༄༅། །ཡིད་འོང་སྤུ་གྲིའི་རྒྱུ་དང་ཁྱད་ཆོས་སྐོར་གླེང་བ།

       མི་རིགས་ཀྱི་ལག་ཤེས་བཟོ་ལས་ནི་རང་ལྗོངས་ཀྱི་སྲོལ་རྒྱུན་ཐོན་ལས་ཆེན་པོ་གསུམ་གྱི་གྲས་ཤིག་ཡིན་ཞིང་། དེ་ལས་མི་རིགས་ཀྱི་ཁྱད་ཆོས་ཟབ་མོ་མངོན་བཞིན་ཡོད། རང་ལྗོངས་ལ་ལོ་རྒྱུས་ཡུན་རིང་ལྡན་པའི་མི་རིགས་ཀྱི་ལག་ཤེས་ཐོན་རྫས་མང་པོ་ཡོད་པའི་ཁྲོད་བོད་གྲི་ནི་ཐུན་མོང་མ་ཡིན་པ་ཞིག་རེད།

       དེ་ཡང་ཇི་སྐད་དུ། གྲི་དང་ཕོར་པ་གང་འགྲོར་འཁྱེར། དགྲ་དང་གྲོགས་པོ་ནམ་ཡོང་ཆ་མེད་པ་ཅེས་ཟེར་སྲོལ་མཆིས་པ་ལྟར། རང་རེའི་དམངས་ཁྲོད་དུ་གྲི་ལ་དང་དོད་བྱེད་པའི་སྲོལ་ལུགས་ཤིག་སྔ་ས་ནས་དར་ཡོད། སྤོ་བོ་རྫོང་ཡིད་འོང་སྤུ་གྲིའི་བཟོ་རྩལ་དེ་ཡང་རང་སྐྱོང་ལྗོངས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་ཀྱི་མིང་གཞུང་དུ་འཁོད་ཡོད།

       སྤྱིར་ཡིད་འོང་གི་གྲི་འདི་རིགས་ལ་སྤུ་གྲི་འམ་སྤོ་གྲི་ཞེས་ཡུལ་མིང་དང་ཁྱད་ནུས་ཐོག་ནས་སྤོ་བོའི་ཡུལ་ནས་ཐོན་པའམ་གྲི་རྣོ་ངར་ཅན་ཞེས་གོ་བ་བླངས་ན་འགལ་བ་མི་འདུག་སྙམ། ཡིད་འོང་སྤུ་གྲིའི་ཁྱད་ཆོས་གཙོ་བོ་ནི་གྲིའི་ངོས་གཉིས་སུ་འབྱུང་བ་ཆུའི་རི་མོ་དང་མེའི་རི་མོ། ནམ་མཁའི་འཇའ་ཡི་རི་མོ་ཁག་གསུམ་ཙམ་བརྡུང་སྲོལ་མཆིས་ལ། རྒྱུ་ཆའི་ངོས་ནས“ཡིད་འོང་སྨྱུག་རིའི་ལྕགས་གཏེར”དང“ཕ་རྒན་སྲིན་པོའི་ལྕགས་གཏེར” “ཀོང་པོ་བྲག་གསུམ་གྱི་ལྕགས་གཏེར”བཅས་གཏེར་རྡོ་རིགས་གསུམ་མཉམ་དུ་བཙོ་སྦྱངས་བྱས་ནས་གྲུབ་པའི་ཐུན་མོང་མ་ཡིན་པའི་རྒྱུ་ཆ་དང་བཟོ་རྩལ་དག་གངས་ལྗོངས་ས་ཕྱོགས་ཀུན་དུ་ཁྱབ།

       དམངས་ཁྲོད་ངག་རྒྱུན་དུའང་། འཕྱར་བ་ཙམ་གྱིས་དགྲ་བོ་དབང་དུ་འདུ་བའི་རལ་གྲི་ཚད་ཆོད་མ་དང་། གྲི་གཡུག་ཐེངས་གཅིག་ལ་མཛོ་དང་སྒ་མཉམ་དུ་གཅོད་ཐུབ་པའི་མཛོ་ཕོ་སྒ་ཆོད། གྲི་གཅིག་ལ་ལུག་བརྒྱ་སྤྲད་ཀྱང་མ་ཁུག་པའི་ལུག་བརྒྱ་མ་ཞེས་གྲིའི་རྣོ་ངར་དང་རིན་ཐང་འགྲན་ཟླ་བྲལ་བའི་ཚད་དུ་བྱེད།

