བོད་ཀྱི་སྤྲོ་གར་གློག་བརྙན《ཨ་ཁུལ་སྟོན་པ》ཕབ་བསྐྲུན་བྱས་ཚར་པ།
གློག་བརྙན《ཨ་ཁུ་སྟོན་པ》ཞེས་པའི་ཁྱབ་སྒྲོག་པར་རིས།
ཉེ་ཆར། མཆོད་རྟེན་གློག་བརྙན་འཕྲིན་ཀུང་ཟིའི་ན་གཞོན་འཁྲབ་ཁྲིད་པ་ཀླུ་རྒྱལ་གྱིས་འཁྲབ་ཁྲིད་དང་འཁྲབ་སྟོན་བྱས་པའི་བོད་ཀྱི་སྤྲོ་གར་གློག་བརྙན《ཨ་ཁུལ་སྟོན་པ》ཞེས་པ་ཕབ་བསྐྲུན་བྱས་ཚར་ནས་ལོ་གསར་བའི་རྟེན་འབྲེལ་ཞུ་བའི་གློག་བརྙན་དུ་བྱེད་རྒྱུ་རེད།
འཁྲབ་ཁྲིད་པ་ཀླུ་རྒྱལ་ལགས་ནི་མཚོ་སྔོན་ཡ་རྫི་རུ་སྐྱེས་ཤིང་། པེ་ཅིང་གློག་བརྙན་སློབ་གླིང་གི་འཁྲབ་ཁྲིད་པའི་སྡེ་ཁག་ནས་མཐར་ཕྱིན། ཁོང་གིས་གློག་བརྙན《ལུས་སེམས་འགུལ་བའི་མཚར་གཏམ》དང《ཉེས་དམིགས》། 《རླུང་ཁའི་མར་མེ》སོགས་གློག་བརྙན་མང་པོ་འཁྲབ་ཁྲིད་བྱས་ནས་རྒྱལ་ནང་གི་གློག་བརྙན་དུས་ཆེན་སྟེང་བྱ་དགའ་ཐེངས་དུ་མར་ཐོབ་ལ། རྒྱ་ཆེའི་གཟིགས་མོ་བ་རྣམས་ཀྱི་དགའ་བསུ་ཆེན་པོ་ཐོབ།
《ཨ་ཁུལ་སྟོན་པའི་གཏམ་རྒྱུད》ནི་མདོ་དབུས་ཁམས་གསུམ་གྱི་བོད་དམངས་ཡོངས་ཀྱི་ཤེས་པའི་བག་ལ་ཉལ་ཞིང་ཀུན་གྱིས་དགའ་ཞེན་ཚད་མེད་འབུལ་བའི་གཏམ་རྒྱུད་གྲགས་ཅན་ཞིག་ཡིན་ཞིང་། མི་རབས་དུ་མའི་གསར་གཏོད་ཀྱི་བློ་གྲོས་དང་རྒྱུད་འཛིན་གྱི་སྤོབས་པར་བརྟེན་ནས་གཏམ་རྒྱུད་ཀྱི་ནང་དོན་ཕུན་སུམ་ཚོགས་པར་བསྐྲུན་ཐོག བོད་དམངས་ཀྱི་འཚོ་བའི་ཁྲོད་ཁེབས་རྒྱ་ཡངས་ཤིང་མང་ཚོགས་ཀྱི་རྨང་གཞི་བརྟན་པོ་ཞིག་ཆགས་འདུག་པ་རེད།
