གློག་བརྙན«གསའ»རྒྱལ་སྤྱིའི་གློག་བརྙན་དུས་ཆེན་འདིའི་འོས་མིང་དུ་ཚུད་འདུག

       སྤྱི་ཟླ་བདུན་པའི་ཚེས་ཉེར་ལྔ་ཉིན་གྱི་ཆུ་ཚོད་བཅུ་གཅིག་པར། ཝེ་ནེ་སི་རྒྱལ་སྤྱིའི་གློག་བརྙན་དུས་ཆེན་རེབ་བརྒྱད་བཅུ་བའི་འོས་མིང་དུ་ཚུད་པའི་གློག་བརྙན་གྱི་མིང་བྱང་ཁྱབ་བསྒྲགས་བྱས་འདུག དེ་རུ་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་ཀྱི་གཏམ་རྒྱུད་གློག་བརྙན་བརྒྱད་པ«གསའ»ཡང་གློག་བརྙན་དུས་ཆེན་དེར་ཚུད་འདུག འདི་ནི་ཁོང་གི་གློག་བརྙན་དུས་ཆེན་དེར་ཚུད་ཐེངས་བཞི་པར་ཆགས་ཡོད། སྔོན་མ་གསུམ་ནི«ཐར་ལོ»དང«ལག་དམར» «དབུགས་ལྒང»བཅས་ཡིན། གློག་བརྙན་འདི་ནི་གཞེས་ནིང་གི་དགུན་ཟླ་བཅུ་བར་མགོ་ལོག་རྨ་སྟོད་ནས་བརྙན་ཕབ་བྱས་ཤིང་། དེ་ནས་ཏག་ཏག་ལོ་གཅིག་ལྷག་ལ་མཇུག་གི་བཟོ་སྐྲུན་གྱི་ལས་ཀ་བསྐྱངས་ནས་གྲུབ་པ་ཞིག་རེད།

       གློག་བརྙན་འདི་ནི་འཁྲབ་ཁྲིད་པ་ཁོང་གིས་འཁྲབ་གཞུང་དང་འཁྲབ་ཁྲིད་བྱས་ཤིང་། ཝང་ལི་ནས་བརྙན་སྐྲུན་པ་དང་ཚེ་མདོ་ནས་ལག་བསྟར་བརྙན་སྐྲུན་པའི་འགན་ཁུར་འདུག དེ་མིན་གློག་བརྙན་འཁྲབ་སྟོན་པ་སྦྱིན་པ་དང་ཞོང་ཙི་ཆིས། ཚེ་བརྟན་བཀྲ་ཤིས་སོགས་ནས་གཙོ་འཁྲབ་པའི་འགན་ཁུར་འདུག

       ཐེངས་འདིའི་བརྙན་ལེན་པ་ནི་བྷིས་ལིས་ཧྲིའི་ན་གཞོན་བརྙན་ལེན་པ་མར་ཐིས་ཡཱ་སི་དང་། དེ་མིན་ཁྱད་རྩལ་འཛུབ་སྟོན་པ་ཀྲང་ཧན་སུའུ། ཁྱད་རྩལ་སྤྱི་བ་ཀྲང་པའེ་ཕིན། ཧྥང་ཞའོ་པིན་སོགས་ཀྱིས་གྲུབ་པའི་རྒྱལ་ནང་གི་ཁྱད་རྩལ་ལག་རྩལ་རྩེར་སོན་རུ་ཁག་གིས་གློག་བརྙན་འདིའི་མཇུག་གི་ཁྱད་རྩལ་བཟོ་སྐྲུན་གྱི་ལས་ཀ་ལེགས་པར་བསྐྱངས་འདུག

       གློག་བརྙན«གསའ»ནི་འཁྲབ་ཁྲིད་པ་ཁོང་གི་གཏམ་རྒྱུད་གློག་བརྙན་བརྒྱད་པར་ཆགས་འདུག་ལ། ནན་ཅིས་དང་ཀྲིག་ཧའོ། པདྨ་ཚེ་བརྟན། ཀོང་ཡོས་སོགས་ནས་ཕབ་སྐྲུན་པའི་འགན་ཁུར་འདུག དེ་མིན་བོད་ཀྱི་གློག་བརྙན་འཁྲབ་སྟོན་པ་རྒན་བློ་བཟང་ཆོས་འཕེལ་དང་། ན་གཞོན་གློག་བརྙན་འཁྲབ་སྟོན་པ་དགེ་འདུན་ཕུན་ཚོགས། ཀུན་བདེ། རྒྱའི་འཁྲབ་སྟོན་པ་ཏང་ཧའོ་ཡོས། བོད་ཀྱི་འཁྲབ་སྟོན་པ་འཇིགས་བྷ། དཀའ་ཐུབ་ཚེ་རིང་། བདེ་ཆེན་གཡང་འཛོམས། འཇུ་ཁྱུང་ཆེན་སོགས་ཡང་རེབ་འདིའི་གློག་བརྙན་ཁྲོད་འཁྲབ་ཞུགས་བྱས་ཡོད།

