༄༅། །མལ་གྲོ་གོང་དཀར་གྱི་འབྲི་གུང་འཚེམ་འདྲུབ་ལག་རྩལ།

ཐང་ཀ་ནི་རས་དང་། གོས་ཆེན། ཤོག་བུའི་སྟེང་དུ་གོས་ཆེན་འཚེམ་པའམ་ཚོན་འབྲི་བའི་རི་མོའི་སྒྱུ་རྩལ་ཞིག་ཡིན་ཞིང་། དེར་བོད་མི་རིགས་ཀྱི་ཐུན་མོང་མ་ཡིན་པའི་རིག་གནས་ཀྱི་ཁྱད་ཆོས་ཟབ་མོ་ལྡན་ཡོད། ཐང་ཀ་བཟོ་སྟངས་དེ་རིགས་ལས་འབྲི་གུང་འཚེམ་འདྲུབ་ལག་རྩལ་ནི་༡༨༨༠ལོའི་འབྲི་གུང་གདན་རབས་སུམ་ཅུ་སོ་ལྔ་པའི་དུས་ནས་མགོ་ཚུགས་ཤིང་། དེའི་སྲོལ་གཏོད་མཁན་ནི་འཕྲིན་ལས་རྡོ་རྗེ་མཆོག་ཡིན་པ་དང་། དེ་རྗེས་མི་རབས་ལྔ་ཙམ་གྱི་ཁྱིམ་རྒྱུད་ཀྱིས་རྒྱུད་འཛིན་བྱས་པ་ལ་བརྟེན་ནས་ཐང་ཀའི་འཚེམ་བཟོའི་ལག་རྩལ་དེ་རིམ་བཞིན་འཐུས་ཚང་དུ་སོང་ཞིང་། བཟོ་བཀོད་སོགས་གང་ཅིའི་ཐད་ནས་ཞིབ་ཚགས་སྤུས་གཙང་དུ་ཕྱིན་ཡོད། འབྲི་གུང་གི་ཐང་ཀའི་འཚེམ་འདྲུབ་ལག་རྩལ་དེ་དམངས་ཁྲོད་དུ་ཐང་ཀ་བཟོ་བའི་ལག་རྩལ་ཅུང་དམིགས་བསལ་ཆེ་བའི་རིགས་ཤིག་ཡིན་ཞིང་། ཁོང་ཚོས་རྒྱུན་དུ་གོས་ཆེན་རྣམས་སྒྲིག་པ་དང་། སྦྱར་བ། འཚེམ་པ། ཕར་ཆིན་བརྒྱབ་རྒྱུ་སོགས་ཀྱི་ལས་ལ་དང་དོད་ཆེན་པོ་གནང་གི་ཡོད་ཅིང་། འཚེམ་འདྲུབ་ཐང་ཀ་དེ་དག་ཕར་ཆིན་གྱི་ལག་རྩལ་ལས་བྱུང་བ་ཤ་སྟག་ཡིན་སྟབས། གསར་བཞེངས་བྱུང་བའི་ཐང་ཀའི་གཟུགས་བརྙན་དེ་དག་འབུར་དུ་ཐོན་ལ་ཆེས་མངོན་གསལ་ཞིང་། ལྷག་དོན་མི་སྣའི་གཟུགས་བརྙན་དེ་དག་གསོན་ཉམས་ལྡན་པ་ཞིག་ཡོད།
