གློ་གཅོང་ནད་ཇི་ལྟར་སྔོན་འགོག་བྱེད་དགོས།

　བཅོས་སྒྱུར་སྒོ་འབྱེད་ཀྱི་སྲིད་ཇུས་བཟང་བོ་རྒྱུན་ཆད་མེད་པར་གཏིང་ཟབ་ཏུ་སྤེལ་བ་དང་བསྟུན་ནས། འཁོར་བསྐྱོད་བྱེད་པའི་མི་ཧ་ཅང་མང་པོ་ཞིག་མཁར་གྲོང་དུ་འདུ་རུབ་བྱེད་ཀྱིན་ཡོད་པས། མཁར་གྲོང་གི་འཁོར་བསྐྱོད་བྱེད་པའི་མི་རྣམས་ཀྱི་གློ་གཅོང་ནད་འགོག་བཅོས་བྱེད་པའི་བྱ་བ་སྤེལ་རྒྱུ་དེ་ཧ་ཅང་གལ་ཆེ་ཞིང་། དེ་སྣང་མེད་དུ་ཅུང་ཙམ་བཞག་ན་ཡང་ས་ཁུལ་རང་གི་གློ་གཅོང་ནད་སླར་ཡང་འབྱུང་སྲིད། འཁོར་སྐྱོད་བྱེད་པའི་མི་མང་ཆེ་བ་ནི་དཔལ་འབྱོར་འཕེལ་རྒྱས་བལྟོས་བཅས་ཀྱིས་རྗེས་ལུས་ཡིན་པའི་ས་ཁུལ་དང་ཞིང་སྡེ་ནས་ཡོང་བ་ཡིན་ཞིང་། དེའི་ནང་གི་མི་སྐོར་ཞིག་ལ་མ་གཞི་ནས་གློ་གཅོང་ནད་ཡོད་པ་དང་། ཁོ་ཚོ་མཁར་གྲོང་དུ་ཡོང་རྗེས། འཚོ་བ་བརྟན་འཇགས་མིན་པ་དང་སྡོད་གནས་འཚང་ཁ་ཆེ་བ་དེ་གློ་གཅོང་ནད་འགོས་མཆེད་འབྱུང་དུ་འཇུག་པའི་ཉེ་ཁ་ཆེ་བའི་མི་ཚོགས་སུ་གྱུར་བ་རེད། ཁོ་ཚོའི་ཁྲོད་ཀྱི་མི་ཁ་ཤས་ལ་ནད་བྱུང་རྗེས་ནད་གཞི་ཅུང་ཚབས་ཆེ་སྐབས་སུ་མ་གཏོགས་སྨན་པར་མི་སྟོན་པ་དང་། ནད་ཀྱི་འགོ་ཁུངས་དུས་ཐོག་ཏུ་མ་ཤེས་པས། ཡང་བསྐྱར་ནད་འགོས་མཆེད་འབྱུང་དུ་འཇུག་བཞིན་ཡོད། དེར་བརྟེན། འཁོར་སྐྱོད་བྱེད་པའི་མི་རྣམས་ཀྱི་གློ་གཅོང་ནད་འགོག་བཅོས་བྱ་བ་སྤེལ་བར་དོན་སྙིང་ཟབ་མོ་ཡོད།
　ཅི་ཞིག་ལ་གློ་གཅོང་ནད་ཟེར།
　གློ་གཅོང་ནད་ནི་འདུས་འདྲིལ་དབྱིག་དབྱིབས་འབུ་ཕྲ་མིའི་ལུས་ཐོག་ཏུ་ཞུགས་ནས་བྱུང་བའི་དལ་བའི་རང་བཞིན་གྱི་འགོ་ནད་ཅིག་ཡིན་ལ། གཙོ་བོ་གློ་བར་གནོད་པ་ཚབས་ཆེན་བཟོ་བའི་ནད་ཅིག་ཡིན། གཅོང་ནད་འབུ་ཕྲ་དེས་དོན་སྣོད་གང་ཞིག་ལ་གནོད་པ་བཟོས་ཚེ་དོན་སྣོད་དེའི་གཅོང་ནད་ཟེར་བ་དང་། དཔེར་ན་ཀླད་སྐྱིར་གནོད་པ་བཟོས་ན་ཀླད་སྐྱིའི་གཅོང་ནད་དང་། རུས་པར་གནོད་པ་བཟོས་ན་རུས་པའི་གཅོང་ནད་ཟེར་བ་ལྟ་བུ་རེད། གློ་གཅོང་ནད་ཀྱིས་གཅོང་ནད་སྣ་ཚོགས་ཀྱི་བརྒྱ་ཆའི་བརྒྱད་ཅུ་ཟིན་ཡོད།
