གཟུགས་འདས་ཤུལ་བཞག་རིག་གནས་ཁྲོད་ཀྱི་ཀོས་ནན་གཙགས་དྲུབ།

       ཨ་མདོའི་སྲོལ་རྒྱུན་གྱི་མི་རིགས་གྱོན་ཆས་སྔར་བས་འགྲེམས་སྟོན་དང་ཀོས་ནན་གྱི་ས་ཁུལ་ཁྱད་ཆོས་དང་མི་རིགས་ཁྱད་ཆོས་འབུར་ཐོན་བྱ་ཆེད། ཟླ2པའི་ཚེས21ནས་ཚེས23ཉིན་བར། ཀོས་ནན་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས་རང་རེའི་རྫོང་གི་རྒྱལ་ཁབ་རིམ་པའི་གཟུགས་འདས་རིག་གནས་ཤུལ་བཞག་གི་མཚོན་བྱེད་རང་བཞིན་ལྡན་པའི་རྣམ་གྲངས་ཀོས་ནན་བོད་རིགས་ཀྱི་གཙགས་དྲུབ་ཏེ་ཞིང་ཆེན་རིག་གནས་དང་ཡུལ་སྐོར་ཐིང་གིས་གཉེར་བའི་མཛེས་སྡུག་ལྡན་པའི་མཚོ་སྔོན་གྱི་གཟུགས་འདས་ཤུལ་བཞག་རིག་གནས་ཐུན་མོང་ཐོག་ལོངས་སྤྱོད་བྱེད་པ་ཞེས་པ་བརྗོད་དོན་གཙོ་བོར་བྱས་པའི་མཚོ་སྔོན་གྱི་ལག་བཟོས་འགྲེམས་ཁུལ་གྱི་བྱེད་སྒོར་ཞུགས་པ་རེད།

       བྱེད་སྒོ་སྤེལ་ཡུལ་དུ་ཐོན་རྫས་འགྲེམས་སྟོན་དང་རྒྱུན་འཛིན་པའི་ཡུལ་དངོས་འགྲེམས་འཁྲབ། སྤེལ་རེས་ཉམས་ལེན་སོགས་ཀྱི་བྱེད་ཐབས་བརྒྱུད་ནས། ཀོས་ནན་བོད་ཀྱི་གཙགས་དྲུབ་ཞེས་པས་ཨ་མདོའི་བོད་རིགས་ཀྱི་སྲོལ་རྒྱུན་རྒྱན་གོས་དེ་མཚོ་སྔོན་གྱི་ལག་འགྲེམས་ཁུལ་དུ་འགྲེམས་སྟོན་ཆེན་པོ་བྱས་པས། གཙགས་དྲུབ་ཀྱི་ཁྱད་ཆོས་ལ་ལྟད་མོ་བའི་བསྔགས་བརྗོད་ཐོབ་པ་དང་། ངོ་མཚར་ཆེ་བའི་བོད་ཀྱི་གཙགས་དྲུབ་བརྩམས་ཆོས་ཀྱིས་གྲོང་མིར་རྩེར་སོན་གྱི་རིག་གནས་ལྟད་མོ་གྱ་ནོམ་པ་ཞིག་བཤམས་ཡོད་པ་རེད།

       ཐེངས་འདིའི་བྱེད་སྒོ་ནི་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་དང་། རྒྱུན་འཛིན་པ་དང་ཤུལ་བཞག་རིག་གནས་ལས་དོན་པར་ཕན་ཚུན་སྤེལ་རེས་དང་སློབ་སྦྱོང་བྱེད་པའི་བྱ་ཐབས་གལ་ཆེན་ཞིག་ཀྱང་བཏོད་དེ། གཟུགས་འདས་ཤུལ་བཞག་རིག་གནས་དང་ཉམས་ལེན་བྱ་ཡུལ་མཉམ་འདྲེས་གཏིང་ཟབ་ཐུབ་པ་དང་། དུས་མཚུངས་སུ་ཀོས་ནན་བོད་ཀྱི་གཙགས་དྲུབ་དང་གསེར་གྱི་མིང་བྱང་གཏོད་རྒྱུར་རྨང་གཞི་བཏིང་ནས། ཀོས་ནན་བོད་ཀྱི་གཙགས་དྲུབ་ཀྱིས་རྒྱལ་ཁབ་རིམ་པའི་གཟུགས་འདས་ཤུལ་བཞག་རིག་གནས་ཀྱི་རྣམ་གྲངས་དེར་སྲུང་སྐྱོང་དང་རྒྱུན་འཛིན་ཐུབ་ཡོད།