       འཁྲབ་ཁྲིད་པ་ཁོང་དང་ཁོང་གི་ལས་བཟོ་བས་བརྩམས་ཆོས་ལེགས་པར་འཁྱོངས་ཆེད་དཀའ་བ་ཁྱད་དུ་བསད་ཅིང་ངལ་བ་དང་དུ་བླངས་ཏེ། ས་མཐོ་རི་གཙང་གི་ཡུལ་དུ་གུར་བརྒྱབ་ནས་བརྙན་ཕབ་བྱས་ཤིང་། གནམ་གཤིས་ཀྱི་འགྱུར་ལྡོག་དང་ས་བབ་ཀྱི་མཐོ་ཚད་ཀྱིས་བརྙན་ཕབ་ཀྱི་ལས་ཀར་བཀག་རྒྱ་བཟོས་མོད། ལས་བཟོ་བས་དཀའ་ངལ་གདོང་གཏད་ཀྱི་སྤོབས་པས་བརྙན་ཕབ་ཀྱི་ལས་གཞི་བདེ་ལེགས་ངང་གྲུབ་ཡོད།

       རྒྱུས་ལོན་བྱུང་པ་ལྟར་ན། གློག་བརྙན་འདི་ནི་པེ་ཅིང་ནན་ཅིས་གློག་བརྙན་ལས་རིགས་ཚད་ཡོད་ཀུང་སི་དང་། པེ་ཅིང་རིག་ལའེ་ཁའེ་ཁྲང་རིག་གནས་སྨྱན་སྦྱོར་ཀུང་སི། མཚོ་སྔོན་མ་ཎི་རྡོ་འབུམ་གློག་བརྙན་ལས་རིགས་ཚད་ཡོད་ཀུང་སི། ཧྲིན་ཀྲིན་མཛོ་སྣ་གློག་བརྙན་ལས་རིགས་ཚད་ཡོད་ཀུང་སི། ཨེ་ཆིས་ཡིས་གློག་བརྙན་ལས་རིགས་པེ་ཅིང་ཀུང་སི། པེ་ཅིང་ཝིན་ཐིག་རིག་གནས་ཁྱབ་སྤེལ་ཚད་ཡོད་ཀུང་སི། ཧང་ཀྲིག་ཧའེ་ཞིས་གློག་ཆས་ཚོང་དོན་ཚད་ཡོད་ཀུང་སི། ཧྲང་ཧའེ་ཧྥང་ཐན་རིག་གནས་ཁྱབ་སྤེལ་ཚད་ཡོད་ཀུང་སི། པེ་ཅིན་ཡུན་ཧྭ་ཧྲི་ཀང་གློག་བརྙན་ལས་རིགས་ཚད་ཡོད་ཀུང་སི་བཅས་ཀྱིས་མཉམ་འབྲེལ་གྱིས་ཕབ་སྐྲུན་བྱས་ཤིང་། མཚོ་སྔོན་མ་ཎི་རྡོ་འབུམ་གློག་བརྙན་ལས་རིགས་ཚད་ཡོད་ཀུང་སི་དང་ཀྲུང་གོ་མཛེས་རྩལ་སློབ་གླིང་གློག་བརྙན་སྨྱན་སྦྱོར་ཚད་ཡོད་ཀུང་སི་གཉིས་ནས་བཟོ་སྐྲུན་ལས་ཁུངས་ཀྱི་འགན་ཁུར་ཡོད། དེ་མིན་གདུགས་དཀར་ཚེ་རིང་ནས་སྒྲ་དང་རོལ་མོའི་མཛུབ་སྟོན་པ། སྟག་རྩེ་དོན་གྲུབ་ནས་མཛེས་རིས་པ། ཅིན་ཏིས་ཀྱིས་སྒྲིག་སྦྱོར་དང་ཧྥུའུ་ཧྲུའུ་ནས་ཚོན་མདངས་བཟོ་མཁན་པའི་འགན་ཁུར་ཡོད།

       སྤྱི་ཟླ་བརྒྱད་པའི་ཚེས་སུམ་ཅུའི་ཉིན། ཝེ་ནེ་སི་ལིས་ཏུའུ་གླིང་ཕྲན་གྱི་གློག་བརྙན་ཕོ་བྲང་ནས་རྒྱལ་སྤྱིའི་ཐོག་མའི་གཟིགས་འབུལ་བྱེད་འཆར་འདུག་གོ །