༄༅།།མི་འཕྲོད་པའི་ཟས་རིགས་བསྡམས་པ།

གཅིག དུག་ལྡན་གྱི་ཟས་བསྡམས་པ།
སྤྱིར་ཟས་དང་སྐོམ་ནི་བཟའ་ཞིང་བཏུང་བར་བྱ་བ་ཁོ་ན་ཡིན་མོད་དུ་ཟིན་ཀྱང་། སྦྱར་བ་ལ་སོགས་པའི་དུག་དང་ལྡན་པའི་ཟས་དང་། མི་འཕྲོད་པའི་རིགས་ཀྱི་ཁ་ཟས་གང་ཡིན་པ་ཐམས་ཅད་ནི་མི་ཟ་ཞིང་བསྡམ་པར་བྱ་བ་ཁོ་ན་ཡིན་གྱི། དེ་མ་བསྡམ་པར་བབ་ཅོལ་དུ་ཟོས་ཤིང་འཐུང་ན་དེས་འཕྲལ་དུ་སྲོག་འདོར་བའམ་རླུང་ལ་སོགས་པའི་ཉེས་པ་རྣམས་རིམ་པས་འཁྲུགས་པར་གྱུར་ཏེ་མི་བཟོད་པའི་ཟུག་རྔུས་འདེབས་པར་འགྱུར་བ་དེའི་ཕྱིར་དེ་གཉིས་འབད་པས་བསྲུང་བར་བྱ་བ་ཡིན། དེ་བས། འབྲས་སོགས་བཙོས་པའི་ཁུ་བ་ཅན་ནམ་རླན་གཤེར་གྱི་བག་དང་བྲལ་ཏེ་སྐམ་ཁོག་གི་ངོ་བོའམ་བག་ཅན་དུ་གྱུར་འདུག་ཅིང་སྐམ་བག་ཅན་གྱི་ཟས་དང་འདྲ་བར་འགྱུར། དེ་བཞིན་དུ་ཟས་རིགས་མ་བཙོས་པའི་སྔོན་ནས་དུག་ཅན་དུ་གྱུར་པའི་རྟགས་ནི་བཙོས་ན་ཡུན་རིང་དུ་ཚོས་པར་མི་འགྱུར་ཞིང་ཚོས་གྱུར་ནའང་ཁ་དོག་དྲི་རོ་སོགས་ཡལ་བར་གྱུར་ཏེ་བཙོས་ནས་ཞག་གཅིག་བཞག་པའི་ཟས་ལྟ་བུར་འགྱུར་བ་དང་། ཡང་ན་རླངས་པ་ལ་རྨ་བྱའི་མགྲིན་པ་ལྟ་བུའི་ཁ་དོག་སྣ་ཚོགས་ལྡན་པར་འགྱུར་བའམ། བརྒྱལ་བ་དང་ལུས་ནས་རྔུལ་ལྷག་པར་སྐྱེད། ལྷག་པར་དུ་དྲི་མདོག་སོགས་གང་ལ་ལྟོས་ནའང་རང་གི་ཇི་ལྟ་བ་ཉིད་ཉམས་ཤིང་སྔར་ལས་འཇིགས་པར་གྱུར་པ་དང་། འདྲུལ་ཅིང་རུལ་བའི་རྣམ་པར་གནས་པ། ཁ་དོག་རྨ་བྱའི་མཇུག་སྒྲོ་ཇི་བཞིན་སྔོ་དམར་སེར་སོགས་འབྱུང་བ་ཡིན། ཡང་ན་དྲི་རོ་མདོག་སོགས་རང་ལས་ལྡོག་པའང་འབྱུང་སྲིད། དུག་ལྡན་གྱི་ཟས་དེ་མེ་ལ་བསྲེགས་པ་ན་དུ་བ་སྔོ་དམར་སེར་ལྗང་སོགས་རྨ་བྱའི་མགྲིན་པ་འདྲ་བར་འཇའ་ཚོན་ལྟ་བུ་འབྱུང་། ཡང་ན་མེ་ལྕེ་གྱེན་དུ་མི་འགྲོ་ཞིང་ཕྱོགས་གཅིག་ཏུ་འཁྱིལ་ཞིང་མེ་སྟག་རྒྱང་རིང་དུ་བརྒལ་ཏེ་འགྲོ་བ་དང་། ཁ་ཟས་དེ་ཉིད་སྲོག་ཆགས་གཞན་གྱིས་མཐོང་བར་གྱུར་པ་ན་བྱ་རོག་རྣམས་སྐད་འདོན་ཞིང་རྨ་བྱ་རྣམས་དགའ་བར་འགྱུར་བ། ཁྱི་ལ་བྱིན་ན་ལྟོ་བ་དྲོས་པའི་ཚོད་ཙམ་ནས་སྐྱུག་པར་འགྱུར། བྱེ་བྲག་ཏུ་ཤ་ལ་དུག་ཡོད་ན་ཁ་དོག་རྒྱུན་ལས་ལྷག་པར་དམར་ཞིང་ལྕགས་བསྲེགས་སྤ་ལ་སྦྱར་ན་མི་ལེན་པ་སྟེ་འབྱར་མི་འོང་བ། སོབ་སོབ་ཏུ་སྦོས་པ། ཤ་དེ་ཆང་དང་སྦྱར་ཏེ་རླངས་པ་མིག་ལ་དུགས་ན་ལྷག་པར་གནོད་པ་དང་ཚ་ཞིང་དམར་པོར་འགྱུར་བ་སོགས་འཁྲུགས་པར་འགྱུར།
དེ་ཡང་ཆ་རྒྱུས་མེད་པའི་ཁྱིམ་མམ་རྒྱུས་མེད་མགྲོན་པོ་ལག་གི་ཟས་སོགས་གང་བྱུང་བབ་ཅོལ་དུ་མི་ཟ་བར་དེ་ལ་དུག་ཡོད་ཀྱི་ཐེ་ཚོམ་སྐྱེ་བྱུང་ན་དེ་ལ་ལེགས་པར་ཞིབ་ཏུ་བརྟག་ཚེ་ཆག་ཚང( དུགར་བཟོ་བའི་ཁྱིམ་ཚང) གི་མི་དེ་ཉིད་ཁ་སྐམ་ལ་ལུས་ཁམས་རྔུལ་ཞིང་འདར་བ་དང་། སྐྲག་ནས་གནས་གཅིག་ཏུ་འདུག་མི་ཚུགས་ལ། དུག་སྟེར་ཡུལ་ལ་འདྲོག་པ་བཅས་ཀྱི་རྣམ་འགྱུར་སྣ་ཚོགས་སྟོན་པ་བཅས་ལས་སེམས་ཅན་ལ་གནོད་པའི་དུག་གཡོས་སྦྱོར་བྱེད་མཁན་དུ་ཤེས་ནས་ཚོགས་ལས་བསྐྲོད་པའམ་དོར་བར་བྱ།
གཉིས། མི་འཕྲོད་པའི་ཟས་བསྡམས་པ།
ཞོ་མ་ལངས་པ་དང་ཆང་གསར་བ་གཉིས་ལྷན་ཅིག་ཏུ་འཐུང་ན་དེ་གཉིས་ཕན་ཚུན་ནུས་པ་མི་འཕྲོད་པ་དང་། དེ་བཞིན་ཉའི་ཤ་དང་འོ་མ་གཉིས་ལྷན་ཅིག་ཏུ་བཟའ་བཏུང་བྱས་ན་ཕན་ཚུན་ནུས་མི་འཕྲོད། འོ་མ་དང་ཁམ་སྟར་སོགས་ཤིང་ཏོག་རིགས་གཉིས་ལྷན་གཅིག་ཏུ་ཟ་བའང་མི་འཕྲོད། ཡང་བྱའི་སྒོ་ང་དང་ཉའི་ཤ་གཉིས་ལྷན་ཅིག་ཏུ་ཟ་བ་མི་འཕྲོད་པ་དང་། སྲན་མའི་ཚོད་མ་དང་། བུ་རམ། ཞོ་བཅས་གསུམ་པོ་ལྷན་ཅིག་ཏུ་ཟ་བའང་མི་འཕྲོད། སེར་ཤ་སོགས་ཤ་མོའི་རིགས་ཡུངས་དཀར་གྱི་མར་ལ་བརྔོས་ནས་ཟ་བ་མི་འཕྲོད། ཁྱིམ་བྱའི་ཤ་དང་ཞོ་གཉིས་བསྲེས་ནས་ཟ་བ་དང་། སྦྲང་རྩི་མར་ནག་སྟེ་སྣུམ་དང་ཆ་མཉམ་དུ་ཟོས་ན་ཡང་འཕྲོད་པར་མི་འགྱུར་ཞིང་། གཞན་ཡང་མར་གསར་བ་འཁར་བའམ་ཟངས་ཀྱི་སྣོད་དུ་ཞག་བཅུ་ཡན་ལུས་པ་དག་ཟ་བ་དང་། བྱ་ཧ་རི་ཏྲའི་ཤ་ཞེས་བྱ་ལྗང་ཁུ་ཆ་མཐུན་ནེ་ཙོ་ཡིན་པ་དྲེའི་ཤ་སྐྱེར་ཐུར་ལ་བསྐོན་ནས་སྐྱེར་བའི་མེར་བསྲེགས་ཏེ་ཟ་བ་དང་། ཅོང་ཞིའི་ཕྱེ་མ་ཟོས་པའི་རྗེས་སུ་དེ་མ་ཞུ་བའི་སྔ་རོལ་ཏུ་ཤ་མོ་དང་། བྲ་ཕྱེའམ་བག་ཕྱེའི་ཁུར་བ་ཟ་བ་དང་། ཞུན་མར་ཟོས་པའི་རྗེས་དེ་མ་ཐག་ལ་ཆུ་གྲང་སོགས་གྲང་མོའི་རིགས་འཐུང་ནའང་མི་འཕྲོད་ཅིང་། དེ་བཞིན་ཤ་རློན་པར་ཞོ་སོགས་དཀར་གྱི་རིགས་དང་། ཆང་སིངས་པོ་སོགས་སྐྱུར་གྱི་རིགས། རྩམ་པའི་དྲི་མ་བཅས་ཕོག་ནས་ཞག་ཏུ་ལུས་པ་ཟ་བ་དང་། ཤ་བཙོས་པའི་རླངས་པ་ཕྱིར་མ་ཕྱུངས་པར་ནང་དུ་བསུབས་ཏེ་ཞག་བདུན་གྱི་བར་ལུས་ཟ་བ། སྟར་བུ་དང་། ཆུ་ཆུར་གྱི་རྐང་སོགས་སྐྱུར་གྱི་རིགས་དང་འོ་མ་གཉིས་ལྷན་ཅིག་ཏུ་ཟ་བ། ད་དུང་ཁ་ཟས་གང་ཡང་སྔ་མ་མ་ཞུ་བར་ཕྱི་མ་ཅིག་ཅར་དུ་ཟོས་པས་ཀྱང་མི་འཕྲོད་པ་བཅས་ཇི་སྐད་བཤད་པའི་ཁ་ཟས་དེ་རྣམས་ཀྱི་ནུས་པ་ཕན་ཚུན་འཐབ་པར་བརྟེན་ནས་མཐར་དུག་ལྟ་བུར་འགྱུར་འགྲོ་བ་ཡིན་ལ། དེ་བཞིན་སྔར་ཟ་བར་མ་གོམས་པའི་ཁ་ཟས་རིགས་གློ་བུར་དུ་རྒྱུན་ལྡན་གྱི་ཚད་གཞི་ལྟར་ཟོས་པའམ་ཡང་ན་དུས་མ་ཡིན་པར་ཟོས་པ་སྟེ་ནམ་ཕྱེད་ལྟ་བུར་ཡང་ཟོས་ཤིང་འཐུང་བ་སོགས་ཀྱིས་ཀྱང་འཇུ་མ་ཐུབ་པར་ལུས་སྲོག་ལ་འཚེ་བའི་དུག་ཉིད་དུ་འགྱུར་འགྲོ་བའང་ཡོད།