logo

མི་རིགས་རོལ་དབྱངས་ཟློས་གར་ཆེན་མོ«ལས་དབང་གི་མཇལ་འཛོམས»ཞེས་པ་ཅང་སུའུ་ནས་འཁྲབ་སྟོན་བྱ་རྒྱུ་རེད།

རྩོམ་པ་པོ།: ཡོང་ཁུངས།:མཚོ་ལྷོ་བོད་ཡིག་ཚགས་པར། དུས་ཚོད།:2023-10-16 ཀློག་གྲངས།:
       ཉེ་སྔོན། གསར་འགོད་པས་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ནས་རྒྱུས་ལོན་པ་ལྟར་ན། ཞིང་ཆེན་ཏང་ཨུའི་དྲིལ་བསྒྲགས་པུའུ་དང་མཚོ་ལྷོ་ཁུལ་ཁུལ་ཨུ་དང་ཁུལ་སྲིད་གཞུང་གིས་བཀོད་སྒྲིག་བྱས་ཤིང་། མཚོ་ལྷོ་ཁུལ་མི་རིགས་གླུ་གར་ཚོགས་པས་གསར་རྩོམ་བྱས་པའི་མི་རིགས་རོལ་དབྱངས་ཟློས་གར་ཆེན་མོ«ལས་དབང་གི་མཇལ་འཛོམས»ཞེས་པ་ཟླ10བའི་ཟླ་སྨད་དུ་ཅང་སུའུ་ཞིང་ཆེན་གྱི་ནན་ཅིན་གྲོང་ཁྱེར་དང་ཁྲེང་ཀྲུག དབྱང་ཀྲུག ཞི་ཀྲུག ནན་ཐུང་། ཡན་ཁྲིན་བཅས་ས་ཁུལ་མི་འདྲ་བ་དྲུག་ཏུ་རིམ་བཞིན་འཁྲབ་སྟོན་བྱ་རྒྱུ་ཡིན་ལ། ཐེངས་འདིའི་སྐོར་བསྐྱོད་འཁྲབ་སྟོན་གྱི་དམིགས་ཡུལ་གཙོ་བོ་ནི། ཅང་སུའུ་ཞིང་ཆེན་གྱིས་མཚོ་སྔོན་ལ་རོགས་འདེགས་མཛད་ནས་ལོ་འཁོར13ལོན་པར་ལྷག་བསམ་ཟོལ་མེད་ཀྱིས་རྟེན་འབྲེལ་ཞུ་བའི་ལེགས་སྐྱེས་སུ་ཕུལ་ཏེ། ས་ཁུལ་གཉིས་ཀྱིས་སྔར་ལས་ལྷག་པའི་སྒོ་ནས་ཕན་ཚུན་ལ་རྒྱུས་ལོན་དང་རོགས་འདེགས་བྱེད་པའི་བརྩེ་བའི་ཕྱི་ཐག་རིང་དུ་བསྲིངས་ཏེ། མཚོ་བོད་མཐོ་སྒང་གི་ཐུན་མོང་མ་ཡིན་པའི་ཡུལ་སྲོལ་གོམས་ལུགས་དང་མི་གཤིས་ཀྱི་མཛའ་བརྩེ་དེ་མཚོན་པར་བྱ་རྒྱུ་དེ་རེད།
       མི་རིགས་རོལ་དབྱངས་ཟློས་གར་ཆེན་མོ«ལས་དབང་གི་མཇལ་འཛོམས»ཞེས་པ་ནི། ཞིང་ཆེན་ནང་ཁུལ་དུ་མཚོ་སྔོན་ལ་རོགས་འདེགས་བྱས་པ་མཚོན་པར་བྱེད་པའི་ཟློས་གར་གྱི་འཁྲབ་གཞུང་ཐོག་མ་ཡིན་ཞིང་། ཟློས་གར་འདི་ཉིད་ཀྱི་བརྗོད་བྱའི་བསྟན་དོན་ནི་ཅང་སུའུ་ཞིང་ཆེན་གྱིས་མཚོ་སྔོན་ལ་རོགས་འདེགས་མཛད་པ་རྒྱབ་ལྗོངས་བྱས་ཏེ།  