གློག་བརྙན«ཁྱིམ་ཚང་གཅིག་གི་མི»ཞེས་པའི་ཕབ་སྐྲུན་ལས་ཀ་མཇུག་བསྒྲིལ།

       བོད་སྐད་མུ་འབྲེལ་གློག་བརྙན«ཁྱིམ་ཚང་གཅིག་གི་མི»ཞེས་པའི་ཕབ་སྐྲུན་ལས་དོན2023ལོའི་ཟླ8པའི་ཚེས31ཉིན། མདོ་སྨད་བོད་མཁར་དུ་གྲགས་པའི་གཡུ་གཞོང་རྐང་ཚ་རྫོང་དུ་བདེ་བླག་ངང་མཇུག་བསྒྲིལ།

       གློག་བརྙན་འདིའི་ནང་བཟའ་དཔོན་གྱི་མིང་ལ་སྐལ་ལོར་འབོད་པའི་དུས་རབས་གསར་པའི་བོད་ཁུལ་གྱི་ཁྱིམ་ཚང་ག་གེ་མོ་ཞིག་གིས། སྡེ་བའི་འཛུགས་སྐྲུན་ལ་མ་དངུལ་གཏོང་མཁན་གྱི་ཁེ་ལས་པ་ཆེན་པོ་ཀུ་རུ་ར་ཟེར་བ་ཞིག་ལ་རེ་སྒུག་བྱས་པའི་ཁྲོད་བྱུང་བའི་གཏམ་རྒྱུད་བརྗོད་ཡོད། གློག་བརྙན་འདིའི་འཁྲབ་གཞུང་རྩོམ་མཁན་ནི། བོད་ཀྱི་སྒྱུ་རྩལ་པ་དང་སྙན་ངག་པ་ཞི་བདེ་ཉི་མ་ལགས་ཡིན། ཁོས་མུ་འབྲེལ་གློག་བརྙན་འདིའི་སྤྱིའི་འཁྲབ་ཁྲིད་པ་དང་འཁྲབ་མཁན་གཙོ་བོའི་འགན་ཡང་གཅིག་ལྕོགས་སུ་ཁུར་ཡོད།

       གཞན་གློག་བརྙན་འདིའི་ནང་། བོད་ཁུལ་དུ་གྲགས་ཆེ་བའི་འཁྲབ་སྟོན་པ་དང་གླུ་ལེན་སྒྱུ་རྩལ་པ། དེ་བཞིན་དྲ་གྲགས་སོགས་མི་སྣ20ལྷག་ཞུགས་ཏེ།  ཟུར་ངོས་འདྲ་མིན་ནས་གསོན་ཉམས་ལྡན་པའི་གློག་བརྙན་མི་སྣ་གང་མང་བཞེངས་སྐྲུན་བྱས་ཡོད།