འབྲི་གུང་འཚེམ་འདྲུབ་ཀྱི་ཐང་ཀའི་བཟོ་རྩལ་དེའི་སྲོལ་གཏོད་པ་པོ་ནི་འཕྲིན་ལས་རྡོ་རྗེ་ཞུ་བ་ཡིན་ལ། ཁོང་ནི་སྐབས་དེའི་འཚེམ་འདྲུབ་མཁས་ཅན་ཞིག་ཀྱང་ཡིན་པས། རྒྱུན་དུ་སྐུ་དྲག་དང་དགོན་སྡེ་ཁག་ནང་ཐང་ཀ་བཟོ་སྐྲུན་གྱི་ཕྱག་ལས་གནང་གི་ཡོད་པ་དང་། ཁོང་ཉིད་ཀྱི་ཕྱག་སོར་ལས་འཁྲུངས་པའི་ཐང་ཀ་ཞིག་ད་ལྟའང་གཡང་ཁ་དགོན་པའི་ནང་མཇལ་རྒྱུ་ཡོད། དེ་ནས་ཁོང་གི་ཁྱིམ་རྒྱུད་རྣམས་ཀྱིས་ཁོང་གི་ཕྱག་རྒྱུན་རྒྱུད་འཛིན་དང་འཕེལ་རྒྱས་གང་ལེགས་བཏང་བས། ལག་རྩལ་དེ་ཉིད་དར་སྲོལ་ཧ་ཅང་ཆེན་པོ་བྱུང་ཡོད།
དེ་ཡང་ཐང་ཀ་དེ་དག་གི་ནང་དོན་མདོར་བསྡུས་ཙམ་ཞིག་གླེང་ན།སྤྱིར་ཐང་ཀའི་ནང་བསྟན་བྱའི་དོན་ཕུན་སུམ་ཚོགས་ཤིང་། རྒྱ་ཆེ་བ་ཞིག་ཡིན་ཏེ་ཆོས་ལུགས་ཀྱི་ནང་དོན་ཁོ་ན་མ་ཡིན་པར་ལོ་རྒྱུས་དང་དམངས་སྲོལ་སོགས་ཕྱོགས་གང་ཅིའི་ནང་དོན་གཅིག་ཏུ་བསྡུས་པས། དེར་མི་རྣམས་ཀྱིས་བོད་ཀྱི་ལོ་རྒྱུས་དང་རིག་གནས་ཤེས་རྟོགས་བྱེད་པའི་ཤེས་བྱ་ཀུན་འདུས་ཀྱི་དཔེ་མཛོད་ཅེས་བརྗོད་ཀྱི་ཡོད། དེ་དང་འདྲ་བར་འབྲི་གུང་འཚེམ་འདྲུབ་ཀྱི་ཐང་ཀའི་ནང་དོན་ལ་ཡང་གཙོ་བོ་སྟོན་པ་བཅོམ་ལྡན་འདས་དང་། བྱང་ཆུབ་སེམས་དཔའ་ཡི་རིགས། སྟོན་པའི་འཁྲུངས་རབས་ཀྱི་སྐོར། གསང་སྔགས་ཀྱི་ཡི་དམ་ལྷ་ཚོགས། སྤྱན་རས་གཟིགས། སྒྲོལ་མ། ཆོས་སྐྱོང་སྲུང་མ། གྲུབ་ཐོབ་ཆེན་པོ། བླ་མ་གྲགས་ཆེན། དེ་མིན་གྱི་བོད་ཀྱི་ལོ་རྒྱུས། དེ་དང་འབྲེལ་བའི་སྐྱེས་ཆེན་དམ་པ། གཙུག་ལག་ཁང་དང་མཆོད་རྟེན་ཡོད་ལ། གཞན་ད་དུང་ཤམ་བྷ་ལ་ཡི་ཞིང་གི་བཀོད་པ་དང་། སྲིད་པ་འཁོར་ལོ། སྣོད་ཀྱི་འཇིག་རྟེན་གྱི་བཀོད་པ། རི་རབ་ལྷུན་པོ་སོགས་ནང་དོན་ཕུན་སུམ་ཚོགས་པོ་ཡོད། དེ་ལྟར་འབྲི་གུང་འཚེམ་འདྲུབ་ཐང་ཀ་དེ་རི་མོའི་སྒྲིག་བཀོད་ཚགས་དམ་ཞིང་། ཆ་སྙོམས་པ། ཤ་ཚུགས་ལ་རྣམ་པ་བཀྲ་ཞིང་། རི་མོའི་འབྲི་ཐབས་