རིམས་འགོག་ནུས་པ་ཇེ་མཐོར་གཏོང་བའི་ཐབས་ལམ་འགའ།

       ལུས་ཕུང་བདེ་ཐང་ཡོང་འདོད་ན། ཐོག་མར་རང་ཉིད་ཀྱི་རིམས་འགོག་ནུས་པ་ཇེ་མཐོར་གཏོང་དགོས། དུས་རྒྱུན་གྱི་འཚོ་བའི་ཁྲོད་དུ་རིམས་འགོག་ནུས་པ་ཇེ་མཐོར་བཏང་སྟེ། ནད་རིགས་སྔོན་འགོག་བྱེད་པར་ཐབས་ལམ་གང་དག་ཡོད་དམ་ཞེ་ན། གཤམ་གྱི་དོན་དག་འདི་དག་སེམས་ལ་བཟུང་བས་ཆོག་སྟེ།

       གཅིག བཟའ་བཏུང་ལེགས་པོར་སྤྱོད་པ། དུས་རྒྱུན་གྱི་འཚོ་བའི་ཁྲོད་དུ། ཚང་མས་སིལ་ཏོག་གསར་པ་དང་སྔོ་ཚོད་གསར་པ་མང་དུ་བསྟེན་དགོས་ལ། ཉ་ཤ་དང་བྱ་ཤ་སོགས་སྤྲི་དཀར་འདུས་ཚད་མཐོ་བའི་ཟས་རིགས་བསྟེན་དགོས་པར་མ་ཟད། མ་རྨོས་ལོ་ཏོག་དང་འབྲས། གྲོ་སོགས་འབྲུ་རིགས་མང་དུ་བསྟེན་དགོས། དེ་ལས་གཞན་ད་རུང་ཆུ་མང་དུ་འཐུང་བ་དང་ཞོ་འོས་འཚམ་གྱིས་འཐུང་དགོས་པ་ལས། ཐཱན་སྐྱུར་སྐོམ་ཆུ་ཉུང་འཐུང་བྱེད་པ་དང་དུ་ཆང་དང་རིང་དུ་གྱེས་དགོས་ལ། ཀ་རའི་རིགས་དང་མངར་ཟས་ཉུང་བཟའ་བྱེད་དགོས།

       གཉིས། གཉིད་སྐྱིད་པོར་རོལ་བ། གཉིད་སྐྱིད་པོར་རོལ་བ་ཡིས་ལུས་ཕུང་གི་གནས་བབ་ཆེས་ལེགས་པོ་སྲུང་འཛིན་བྱེད་ཐུབ། གཉིད་ཀྱིས་མི་འདང་བ་ཚབས་ཆེ་ན་ཕྲ་ཕུངTསོགས་རིམས་འགོག་ཕྲ་ཕུང་ལ་གནོད་འཚེ་ཐེབས་ཏེ། ནད་རིགས་འགོ་བའི་ཉེན་ཁ་ཇེ་མཐོར་གཏོང་བ་རེད།

       གསུམ། རྒྱུན་དུ་ལུས་སྦྱོང་བྱེད་པ། ཉིན་རེར་སྐར་མ15ནས30བར་དལ་རྒྱུག་དང་མགྱོགས་འགྲོ་སོགས་ཀྱི་དྲག་ཚད་རན་པའི་ལུས་སྦྱོང་བྱས་ན། སེམས་ཁོང་གི་གནོན་ཤུགས་བསལ་ཏེ་འབྲེལ་ཡོད་སྐུལ་རྩི་ཟགས་ཐོན་ཡོང་བར་རོགས་འདེགས་བྱེད་ཐུབ། ཡིན་ནའང་དོ་སྣང་བྱེད་དགོས་པ་ཞིག་ནི། ཚད་ལས་བརྒལ་བའི་སྒོ་ནས་ལུས་སྦྱོང་དང་ཡང་ན་ལུས་ཕུང་མི་བདེ་བའི་སྐབས་སུའང་སྦྱོང་བརྡར་རྒྱུན་འཁྱོངས་བྱས་ན་རིམས་འགོག་ནུས་པར་ཤུགས་རྐྱེན་མི་ལེགས་པ་ཐེབས་ཏེ། ནད་འགོ་བའི་ཉེན་ཁ་ཆེ་རུ་གཏོང་བ་རེད། དེ་བས་ལུས་སྦྱོང་བྱེད་སྐབས་ངེས་པར་རང་ཉིད་ཀྱི་ལུས་པོའི་གནས་ཚུལ་དང་བསྟུན་ནས་གང་འཚམ་སྒོས་ནུས་ཚོད་ཀྱིས་སྦྱོང་བརྡར་བྱེད་དགོས།

       བཞི། སེམས་ཁམས་སྐྱིད་པ། སེམས་ཀྱི་གནོན་ཤུགས་ཕྱི་རུ་ཕུད་ན་ལུས་པོའི་རིམས་འགོག་ནུས་ཤུགས་མཐོ་རུ་གཏོང་བར་ཕན་པ་དེ་ཞིབ་འཇུག་ལས་ར་སྤྲོད་བྱས་ཡོད། ཚང་མས་དུས་ཡུན་ཐུང་ངུར་སྟོང་འདང་རྒྱག་པ་དང་གླུ་དབྱངས་ལ་ཉན་པ། གྲོགས་པོར་ཁ་བརྡ་བྱེད་པ་སོགས་ཀྱི་བྱེད་ཐབས་ཀྱིས་སེམས་ཀྱི་གནོན་ཤུགས་དུས་ཐོག་ཏུ་སེལ་བར་བྱས་པ་ལས། རང་ཉིད་དུས་ཡུན་རིང་པོར་དགའ་སྣང་ཅི་ཡང་མེད་པར་གནོན་ཤུགས་ཀྱིས་ཁེངས་པ་དང་སེམས་སྡུག་ཁོག་ཏུ་བཅུག་པའི་གནས་བབ་ཏུ་སྡོད་དུ་འཇུག་མི་རུང་ངོ་།།