　གློ་གཅོང་ནད་དེ་ཅི་ལྟར་འགོ་བ་ཡིན།
　གློ་གཅོང་ནད་ནི་དབུགས་ལམ་གྱི་འགོས་ནད་ཅིག་ཡིན་པ་དང་། གློ་གཅོང་ནད་པ་ཚང་མར་འགོ་བའི་རང་བཞིན་ལྡན་པ་ཡིན། ཡིན་ན་ཡང་གློ་གཅོང་ནད་པ་རེ་རེའི་འགོ་བའི་རང་བཞིན་གྱི་ཚབས་ཆེ་ཆུང་དེ་མི་འདྲ་བ་ཡིན། ཞིབ་འཇུག་ལས་བདེན་དཔང་བྱུང་བ་ལྟར་ན་ལུད་པར་ཞིབ་བཤེར་བྱས་ཏེ་ལུད་པའི་ནང་འབུ་ཕྲ་ཡོད་པའི་གློ་གཅོང་ནད་པ་དང་འབྲེལ་འདྲིས་བྱུང་མཁན་ལ་འགོ་བའི་ཉེན་ཁ་ཧ་ཅང་ཆེ་བ་དང་། ལུད་པར་ཞིབ་བཤེར་བྱས་ནས་ལུད་པའི་ནང་གློ་གཅོང་འབུ་ཕྲ་མེད་པའི་གློ་གཅོང་ནད་པ་དང་འབྲེལ་འདྲིས་བྱུང་མཁན་ལ་འགོ་བའི་རང་བཞིན་ཧ་ཅང་ཆུང་བ་ཡིན། ལུད་པར་ཞིབ་བཤེར་བྱས་ནས་ལུད་པའི་ནང་འབུ་ཕྲ་ཡོད་པའི་གློ་གཅོང་ནད་པ་ནི་གློ་གཅོང་ནད་ཀྱི་འགོ་ལམ་གཙོ་བོ་ཡིན་ལ། གློ་གཅོང་ནད་འགོག་བཅོས་བྱ་བ་སྤེལ་ཡུལ་གཙོ་བོ་ཡང་ཡིན། གློ་གཅོང་ནད་དེ་གཙོ་བོ་གློ་གཅོང་ནད་པས་ལུ་བ་དང་སྣ་སྦྲིད་རྒྱག་པ། ཤུགས་ཆེན་པོས་སྐད་ཆ་བཤད་པ་བཅས་ཀྱི་གློ་བ་དང་གློ་སྦུག་ཕྲ་མོའི་ནང་གི་འདུས་འདྲིལ་དབྱིག་དབྱིབས་འབུ་ཕྲ་ཡོད་པའི་མཆིལ་མ་མཁའ་དབུགས་ནང་གཏོར་བ་དེ། བདེ་ཐང་ཅན་གྱི་མིས་འབྱིན་རྔུབ་བྱས་པ་ལས་ཕན་ཚུན་ལ་འགོས་བ་རེད། གཞན་ད་རུང་འཇུ་ལམ་དང་རྨ་ཁ་ལས་ཀྱང་ནད་དེ་འགོ་སྲིད། གལ་ཏེ་ཕ་མ་སོགས་ལ་གཅོང་ནད་ཡོད་ཚེ། ཁོ་ཚོར་འབྲེལ་འདྲིས་དམ་པོ་ཡོད་པའི་བྱིས་པར་གློ་གཅོང་ནད་འགོ་སླ་བ་ཡིན། མཁའ་དབུགས་རྒྱུ་མི་ཐུབ་པའི་ཁོར་ཡུག་དང་ཁྱད་པར་དུ་ཐུན་མོང་གི་འཚོ་བ་དང་སྡོད་གནས་འཚང་ཁ་ཆེ་བའི་མི་ཚོགས་ཀྱི་ཁྲོད་དུ། གལ་ཏེ་མི་ཞིག་ལ་གློ་གཅོང་ནད་བྱུང་ཚེ། རྒྱུན་པར་གློ་གཅོང་ནད་འགོ་བ་དང་མཆེད་དུ་འཇུག་སྲིད།
　གློ་གཅོང་ནད་ལ་རྒྱུན་མཐོང་གི་ནད་རྟགས་གང་དག་ཡོད།
　གློ་གཅོང་ནད་ཀྱི་རྒྱུན་མཐོང་གི་ནད་རྟགས་ནི་ལུས་ཡོངས་མི་བདེ་བ་དང་། ཐང་ཆད་པ། ཡི་ག་ཞན་པ། ཚ་ཅུང་ཙམ་ལངས་བ། རྔུལ་ཆུ་བཞུར་བ། ཟླ་མཚན་མི་སྙོམས་པ། རྩི་ཤིང་དབང་རྩའི་བྱེད་ནུས་འཁྲུག་པ་སོགས་ཡིན་ལ། མྱུར་བའི་རང་བཞིན་གྱི་གློ་གཅོང་ནད་པ་མི་ཉུང་བ་ཞིག་ལ་ཚ་ཆེན་པོ་ལངས་བ་སོགས་ཀྱི་ནད་རྟགས་འབྱུང་བ་རེད།