སྤུ་གྲིའི་བཤད་པ།
 

ཡིད་འོང་ལྕགས་རིའི་ལྕགས་རྡོ་ཕོ་ལྕགས་ཡིན། །
ཡིད་འོང་སྨྱུག་རིའི་ལྕགས་རྡོ་མོ་ལྕགས་ཡིན། །
བྲག་གསུམ་ཡུལ་གྱི་ལྕགས་རྡོ་བར་ལྕགས་ཡིན། །
ལྕགས་རྡོ་དེ་གསུམ་འདུས་ནས་ལྕགས་གཅིག་བཞུ། །
ལྕགས་མཁར་ཟུར་བཞི་ལོག་བརྒྱད་ཡིན། །
ཁུག་མོ་གཡག་ཀོ་ཁ་སྦྱར་ཡོད། །
རྒྱབ་མཁན་ཨ་ཐིག་ནག་པོ་ཡིན། །
རྡོ་ལྕགས་ལ་སྒྱུར་བའི་དམ་ཅན་མིས། །
ལྕགས་དེ་ལ་བརྟེན་ནས་གྲི་ཞིག་བརྡུངས། །
བརྡུངས་མི་སུ་ཡིན་མ་ཤེས་ན། །
བརྡུངས་མི་དམ་ཅན་མགར་བ་ཡིན། །
མགར་གཡོག་སུ་ཡིན་མ་ཤེས་ན། །
མགར་གཡོག་ཐེའུ་རང་སྤུན་དགུ་ཡིན། །
ཡར་སྔོན་ནམ་ལ་དཀར་བརྡུང་བྱེད། །
བཅོ་ལྔའི་ཉིན་ལ་འཇའ་སྟོན་ཁྲིད། །
གྲི་བཀྲག་མདངས་ཆེ་བ་དེ་ནས་བྱུང་། །
མར་སྔོན་ནམ་ལ་ནག་བརྡུང་བྱེད། །
ཉི་ཤུ་དགུ་ལ་དགུ་བརྡུང་བྱེད། །
གྲི་སོ་ཁ་ནག་པ་དེ་ནས་བྱུང་། །
ངར་ཆུ་སྲིན་པོའི་སྙིང་ཁྲག་བླུད། །
གྲི་རྣོ་ཁ་འཛོམས་པ་དེ་ནས་བྱུང་། །
ངར་ཚོད་ཨ་ཕོ་རང་གིས་བཟོ། །
གྲི་མཉེན་ཆ་འཛོམས་པ་དེ་ནས་བྱུང་། །
གྲི་འདི་ལ་གྲུབ་ཆ་ཨེ་འདྲ་ཡོད། །
གྲི་འདི་ལ་འདྲ་མ་འདི་འདྲ་ཡོད། །
འཛེར་གཅིག་ཡག་ལ་འདྲ་མ་ཡོད། །
རྒྱལ་པོ་གདན་ལ་བཞུགས་འདྲ་ཡོད། །
འཛེར་གཉིས་ཡག་ལ་འདྲ་མ་ཡོད། །
རྒྱལ་བློན་གྲོས་ལ་བཤིབ་པ་འདྲ། །
འཛེར་གསུམ་ཡག་ལ་འདྲ་མ་ཡོད། །
བུ་སྤུན་གསུམ་ས་རྡོ་བཀོག་པ་འདྲ། །
གཏིང་འབོག་ཡག་ལ་འདྲ་མ་ཡོད། །
འཇའ་ཚོན་སྣ་ལྔའི་ཁྲ་ཞིག་ཡོད། །
སྦ་ལུང་ཡག་ལ་འདྲ་མ་ཡོད། །
གླ་སྤགས་རྒྱུན་བུ་ཉིས་སྒྲིལ་ཡིན། །
སྦོ་སྒྲིལ་ཡག་ལ་འདྲ་མ་ཡོད། །
