གློག་བརྙན་ཐུང་གྲས«ཞེ་ལ་འཁྲེང་བའི་མུ་ཏིག་ནག་པོ»སྟོན་འཆར་འདུག

       ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་སློབ་སྦྱོང་དང་དྲིལ་བསྒྲགས་ལག་བསྟར་གཏིང་ཟབ་བྱེད་པ་དང་། མཚོ་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་ངོ70འཁོར་བར་རྟེན་འབྲེལ་ཞུ་ཆེད། ཀོས་ནན་རྫོང་དྲིལ་བསྒྲགས་པུའུ་དང་རྫོང་སྨྱན་སྦྱོར་ལྟེ་གནས་གཉིས་ཀྱིས་མཉམ་འབྲེལ་སྒོས་ཕབ་སྐྲུན་བྱས་པའི«ཞེ་ལ་འཁྲེང་བའི་མུ་ཏིག་ནག་པོ»ཞེས་པ་མི་འགྱང་བར་དྲ་ལམ་སོ་སོར་བཀྲམ་སྟེ་རྒྱལ་སྟོན་བསུ་བའི་ལེགས་སྐྱེས་སུ་ཕུལ་འཆར་འདུག

       «ཞེ་ལ་འཁྲེང་བའི་མུ་ཏིག་ནག་པོ»ཞེས་པའི་བརྙན་ཐུང་ནང་དུ་གཙོ་བོ་གྲོང་གསེབ་དར་སྤེལ་གཏོང་བའི་འཐབ་ཇུས་ལག་བསྟར་གཏིང་ཟབ་བྱེད་པའི་རྒྱབ་ལྗོངས་ཆེན་པོའི་འོག་ཕ་ཡུལ་དུ་ལོག་མཁན་སློབ་ཆེན་སློབ་མ་བཀྲ་ཤིས་དང་ཀོས་ནན་རྫོང་ལུག་ནག་གསོ་སྤེལ་ལྟེ་གནས་ཀྱི་ལག་རྩལ་པ་གཡུ་སྒྲོན་གཉིས་ཀྱིས་ཁྱིམ་མིའི་བསམ་ཤེས་མི་བྱེད་པ་དང་སྡེ་མིའི་རྒྱབ་སྐྱོར་མི་བྱེད་པའི་གནས་ཚུལ་འོག་སྔར་བཞིན་ཐོག་མའི་སེམས་འདུན་མ་བརྗེད་པར་ཕ་ཡུལ་གྱི་གཅེས་སེམས་དེ་ལུག་ནག་གི་བྱ་གཞག་ཁྲོད་འཐིམས་པར་བྱས་ནས་རྫོང་ཨུ་དང་རྫོང་སྲིད་གཞུང་། དེ་བཞིན་འབྲེལ་ཡོད་སྡེ་ཚན་གྱི་སྲིད་ཇུས་རོགས་སྐྱོར་དང་རང་ཉིད་ཀྱི་འབད་བརྩོན་བརྒྱུད་ཀོས་ནན་གྱི་ལུག་ནག་གི་ཁྱད་ཆོས་ལྡན་པའི་ཐོན་རྫས་རྒྱུན་ཆད་མེད་པར་འཕེལ་རྒྱས་དང་སྟོབས་ཆེར་བཏང་བ་མ་ཟད།“རྒྱལ་ཁབ་ཀྱི་ས་ཁམས་མཚོན་རྟགས་སྲུང་སྐྱོང་ཐོན་རྫས”ཀྱི་མཚན་སྙན་ཐོབ་པ་དང་། བཀྲ་ཤིས་དང་གཡུ་སྒྲོན་གཉིས་ཀྱིས་བརྒྱུད་རིམ་དེའི་ཁྲོད་ཕན་ཚུན་ལ་བརྩེ་བ་ཟབ་མོ་ཆགས་པའི་བརྩེ་དུང་གི་གཏམ་རྒྱུད་ཅིག་ཡིན།