པྲོག་དབྱིབས་ནད་དུག་གསར་བའི་གློ་ཚད་རིམས་ནད་འགོག་སྡོམ་ཤེས་བྱའི་དྲི་བ་དྲིས་ལན། (གསུམ།)

གཅིག ཉིང་སྐྱུར་དཔེ་སྒྲུག་གི་སྔོན་ལ་དོ་སྣང་བྱེད་དགོས་པའི་དོན་ཚན་གང་དག་ཡོད།
        ཆུ་ཚོད48ནང་པྲོག་གསར་ནད་དུག་གི་འགོག་ཁབ་བརྒྱབ་ཟིན་པའི་མི་སྣས་མ་དཔེ་ལེན་པ་ཕྱིར་འགྱངས་བྱེད་དགོས། ཡར་སྔོན་ནས་མ་དཔེ་ལེན་པའི་རྟགས་རིས་ཐོ་འགོད་བྱེད་པ་དང་། ཐོབ་ཐང་ལག་ཁྱེར་གྲ་སྒྲིག་ཡག་པོ་བྱས་ཏེ། སྤྱད་གྲབས་ཁ་ཐུམ་དང་ལག་པ་བཀྲུ་མི་དགོས་པའི་དུག་སེལ་གཤེར་ཁུ། དུག་སེལ་ལག་ཕྱིས་བཅས་འཁྱེར་ནས་ཐག་ཉེ་སའི་བཤེར་འཇལ་ས་ཚིགས་སུ་འགྲོ་དགོས། དོ་སྣང་བྱེད་དགོས་པ་ཞིག་ནི། གྲལ་སྒྲིག་སྐབས་བར་ཐག་སྨི་གཅིག་རྒྱུན་འཁྱོངས་བྱས་ཏེ་བརྒྱུད་རིམ་ཧྲིལ་པོར་ཁ་ཐུམ་ཡག་པོར་རྒྱག་དགོས། མ་དཔེ་མ་བླངས་པའི་སྔོན་གྱི་དུས་ཚོད་གཉིས་ཀྱི་ནང་ཟ་མ་མི་ཟ་བ་དང་། མ་དཔེ་མ་བླངས་པའི་སྔོན་གྱི་སྐར་མ30ཡི་ནང་ཐ་མག་མི་འཐེན་པ་དང་ཆང་མི་འཐུང་བ། ཁ་མངར་ཐང་ཆུ་མི་ལྡད་པ་བཅས་བྱས་ཏེ་བཤེར་འཇལ་མཇུག་འབྲས་ལ་གནོད་པ་བྱེད་མི་ཉན།
གཉིས། ཅི་ཞིག་ལ་པྲོག་གསར་ནད་དུག་གི་འགོག་ཟུངས་བཤེར་འཇལ་ཟེར།
        པྲོག་གསར་ནད་དུག་གི་འགོག་ཟུངས་ནི་ནད་དུག་ཉིང་སྐྱུར་དང་འདྲ་བར། གཉིས་ཀ་ནད་དུག་མ་གཞི་ནས་ཡོད་པའི་དམིགས་བསལ་གྱི་དངོས་པོ་ཞིག་ཡིན། ཉིང་སྐྱུར་ནི་ནད་དུག་གི་རྒྱུད་འཛིན་དངོས་རྫསRNAཡིན་པ་དང་། འགོག་ཟུངས་ནི་ནད་དུག་ཉིང་སྐྱུར་ཕྱིའི་ཕྱི་ཤུན་སྤྲི་དཀར་རིམ་པ་ཞིག་ཡིན། དཔེར་ན་འཛེར་འབུར་སྤྲི་དཀར(Sསྤྲི་དཀར)དང་ཕྱི་ཤུན་སྤྲི་དཀར(Nསྤྲི་དཀར)སོགས་ལྟ་བུར་ནད་དུག་གི་ཕྱི་རོལ་དུ་གྱོན་པའི“གྱོན་ཆས”དང་འདྲ། སྤྱིར་བཏང་དུ་བཤད་ན། ནད་དུག་གི་ཉིང་སྐྱུར་དང་འགོག་ཟུངས། དེ་མིན་མིའི་ལུས་ཕུང་ལ་འགོས་རྗེས་བྱུང་བའི་དམིགས་གསལ་རང་བཞིན་གྱི་འགོག་གཟུགས་བཅས་ལ་བཤེར་འཇལ་བྱས་པ་བརྒྱུད། པྲོག་གསར་ནད་དུག་འགོས་ཡོད་མེད་ཐག་གཅོད་བྱེད་ཐུབ། འགོག་ཟུངས་བཤེར་འཇལ་ནི་ཉིང་སྐྱུར་བཤེར་འཇལ་དང་འདྲ་བར་མིའི་ལུས་ཕུང་ལ་པྲོག་གསར་ནད་དུག་འགོས་ཡོད་མེད་བརྡར་ཤ་གཅོད་ཐུབ།
གསུམ། འགོག་ཟུངས་བཤེར་འཇལ་དང་ཉིང་སྐྱུར་བཤེར་འཇལ་གྱི་ཁྱད་པར་ཅི་ཡིན།
        ཐོག་མར་དེ་གཉིས་ཀྱི་བཤེར་འཇལ་བྱ་ཡུལ་མི་འདྲ། དཔེར་ན། གལ་ཏེ་པྲོག་གསར་ནད་དུག་ཆུ་ཀུབ་ཅིག་ཡིན་པའི་དབང་དུ་བཏང་ན། ཉིང་སྐྱུར་བཤེར་འཇལ་གྱིས་འཇལ་བ་ནི་ཆུ་ཀུབ་ཀྱི་འབྲུ་གུRNAཡིན་པ་དང་། འགོག་ཟུངས་བཤེར་འཇལ་གྱིས་འཇལ་བ་ནི་ཆུ་ཀུབ་ཀྱི་ཕྱི་ཤུན(སྤྲི་དཀར)ཡིན། དེ་ནས་བཤེར་འཇལ་བྱེད་ཐབས་རིགས་གཉིས་ཀར་སོ་སོར་དགེ་སྐྱོན་ཡོད། འགོག་ཟུངས་བཤེར་འཇལ་གྱི་ལེགས་ཆ་ནི་སྟབས་བདེ་དང་མགྱོགས་མྱུར་ཡིན་པ་དང་། སྐར་མ10ནས15ཡི་ནང་མཇུག་འབྲས་ཐོན་ཐུབ་ལ། མི་སྒེར་གྱིས་རང་བཤེར་བྱེད་ཆོག་པས། དོགས་ཡོད་མི་ཚོགས་ལ་སྔ་དུས་ཀྱི་ཁག་བགོས་དང་མགྱོགས་མྱུར་དོ་དམ་བྱེད་པར་ཕན་ཐོགས་ཡོད། སྐྱོན་ཆ་ནི་ཚོར་སྐྱེན་རང་བཞིན་ཅུང་ཞན་པ་དང་། ཉིང་སྐྱུར་བཤེར་འཇལ་གྱི་ཚོར་སྐྱེན་རང་བཞིན་ལས་ཞན་པ་ཡོད། འོན་ཀྱང་ཉིང་སྐྱུར་བཤེར་འཇལ་བྱེད་པར་ཆེད་སྤྱོད་ཀྱི་དཔྱད་ཆས་སྒྲིག་སྦྱོར་བྱེད་དགོས་པ་དང་ཆེད་ལས་ཀྱི་གསོ་སྦྱོང་བྱས་པའི་མི་སྣས་གཞི་ནས་བཀོལ་སྤྱོད་བྱེད་ཐུབ། མཇུག་འབྲས་ཐོན་པའི་དུས་ཚོད་རིང་བས་ཉུང་མཐར་ཡང་ཆུ་ཚོད2-3དགོས་ཀྱི་ཡོད། མིག་སྔར་ཉིང་སྐྱུར་བཤེར་འཇལ་ནི་སྔར་བཞིན་པྲོག་གསར་ནད་དུག་འགོས་པ་གཏན་ཁེལ་གྱི་གཞི་འཛིན་ས་ཡིན་པ་དང་། འགོག་ཟུངས་བཤེར་འཇལ་དེ་ཉིང་སྐྱུར་བཤེར་འཇལ་གྱི་ཁ་གསབ་ཏུ་བརྩིས་ཆོག