ཐེམ་ཆེན་རྫོང་ཤེས་ཡོན་གྲོང་རྡལ་དུ་སྨན་པ་རྒྱ་མཚོ་ཡིས་སྨན་སྦྱིན་གཏོང་བའི་མཛད་སྒོ་སྤེལ།

སྨན་པ་རྒྱ་མཚོ་ཡིས་ནད་ལ་བརྟག་པ།

      ཉེ་ཆར། ཏང་གི་མང་ཚོགས་ལམ་ཕྱོགས་སློབ་གསོའི་ལག་ལེན་བྱ་འགུལ་སྤེལ་བ་དང་། དམངས་ལ་དོན་དངོས་ཀྱིས་ཁེ་ཕན་སྒྲུབ་པའི་ཆེད་དུ། ཐེམ་ཆེན་རྫོང་ཤེས་ཡོན་གྲོང་རྡལ་གྱིས་རྩ་འཛུགས་བྱས་ཏེ་སྨན་པ་རྒྱ་མཚོ་ཡིས་སྨན་སྦྱིན་གཏོང་བའི་མཛད་སྒོ་དེ་ཤེས་ཡོན་གྲོང་རྡལ་དུ་སྤེལ།
      སྨན་པ་རྒྱ་མཚོ་ཡིས་སྔ་ཕྱིར་དཔའ་ལུང་རྫོང་སྟག་ལུང་ཞང་དང་། ཐེམ་ཆེན་རྫོང་འབྲུག་ཁྱུང་ཞང་། གསེར་ཆེན་རྫོང་སྦྲུལ་ལུང་སྡེ་བ་བཅས་ནས་ནད་པ་ཁྲི་སྟོང་མང་པོར་སྨན་སྦྱིན་གཏོང་བའི་མཛད་སྒོ་སྤེལ་ལ། ཐེངས་འདིར་ཡང་ཉིན་ལྔའི་རིང་གི་དུས་ཚོད་བེད་སྤྱད་ནས་སྨན་སྦྱིན་གཏོང་རྩིས་ཡོད་ལ། སྒོར་ཁྲི45ནས53བར་གྱི་སྨན་རྫས་གྲ་སྒྲིག་བྱས་ཡོད་པ་དང་། ནད་པ2000ལྷག་ལ་སྨན་སྦྱིན་གཏོང་བའི་འཆར་གཞི་ཡོད།

      ཨ་ནེ་མ་ཐོ་ནི་ཐེམ་ཆེན་རྫོང་ཤེས་ཡོན་གྲོང་རྡལ་རུ་ཁག་བརྒྱད་པའི་མི་ཡིན་ལ། ཁོ་མོར་ནད་གཞི་བྱུང་ནས་ལོ་ངོ་མང་པོ་ཞིག་འགོར་ལ། ཞིང་ཆེན་ནང་ཁུལ་གྱི་སྨན་ཁང་ཆེ་ཆུང་གང་རུང་དུ་ཕྱིན་ནས་སྨན་བཅོས་བྱས་ཀྱང་ནད་ ལ་ཕན་ཐོགས་ཆེན་པོ་མ་བྱུང་། ཁོ་མོ་ཕྱིར་རང་ཡུལ་དུ་ལོག་རྗེས་སུ་འདི་གའི་སྨན་པ་རྒྱ་མཚོ་ཡི་མདུན་ནས་བོད་ སྨན་འཐུང་མགོ་བརྩམས་པ་ཡིན་ལ། ཟླ་ངོ་གཉིས་གསུམ་གྱི་བོད་སྨན་འཐུང་རྗེས་ནད་གཞི་ཇེ་བདེར་སོང་ནས་ཡུན་གྱིས་ནད་ ཀྱི་སྡུག་བསྔལ་ལས་གྲོལ་བར་བྱས།
      སྨན་པ་རྒྱ་མཚོས་ཐེངས་འདིར་ཡང་རང་ཉིད་ཀྱི་སྨན་པའི་ཉམས་མྱོང་ཕུན་སུམ་ཚོགས་པ་ དེ་བེད་སྤྱད་ནས་ནད་པ་མང་པོའི་ནད་རིགས་སྣ་ཚོགས་ལ་བརྟག་དཔྱད་བྱེད་ཀྱིན་ཡོད་ལ། དེ་ལས་ཐེམ་ཆེན་ས་ཁུལ་གཙོ་བྱས་ཏེ། ཉེ་འཁོར་གྱི་གསེར་ཆེན་རྫོང་སོགས་ནས་ནད་པ་མང་པོར་སྨན་པ་སྟོན་པར་ཐོན་ཡོད་ལ། དེའི་ནང་དུ་བོད་རིགས་དང་རྒྱ་རིགས། ཁ་ཆེ་རིགས་སོགས་མི་རིགས་མང་དུ་ཡོད་པས། ཁོས་སྨན་སྦྱིན་གཏོང་བའི་མཛད་སྒོ་འདི་ལས་མི་རིགས་མཐུན་སྒྲིལ་གྱི་ཁོར་ཡུག་ བཟང་བོ་ཞིག་བསྐྲུན་པར་མ་ཟད། ཁོས་ལྷག་བསམ་བཟང་བོའི་ཀུན་སློང་ལ་བརྟེན་ནས་སྨན་སྦྱིན་གཏོང་བའི་བྱ་འགུལ་འདི་ ལ་ས་གནས་མང་ཚོགས་ཀྱིས་དགའ་བསུ་ཆེན་པོ་ཐོབ་ཀྱིན་ཡོད།