　གློ་བར་གནོད་པ་ཐེབས་པ་ལས་བྱུང་བའི་དབུགས་ལམ་གྱི་ནད་རྟགས་གཙོ་བོ་ནི། ལུ་བ་དང་ལུད་པ་ཐོན་པ། ནད་པ་གསུམ་ཆའི་གཅིག་ལ་ཚད་མི་འདྲ་བའི་ཁྲག་ལུ་བ་དང་ བྲང་ཁ་ན་བ། དབུགས་ལེན་དཀའ་བ་སོགས་ཀྱི་སྣང་ཚུལ་འབྱུང་སྲིད། གློ་གཅོང་ནད་ཀྱི་ནད་རྟགས་དེ་གཅོང་ནད་ལ་དམིགས་བསལ་དུ་ཡོད་པ་ཞིག་མིན་ལ། ནད་རྟགས་ཀྱི་ཚད་རིམ་དེ་ནད་འགྱུར་གྱི་ཁྱབ་ཁོངས་དང་འཕེལ་ཚད། ལུས་ཁམས་ཀྱི་འགྱུར་ལྡོག་རང་བཞིན་བཅས་དང་འབྲེལ་བ་ཡོད་པ་ཞིག་ཡིན། གཟའ་འཁོར་གཉིས་ཡན་ལ་ལུ་བ་དང་ལུད་པའི་ནང་ཁྲག་འདྲེས་ཚེ་གློ་གཅོང་ནད་འབྱུང་བའི་ངེས་བ་ཆེ་བས། གློ་གཅོང་ནད་ལ་དོགས་པ་ཟ་བའི་ནད་རྟགས་ལ་གཏན་ཁེལ་བྱེད་དགོས།
　གློ་གཅོང་ནད་ནི་དལ་བའི་རང་བཞིན་གྱི་ནད་ཅིག་ཡིན་པས། ནད་རྟགས་མང་ཆེ་བ་ནི་ཡང་མོ་ནས་ལྗིད་མོ་དང་། ནད་རྟགས་མི་གསལ་བ་ནས་གསལ་བར་གྱུར་ནས་རིམ་བཞིན་ཇེ་སྡུག་ཏུ་འགྲོ་བ་དང་། དུས་ཐོག་མའི་ནད་པ་མང་ཆེ་བ་ཞིག་གི་ནད་རྟགས་ཅུང་ཡང་བས་རྒྱུན་པར་དོ་སྣང་བྱེད་ཀི་མེད་ཅིང་། ཡང་ལ་ལས་ཆམ་ནད་དང་གློ་ཡུའི་གཉན་ཚད་ལ་གོ་ནོར་འབྱུང་གི་ཡོད་པ་རེད། དེར་བརྟེན། གལ་ཏེ་གློ་གཅོང་ནད་ཀྱི་འབྲེལ་ཡོད་ནད་རྟགས་དང་ཁྱད་པར་དུ་གློ་གཅོང་ནད་ལ་དོགས་པ་ཟ་བའི་ནད་རྟགས་ཡོད་ཚེ་དུས་ཐོག་ཏུ་ཞིབ་བཤེར་བྱེད་དགོས།
　མི་གང་དག་ལ་གློ་གཅོང་ནད་འབྱུང་སླ་བ་ཡིན། གློ་གཅོང་འབུ་ཕྲ་འགོས་མེད་པའི་མི་ཚོགས་ལ་མཚོན་ན། གལ་ཏེ་གཅོང་ནད་འབུ་ཕྲ་མཆེད་པའི་ཁོར་ཡུག་ཏུ་འཚོ་བ་རོལ་བ་དང་བྱ་བ་སྒྲུབ་ཚེ། ཡོངས་ཁྱབ་ཏུ་ནད་དེ་འགོ་སླ་ཡིན། དེའི་ནང་ད་རུང་ཤེས་མེད་པ་དང་གསོ་བཅོས་བྱས་ནས་ནད་དྲག་མེད་པའི་གློ་གཅོང་ནད་པ་དང་འབྲེལ་འདྲིས་དམ་པོ་ཡོད་པའི་མི་ལ་གཅོང་ནད་འབུ་ཕྲ་འགོ་སླ་བ་ཡིན། དཔེར་ན་གློ་གཅོང་ནད་པའི་ཁྱིམ་མི་དང་ནང་སྒོས་སུ་བྱིས་པ། གློ་གཅོང་ནད་པར་འབྲེལ་འདྲིས་བྱས་པའི་སྨན་བཅོས་མི་སྣ་བཅས་ཡིན།
