༄༅།།འབྲི་ཆུའི་འགྲམ་གྱི་གནའ་བོའི་བཟོ་བཀོད། མེས་པོའི་ལག་རྩལ་གྱི་བང་མཛོད།

      འབྲི་ཆུའི་བཞུར་རྒྱུན་དེད་ནས་བསྐྱོད་ན། འགྲམ་ངོགས་སུ་ཡོད་པའི་བོད་ཀྱི་གནའ་བོའི་བཟོ་བཀོད་དག་ནི་རི་སྒང་གི་ངོས་སུ་ཁ་ཤར་ལ་གཏད་ནས་ཡོད་ཅིང་། དེ་དག་ནི་གནའ་བོའི་བཙན་མཁར་རམ་ཡང་ན་ཐོག་ཁང་ཚོགས་ཤིག་དང་འདྲ་བར་མ་ཟད། ཁམས་ཕྱོགས་ཀྱི་སྡོད་ཁང་གི་ཁྱད་ཆོས་འབུར་དུ་ཐོན་ཡོད།
རྡོ་ལེབ་བརྩིགས་ཏེ་ཕྱི་མཁར་བྱེད་པ་དང་འདམ་བག་བརྫིས་ཏེ་ཁང་ཀླད་འགེབ་པ། ལོ་ཟླའི་ཆར་རླུང་ནང་ལ་རྙིང་རལ་དུ་གྱུར་པའི་སྒོ་དང་སྒེའུ་ཁུང་། ད་དུང་ཕྱིར་འབུར་ཡོད་པའི་བྱ་འདབ་སོགས་མཐོང་ཡོང་ན། མིའི་སེམས་ལ་གནའ་བོའི་རྣམ་པ་ཞིག་དང་བརྗིད་ཉམས་ལྡན་པ་ཞིག ངོ་མཚར་བའི་ཉམས་ཤིག་བཅས་དབང་མེད་དུ་སྟེར་ཡོང་།       རྡོ་ནི་གནའ་བོའི་བཟོ་བཀོད་ཀྱི་གྲུབ་ཆ་གཙོ་བོ་ཡིན་ཞིང་། འབྲི་ཆུའི་ངོགས་གཉིས་སུ་རྡོ་ལེབ་མང་པོ་ཡོད་སྟབས། ས་གནས་དེ་གའི་མང་ཚོགས་ཀྱིས་སྡོད་ཁང་རྒྱག་པ་དང་བགྲོད་ལམ་བཏོད་པ་ལ་རྡོ་ཡི་རྒྱུ་ཆ་རང་ས་ཆ་ནས་བླངས་ཆོག་ཆོག་ཡིན་ལ། ཡུལ་དེའི་སྡོད་ཁང་སྤྱིར་བཏང་བ་ཞིག་གམ་ཡང་ན་བཙན་མཁར་བརྗིད་པོ་ཞིག ཐ་ན་ལྷས་རའི་ཆུ་ཁུང་ལྟ་བུ་ཞིག་ལའང་རྡོ་ལེབ་བསྒྲིགས་ཏེ་བཟོས་ཡོད།
      སྲ་ཞིང་མཁྲེགས་པའི་རྡོ་ལེབ་སྤྱིར་བཏང་བ་རེ་རེ་བོད་པ་མང་ཚོགས་ཀྱི་ལག་ཏུ་ཐོན་ཚེ། དེ་དག་ནི་ཚགས་དམ་ལ་གོ་རིམ་ལྡན་ཞིང་ཡིད་འོང་མཛེས་ཉམས་དོད་པའི་རྩིག་ལས་བཟོ་བཀོད་ཀྱི་སྒྱུ་རྩལ་ཁྱད་འཕགས་ཤིག་ཏུ་གྱུར་ནས་འོད་སྟོང་འབར་བཞིན་ཡོད།       གྲུ་དཔོན་ཚང་གི་གཞིས་ཀ་ནི་ཡུལ་ཤུལ་གྲོང་ཁྱེར་ཁྲི་འདུ་རྫོང་བཞི་དབུས་གྲོང་རྡལ་གྲུ་བའི་མདའ་གྲོང་ཚོ་ན་ཡོད་ཅིང་། འདི་ནི་ལོ་རྒྱུས་ཐོག་གི་འབྲི་ཆུའི་གྲུ་བའི་མདའ་རབ་ཁའི་དོན་གཅོད་ཁྱིམ་རྒྱུད་ཀྱི་སྡོད་ཁང་ཡིན། ལོ་ཟླ་མང་བོ་འགོར་བ་དང་བསྟུན་ནས། ཕྱི་མཁར་གྱི་ངོས་སུ་རྩྭ་ལྡུམ་གྱིས་ཁེབས་ཡོད་ནའང་། སྡོད་ཁང་སྔར་བཞིན་བརྟན་ལྷིང་ངེ་ཡོད།