གཙོ་བོར་ཞིབ་བྲིས་གར་ཚོན་དང་། སྐྱ་རིས་ཟུང་དུ་འབྲེལ་བ་ཞིག་ཡིན་པ་དང་། ཐང་ཀ་བཟོ་བའི་བརྒྱུད་རིམ་ནང་ཚང་མ་ནི་འཚེམ་འདྲུབ་ཀྱི་ལས་ཁོ་ན་ཡིན་པས། དེ་ལས་གྲུབ་པའི་རི་མོའི་གཟུགས་བརྙན་རྣམས་འབུར་དུ་དོད་ཅིང་། ལྷ་ཁང་སོགས་ཀྱི་ནང་བཀལ་ན་བརྗིད་ཉམས་ཆེ་ལ་གསོན་ཉམས་ལྡན་པ་ཞིག་ཡོད་པ་ཀུན་གྱིས་མཁྱེན་གསལ་ལགས།
འབྲི་གུང་གི་འཚེམ་འདྲུབ་ལག་རྩལ་གོང་འཕེལ་ཤུགས་ཆེན་བྱུང་བས། ད་ལྟའི་བར་དུ་དགོན་སྡེ་དང་མི་སྒེར་གྱི་ཉར་ཚགས་དུ་མ་གནང་ཡོད་དེ། དཔེར་ན། མཐོ་ཚད་ལ་ཐོག་བརྩེགས་ལྔ་ཙམ་ཡོད་པའི་འབྲི་གུང་མཐིལ་དགོན་དུ་ཉར་ཚགས་བྱས་པའི་སངས་རྒྱས་ཤྰཀྱ་ཐུབ་པ་དང་འབྲི་གུང་གི་རིམ་བྱོན་བླ་མའི་གཙོ་འཁོར་གྱི་ཞལ་ཐང་དང་། དེར་ཡོད་པའི་སྟོན་པ་གཙོ་འཁོར་གྱི་འཚེམ་འདྲུབ་ཞལ་ཐང་། མཐོ་ཚད་ལ་ཐོག་བརྩེགས་གསུམ་ཙམ་ཡོད་པའི་འབྲི་གུང་ཡང་རི་སྒང་དགོན་དུ་ཉར་ཚགས་བྱས་པའི་སློབ་དཔོན་པདྨ་འབྱུང་གནས་ཀྱི་ཞལ་ཐང་། འབྲི་གུང་གཏེར་གྲོང་ཨ་ནེའི་དགོན་གྱི་ཐོག་ཚད་གཅིག་གི་ཚད་ལོན་པའི་གུ་རུའི་ཞལ་ཐང་། རྩ་ཞོལ་རྒྱལ་པོ་དགོན་གྱི་ཐོག་བརྩེགས་གསུམ་ཙམ་གྱི་ཚད་ཡོད་པའི་བྱམས་པ་ཆོས་འཁོར་གྱི་གཙོ་བོ་བྱས་པའི་བཀའ་གདམས་པའི་རིམ་བྱོན་བླ་མའི་ཞལ་ཐང་། ཐོག་བརྩེགས་དྲུག་ཙམ་གྱི་ཚད་ཡོད་པའི་ལྷོ་ཁ་རྡོ་རྗེ་བྲག་དགོན་པའི་སློབ་དཔོན་པདྨ་འབྱུང་གནས་ཀྱི་ཞལ་ཐང་། སྟག་རྩེ་ཤན་ལོ་དགོན་དུ་ཡོད་པའི་ཐོག་བརྩེགས་བཅུ་ཙམ་གྱི་ཇོ་བོ་རྗེ་དཔལ་ལྡན་ཨ་ཏི་ཤ་གཙོ་བོ་བྱས་པའི་ཞལ་ཐང་། འབྲི་གུང་གཏེར་གྲོང་ལྡིང་རྒྱལ་དགོན་དུ་ཉར་ཚགས་བྱས་པའི་སྤྱན་རས་གཟིགས་སེམས་ཉིད་