　གློ་གཅོང་ནད་ལ་དོགས་པ་ཟ་མཁན་གྱིས་ཐོག་མར་གང་ལ་སོང་ནས་ནད་བརྟག་སྨན་བཅོས་བྱེད་དགོས།
　མིག་སྔར་རང་རྒྱལ་དུ་ཀྲུང་དབྱང་ནས་རྫོང་ཁག་སོ་སོར་གློ་གཅོང་ནད་འགོག་བཅོས་ཆེད་ལས་སྒྲིག་གཞི་བཙུགས་ཡོད་པ་དང་། གལ་ཏེ་གློ་གཅོང་ནད་ཀྱི་དོགས་གཞི་ཡོད་པའི་ནད་རྟགས་བྱུང་ན་མྱུར་དུ་རང་ཡོད་སའི་ས་ཁུལ་གྱི་གློ་གཅོང་ནད་འགོག་བཅོས་ས་ཚིགས་དུ་སོང་ནས་ནད་བརྟག་སྨན་བཅོས་བྱེད་དགོས། རྫོང་དང་ས་ཁུལ་གྱི་གློ་གཅོང་ནད་འགོག་བཅོས་སྒྲིག་གཞི་ནི་གློ་གཅོང་ནད་བྱུང་བའི་ནད་པར་བརྟག་དཔྱད་དང་གསོ་བཅོས། དོ་དམ་བཅས་བྱེད་པའི་ཆེད་ལས་སྒྲིག་གཞི་ཞིག་ཡིན་ཞིང་། སྨན་བཅོས་མི་སྣར་ཆེད་ལས་ཀྱི་གསོ་སྦྱོང་ཆ་ཚང་བྱས་ཡོད།
　ཅི་ཞིག་ལ་གློ་གཅོང་ནད་ཀྱི་དོགས་གཞི་ཡོད་མཁན་ཟེར།
　ནད་རིགས་གཞན་པ་དང་འདྲ་བར་ཐོག་མའི་དུས་རིམ་གྱི་གློ་གཅོང་ནད་དེར། ནད་གཞིར་འགྱུར་ལྡོག་ཆུང་བར་བརྟེན་ནས་མངོན་གསལ་གྱི་ནད་རྟགས་མེད་པ་རེད། གལ་ཏེ་ནད་རྟགས་ཡོད་ན་ཡང་། གློ་གཅོང་ནད་ཀྱི་ནད་རྟགས་ལ་ཆེས་མངོན་གསལ་གྱི་ཁྱད་ཆོས་མེད་པའི་དབང་གིས་ནད་པ་དང་སྨན་པས་ནད་གཞན་པར་གོ་ནོར་བྱུང་ནས་གློ་གཅོང་ནད་ལ་བསམ་བློ་གཏོང་གི་མེད། གློ་གཅོང་ནད་ཀྱི་དོགས་གཞི་ཡོད་པའི་ནད་རྟགས་ནི་གཟའ་འཁོར་གཉིས་ཡན་ལ་ལུ་བ་དང་ལུད་པའི་ནང་ཁྲག་འདྲེས་བ། ཚ་རྒྱས་བ། བྲང་ཁ་ན་བ་སོགས་ཡིན།
　གློ་གཅོང་ནད་ཀྱི་དོགས་གཞི་ཡོད་པའི་ནད་རྟགས་བྱུང་ན་ཅི་ལྟར་ཐག་གཅོད་དགོས།
　མི་སུ་ཡིན་རུང་གལ་ཏེ་གློ་གཅོང་ནད་ཀྱི་དོགས་གཞི་ཡོད་པའི་ནད་རྟགས་བྱུང་ན། རང་ཉིད་ལ་གློ་གཅོང་ནད་བྱུང་ཡོད་མེད་ལ་བསམ་བློ་བཏང་ནས་མྱུར་དུ་གློ་གཅོང་ནད་འགོག་བཅོས་ལྟེ་གནས་སུ་སོང་ནས་ཞིབ་བཤེར་བྱེད་དགོས། ཞིབ་བཤེར་བྱེད་ཐབས་གཙོ་བོ་ནི་ནད་པའི་ལུད་པར་བརྟག་དཔྱད་དང་བྲང་ཁོག་ལxགློག་འོད་ཀྱི་འདྲ་པར་ལེན་པ་དེ་ཡིན། གལ་ཏེ་ཞིབ་བཤེར་བྱས་ནས་ལུད་པའི་ནང་གློ་གཅོང་འབུ་ཕྲ་ཡོད་ཚེ། འགོས་ཁྱབ་རང་བཞིན་ལྡན་པས། མྱུར་དུ་གློ་གཅོང་ནད་འགོག་པའི་གསོ་བཅོས་བྱེད་དགོས།
　གློ་གཅོང་ནད་དེ་མི་རབས་རྗེས་མར་འགོ་སྲིད་དམ།
　གློ་གཅོང་ནད་ནི་དལ་བའི་རང་བཞིན་གྱི་འགོ་ནད་ཅིག་ཡིན་པ་ལས་རྒྱུད་འཛིན་རང་བཞིན་གྱི་ནད་རིགས་ཤིག་མིན། དེར་བརྟེན་མི་རབས་རྗེས་མར་གློ་གཅོང་ནད་འགོ་མི་སྲིད་པ་ཡིན། ཁྱིམ་ཚང་ལ་ལར་དུས་མཉམ་དུ་གློ་གཅོང་ནད་བྱུང་བའི་ནད་པ་ཁ་ཤས་ཡོད་པ་དེ། གཙོ་བོ་ཁྱིམ་ཚང་དུ་འགོས་ཁྱབ་རང་བཞིན་ལྡན་པའི་གློ་གཅོང་ནད་པ་ཡོད་པའི་རྐྱེན་གྱིས་ཕན་ཚུན་ལ་འགོས་བ་ཡིན་པ་ལས། རྒྱུད་འཛིན་ལ་འབྲེལ་བ་མེད།
　འགོ་བའི་རང་བཞིན་གྱི་གློ་གཅོང་ནད་གསོ་བཅོས་བྱས་ནས་དྲགས་རྗེས་མི་གཞན་པར་འགོ་རུ་འཇུག་སྲིད་དམ།
　འགོ་བའི་རང་བཞིན་གྱི་གློ་གཅོང་ནད་གསོ་བཅོས་བྱས་རྗེས་དེའི་འགོ་བའི་རང་བཞིན་མྱུར་དུ་ཇེ་དམའ་རུ་འགྲོ་སྲིད་པ་ཡིན། ནམ་རྒྱུན་སྨན་རྫས་ལ་ཚོར་བ་རྣོ་བའི་འགོ་བའི་རང་བཞིན་གྱི་གློ་གཅོང་ནད་དེ། གསོ་བཅོས་བྱས་ནས་གཟའ་འཁོར་གཉིས་འགོར་རྗེས་དང་། ཁྱད་པར་དུ་ཟླ་གཉིས་ཀྱི་ནང་ལུད་པའི་ནང་གི་གློ་གཅོང་འབུ་ཕྲ་དེ་མགྱོགས་མྱུར་སྒོས་ཇེ་ཉུང་དུ་སོང་སྟེ། འབུ་ཕྲའི་འགུལ་སྐྱོད་ལ་ཡང་ཚོད་འཛིན་ཐེབས་པ་དང་ཡང་ན་རྩ་བ་ནས་མེད་པར་གྱུར་བས། མཐའ་འཁོར་གྱི་མི་ཚོགས་ལ་འགོ་མི་སྲིད། གློ་གཅོང་ནད་པས་གཏན་ལ་ཕབ་པའི་གསོ་བཅོས་ཇུས་གཞི་དང་གསོ་བཅོས་དུས་ཡུན་ལྟར་གསོ་བཅོས་བྱས་ནས་ནད་དྲག་རྗེས། ལུད་པར་བརྟག་དཔྱད་བྱས་ནས་གློ་གཅོང་འབུ་ཕྲ་མེད་ཚེ། མི་གཞན་པར་འགོ་མི་སྲིད་པ་ཡིན།
　མི་གང་དག་ལ་གློ་གཅོང་ནད་འབྱུང་སླ་བ་ཡིན།