      གཞིས་ཀ་དེ་ནི་ཐོག་ཁང་གསུམ་ཅན་ཞིག་ཡིན་ལ། འོག་ཁང་ཏུ་གཟན་ཆས་དང་སོ་ནམ་ཡོ་བྱད་སོགས་ཡོད་ཅིང་། ཉིས་ཐོག་ཏུ་མི་སྡོད་ས་དང་མཆོད་ཁང་། ཇ་ཁང་། ཁྱམས་ར་བཅས་འདུག སུམ་ཐོག་གི་ཁང་བ་ནི་འོག་ཁང་དང་ཉིས་ཐོག་གཉིས་ལས་ཆུང་ཞིང་དམའ་བར་མ་ཟད། ད་དུང་གྱང་དང་སྒེའུ་ཁུང་། གནམ་ཤིང་། སྐས་རྐང་གཅིག་མ་བཅས་རང་བཞིན་དུ་སྣང་བ་ལས་ཚོན་རྩི་སོགས་ཅི་ཡང་བྱུགས་མེད་པ་རེད།       སྡོད་ཁང་གསར་རྒྱག་གི་སྐབས། རྩིག་མཁན་གྱིས་ཐིག་མི་འཐེན་ཞིང་དཔེ་རིས་ཀྱང་མི་འབྲི་བར་ཚང་མ་རང་ཉིད་ཀྱི་ཉམས་མྱོང་ལ་བསྟུན་བཞིན་ཡོད་ལ། དེ་ལྟར་བྱས་ཀྱང་། ལྡེབས་ངོས་སྙོམས་ལ་མཉམ་པའི་ཚད་གཞི་ནི་སྔར་བཞིན་ཐོན་ཐུབ་ཡོད། ད་དུང་ཡུལ་ཤུལ་ལ་ས་ཡོམ་བྱུང་དུས། འབྲི་ཆུའི་འགྲམ་ངོགས་ཀྱི་སྲོལ་རྒྱུན་རྩིག་པའི་སྡོད་ཁང་ཁྲོད་ནས་རྡིབ་ཉིལ་བྱུང་བ་ཧ་ཅང་ཉུང་བ་རེད།
      བཟོ་ལས་ཅན་དང་གྲོང་ཁྱེར་ཅན་གྱི་འཕེལ་རྒྱས་ཆེན་པོ་བྱུང་བ་དང་བསྟུན་ནས། འབྲི་ཆུའི་བཞུར་ཁོངས་ཀྱི་སྲོལ་རྒྱུན་གྲོང་ཚོ་ནུབ་པ་དང་སྟོང་བར་འགྱུར་བའི་གནས་སུ་ལྷུང་ཡོད་ནའང་། གྲོང་གསེབ་དར་སྤེལ་གྱི་འཐབ་ཇུས་ལག་ལེན་བསྟར་བ་ན། ཡུལ་ཤུལ་ཁུལ་གྱིས་གནའ་བོའི་གྲོང་ཚོ་སྲུང་སྐྱོབ་ཀྱི་ཕྱོགས་ནས་མི་ཤུགས་དང་དངོས་ཤུགས་མང་དུ་བཏང་ནས་ཐུབ་ཚོད་ནུས་ཚོད་ཀྱིས“རྙིང་བ་རྙིང་བ་ལྟར་ཞིག་གསོ་བྱེད་པ”ཡི་ཚད་གཞི་ལག་ལེན་བསྟར་ཡོད་པས། གཞི་རྩའི་ཆ་ནས་གནའ་བོའི་གྲོང་ཚོ་ཡི་རྣམ་པ་སོར་འཇོག་ཐུབ་ནས་བོད་ཀྱི་གནའ་བོའི་གྲོང་ཚོ་ཡི་བཟོ་བཀོད་ཀྱི་སྲུང་སྐྱོབ་ཆུ་ཚད་གསར་བ་ཞིག་ལ་ཐོན་དང་ཐོན་བཞིན་ཡོད་པ་རེད།       ཡུལ་ཤུལ་གྱི་བོད་ལུགས་གནའ་བོའི་བཟོ་བཀོད་ཀྱི་ལོ་རྒྱུས་ནི་འབྲི་ཆུའི་འགྲམ་ངོགས་ནས་བྲིས་ཡོད་ལ། དེ་རུ་གཙང་ཆུ་སྔོན་མོའི་གཟི་དཔལ་དང་མཛེས་ཉམས། ཤེས་རིག་གི་ཡུན་རིང་དང་རྒྱུན་འཛིན། མི་རིགས་ཀྱི་བབ་ཆགས་དང་དགའ་ཉམས་བཅས་མངོན་ཡོད་པར་མ་ཟད། དུས་སྐབས་རེ་རེའི་བཟོ་བཀོད་སྒྱུ་རྩལ་དང་དེ་ཉིད་གནས་པའི་ལོ་རྒྱུས་དུས་རབས། ས་བབ་གནམ་གཤིས། མི་རིགས་རིག་གནས། འཚོ་བའི་གོམས་གཤིས་བཅས་ལའང་འབྲེལ་བ་དམ་ཟབ་ཡོད་སྟབས། སྲོལ་རྒྱུན་གྲོང་ཚོ་འདི་དག་ཏུ་སྲོལ་རྒྱུན་རིག་གནས་ཀྱི་ཉིང་བཅུད་འདུས་པ་དང་མི་རིགས་རིག་གནས་ཀྱི་སྣ་མང་རང་བཞིན་ཡང་གསོག་ཉར་བྱས་ནས་ཡོད།