ངལ་གསོའི་འཚེམ་འདྲུབ་ཐང་ཀ། ནག་ཆུ་སོག་རྫོང་ཙན་དན་དགོན་དུ་ཡོད་པའི་སྟོན་པ་གཙོ་འཁོར་གྱི་འཚེམ་འདྲུབ་ཞལ་ཐང་སོགས་ཇི་སྙེད་ཅིག་ཡོད་པ་དང་། གཞན་ད་དུང་ཐེའེ་ཝན་དང་། ཕྱིའི་རྒྱལ་ཁབ་ཨ་མེ་རི་ཁ། རྒྱ་གར་སོགས་སུ་ཉར་ཚགས་བྱས་པའང་ཤིན་ཏུ་མང་པོ་ཡོད།
འབྲི་གུང་གི་འཚེམ་འདྲུབ་ཐང་ཀའི་བཟོ་རྩལ་ལ་ཐུན་མིན་གྱི་ཁྱད་ཆོས་མང་པོ་ལྡན་ཡོད་ཅིང་། དེ་ནི་དམངས་ཁྲོད་ཀྱི་ཐང་ཀ་ལག་བཟོའི་ནང་ཅུང་དམིགས་བསལ་ཅན་ཞིག་ཡིན་པ་དང་། ཚོན་འབྲིའི་ཐང་ཀ་བཟོ་ཐབས་དང་བསྡུར་ན་ཅུང་དཀའ་ཚེགས་ཆེ་ཞིང་། ལས་ཀའི་འབོར་ཚད་ཀྱང་མང་བ་ཡོད་དེ། འདིར་མདོར་བསྡུས་ཙམ་ཞིག་དྲངས་ན་ཐང་ཀ་དེ་རིགས་བཟོ་སྐབས་སྔོན་ལ་འབྲི་བྱའི་ནང་དོན་རྣམས་རི་མོར་ཕབ་དགོས་པ་དང་། དེ་ནས་ཕར་ཆིན་བརྒྱབ་དགོས། ཕར་ཕྱིན་བརྒྱབ་སྐབས་རྒྱུ་ཆ་རྩེ་གྲ་ཤ་སྟག་དགོས་ཤིང་། རྒྱ་ཁྱོན་ལ་སྨི་གྲུ་བཞི་མ་བཅུ་ཡོད་པའི་ཐང་ཀ་ཆེ་གྲས་རྣམས་བཟོ་སྐབས་རྟའི་རྔ་མ་རྐང་ལྔ་དྲུག་མཉམ་དུ་སྒྲིམ་ནས་དེར་ཚགས་ཤའམ་ལུག་ཤ་རློན་པ་བྱུག་སྟེ་མཉམ་དུ་སྒྲིལ་བ་བྱེད་དགོས་པ་དང་། ཕྱི་ངོས་རྣམས་ཚོན་ཁྲ་སྣ་མིན་གྱི་གོས་ཆེན་གྱིས་ཐུམ་ནས་སྟོང་སྐུད་ཀྱིས་བཙེམས་དགོས། དེ་དང་འདྲ་བར་རྒྱ་ཁྱོན་ལ་སྨི་གྲུ་བཞི་མ་གཅིག་ནས་གཉིས་བར་རམ་ཡང་ན་རྒྱ་ཁྱོན་དེ་ལས་ཆུང་བའི་ཐང་ཀ་ཆུང་གྲས་རྣམས་བཟོ་སྐབས་རྟའི་རྔ་མ་རྐང་གཉིས་གསུམ་མཉམ་དུ་སྒྲིམ་ནས་འཚེམ་བཟོ་བྱ་དགོས། དེ་ལྟར་ཐང་ཀ་དེ་དག་བཟོ་བའི་བརྒྱུད་རིམ་ནི་རྙོག་འཛིང་ཆེ་ཞིང་། ཐང་ཀ་བཟོ་གནང་མཁན་གྱི་རི་མོའི་ཆུ་ཚད་དང་། བཟོ་བཀོད་སོགས་ལ་རེ་བ་ངེས་ཅན་ཞིག་ཡོད། སྤྱིར་ཐང་ཀ་བཟོ་སྐྲུན་གནང་མཁན་གྱིས་ཚོན་འབྲིའི་ཐབས་ལ་བརྟེན་པའམ་ཡང་ན་ཚོན་འབྲི་དང་ཕར་ཆིན་ཟུང་དུ་སྦྲེལ་བའི་ཐབས་ལ་བརྟེན་ནས་ཐང་ཀ་ལེགས་གྲུབ་བྱེད་ཀྱི་ཡོད་མོད། ད་ལྟ་ཉར་ཚགས་བྱས་པའི་འབྲི་གུང་ཐང་ཀའི་ངོས་ནས་བརྗོད་ན། དེ་དག་ཚང་མ་ནི་ལག་བཟོའི་འཚེམ་འདྲུབ་ལས་བཟོས་པ་ཤ་སྟག་ཡིན་ལ་བོད་ཀྱི་ཐང་ཀ་བཟོ་བའི་ལོ་རྒྱུས་སྟེང་ཧ་ཅང་མཐོང་དཀོན་པས། དེ་ནི་འབྲི་གུང་གི་ཐུན་མོང་མ་ཡིན་པའི་ལག་ཤེས་བཟོ་ལས་ཤིག་ཡིན་ལ། བོད་ཀྱི་དམངས་ཁྲོད་རིག་གནས་སྒྱུ་རྩལ་གྱི་ཁྲོད་ནམ་ཡང་ཉམས་སུ་མི་རུང་བའི་རིན་ཆེན་གྱི་ནོར་བུ་ཞིག་ཀྱང་ཡིན། བྱས་ཙང་། འབྲི་གུང་འཚེམ་འདྲུབ་ཀྱི་ཐང་ཀར་ལོ་རྒྱུས་ལ་ཞིབ་འཇུག་བྱེད་པའི་རིན་ཐང་ངེས་ཅན་ཞིག་ལྡན་ཡོད་པ་དང་། དེའི་བཟོ་རྩལ་གྱི་བརྒྱུད་རིམ་དང་བཟོ་སྐྲུན་གྱི་རྣམ་པར་སྐབས་དེའི་སྤྱི་ཚོགས་དང་། ཆོས་ལུགས། ལོ་རྒྱུས། དམངས་སྲོལ་སོགས་ཕྱོགས་གང་ཅིའི་ཐད་ཀྱི་ནང་དོན་ལ་ངོས་འཛིན་དང་ཤེས་རྟོགས་བྱེད་པའི་ནང་དོན་འདུས་པས། དེ་ནི་འབྲི་གུང་གི་རིག་གནས་ལ་ཞིབ་འཇུག་བྱེད་པའི་ཤེས་བྱ་ཀུན་འདུས་ཀྱི་དཔེ་དེབ་ཉག་ཅིག་ཡིན། 
དེང་གི་བསྒྱུར་བཅོས་སྒོ་དབྱེའི་དུས་འདིར་འབྲི་གུང་འཚེམ་འདྲུབ་ཐང་ཀ་དེ་བཟོ་རྩལ་གྱི་ཐོན་རྫས་ཐོག་ནས་ཁྲོམ་རྭའི་ཐོག་ཏུ་བསྐྱོད་མགོ་ཚུགས་ཤིང་། དེའི་ཐུན་མིན་གྱི་བཟོ་སྟངས་དང་། ཕུན་སུམ་ཚོགས་པའི་རིག་གནས་ཀྱི་མཚོན་དོན་གྱིས་མི་རིགས་ཀྱི་ལག་ཤེས་བཟོ་ལས་དེ་ཡངས་ཤིང་རྒྱ་ཆེ་བའི་ཁྲོམ་རྭའི་འགྲོ་ལམ་ཐོག་བསྐྱོད་རྒྱུར་སྒོ་མོ་ཡག་པོ་འབྱེད་ཡོད་པས། ང་ཚོས་དེའི་དམིགས་བསལ་གྱི་ཁྱད་ཆོས་ལ་དམིགས་ནས་ལེགས་ཆ་འདོན་སྤེལ་གང་ལེགས་ཀྱིས་དེའི་རིན་ཐང་རྣམས་མངོན་པ་བྱེད་དགོས།