མཚོ་སྔོན་གྱི་སྤྱི་ཚོགས་དཔལ་འབྱོར་དང་རིག་གནས་སློབ་གསོའི་འཕེལ་རྒྱས་ཀྱི་ཕྱིར་དུ་རོགས་རམ་ལ་ཡོང་བའི་ལས་བྱེད་འཇོན་མི་རྣམས་ཀྱི་མི་ལོ་བཅུ་ཕྲག་ལྷག་རིང་གི་དཀའ་སྤྱད་ཀྱི་བྱ་བའི་བརྒྱུད་རིམ་དང་། དེ་ལས་བྱུང་བའི་གཏམ་རྒྱུད་ཀྱི་མཐོང་སྣང་མི་འདྲ་བ་ལས་མཚོ་སྔོན་གྱི་འཕེལ་རྒྱས་ཐད་གྲུབ་འབྲས་མི་དམན་པ་བླངས་ཟིན་པའི་བརྗོད་དོན་ལྷུག་པར་བརྗོད་དེ། མཚོ་ལྷོའི་མི་རིགས་ཁག་གི་མི་དམངས་ཀྱིས་ཅང་སུའུ་ཞིང་ཆེན་གྱི་བརྩེ་བའི་ཕྱག་ཟུང་དྲོན་མོ་ལ་བཀའ་དྲིན་ཞུ་བའི་སེམས་འདུན་མཚོན་པར་བྱས་ཡོད།
       «ལས་དབང་གི་མཇལ་འཛོམས»ཞེས་པའི་ཟློས་གར་འདིའི་གར་སྟེགས་ཀྱི་ཇུས་འགོད་དང་འཁྲབ་ཆས་ཀྱི་སྒྲིག་ལུགས། རོལ་དབྱངས་ཀྱི་སྡེབ་སྒྲིག དེ་མིན་མི་གཤིས་ཀྱི་མཛེས་བརྙན་སོགས་ལ་ཚད་མཐོ་བའི་སྒྱུ་རྩལ་རང་བཞིན་གྱིས་ཀུན་ནས་ཕྱུག་ཡོད་དེ། འཁྲབ་སྟོན་པའི་ལུས་ཀྱི་སྟངས་སྟབས་དང་ངག་གི་སྨྲ་བརྗོད་བསྡེབས་པའི་མི་སྣའི་ནང་སེམས་ཀྱི་འགྱུར་བ་རྒོད་པས། དོན་གྱི་བྱུང་རིམ་གང་ཉིད་ལྷུག་པར་བརྗོད་པ་ལ་ཡིད་འགུག་གི་ནུས་པ་ལྡན་ཞིང་། གར་སྟེགས་ཀྱི་ཡོལ་རིས་དང་རི་མོའི་འཁྱུག་འགྲོས་སྣ་ཚོགས་ཀྱིས་ཟློས་གར་འཁྲབ་སྟོན་གྱི་གཟུགས་བརྙན་ཅི་རིགས་མཐོང་སྣང་དུ་སྐྱོམས་ནུས་པས། དོན་གྱི་འགལ་འདུ་ཤུགས་ཀྱིས་བརྗོད་པ་ལ་བདེན་སྣང་གི་ཁྱད་ཆོས་ཐོན་འདུག ད་དུང་ཡང་གཟུགས་ལྗོངས་ཀྱི་འགུལ་རྣམ་དང་ཉམས་འགྱུར་བྱེ་བྲག་བ་ལས་མངོན་པའི་གཏམ་རྒྱུད་ཀྱི་མཐོ་རླབས་དྲག་ཏུ་གཡོ་བ་དང་མཉེན་པར་སྡུད་པ་ལ་སྣང་བའི་སྒྱུ་རྩལ་གྱིས་རབ་ཏུ་རྒྱན་ཡོད་པས། མཐོང་འདོད་ཀྱི་མིག་དབང་གསོ་བ་ལ་རྟོག་སྣང་གི་འཆར་སྒོ་ཡུན་གྱིས་ཕྱེས་ཐུབ་པ་སོགས་ཀྱི་ཁྱད་ཆོས་ལྡན་པ་མ་ཟད། འཁྲབ་ཚན་རེ་རེའི་ཉམས་དང་འགྱུར་བ་ལས་མཚོ་ལྷོ་ཁུལ་གྱི་རྫོངས་མཐུག་པའི་རིག་གནས་ཀྱི་རྔམ་ཁ་དང་ཕུན་སུམ་ཚོགས་པའི་ཡུལ་སྐོར་ཐོན་ཁུངས་ཀྱང་ངང་ངམ་ཤུགས་ཀྱིས་བརྗོད་འདུག
       མདོར་ན་ཟློས་གར་འདིའི་མགོ་མཇུག་བར་གསུམ་དུ་མཚོ་སྔོན་ལ་རོགས་སྐྱོར་བྱེད་དུ་ཡོང་བའི་ལས་བྱེད་དཔུང་ཁག་དག་གི་དངོས་སྒྲུབ་ཀྱི་བྱ་བའི་བརྒྱུད་རིམ་དང་དཔེར་མཚོན་གྱི་གྲུབ་འབྲས་སོགས་བརྗོད་དོན་དུ་བཟུང་སྟེ། གཞི་རིམ་མང་ཚོགས་ལ་སྨན་བཅོས་འཕྲོད་བསྟེན་ཕྱོགས་གྱི་མཐུན་རྐྱེན་མཁོ་སྤྲོད་བྱས་ཚུལ་དང་འབྲིང་རིམ་སློབ་མར་སློབ་ཡོན་ཁ་གསབ་བྱས་ཚུལ། དེ་མིན་མང་ཚོགས་ལ་སྣེ་ཁྲིད་དེ་རང་བྱུང་གི་གནོད་འཚེ་ལས་བསྐྱབས་ཚུལ། མཚོ་སྔོན་ལ་རོགས་སྐྱོར་བྱེད་དུ་ཡོང་བའི་ལས་བྱེད་པའི་ཁྱིམ་མི་དག་མཚོ་ལྷོར་ཡོང་ནས་གཉེན་དོན་གླེང་བ་སོགས་འཁྲབ་ཚན་མི་འདྲ་བ་དུ་མས་གྲུབ་ཡོད་ལ། སྤྱིའི་བརྗོད་དོན་གྱི་ཆ་ནས་ཅང་སུའུ་ཞིན་ཆེན་གྱིས་སྒེར་སེམས་མེད་པར་རང་ཉིད་ཀྱི་སྟོབས་ཤུགས་ལེགས་སྐྱེས་སུ་ཕུལ་བ་དེས་མཚོ་སྔོན་གྱི་སྤྱི་ཚོགས་དཔལ་འབྱོར་གོང་འཕེལ་དུ་འགྲོ་བར་རོགས་འདེགས་ཀྱི་ནུས་པ་ཆེན་པོ་ཐོན་ཡོད་པས། ས་མཐོའི་མི་རིགས་ཁག་གི་མི་དམངསམ་ཀྱིས་ཏང་ཀྲུང་དབྱང་གི་བཀའ་དྲིན་དྲན་པ་དང་མཚོ་སྔོན་ལ་རོགས་སྐྱོར་དུ་ཡོང་བར་བཀའ་དྲིན་ཞུ་བའི་བརྩེ་སེམས་མཚོན་པར་བྱས་ཡོད།
       2020ལོ་ནས་བཟུང་། ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་ཞིང་ཆེན་རིག་གནས་ཡུལ་སྐོར་སྤྱི་ཁྱབ་ཁང་གི་རྩ་འཛུགས་དང་རོགས་སྒྲུབ་ཀྱི་འོག་ཏུ། ཞིང་ཆེན་རིམ་པའི་ཆེད་མཁས་པ་མང་པོ་གདན་དྲངས་ཏེ་ཐེངས་མང་པོར་གདམས་དཔྱད་གྲོས་ཚོགས་བསྡུས་ནས་ཞིབ་བཤེར་དག་སྒྲིག་གང་ལེགས་བྱས་པ་དང་། ཆེད་མཁས་ཚོགས་པས་ངོས་འཛིན་བྱས་པ་ལྟར་ན།  མི་རིགས་རོལ་དབྱངས་ཟློས་གར་ཆེན་མོ«ལས་དབང་གི་མཇལ་འཛོམས»ཞེས་པ་འདིའི་བརྗོད་དོན་གསར་བ་ཡིན་པའི་ཁར་བསྟན་དོན་གྱི་མིག་རྒྱང་རིང་བ། སྒྲིག་བཀོད་ཀྱི་རྣམ་པ་འཐུས་ཚང་བ། གཏན་ཚིགས་ཀྱི་རང་བཞིན་ལེགས་པར་སྣང་བ། གཏམ་རྒྱུད་ཀྱི་ཡིད་འགུག་ནུས་པ་རབ་ཏུ་ཆེ་བ་སོགས་ཀྱི་ཁྱད་ཆོས་ལྡན་པས། བརྩེ་སེམས་དང་སྤྲོ་ཉམས་ཀྱིས་ཕྱུག་ཡོད་པའི་འཁྲབ་གཞུང་བཟང་བོ་ཞིག་རེད་ཅེས་དཔྱད་འཇོག་གནང་བ་རེད།
འབྲེལ་ཡོད་འོས་སྦྱོར།