༄༅། །རོང་འབྲོག་མི་མང་གིས་ལོ་རེ་རེ་བཞིན་ལུས་ཕུང་བརྟག་བཤེར་བྱེད་པའི་གོམས་སྲོལ་ཆགས་ན་བཟང་། ཧྲོང་བོ་ཚེ་བརྟན་རྒྱལ།

   
       དེང་དུས་ལས་ཁུངས་སོ་སོའི་ལས་བྱེད་པ་རྣམས་ལ་ལོ་རེ་རེ་བཞིན་ལུས་ཕུང་བདེ་ཐང་ལ་བརྟག་བཤེར་བྱེད་པའི་རྣམ་གྲངས་དང་གོམས་གཤིས་ཆགས་ཡོད་ཅིང་། ས་གནས་རོང་འབྲོག་མི་མང་ལ་དེ་ལྟ་བུའི་ནད་ལ་སྔོན་བཤེར་བྱེད་པའི་གོམས་སྲོལ་མེད་པ་རེད། དེ་ཡང་གཅིག་ཏུ་ན་མང་ཚོགས་ལ་ལས་བྱེད་པ་ལྟ་བུའི་དཔལ་འབྱོར་གྱི་མཐུན་རྐྱེན་ཞན་པས་སྒོར་མོ་གྲོན་ཆུང་བྱས་པ་ཡིན་ན་ཐང་མོད། གཙོ་བོའི་ནང་གི་གཙོ་བོ་ནི་སྒོར་མོའི་ཆ་རྐྱེན་མེད་པའང་མ་ཡིན་ཏེ། དེ་ནི་རིག་གནས་དང་བསམ་བློའི་གོ་རྟོགས་དང་འདུ་ཤེས་འཛིན་སྟངས་ཀྱི་དབང་གིས་དེ་འདྲའི་ལུགས་སྲོལ་མེད་པ་རེད། ཡིན་ན་ཡང་དེང་དུས་ཚོང་ལས་དཔལ་འབྱོར་གྱི་ཚ་རླབས་འཕྱུར་ཞིང་རྒྱ་བོད་སོག་གསུམ་ཕུད་གཞན་དུ་ཕྱི་རྒྱལ་བའང་འདུ་བའི་མི་ཚོགས་ཀྱི་འདུ་འཛི་ཆེ་བའི་ཁོར་ཡུག་དང་གནས་ཚུལ་ལ་གཞིགས་ཏེ་ལོ་རེ་རེ་བཞིན་བཟའ་ཟླ་ཕན་ཚུན་ལ་རེག་དུག་དང་ཨེ་ཙི་མཆིན་མིན་གྱི་ལུས་བཤེར་ཐེངས་རེ་ས་གནས་རྫོང་སོ་སོའི་ནད་རིམས་ཚོད་འཛིན་ལྟེ་གནས་སམ། རྫོང་མི་དམངས་སྨན་ཁང་། ཡང་ན་རྫོང་བོད་སྨན་ཁང་སོགས་སུ་སོང་ནས་དེ་ལུགས་སྒྲུབ་ན་ཤིན་ཏུ་བཟང་། དེ་ལས་རང་ཉིད་ལ་ན་ཚ་དེ་རིགས་ཡོད་མེད་གསལ་བོ་ཡིན་པ་ཤེས་པ་དང་། རང་ཉིད་བདེ་ཐང་ཡིན་པ་རྨང་གཞི་བྱས་ནས་ཕྱིན་ཆད་ནད་དེ་རིགས་འགོ་བའི་བྱ་སྤྱོད་ལ་འཛེམས་པ་དང་། ནད་དེ་རིགས་འབྱུང་བར་སྔོན་འགོག་གང་ལེགས་བྱེད་དགོས། གལ་ཏེ་སྐྱེས་ཕོ་མོ་སུ་ཞིག་ལ་རེག་དུག་ཡོད་པ་ཚོར་བ་ཡིན་ན། དེ་ནི་ཚད་ལྡན་གྱི་སྨན་ཁང་དུ་སོང་ནས་གསོ་བཅོས་ཡང་དག་བྱས་ཏེ་སངས་དྲག་བྱས་ཆོག་པ་དང་། ནད་དེ་སངས་དྲག་ཐོན་རག་བར་དུ་འཁྲིག་སྤྱོད་སོགས་ཀྱི་མི་འཕྲོད་པ་དང་མི་རུང་བའི་འཛེམས་བྱ་ལ་དོ་སྣང་ཆེན་པོ་བྱ་དགོས། གལ་ཏེ་བརྟག་བཤེར་ལས་འགོས་ནད་ངན་པ་ཨེ་ཙི་མཆིས་པ་ཡིན་ན་བཟའ་ཟླ་སོགས་ལ་ལུས་འབྲེལ་བྱེད་མི་ཉན་པ་མ་ཟད། སྨན་ཁང་ཚད་ལྡན་དུ་སོང་ནས་ཆེད་ལས་སྨན་པ་ལས་ནད་དུག་གི་སྨན་དེ་སྨན་པའི་ངག་བཞིན་བསྟེན་རྒྱུ་ནི་ཧ་ཅང་གལ་ཆེ་བ་སྨོས་ཅི་དགོས། དེ་ལྟར་ས་གནས་རོང་འབྲོག་མི་མང་གིས་ཀྱང་ལོ་རེ་རེ་བཞིན་རེག་དུག་དང་ཨེ་ཙི་ཕོག་ཡོད་མེད་ལ་བརྟག་བཤེར་བྱས་པ་ཡིན་ཚེ་དེས་ནི་ཁོ་ཚོའི་ལུས་བདེ་ཐང་གི་བྱ་བར་སྔ་ན་མ་མཆིས་པའི་ཕན་ཐོགས་འབྱུང་སྲིད་པ་མ་ཟད། རེག་དུག་གམ་ཨེ་ཙི་ཤེས་མེད་ཚོར་མེད་དུ་མཆེད་པ་ཡང་སྔོན་འགོག་བྱ་ཐུབ། ད་དུང་རང་ཉིད་ལ་རེག་དུག་སོགས་ཕོག་ཡོད་པ་རྟོགས་ཚེ་དུས་ཚོད་འགོར་འགྱངས་མེད་པར་དེ་ལུགས་ཀྱི་གསོ་བཅོས་བྱེད་ཐུབ། དེ་དང་དེ་འདྲའི་དགེ་མཚན་ཤིན་ཏུ་མང་བས་ན། ད་ནས་བཟུང་བོད་རོང་འབྲོག་མི་མང་གིས་ཀྱང་རང་རྟོགས་ཀྱིས་ལོ་རེ་རེ་བཞིན་བདེ་ཐང་གི་ལུས་བཤེར་ཐེངས་རེ་བྱས་ཏེ་རང་ཉིད་ལ་རེག་དུག་དང་ཨེ་ཙི་འགོས་ཡོད་མེད་བརྟག་རྒྱུ་ནི་ཧ་ཅང་གལ་ཆེའོ། །