གལ་ཏེ་ཉིང་སྐྱུར་བཤེར་འཇལ་བྱས་འབྲས་གདགས་གཤིས་ཡིན་ན། འགོག་ཟུངས་བཤེར་འཇལ་བྱས་འབྲས་གདགས་གཤིས་དང་སྲིབས་གཤིས་གང་ཡིན་རུང་། ཚང་མར་པྲོག་གསར་ནད་དུག་འགོས་མཁན་ནམ་པྲོག་གསར་གློ་ཚད་གཏན་ཁེལ་གྱི་ནད་པ་ལྟར་དེར་མཐུན་གྱི་བྱེད་ཐབས་སྤྱོད་དགོས། གལ་ཏེ་ཉིང་སྐྱུར་བཤེར་འཇལ་བྱས་འབྲས་སྲིབ་གཤིས་ཡིན་མོད། འོན་ཀྱང་འགོག་ཟུངས་བཤེར་འཇལ་བྱས་འབྲས་གདགས་གཤིས་ཡིན་ན། པྲོག་གསར་ནད་དུག་འགོས་མཁན་དང་འདྲ་བར་གཅིག་བསྡུས་ལོགས་བཀར་སོགས་ཀྱི་བྱེད་ཐབས་ལ་བརྟེན་ནས་ལྟ་ཞིབ་ནན་པོ་བྱས་ཏེ། བསྟུད་མར་ཉིང་སྐྱུར་བཤེར་འཇལ་བྱེད་དགོས། འགོག་ཟུངས་བཤེར་འཇལ་གྱི་མཇུག་འབྲས་གདགས་གཤིས་ཡིན་པ་དེ་པྲོག་གསར་ནད་དུག་འགོས་པ་ཐག་གཅོད་ཀྱི་གཞི་འཛིན་ས་བྱེད་མི་རུང་།
བཞི། ཅིའི་ཕྱིར་པྲོག་གསར་ནད་དུག་ལ་འགོག་ཟུངས་བཤེར་འཇལ་བྱེད་དགོས།
        མིག་སྔར་དར་ཁྱབ་ཆེ་བའི་ཨའོ་སྨི་ཁེ་རོང་དུག་སྡོང་ལ་འགོས་ཁྱབ་རང་བཞིན་མཐོ་བ་དང་སྦས་སྐུང་རང་བཞིན་ཆེ་བའི་ཁྱད་ཆོས་ལྡན་པས། ནད་རྟགས་མེད་པའི་ནད་པ་མང་པོ་ཡོད། འགོག་ཟུངས་བཤེར་འཇལ་གྱི་དགེ་མཚན་ནི་བཀོལ་སྤྱོད་སྟབས་བདེ་དང་མགྱོགས་མྱུར་ཡིན་ལ། རང་ཉིད་ལ་བཤེར་འཇལ་བྱེད་པར་སྟབས་བདེ་བ་བཅས་ཡིན། ཉིང་སྐྱུར་བཤེར་འཇལ་གྱི་ཁ་གསབ་གལ་ཆེན་ཞིག་ཡིན་པའི་ཆ་ནས“སྔ་མོ་ནས་ཤེས་རྟོགས་ཐུབ་པའི”ནུས་པ་སྔར་བས་ཆེ་རུ་བཏང་ཡོད་པ་དང་། འཕྲལ་མར་ནད་འགོས་ཡོད་སྲིད་པའི་ནད་པ་གྲལ་བཤེར་བྱེད་ཐུབ་པས། དུས་ཐོག་ཏུ་མགོ་ཁུངས་ཚོད་འཛིན་བྱེད་པར་ཕན་ཐོགས་ཡོད།