ཀོས་ནན་བོད་ཀྱི་གཙགས་དྲུབ་རྒྱུན་འཛིན་པ་བསོད་ནམས་མཚོ་ངོ་སྤྲོད་མདོར་བསྡུས།

       བསོད་ནམས་མཚོ། མོ། སྤྱི་ལོ1966ལོར་མཚོ་སྔོན་ཀོས་ནན་རྫོང་བྱ་མདོ་ནས་སྐྱེས། མཚོ་ལྷོ་ཁུལ་ཁུལ་རིམ་པའི་དངོས་པོ་མ་ཡིན་པའི་ཤུལ་བཞག་རིག་གནས་ཀྱི་རྣམ་གྲངས་ཀོས་ནན་རྫོང་བོད་ཀྱི་གཙགས་དྲུབ་ཀྱི་ཚབ་མཚོན་རང་བཞིན་གྱི་རྒྱུན་འཛིན་པ་དང་ཀོས་ནན་རྫོང་བོད་ཀྱི་གཙགས་དྲུབ་མཁས་པ་ཡིན།

       གཙགས་དྲུབ་དང་འཚེམ་དྲུབ་གྱི་སྒྱུ་རྩལ་ལ་དུང་ཞེན་ཆེ་བའི་ཁོ་མོས་ལོ13ནས་བཟུང་མེས་པོ་ནས་བརྒྱུད་པའི་གཙགས་དྲུབ་ལག་རྩལ་དེ་རང་གི་ཨ་མ་དང་སྡེ་བའི་རྒན་མོ་ཚོའི་ཞབས་ལ་གཏུགས་ནས་སྦྱང་བ་བྱས་ཤིང། 2001ལོ་ནས་བཟུང་སྐྲ་ལོང་དང་རལ་ཤུབས། ཁུར་བཏགས། གཟོག་ཐིག་སོགས་བུད་མེད་ཀྱི་མགོ་རྒྱན་དང་འདོགས་རྒྱན་གཙགས་མགོ་ཚུགས་ཏེ་རང་ས་རང་ཡུལ་གྱི་གཙགས་དྲུབ་སྒྱུ་རྩལ་རྒྱུན་འཛིན་དང་དར་སྤེལ་བཏང་། མོས་གཙགས་པའི་འདོགས་ཆ་ལ་ཕ་ཡུལ་གྱི་ཡུལ་མི་ཚོས་དགའ་བསུ་ཐོབ་དང་ཐོབ་བཞིན་ཡོད་པར་མ་ཟད། 2014ལོར་སྡེ་བའི་བུད་མེད30ལྷག་གིས་གྲུབ་པའི་ཀོས་ནན་རྫོང་བསོད་ནམས་ཡར་འགྲོ་མི་རིགས་གྱོན་གོས་ཚད་ཡོད་སྤྱི་གཉེར་ཁང་བཙུགས་ཏེ། སྔ་གཞུག་ཏུ་རྫོང་ཕྱི་ནང་གི་གཙགས་དྲུབ་འགྲན་སྡུར་སྣ་ཚོགས་སྟེང་ཞུགས་ནས་བྱ་དགའ་ཡང་མི་ཉུང་བ་བླངས་ཡོད།

       2011ལོ་དང2013ལོ། 2014ལོ་བཅས་ལོ་གསུམ་རིང་ལ་ཁོ་མོས་གོ་སྐབས་དམ་འཛིན་བྱས་ཏེ། ས་གནས་དེར་ལོ་གཉིས་རེའི་ནང་སྤེལ་བཞིན་པའི་བྱ་མདོ་ཞང་དྲུག་པའི་སྲོལ་རྒྱུན་སྤྲོ་ཚོགས་ཀྱི་འགྲན་སྡུར་ཁྲོད་ཞུགས་ནས་གཙགས་དྲུབ་གྱི་བྱ་དགའ་ཨང་དང་པོ་ཐོབ་དང་། 2013ལོར་ཀོས་ནན་རྫོང་སྐབས་དང་པོའི་བོད་ཀྱི་གཙགས་གྲུབ་དང་མི་རིགས་གླུ་གར་རིག་གནས་སྤྲོ་ཚོགས་ཀྱི་གཙགས་དྲུབ་འགྲན་སྡུར་སྟེང་བྱ་དགའ་ཨང་གཉིས་པ་ཐོབ་མྱོང་། 2016ལོར་མང་རྫོང་སྐབས་གཉིས་པའི་བོད་ཀྱི་གཙགས་དྲུབ་དང་མི་རིགས་གླུ་གར་རིག་གནས་སྒྱུ་རྩལ་དུས་ཆེན་སྟེང་ཀོས་ནན་རྫོང་བསོད་ནམས་ཡར་འགྲོ་མི་རིགས་གྱོན་གོས་ཚད་ཡོད་སྤྱི་གཉེར་ཁང་གི་སྐྱ་ལོང་ལ་བྱ་དགའ་ཨང་པོ་ཐོབ། 2017ལོའི་ཟླ་བདུན་པར་ཀོས་ནན་རྫོང་སྐབས་གཉིས་པའི་འཕྲུལ་འཁོར་རིག་གནས་ཡུལ་སྐོར་དུས་ཆེན་གྱི་བོད་ཀྱི་གཙགས་དྲུབ་རྒྱན་གོས་འགྲན་བསྡུར་སྟེང་བྱ་དགའ་ཨང་གཉིས་པ་དང་རྒྱན་གོས་ཇུས་འགོད་ལ་ཡང་བྱ་དགའ་ཨང་གཉིས་པ་ཐོབ། 2018ལོའི་ཟླ་བདུན་པར་ཀོས་ནན་རྫོང་སྐབས་གསུམ་པའི་འཕྲུལ་འཁོར་རིག་གནས་ཡུལ་སྐོར་དུས་ཆེན་གྱི་བོད་ཀྱི་གཙགས་དྲུབ་འགྲེམས་སྟོན་འགྲན་བསྡུར་སྟེང་བྱ་དགའ་ཨང་གཉིས་པ་ཐོབ།