　མཁར་གྲོང་དུ་ཡོང་ནས་ལས་ཀ་གཉེར་བའི་འཁོར་བསྐྱོད་མི་སྣ་དང་། ནད་རིགས་གཞན་པ་བྱུང་ཡོད་པའི་མི་སྟེ། དཔེར་ན་གཅིན་སྙི་ཟ་ཁུའི་ནད་དང་ས་རྡུལ་གློ་ནད། ཨེ་ཙི་ནད། ཕོ་བ་གཤག་བཅོས་བྱས་རྗེས་ཀྱི་མི། རྒྱུ་རྐྱེན་སྣ་ཚོགས་ཀྱི་དབང་གིས་དུས་ཡུན་རིང་བོར་སྨན་རྫས་སྐུལ་རྩི་འཐུང་བ་ལས་ལུས་ཀྱི་ནད་འགོག་ནུས་པར་ཚོད་འཛིན་ཐེབས་པའི་མི། རྒྱུན་པར་ཡི་མུག་པ་ལས་ནད་འགོག་ནུས་པ་དོ་མི་མཉམ་པར་འགྱུར་བའི་མི། རྒྱུན་དུ་ཐང་ཆད་སླ་བའི་མི། དུ་བ་འཐེན་པ་ལས་གློ་ཡུའི་ཡན་ལག་ལ་ཕོག་ཐུག་བཏང་ནས། ནད་འགོག་ནུས་པ་ཇེ་ཞན་ཏུ་གྱུར་བའི་མི་བཅས་ལ་གློ་གཅོང་ནད་འབྱུང་སླ་བ་ཡིན།
　གློ་གཅོང་ནད་པས་གང་སར་ལུད་པ་འཕེན་མི་རུང་བའི་རྒྱུ་མཚན་ཅི་ཡིན། ལུད་པ་ནི་མིའི་དབུགས་ལམ་གྱི་ཟེགས་ཐོན་དངོས་རྫས་ཤིག་ཡིན་ཞིང་། རྒྱུན་ལྡན་གྱི་མི་ལ་ལུད་པ་ཧ་ཅང་ཉུང་བ་ཡིན། ཡིན་ན་ཡང་གློ་བའི་ནད་རིགས་སྟེ། དཔེར་ན། གློ་ཡུའི་ཡན་ལག་ཆེར་འབྱེད་པ་དང་གློ་བར་རྣག་གཤིས་ཅན་གྱི་གཉན་ཚད་རྒྱས་སྐབས། ལུད་པ་སེར་བོ་ཇེ་མང་དུ་འགྲོ་བ་མ་ཟད། ད་རུང་ལུད་པའི་ནང་ནད་བསྐྱེད་པའི་འབུ་ཕྲ་མང་པོ་ཡོད་པ་རེད། གློ་གཅོང་ནད་པས་གལ་ཏེ་གང་སར་ལུད་པ་འཕེན་ཚེ། ལུད་པའི་ནང་གི་གློ་གཅོང་འབུ་ཕྲ་མཁའ་དབུགས་ནང་ཁྱབ་པ་དེ། རྒྱུན་ལྡན་གྱི་མིས་རྔུབ་པ་ལས་གློ་གཅོང་ནད་འགོ་སྲིད་པ་རེད། དེར་བརྟེན། གློ་གཅོང་ནད་པས་གང་སར་ཁ་ལུད་འཕེན་མི་རུང་བ་ཡིན།
　གློ་གཅོང་ནད་གསོ་བཅོས་བྱས་ནས་དྲག་རྗེས་ཕྱིར་འཕར་སྲིད་དམ།
　སྤྱིར་གསར་དུ་མཐོང་བའི་འགོ་བའི་རང་བཞིན་གྱི་གློ་གཅོང་ནད་པས་ཚད་ལྡན་གྱི་རྫས་འགྱུར་སྨན་གྱིས་གསོ་བཅོས་བྱེད་པའི་ཇུས་གཞི་ལྟར། ཆོས་ཉིད་ལྡན་པའི་སྒོ་ནས་གསོ་བཅོས་དང་། གཏན་ཁེལ་གྱི་སྨན་བཅོས་དུས་ཡུན་ལོངས་སུ་བཅུག་ཚེ། བརྒྱ་ཆའི་གོ་ལྔ་ཡན་གྱི་ནད་པ་ཡོངས་སུ་སངས་དྲག་འབྱུང་ཐུབ་པ་ཡིན། ལོ་གཉིས་ལ་ལྟ་ཞིབ་བྱས་པ་བརྒྱུད་ནས་ནད་ཕྱིར་འཕར་ཚད་དེ་བརྒྱ་ཆའི་གཉིས་ཡས་མས་རེད། ཡིན་ན་ཡང་ནད་ཕྱིར་འཕར་བ་དེ་སྔར་བཞིན་གློ་གཅོང་ནད་ཀྱི་ཁྱད་ཆོས་ཤིག་ཡིན་པས། སྨན་འཐུང་མཚམས་བཞག་རྗེས་སྦྱོང་བརྡར་འོས་འཚམ་བྱེད་པ་དང་འཚོ་བཅུད་ཁ་གསབ་བྱེད་པ། ཧུར་ཐག་སྒོས་མཉམ་བྱུང་ནད་གསོ་བཅོས་བྱེད་པ། ནད་རྟགས་ཡོད་ཚེ་དུས་ཐོག་ཏུ་སྨན་བཅོས་བྱེད་པ་སོགས་ནི་ནད་ཕྱིར་འཕར་བ་སྔོན་འགོག་བྱེད་པའི་ཕན་ནུས་ལྡན་པའི་བྱེད་ཐབས་ཡིན།