ཕོ་གསར་སྐེད་རགས་བཅིངས་འདྲ་ཡོད། །
པད་མགོ་ཡག་ལ་འདྲ་མ་ཡོད། །
ལུག་བརྒྱ་ཐང་ལ་བཀྲམ་འདྲ་ཡོད། །
རྒྱ་ལོ་ཡག་ལ་དྲ་མ་ཡོད། །
བཅོ་ལྔའི་ཟླ་བ་ཤར་འདྲ་ཡོད། །
གྲི་ཡུ་ཡག་གི་འདྲ་མ་ལ། །
མཚར་ཞིང་བུ་མོའི་སྐྱེ་ཡག་འདྲ། །
གྲི་ཤུབས་ཡག་གི་འདྲ་མ་ལ། །
གྲི་ཤུབས་ཙན་དན་ཤིང་ལས་བཟོས། །
སྐྱེ་ཡག་བུ་མོའི་གོས་རྒྱན་འདྲ། །
གྲི་ཐག་ཡག་གི་འདྲ་མ་ལ། །
ཁྱུང་དཀར་མཛོ་ཕོའི་རྒྱུན་བུ་ཡིན། །
ཆ་མགོ་ཡག་གི་འདྲ་མ་ལ། །
ཆ་མགོ་ཆུ་སྲིན་ཁ་སྤྲོད་ཡིན། །
ཤུབས་བཏུམས་ཤ་བོའི་པགས་པ་ཡིན། །
གྲི་ངོ་ཡག་གི་འདྲ་མ་ལ། །
དཀར་གསལ་ཟླ་བ་ཤར་བ་འདྲ། །
ལྟག་འཛུམ་ཡག་གི་འདྲ་མ་ལ། །
རི་རྩེར་ཁ་བ་བབས་པ་འདྲ། །
གྲི་སོ་ཡག་གི་འདྲ་མ་ལ། །
ནག་པོ་མུན་པ་རུབ་པ་འདྲ། །
གྲི་ཐོད་ཡག་གི་འདྲ་མ་ལ། །
ཕོ་ར་རྩ་ཅན་གྱི་ཐོད་པ་འདྲ། །
འཇའ་རྩེ་ཡག་གི་འདྲ་མ་ལ། །
 མེ་ལྕེ་དགུང་ལ་འཕྱུར་བ་འདྲ། །
སྤྲ་རིས་ཡག་གི་འདྲ་མ་ལ། །
དགུང་ལ་འཇའ་ཚོན་ཤར་བ་འདྲ། །
སྤྲ་རིས་མི་འདྲ་གྲི་གསུམ་ཡོད། །
དེ་འདྲའི་གྲི་ཞིག་ག་ནས་དར། །
སྤོ་བོའི་ཡུལ་ནས་དར་ལེ་རེད། །
ཡུལ་འདིའི་དགྲ་ལྷ་འཁོར་ས་ཡིན། །
སྲིན་འདྲེ་འདུལ་བའི་ཁ་གནོན་ཡིན། །
ནད་དང་མུ་གེ་འཇོམས་ས་ཡིན། །
གེགས་བར་སེལ་བའི་དགེ་མཚན་ཡོད། །
ལོངས་སྤྱོད་འཕེལ་བའི་བཀྲ་ཤིས་ཡོད། །
ཕྱོགས་ལ་འགྲོ་དུས་ལུས་སྲུང་ཡིན། །
ཁྱིམ་ལ་བཞག་དུས་ནོར་བུ་ཡིན། །
རིན་ཐང་ལུག་བརྒྱ་མ་བཙོང་ཡིན། །
གོ་ཆོད་མཛོ་ཕོ་སྒ་ཆོད་ཡིན། །
ཡུལ་མིང་གྲི་ལ་ཐོགས་པ་འདི། །
མིང་ལ་སྤུ་གྲི་འཇའ་ཕེད་གྲགས། །