ཚེ་དབང་རྡོ་རྗེ་ཡིས་བོད་ཤོག་གི་བཟོ་རྩལ་རྒྱུད་འཛིན་དང་དར་སྤེལ་དུ་བཏང་།

        བྲག་དཀར་རྫོང་གེ་སར་ལམ་གྱི་གངས་ལྗོངས་གཡང་ཚང་རིག་གནས་ཐོན་ལས་ཚད་ཡོད་ཀུང་ཟིའི་བཟོ་ཁང་དུ་ཚེ་དབང་རྡོ་རྗེ་ཡིས་སློབ་བུ་རྣམས་ལ་བོད་ཤོག་བཟོ་རྩལ་གྱི་བརྒྱུད་རིམ་ངོ་སྤྲོད་བྱེད་བཞིན་ཡོད།

        བོད་ཤོག་བཟོ་སྐྲུན་གྱི་བརྒྱུད་རིམ་ནི་ཐོག་མར་བལྟས་ཙམ་གྱིས་ཅུང་སླ་པོ་འདྲ་ནའང་དོན་གྱིས་བཟོ་མཁན་གྱི་ལག་རྩལ་ལ་ཆ་རྐྱེན་མཐོན་པོ་ཡོད་དེ། ཉམས་མྱོང་ཕུན་སུམ་ཚོགས་པའི་བཟོ་མཁན་གྱིས་ད་གཟོད་སྲབ་མཐུག་རན་ཞིང་ཆེ་ཆུང་འོས་ཤིང་འཚམས་པའི་བོད་ཤོག་བཟོ་ཐུབ།

        ལོ་ན37ཡིན་པའི་ཚེ་དབང་རྡོ་རྗེ་ནི་བྲག་དཀར་རྫོང་ཆུ་ཁོལ་ཡུལ་ཚོ་ཆུ་རིང་སྡེ་བར་སྐྱེས་ཤིང་། 2013ལོར་ཁོས་བྲག་དཀར་རྫོང་དུ་ཆེས་ཐོག་མའི་བོད་ཡིག་གི་ཡིག་གཏགས་དང་བསྐྱར་དཔར། བརྡ་ཁྱབ་ཇུས་འགོད་བཅས་འདུ་བའི་ཀུང་ཟི་ཞིག་བཙུགས་མོད། དཀའ་ཁག་གང་མང་ལ་ཕྲད་པས་ཀུང་ཟི་དེ་ཡུན་རིང་དུ་གཉེར་མ་ཐུབ།

        འོན་ཀྱང་ཚེ་དབང་རྡོ་རྗེ་ཡིས་འབད་བརྩོན་བྱེད་མཚམས་མ་བཞག་སྟེ། 2017ལོར་ཁོས་ཕྱོགས་མང་པོ་ནས་རྒྱུས་ལོན་བྱས་ཤིང་ཉེ་བའི་ལོ་འགའི་རིང་རིག་གནས་ཡུལ་སྐོར་ཆེས་ཆེར་དར་ཞིང་། བོད་ཤོག་གི་ཁྲོམ་རའི་མདུན་ལྗོངས་ཤིན་ཏུ་ཡངས་ཤིང་རྒྱ་ཆེ་བ་ཚོར་ཏེ་ལོ3གྱི་རིང་བོད་ལྗོངས་སྙེ་མོ་རྫོང་དང་སི་ཁྲོན་སྡེ་དགེ་རྫོང་། ཡུལ་ཤུལ་བོད་རིགས་རང་སྐྱོང་ཁུལ། མགོ་ལོག་སྡེར་ནང་ས་བྲིས་སོགས་ཀྱི་ས་ཁུལ་དུ་སོང་སྟེ་དམངས་ཁྲོད་ཀྱི་བོད་ཤོག་བཟོ་རྩལ་རྒྱུད་འཛིན་བྱེད་མཁན་དག་དགེ་རྒན་ལ་བརྟེན་ནས་ནན་ཏན་གྱིས་སློབ་སྦྱོང་བྱས།

        ཚེ་དབང་རྡོ་རྗེ་ཡིས་ངོ་སྤྲོད་བྱས་པ་ལྟར་ན་བོད་ཤོག་ལ་སྲིན་འབུ་དང་ཙི་གུས་མི་བཟའ་བ། མི་རུལ་བ་བཅས་ཀྱི་ཁྱད་ཆོས་ལྡན་ཞིང་། ཕུལ་དུ་བྱུང་བའི་བཟོ་རྩལ་གྱིས་ད་དུང་ཤོག་བུའི་མདོག་མི་འགྱུར་བ་དང་ཆུས་བརླན་ཀྱང་མི་རལ་བ། ལྟེབ་རྗེས་ཤུལ་མེད་པ་བཅས་ཀྱི་ཁྱད་ཆོས་ལྡན།

