༄༅། །ཨེ་ཙི་དང་རེག་དུག་འགོ་མིན་ལས་དབང་རེད་ཅེས་པ་ནི་མ་ཤེས་པའི་བླུན་རྟགས་ཁོ་ན་རེད།

       སྤྱིར་ང་ཚོ་ཚང་མས་ཤེས་གསལ་ལྟར་དུ་བོད་ཅེས་པའི་རང་མི་རིགས་འདི་ནི་མི་ཤི་རྟ་འགྱེལ་སོགས་ཆག་སྒོ་ཚབས་ཆེན་ཅི་ཞིག་བྱུང་ཡང་དེ་ལས་དབང་རེད་ཅེས་ལས་དབང་ལ་ངན་ཁག་དཀྲི་བ་དང་ལས་དབང་ལ་ཁ་གཡོར་བའི་མི་རིགས་ཤིག་ཡིན་པ་ནི་བསྙོན་དུ་མེད་པ་དང་། གནའ་ནས་ད་ལྟའི་བར་དུ་དེ་ལྟར་ཡིན་མོད། ཡིན་ན་ཡང་། དེང་གི་དུས་སུའང་ནད་ངན་ཨེ་ཙི་དང་རེག་དུག་ལ་རྒྱུས་ལོན་དང་སྔོན་འགོག་མི་བྱེད་པ་དང་། དེ་ལ་དོགས་ཟོན་དང་མཉམ་འཇོག་མི་བྱེད་པར་དེ་རང་ལ་འགོ་མིན་ཡང་ལས་དབང་ལ་རག་ལས་པ་རེད་ཅེས་བག་ལྷོད་པོ་དང་སྙིང་དཔའ་དཔའ། སྒྱིད་ལུག་གི་ངང་དུ་སྡོད་པ་ནི་དངོས་གནས་མ་ཤེས་པར་རང་མགོ་རང་གིས་གཡོགས་པའི་བླུན་རྟགས་འབའ་ཞིག་ལས་མ་འདས་པ་རེད། རྒྱུ་མཚན་ནི་ཨེ་ཙི་དང་རེག་དུག་ལ་ཐོག་མ་ཉིད་ནས་སྔོན་འགོག་དང་འཛེམ་དོགས་ལེགས་པོ་བྱས་ཚེ་མི་འགོ་བ་དང་། དེའི་ཉེན་ཁ་ལས་ཐར་ཐུབ་ཅིང་གཡོལ་ནུས་པ་ནི་ང་ཚོ་ཚང་མས་ཤེས་གསལ་བཞིན་མ་ཡིན་ནམ། དེས་ན་དེའང་སྔོན་ལས་རེད། ལས་དབང་རེད་ཅེས་ནག་འཐོམ་མེར་སྔོན་འགོག་ཙམ་ཡང་མེད་པར་བསྡད་ན་གང་ནས་རུང་ངམ།
       དེང་དུས་ཏང་ཀྲུང་དབྱང་གི་བཀའ་བཀོད་བཞིན་ས་གནས་མི་དམངས་སྲིད་གཞུང་གིས་ཀྱང་ཨེ་ཙི་དང་རེག་དུག་སྔོན་འགོག་བྱ་ཐབས་ཀྱི་འབྲེལ་ཡོད་ཡིག་ཆ་མང་པོ་བཀྲམ་དང་བཀྲམས་ཀྱིན་འདུག་པ་དང་། དེའི་སྐོར་གྱི་ཤེས་བྱ་མང་པོ་བསྒྲགས་དང་བསྒྲོགས་ཀྱིན་པའང་དེ་ལ་སྔོན་འགོག་བྱ་ཐབས་ཡོད་པའི་རྟགས་མཚན་མ་ཡིན་ནམ། དེ་ལ་གཞོལ་ཐབས་ཡོད་པའི་འབོད་པ་མ་ཡིན་ནམ། གསེར་རྟའི་མཁན་པོ་ཚུལ་ཁྲིམས་བློ་གྲོས་ཚང་སོགས་ཀྱིས་ཨེ་ཙི་སྔོན་འགོག་གི་གསུང་བཤད་གནང་བཞིན་པའང་དེ་ལས་དབང་ཁོ་ན་མ་ཡིན་པར་འགོག་ཐབས་ལྡན་པ་ར་སྤྲོད་བྱེད་ཀྱིན་པ་མ་ཡིན་ནམ། རང་རེའི་བོད་ལུགས་གསོ་རིག་གི«དཔལ་ལྡན་རྒྱུད་བཞི»རུའང་ནད་སྔོན་འགོག་བྱ་དགོས་པའི་སྐོར་མང་དུ་གསུངས་ཡོད་དེ། ཐ་མལ་ནད་མེད་ཀྱི་སྐབས་སུ་ཇི་སྐད་དུ། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །རྣམ་པར་མ་གྱུར་ཐ་མལ་ལུས་པོ་ལ། །མི་ན་གནས་དང་རིང་དུ་འཚོ་བར་བྱ། །དང་པོར་མི་ན་གནས་པར་བྱ་བ་ནི། །ནད་ཀུན་རྒྱུ་