　གློ་གཅོང་ནད་བྱུང་ཚེ་ལུས་ཕུང་ལ་གནོད་པ་ག་འདྲ་ཡོད། སྔོན་ཆད་རང་རྒྱལ་དམངས་ཁྲོད་དུ་མི་བཅུ་ལ་གློ་གཅོང་ནད་བྱུང་ན་མི་དགུ་ཤི་ཟེར་བའི་བཤད་སྲོལ་ཡོད་པ་དེ་ལས། གློ་གཅོང་ནད་ཀྱིས་རང་རྒྱལ་མི་དམངས་ཀྱི་ལུས་ཁམས་དང་སེམས་ཁམས་ལ་རྨ་ཁ་ཆེན་པོ་ཞིག་བཟོས་བ་དེ་མཚོན་ཐུབ། གློ་གཅོང་ནད་བྱུང་རྗེས་གློ་བའི་ནད་རྟགས་དང་ལུས་ཡོངས་ཀྱི་ནད་རྟགས་དེ་ཚང་མ་ཧ་ཅང་ཚབས་ཆེ་བ་དང་། ནང་སྒོས་སུ་དུས་མཉམ་དུ་ཁྲག་ལུ་བ་དེ་དུས་ཐོག་ཏུ་གསོ་བཅོས་མ་བྱས་ཚེ། དྲན་མེད་དུ་བརྒྱལ་བ་དང་དབུགས་ཆད་པ་སོགས་ཀྱི་སྣང་ཚུལ་འབྱུང་སླ་བ་དང་། ཐ་ན་འཆི་སྲིད། གློ་གཅོང་ནད་པས་གལ་ཏེ་དུས་ཐོག་ཏུ་གསོ་བཅོས་བཟང་བོ་མ་བྱས་ན། ནད་གཞི་མྱུར་དུ་ཇེ་སྡུག་ལ་སོང་ནས་ལས་ཀ་ཡང་ལས་མི་ཐུབ་པ་རེད།
　གློ་གཅོང་ནད་པས་རིན་མ་བླངས་བར་ཞིབ་བཤེར་དང་རིན་མ་བླངས་བར་གསོ་བཅོས་བྱེད་པ་དེ་ཇི་ལྟར་དང་ལེན་བྱེད་དགོས།
　གློ་གཅོང་ནད་ལ་འགོས་ཁྱབ་རང་བཞིན་ལྡན་པ་དང་། གསོ་བཅོས་ཀྱི་དུས་ཡུན་རིང་བས། སྨན་རྫས་སྣ་མང་མཉམ་དུ་བཀོལ་ནས་གསོ་བཅོས་བྱས་ན་ད་གཟོད་རྩ་བ་ནས་དྲག་ཐུབ་པ་ཡིན། མིག་སྔར་རང་རྒྱལ་གྱི་གློ་གཅོང་ནད་ལ་རིན་མ་བླངས་བར་གསོ་བཅོས་བྱེད་པའི་སྲིད་ཇུས་དེ་གཙོ་བོ་གློ་གཅོང་ནད་འགོག་བཅོས་སྒྲིག་གཞིས་ལག་བསྟར་བྱེད་དགོས་ལ། གློ་གཅོང་ནད་འགོག་བཅོས་ཆེད་ལས་སྒྲིག་གཞིས་རྫས་འགྱུར་སྨན་གྱིས་གསོ་བཅོས་དང་། རིན་མ་བླངས་བར་གསོ་བཅོས་བྱེད་པའི་སྲིད་ཇུས་དངོས་འབེབས་བྱས་ཏེ། ནད་པར་ཚད་ལྡན་སྒོས་གསོ་བཅོས་དང་དོ་དམ་བྱེད་པ་ཡིན་པས། གློ་གཅོང་ནད་བྱུང་བའི་ནད་པ་རྣམས་ཆེད་ལས་སྒྲིག་གཞི་དེ་དག་ཏུ་སོང་ནས་ཞིབ་བཤེར་དང་གསོ་བཅོས་བྱེད་དགོས། གློ་གཅོང་འབུ་ཕྲ་ཡོད་པའི་ནད་པ་དང་འབྲེལ་འདྲིས་དམ་པོ་བྱེད་མཁན་ལ་མཚོན་ན་ཡང་། ཁོ་ཚོ་ཆེད་ལས་སྨན་ཁང་དུ་སོང་ནས་ལུས་ཕུང་ལ་བརྟག་དཔྱད་བྱས་ཏེ། ནད་སྔ་མོ་ནས་ཤེས་བ་དང་སྔ་མོ་ནས་གསོ་བཅོས་བྱེད་པར་སྐུལ་སློང་བྱེད་དགོས། དུས་མཚུངས་སུ་ཕྱོགས་བསྡུས་སྨན་བཅོས་སྒྲིག་གཞིས་འཕྲོད་བསྟེན་པུའུ་ཡི«སྨན་བཅོས་འཕྲོད་བསྟེན་སྒྲིག་གཞིས་གློ་གཅོང་ནད་པ་ཡར་ཞུ་དང་གནས་སྤོར་གསོ་བཅོས། རྗེས་འདེད་བཅས་ཀྱི་ལག་བསྟར་བྱེད་ཐབས»ལྟར། ནན་ཏན་སྒོས་གློ་གཅོང་ནད་ཀྱི་གནས་སྤོར་གསོ་བཅོས་བྱ་བ་བཟང་བོར་སྒྲུབ་ནས། སྨན་གྱི་ནུས་བ་མི་ཐོན་པའི་ནད་པ་བྱུང་བར་གཡོལ་བ་དང་ཇེ་ཉུང་དུ་གཏོབ་དགོས།
　གལ་ཏེ་རང་ཉིད་ལ་གློ་གཅོང་ནད་བྱུང་ཡོད་མེད་ལ་ཇི་ལྟར་ལྟ་དགོས།
　ཐོག་མའི་དུས་རིམ་གྱི་གློ་གཅོང་ནད་དེར་ནད་རིགས་གཞན་དག་དང་འདྲ་བར་མངོན་གསལ་གྱི་ནད་རྟགས་མེད། གལ་ཏེ་ནད་རྟགས་ཡོད་ན་ཡང་། ཆེས་མངོན་གསལ་ཞིག་མིན་པས། ནད་པ་རང་ཉིད་དང་སྨན་པ་སུ་ཡིན་རུང་གློ་བའི་ནད་གཞན་པར་ནོར་འཁྲུལ་འབྱུང་གི་ཡོད། གློ་གཅོང་ནད་ཡིན་མིན་ལ་ངོས་འཛིན་ཇི་ལྟར་བྱེད་དགོས་ཟེར་ན། བསྟུད་མར་གཟའ་འཁོར་གཉིས་ཡན་ལ་ལུ་བ་དང་ལུད་པ་ཐོན་པ། ལུད་པའི་ནང་ཁྲག་འདྲེས་བ། ཚ་ལངས་བ། བྲང་ཁ་ན་བ་སོགས་ཀྱི་རྟགས་བྱུང་ཚེ། སྨན་ཁང་དུ་སོང་ནས་ཞིབ་བཤེར་བྱས་ན་ཤེས་ཐུབ།
　གལ་ཏེ་གོང་གི་ནད་རྟགས་དེ་དག་ཡོད་པ་དང་ལྷག་པར་དུ་བསྟུད་མར་གཟའ་འཁོར་གཉིས་ཡན་ལ་ལུ་བ་དང་ལུད་པ་ཐོན་ཚེ། རང་འགུལ་གྱིས་སྨན་ཁང་ལ་སོང་ནས་སྨན་པས་བཤད་པ་ལྟར“ཅེ་ཧི་ཅོན་སུའུ”ཞེས་པའི་སྨན་ཁབ་བརྒྱབ་ནས་ནད་དེ་ཡིན ་མིན་ལ་བརྟག་དཔྱད་དང་། ལུད་པའི་ནང་འདུས་འདྲིལ་དབྱིག་དབྱིབས་འབུ་ཕྲ་ཡོད་མེད་ལ་བརྟག་དཔྱད་བྱེད་དགོས། གཞན་ད་རུངxགློག་འོད་ཀྱི་འདྲ་པར་ཡང་ལེན་དགོས། དེ་ལྟར་བྱས་ཚེ་ནད་ངོས་འཛིན་གསལ་བོ་བྱེད་ཐུབ།
　གལ་ཏེ་གློ་གཅོང་ནད་ལ་ངོས་འཛིན་བྱས་ཚེ། ས་གནས་ཀྱི་ནད་ཡམས་སྔོན་འགོག་ཚོད་འཛིན་ལྟེ་གནས་སུ་སོང་ན། ཁོ་ཚོས་རིན་མི་ལེན་པར་ནད་བརྟག་སྨན་བཅོས་བྱེད་ངེས་རེད།