའ་ཤུལ་ཡོད། དེ་ནས་ཐོན་པའི་རིག་རྫས་རྣམས་ལ་ཆེད་མཁས་མི་སྣས་ཞིབ་འཇུག་གནང་བ་ལྟར་ན། གནའ་ཤུལ་འདིར་རྡོ་ཆས་གསར་མའི་དུས་རབས་ནས་ཟངས་ཆས་དུས་རབས་ལ་སོགས་དུས་རབས་རིམ་པ་མ་འདྲ་བ་ཁ་ཤས་བརྒྱུད་ཡོད་པ་ཚན་རིག་པས་བརྟག་ཅིང་དཔྱད་པའི་མཐར་འདས་པའི་ལོ་ངོ་དྲུག་སྟོང་ལྷག་གི་ལོ་རྒྱུས་ལྡན་པར་ཞིབ་འཇུག་གི་ལམ་ནས་ར་སྤྲོད་བྱས་ཡོད་པ་མ་ཟད། སའི་འོག་ནས་ཐོན་པའི་རུས་པ་མང་པོ་ཞིག་ལའང་རི་དྭགས་ཤ་བ་ལ་སོགས་ཀྱི་རུས་པ་ཡིན་པར་ཚན་རིག་གི་ཞིབ་འཇུག་ལས་བདེན་དཔང་གསལ་བོ་གྲུབ་ཡོད། དེ་ལྟར་ན། ཆེས་གནའ་བོའི་དུས་སྐབས་དེར་གནས་འདིའི་ཁོར་ཡུག་ཀུན་ཏུ། མི་རྣམས་ཀྱིས་འཚོ་བ་སྐྱེལ་སྟངས་ནི་རི་དྭགས་ཤ་བ་ལ་སོགས་བརྔོན་ནས་འཚོ་བ་བསྐྱེལ་ཡོད་པའང་གསལ་བོར་རྟོག་ཐུབ། དེའི་རྐྱེན་གྱིས་ནོར་ལུང་གི་བྲག་བརྐོས་རི་མོ་དང་རྫོང་རུའི་གནའ་ཤུལ་གཉི་གའི་བར་ན་འབྲེལ་བ་ངེས་ཅན་ཞིག་ཡོད་པའང་ང་ཚོའི་རིག་པའི་ལམ་ནས་ཚོད་དཔག་བྱེད་ཐུབ་པ་རེད།  དེ་མིན་ད་དུང་། ཉེ་འགྲམ་གྱི་མུ་ཡངས་ལུང་བ་ནི། ཆེས་གནའ་བོའི་དུས་སྐབས་ཤིག་ལ། དམུ་ཡི་རིགས་རྒྱུད་ཀྱིས་བདག་བཟུང་བྱས་ཏེ་གནས་བཅོས་པར་དགེ་རྒན་ཆེན་མོ་ཁ་སྒང་བཀྲ་ཤིས་ཚེ་རིང་ལགས་ཀྱིས་དཔྱད་རྩོམ་ཡང་བྲིས་ཡོད། ཕྱོགས་འདི་དག་ལ་བསམ་བློ་ཞིག་ཞིབ་ཏུ་བཏང་ན། ས་གནས་འདི་དང་ཉེ་འཁོར་ཐམས་ཅད་དུ་ཆེས་གནའ་བོའི་དུས་ནས་མིའི་རུ་ཚོགས་རྣམས་གནས་སྡོད་བྱས་ཏེ་རྔོན་ལས་ཀྱི་འཚོ་བ་བསྐྱལ་ས་ཞིག་ཡིན་པ་གསལ་བོར་རྟོག་ཐུབ། སྐབས་དེ་འདྲ་ནས་རིམ་བཞིན་དུས་རབས་ཀྱི་འགྱུར་ལྡོག་གི་དབང་གིས་ཁོ་ཚོ་ས་ཆ་གཞན་དག་ཏུ་གནས་སྤོར་བྱས་སོང་ཡང་འཚོ་བའི་རྗེས་ཤུལ་རྣམས་ང་ཚོའི་མིག་ལམ་དུ་དངོས་སུ་མངོན་ཐུབ་པ་འདི་རྣམས་རེད། དེའི་སྟབས་ཀྱིས་མ་འོངས་པ་ན་ཁོ་ཚོ་འཚོ་བཞུགས་ཀྱི་རྗེས་ཤུལ་མང་པོ་ད་དུང་ང་ཚོའི་མིག་ལམ་ལ་མངོན་རྒྱུ་ཡོད་པའང་ཁ་ཚོན་བཅད་དེ་བརྗོད་ཆོག་པར་སྙམ་སོང་།
