སྨན་བསྟེན་ནོར་བྱུང་ན་ཇི་ལྟར་བྱ་དགོས།

        དུས་རྒྱུན་འཚོ་བའི་ཁྲོད་ལོ་ལོན་དང་ལོ་ན་གཉིས་ནས་དྲུག་བར་གྱི་བྱིས་པ་དག་ནི་རྒྱུན་དུ་སྨན་བསྟེན་ནོར་འབྱུང་སླ་བའི་རིགས་ཡིན། སྨན་ལ་ཡང་རིགས་མི་འདྲ་བ་མང་པོ་ཡོད་པས། གལ་ཏེ་བསྟེན་ནོར་བྱུང་ན་དེར་མྱུར་སྐྱོབ་བྱེད་ཐབས་ཀྱང་མི་འདྲ་བ་མང་པོ་ཡོད་པ་རེད།
        མྱུར་དུ་ཕོ་བའི་ནང་གི་སྨན་རྫས་ཕྱིར་ཕུད་རྒྱུ་ནི་གལ་ཆེན་ནང་གི་འགངས་ཆེན་ཡིན། མཛུབ་མོ་དང་ཐུར་མས་མིད་པར་ཟུག་གཟེར་བསླངས་ནས་མྱུར་མོར་ཕྱིར་སྐྱུག་ཏུ་འཇུག་དགོས།
        གལ་ཏེ་ལེ་སུའུ་ཨེར（来苏尔）སོགས་རུལ་བསླད་རང་བཞིན་གྱི་སྨན་འཐུང་ཚེ། སྐྱུག་ཐབས་སྤྱད་ན་དེ་འདྲའི་མི་ཕན་པས། མྱུར་མོར་ནད་པར་སྒོ་ང་དང་འོ་མ་སོགས་འཐུང་དུ་འཇུག་དགོས། དེ་ལྟར་བྱས་ན་སྒོ་ང་དང་འོ་མའི་རིགས་དེ་རྒྱུ་མའི་ངོས་དང་ཕོ་བའི་ངོས་སུ་འབྱར་ནས་སྲུང་སྐྱོང་གི་ནུས་པ་ཐོན་གྱིན་ཡོད་པས། ཕོ་བར་ཡང་བསྐྱར་གནོད་པ་འབྱུང་བར་སྔོན་འགོག་བྱེད་ཐུབ།
        གལ་ཏེ་གཉིད་སྨན་དང་དུག་ལྡན་རང་བཞིན་གྱི་སྨན་རྫས་མང་དུ་བསྟེན་པ་ཡིན་ན། དུས་ཚོད་ཐུང་ངུའི་ནང་བསྐྱུག་ཏུ་འཇུག་དགོས། དེར་ཐུར་མ་དང་ཡང་ན་ཁུ་བ་འཐུང་བྱེད་ཀྱི་ཁེམ་བུས་ནད་པའི་ལྕེ་རྟིང་མནན་ནས་བསྐྱུག་ཏུ་འཇུག་པ་དང་། བསྐྱུགས་རྗེས་ཆུ་དྲོད་འཇམ་འཐུང་ནས་ཡང་བསྐྱར་ཕོ་བའི་ནང་གི་ཟ་མ་ཡོངས་རྫོགས་བསྐྱུག་ཏུ་འཇུག་དགོས།
        གལ་ཏེ་ཝ་ཚྭའི་ཆང(碘酒)རིགས་བསྟེན་ནོར་བྱུང་ཚེ། མྱུར་མོར་སྐྱོ་མའམ་འབྲས་ཐང་སོགས་སིང་ཕྱེ་རིགས་འཐུང་དུ་བཅུག་རྗེས་སྐྱུག་ཐབས་བྱེད་དགོས། སིང་ཕྱེ་དེ་ཝ་ཚྭའི་ཆང་ལ་འདྲེས་རྗེས། འགྱུར་འབྱུང་བྱུང་སྟེ་དུག་ནུས་མེད་པར་འགྱུར་འགྲོ་ཞིང་། དེ་ལྟར་ཡང་དང་བསྐྱར་དུ་སྐྱུག་ཏུ་བཅུག་ནས་སྐྱུག་རོའི་མདོག་སྔོན་པོ་ཅན་དེ་མེད་པར་བཏང་ཚེ། ད་གཟོད་ཕོ་བའི་ནང་གི་ཝ་ཚྭའི་ཆང་ཕྱིར་བསྐྱུགས་ཚར་བའི་རྟགས་ཡིན།
        ཁྱིམ་དུ་ཐོག་མའི་མྱུར་སྐྱོབ་བྱེད་ཐབས་བཀོལ་སྤྱོད་བྱས་རྗེས། ངེས་པར་དུ་མྱུར་མོར་ནད་པ་སྨན་ཁང་དུ་བསྐྱལ་ནས་མྱུར་སྐྱོབ་བྱེད་དགོས་པར་མ་ཟད། ནད་པས་བསྟེན་ནོར་བྱུང་བའི་སྨན་དང་སྨན་སྣོད་སོགས་སྨན་པར་བྱིན་ནས་མྱུར་སྐྱོབ་བྱེད་སྐབས་ཟུར་ལྟ་བྱེད་དུ་འཇུག་དགོས། གལ་ཏེ་ནད་པས་སྨན་ཅི་ཞིག་འཐུང་བ་མ་ཤེས་ན། ནད་པ་བསྐྱུགས་པའི་སྐྱུག་རོ་དག་སྨན་ཁང་དུ་འཁྱེར་ནས་ཞིབ་བཤེར་བྱེད་པར་གྲ་སྒྲིག་བྱེད་དགོས།
        སྨན་བསྟེན་རྗེས་ཤེས་ཚོར་མེད་པའམ་འཁུམ་འདར་བྱུང་བའི་བྱིས་པ་དང་རྒན་པར་སྐྱུག་ཐབས་སྤྱད་ན་མི་འཚམ་པས། ང་ཚོས་ངེས་པར་དུ་སྨན་ཁང་དུ་བསྐྱལ་ནས་མྱུར་སྐྱོབ་བྱེད་དགོས། །

གོང་གི་ཤེས་བྱ་འདི《མཚོ་སྔོན་ཞིང་ཆེན་བདེ་ཐང་སློབ་གསོ་ཁང》གིས་འདོན་སྤྲོད་བྱས་པ་ཡིན།