        བོད་ཤོག་གི་སྤྱོད་ཡུན་རིང་ཞིང་སྤུས་ལེགས་པའི་རྒྱུ་མཚན་ནི་དེ་ཉིད་ཀྱི་རྒྱུ་ཆ་ཁྱད་པར་བ་སྟེ་རེའུ་ལྕག་དང་འབྲེལ་བ་ཆེན་པོ་ཡོད། རེའུ་ལྕག་གི་རྩད་པར་རིམ་པ་གསུམ་ཡོད་པ་དང་བོད་ཤོག་བཟོ་དུས་ཆེས་ནང་གི་རིམ་པ་དེ་ཁོ་ན་བེད་སྤྱོད་བྱེད་པ་ཡིན་ལ། དེ་ཉིད་ཆུ་ཁོལ་ནང་དུ་བུལ་བསྣན་ཏེ་བསྐོལ་བ་དང་ལས་སྣོན་བྱས་ཏེ་ཁུ་བ་ལེན་པ། དེ་ནས་ཡང་བསྐྱར་སྦངས་བ་བཅས་བྱེད་པ་དང་། དེའི་རྗེས་ཤོག་བུའི་ཆེ་ཆུང་གི་དཔེ་དབྱིབས་སྟེང་དུ་ལེན་པ་དང་མཇུག་མཐར་ཉི་འོད་འོག་ཏུ་སྐེམ་པ་བཅས་ཀྱི་གོ་རིམ་ཚར་རྗེས་བོད་ཤོག་ཚད་ལྡན་ཞིག་ལེགས་པོར་གྲུབ་པ་ཡིན།

        2021ལོའི་ཟླ10པར། ཚེ་དབང་རྡོ་རྗེ་ཡིས་དངོས་སུ་བོད་ཤོག་རིག་གནས་ཐོན་ལས་གཉེར་པ་དང་། དེ་དང་ཆབས་ཅིག་བོད་སྤོས་དང་བཏུམ་ཤོག་སོགས་ཀྱི་ཐོན་རྫས་ཀྱང་བཟོས་ཏེ་གསར་གཏོད་ཀྱི་ལག་རྩལ་རོང་འབྲོག་ས་ཁུལ་དུ་དྲངས་ཤིང་། ཐབས་ལམ་མང་པོ་བརྒྱུད་དེ་བོད་མི་རིགས་ཀྱི་སྲོད་རྒྱུན་རིག་གནས་དར་སྤེལ་བཏང་།

        གསར་འགོད་པས་གངས་ལྗོངས་གཡང་ཚང་རིག་གནས་ཐོན་ལས་ཚད་ཡོད་ཀུང་ཟིར་རྒྱུས་ལོན་བྱུང་བ་ལྟར་ན། སློབ་བུ་རྣམས་ཀྱིས་བོད་ཀྱི་ཡིག་གཟུགས་ཀྱིས་སྤུས་དག་ཅིང་སྲབ་མཐུག་རན་པའི་བོད་ཤོག་སྟེང་དུ་གསུང་རབ་དང་བསྟན་བཅོས་སྣ་ཚོགས་བཤུ་འབྲི་བྱེད་བཞིན་ཡོད་པ་དང་། ཚེ་དབང་རྡོ་རྗེ་ན་རེ། “ང་ཚོས་མཁོ་མཁན་གྱི་རེ་བ་ལྟར་གླེགས་བམ་དང་བརྩམས་ཆོས་སྣ་ཚོགས་བོད་ཤོག་སྟེང་དུ་བཤུས་པ་ཡིན་ལ། དེ་ལྟར་བྱས་ན་བོད་ཤོག་ཐོན་ལས་འཕེལ་རྒྱས་སུ་གཏང་ཐུབ་པར་མ་ཟད། སློབ་བུ་རྣམས་ལའང་འོས་འཚམས་ཀྱི་ཡོང་སྒོ་ཐོབ་བཞིན་ཡོད”ཟེར།

        རྒྱུས་ལོན་བྱུང་བ་ལྟར་ན། རོང་འབྲོག་མང་ཚོགས་ཀྱིས་ལས་གཏོད་ལས་ཞུགས་བྱེད་པ་དང་ཡོང་འབབ་འཕར་བར་རོགས་རམ་བྱ་ཆེད། ཀུང་ཟིས་ཆེད་དུ“དབང་སྐྱོན་དང་རོང་འབྲོག་མང་ཚོགས་ལ་རོགས་སྐྱོར་བྱེད་པའི་སྟེགས་བུ”བཙུགས་ཤིང་། རིན་མེད་ངང་དབང་སྐྱོན་མི་སྣ་དང་རོང་འབྲོག་མང་ཚོགས་ཀྱི་ལག་བཟོའི་ཐོན་རྫས་ཕྱིར་འཚོང་བྱེད་རོགས་བྱེད་བཞིན་ཡོད།

        མིག་སྔར་ཁོང་གི་ཀུང་ཟིར་ས་གནས་ཀྱི་མང་ཚོགས24ཡིས་བོད་ཤོག་གི་བཟོ་རྩལ་སློབ་བཞིན་ཡོད་པ་དང་། ཁོ་ཚོས་རང་གི་ཕ་མེས་ཡང་མེས་ནས་དར་བའི་དམངས་ཁྲོད་ཀྱི་བཟོ་རྩལ་ཁྱས་པར་བ་འདི་མུ་ནས་མུ་རུ་དར་སྤེལ་དང་རྒྱུད་འཛིན་བྱ་ཐུབ་པར་སེམས་གཏིང་ནས་རེ་བ་བརྟན་པོ་བཅངས་ཡོད།