       དེ་བས། ནག་བཟའ་སྡེ་བའི་ནོར་ལུང་གི་བྲག་བརྐོས་རི་མོ་འདི་དག་ལ། མདོ་དབུས་མཐོ་སྒང་རྨ་ཆུའི་སྟོད་རྒྱུད་ཀྱི་བྲག་བརྐོས་རི་མོའི་ཁྱད་ཆོས་ལྡན་ཞིང་། བྱེ་བྲག་གི་གཟུགས་རིས་སྣ་ཚོགས་ལ་སོ་སོར་ཐུན་མིན་གྱི་ཁྱད་ཆོས་ཀྱང་མང་དུ་མཆིས། འདི་དག་རྫོང་རུའི་གནའ་ཤུལ་དང་འབྲེལ་ནས་ང་ཚོས་ཆེས་གནའ་བོའི་མི་རྣམས་ཀྱི་འཚོ་བ་རོལ་སྟངས་ལ་བསམ་གཞིག་དང་ཞིབ་འཇུག་བྱེད་ཐུབ་པ་མ་ཟད། མདོ་དབུས་མཐོ་སྒང་འདིར་ཆེས་གནའ་བོའི་མི་ཚོགས་ཀྱིས་གདོད་མའི་འཚོ་བ་རོལ་སྟངས་རིམ་པར་བརྒྱུད་དེ་འཚོ་ཐབས་གསར་བའི་ལམ་དུ་བརྒལ་ཡོད་པ་ཡང་ཤུགས་ཀྱིས་རྟོགས་ཐུབ་ཅིང་། སྐབས་དེའི་མི་དང་རི་སྐྱེས་སྲོག་ཆགས་བར་གྱི་འབྲལ་ཐབས་མེད་པའི་འཚོ་བའི་རིག་གནས་ཤིག་ཀྱང་ཤུགས་ཀྱིས་མཚོན་ཡོད་པར་སྙམ།
བཞི་བ། རི་མོ་སོ་སོའི་གྲངས་ཀ་སོགས་ངོ་སྤྲོད་རགས་ཙམ།
       ང་ཚོའི་མཐོང་ལམ་དུ་དངོས་སུ་མངོན་ཐུབ་པའི་སྣ་འདུས་ཀྱི་རི་མོ་འདི་དག་གི་ཁྲོད་དུ་རྔོན་ལས་བྱེད་མཁན་གཙོ་གྲས་ཀྱི་སྐྱ་མི་བཞི་དང་། རྐང་ཐང་གཅིག ཁྱི་གུ་གསུམ་བཅས་ཚན་པ་གཅིག་དང་། རི་དྭགས་ཀྱི་རིགས་ལ་འབྲོང་གཡག་དྲུག་དང་། ཤྭ་ཕོ་དགུ། ཡུ་མོ་གཅིག ཕག་རྒོད་གཅིག་བཅས་མི་ཁྱི་རི་དྭགས་སོགས་བསྡོམས་པའི་གྲངས་ཀ་ཉེར་ལྔ་ཙམ་ཡོད། དེའི་ཁྲོད་ཀྱི་མི་ཁྱི་རྣམས་ཀྱིས་རྔོན་ལས་ཀྱི་ལས་ཀ་རྐྱང་བ་བྱེད་པ་དང་། རི་དྭགས་རིགས་རྣམས་རང་རང་འཚོ་ཐབས་ཀྱི་གནས་སྟངས་ལ་འབད་ཀྱིན་ཡོད་པའི་རྣམ་པ་མ་འདྲ་བའང་མཚོན་ཡོད། དེ་དག་ལས། ལྷོད་ཡེངས་སུ་གནས་པའི་འབྲོང་གཡག་བཞི་ཡོད་པ་དང་། འདྲོག་ཏེ་འབྲོ་བཞིན་པའི་འབྲོང་རྒོད་གཉིས་དང་ཤྭ་བ་སོགས་བྲག་རྡོ་ཚན་པ་གཉིས་ཀྱི་ཐོག་ཏུ་ཡོད། བྲག་རྡོ་ཚན་པ་ལྔའི་ཐོག་གི་ཤྭ་ཕོ་དགུའི་ཁྲོད་དུ་བག་ཡངས་སུ་གནས་པའི་ཤྭ་ཕོ་ཡོད་ལ་འབྲོ་བཞིན་པའི་ཤྭ་ཕོ་པའང་ཡོད། ཤྭ་ཕོ་དེ་དག་གི་མགོར་སྐྱེས་ཡོད་པའི་རྭ་ཅོའི་རྭ་ལག་གི་མང་ཉུང་ཆ་མི་མཚུངས་ཤིང་། ལ་ལ་རྭ་ལག་བཅུ་དྲུག་ཅན་དང་། ཁ་ཤས་ལ་རྭ་ལག་བཅུ་གཉིས་ཅན། ད་དུང་རྭ་ལག་བརྒྱད་ཅན་བཅས་ཡོད། དེ་དག་གི་ཁྲོད་དུ་ཡུ་མོ་གཅིག་ཡོད། དེ་མིན་ད་དུང་། ཕར་རྒྱུགས་བཞིན་པའི་ཕག་རྒོད་གཅིག་ཀྱང་ཡོད་པ་རེད།
ལྔ་བ། རི་མོ་རེ་རེའི་ཁྱད་ཆོས་དང་ནང་དོན་ལ་བསམ་གཞིགས།        ༣ ཤ་ཁྱུའི་ཁྲོད་ཀྱི་ཤྭ་ཕོ་རེ་རེའི་རྭ་ཅོའི་ར་ལག་གི་མང་ཉུང་གིས་ན་ཚོད་མཚོན། རྭ་ལག་ཉུང་བའི་ན་སོ་ཆུང་བ་དང་། རྭ་ལག་མང་བོས་ན་སོ་རྒན་པ་མཚོན། མགོ་བོ་དགྱེས་ཏེ་ཕར་འགྲོ་བཞིན་པའི་ཤྭ་ཕོ་དྲུག་ཡོད་པ་འདིས། ཁོ་ཚོ་རྔོན་པའི་འཚེ་བ་ལ་དོགས་ཟོན་གྱིས་ཁེངས་འདུག་པ་དང་། དེ་དག་གི་ཁྲོད་དུ་རྩྭ་ཟ་བའི་ཚུལ་དུ་སྣང་བའི་ཤྭ་ཕོ་གཉིས་ཡོད་པ་འདིས། ཤ་ཁྱུ་ཚོགས་རྣམས་རི་ལུང་གཅིག་ཏུ་མ་ངེས་པར་ཕྱོགས་གཞན་དུའང་ལྷོད་ཡངས་ཀྱིས་འཚོ་བཞིན་ཡོད་པ་མཚོན་ཡོད། རི་མོ་ལས་ཤྭ་ཕོ་གཉིས་དང་ཡུ་མོ་གཅིག་ཡོད་པའི་ཁྲོད་དུ་ཤྭ་ཕོ་གཅིག་གིས་ཁ་གདེངས་པ་འདིས། ང་ཚོའི་ནམ་ཟླ་བརྩི་སྟངས་ཁྲོད་དུ“དགུ་བ་ཤ་ངུ”ཟེར་སྲོལ་ཞིག་ཡོད། དེ་ནི་ནམ་ཟླ་སྟོན་དགུན་མཚམས་ཀྱི་ཟླ་དགུ་བའི་དུས་སུ་ཤྭ་ཕོས་ཡུ་མོ་རྣམས་བཀག་སྟེ་རྒྱུད་སྤེལ་བ་རེད། སྐབས་དེར། ཤྭ་ཕོས་ཡུ་མོ་འཕྲོག་རྩོད་བྱེད་སྐབས་བཙན་གཉོམ་གྱི་ཁྱད་པར་གྱིས་ཡུ་མོ་རྣམས་བདག་བཟུང་བྱེད་པའི་རྣམ་པ་དེ་དངོས་སུ་མཚོན་ཡོད།
       ༤ རི་དྭགས་མང་པོའི་ཁྲོད་དུ་ཕག་རྒོད་གཅིག་མ་གཏོགས་མེད། སྐབས་དེ་དུས་ཀྱང་གནས་འདིར་ཕག་རྒོད་མང་པོ་མེད་པ་མཚོན་ཡོད། དེ་ཡང་ཕར་བྲོས་འབྲོ་བཞིན་པའི་རྣམ་པ་འདིས། མི་ཁྱི་གཉིས་ཀྱིས་ཐབས་ལམ་སྣ་ཚོགས་བརྒྱུད་ནས་ཕག་རྒོད་ཀྱང་བརྔོན་ཏེ་རང་རང་གི་ཁ་ཟས་བྱེད་ཀྱིན་ཡོད་པ་བྲག་བརྐོས་རི་མོ་འདི་རྣམས་ཀྱི་དངོས་ཤུགས་བརྒྱུད་གསུམ་ནས་ད་གཟོད་གསལ་རྟོགས་བྱུང་ཐུབ་པ་རེད་སྙམ་མོ། །