སྤྱི་ལོ་༢༠༠༦ལོར་མལ་གྲོ་གོང་དཀར་རྫོང་སྲིད་གཞུང་དང་། རིག་གནས་ཅུད་ཀྱིས་འབྲི་གུང་འཚེམ་འདྲུབ་ཐང་ཀའི་རྒྱུན་འཛིན་པ་དང་འཚེམ་འདྲུབ་ལག་རྩལ་ལ་སྲུང་སྐྱོབ་ཀྱི་ལས་ཀ་མགོ་ཚུགས་ཡོད་ཅིང་། ཁོང་རྣམས་ཀྱིས་གཅིག་ནས་འབྲི་གུང་གི་འཚེམ་འདྲུབ་ཐང་ཀ་ལ་བརྟག་ཞིབ་རགས་ཙམ་བྱས་ཐོག་རྩ་ཞོལ་ཤང་གི་འབྲི་གུང་ཐང་ཀའི་གཞི་རྩའི་གནས་ཚུལ་ལ་རྒྱུས་ལོན་པ་བྱས་ཡོད་ལ། གཉིས་ནས་སྲིད་གཞུང་གི་མིང་ཐོག་ནས་འཚེམ་འདྲུབ་ཀྱི་ལག་རྩལ་བྱང་ཆུབ་པའི་སྒྱུ་རྩལ་པ་རྒན་གྲས་རྣམས་ཀྱིས་ལག་རྩལ་བརྒྱུད་སྤེལ་ཡོང་རྒྱུར་བློ་འགུགས་ཐབས་ཀྱི་ལས་དོན་སྤེལ་ཡོད་པས། དེའི་ཐོག་ནས་ལག་རྩལ་དེ་རིགས་འབྲི་གུང་གི་རིག་གནས་ཁྲོད་གལ་ཆེའི་གནས་བབ་དང་བརྒྱུད་སྤེལ་གྱི་གལ་ཆེའི་རང་བཞིན་མངོན་ཡོད། བྱས་ཙང་། ང་ཚོས་མུ་མཐུད་རིག་གནས་དེ་རིགས་ལ་མཐོང་ཆེན་གྱིས་འབྲི་གུང་འཚེམ་འདྲུབ་ཀྱི་ཐང་ཀའི་རིག་དངོས་ལ་ཡོངས་བཤེར་གྱིས་སྒྱུ་རྩལ་དེའི་བྱུང་རིམ་དང་། འཕེལ་རྒྱས། རྒྱུན་འཛིན། ལོ་རྒྱུས་སོགས་ཀྱི་རྒྱུ་ཆར་གཅིག་འགྱུར་གྱིས་རིགས་དབྱེ་དང་། ལེགས་སྒྲིག། ཉར་ཚགས་བཅས་བྱ་དགོས་ལ། ད་ལྟའི་འབྲི་གུང་འཚེམ་འདྲུབ་ཐང་ཀའི་ལག་རྩལ་མི་སྣར་སྲུང་སྐྱོབ་དང་བརྩི་མཐོང་ཆེན་པོ་བྱ་དགོས། དེས་མ་ཚད་སྲིད་གཞུང་གི་གཙོ་ཁྲིད་འོག་མེས་པོའི་ལག་རྩལ་ཕྱིར་གྱར་མི་ཆོག་པའི་འདུ་ཤེས་རྙིང་པའི་བཀག་རྒྱ་གཏོར་ནས་གྲངས་ཚད་ངེས་ཅན་གྱི་གཞོན་སྐྱེས་སྒྱུ་རྩལ་པའི་གསོ་སྐྱོང་ལས་ལ་ཡང་འབད་དགོས་སོ། །