ལས་རྐྱེན་གྱིས་བསླང་ལས་འབྱུང་། །རྐྱེན་མེད་རྒྱུ་ལས་འབྲས་བུ་འབྱུང་མི་སྲིད། །དེ་ཕྱིར་ནད་རྣམས་ཀུན་གྱི་རྐྱེན་སྤང་བྱ། །ཞེས་པ་དང་། རྒྱུད་ཀྱི་ཀླུ་གདོན་གསོ་བའི་ལེའུར། ཟས་སྐོམ་སྤྱོད་ལམ་གནས་མལ་གོས་ལ་སོགས། །དྲི་དང་རེག་པས་འགོས་ཕྱིར་བསྲུང་བ་གཅེས། །ཅེས་པ་སོགས་ལས། ལུས་ཀྱི་བདེ་ཐང་ལ་གནོད་པ་ནི་འགོས་ནད་སོགས་ཡིན་པས་ན་དེ་སྔོན་འགོག་དང་དེ་ལ་དོགས་ཟོན་བྱ་དགོས་པའི་གལ་ཆེན་རང་བཞིན་ཁ་གསལ་མངོན་གསལ་དུ་གསུངས་འདུག་པ་ལས། རྗེ་གཡུ་ཐོག་པས་ཀྱང་ཀླུ་གདོན་སོགས་འགོས་རིམས་ཀྱི་སྐོར་གཞན་དབང་སྔོན་ལས་ཀྱི་ནད་རེད་ཅེས་བསྟན་མི་འདུག་ལ། དེ་འགོ་མིན་ལས་དབང་རེད་ཟེར་བ་ཞིག་ལར་ནས་མཐོང་རྒྱུ་མི་འདུག་པས་ན། འུ་ཅག་གིས་དེང་དུས་ཀྱི་འགོས་རིམས་རེག་དུག་འགོ་མིན་ལས་དབང་ལ་བཅོལ་ནས་སྔོན་འགོག་མི་བྱེད་པ་ནི་ས་ཕྱར་ན་རྡོ་ལྷང་ལ་བུད་པའི་དཔེ་ལྟར་བླུན་རྟགས་དམར་རྗེན་དུ་མཐོང་བ་མ་ཡིན་ནམ། བོད་ཀྱི་ལོ་རྒྱུས་སུའང་། འགོས་རིམས་ལ་འཛེམ་དོགས་བྱས་པ་མཐོང་རྒྱུ་འདུག་སྟེ། «ཆོས་འབྱུང་མཁས་པའི་དགའ་སྟོན»ལས། རྒྱལ་རབས་སུམ་ཅུ་བ་རྒྱལ་པོ་འབྲོང་གཉན་ལྡེའུ་ལའང་འགོས་རིམས་གདུག་པ་ཅན་ཆུ་སེར་ནག་པོས་བསྐྱེད་པའི་མཛེ་ནད་བྱུང་ཚུལ་བསྟན་ཡོད་དེ། དེ་ནས་རྒྱལ་པོ་འབྲོང་གཉན་ལྡེ་རུ་སྟེ། །རྟོག་པའི་ནད་ཀྱིས་སྐུ་ལ་སྙུན་མཛེ་བྱུང་། །ཞེས་གསུངས་པ་དང་། ཡང་དེ་རུ། ཡབ་ཡུམ་གཉིས་བློན་པོ་སྙགས་ཐང་པ་ཡར་རྗེ་དང་བཅས་པ་གདུང་རྒྱུད་ལ་སྙུན་མི་འབྱུང་བའི་ཕྱིར་གསོན་པོར་དུར་དུ་ཞུགས།ཞེས་པ་སོགས་ལས། སྔ་མོ་བོད་བཙན་པོའི་དུས་ནས་བཟུང་བོད་ཀྱིས་འགོས་རིམས་ལ་སྔོན་འགོག་དང་རྒྱུས་ལོན་བྱུང་ནས་དེ་ལ་འཛེམ་དོགས་བྱས་པ་ཧ་ཅང་གསལ་པོ་ཡིན་པས་ན།  ང་ཚོས་དེང་དུས་ཀྱང་མེས་པོ་གོང་མའི་ལུགས་སྲོལ་བཟང་པོར་ཁ་མིག་ཡར་ལྟ་དང་སློབ་སྦྱོང་མི་བྱེད་པར་ཨེ་ཙི་དང་རེག་དུག་འགོས་སོང་ན་ལས་དབང་རེད་ཅེས་ཨུ་ཚུགས་ཀྱིས་འདུག་ག་ལ་རུང་། དེ་བས་ཁོ་བོས་ཨེ་ཙི་དང་རེག་དུག་ལ་སྔོན་འགོག་མི་བྱེད་པར་དེ་འགོ་མིན་ལས་དབང་རེད་ཟེར་བ་ནི་བླུན་རྟགས་རེད་ཅེས་ཤ་ཚ་ཚ་དང་སྙིང་ན་ནས་བཤད་འདོད་པ་ཡིན།
       དེས་ན་ལས་དབང་ལས་བྱུང་བའི་ནད་གང་རེད་ཅེ་ན། དེ་ནི་སྔོན་འགོག་བྱ་ཐབས་བྲལ་བའི་དེང་དུས་ལ་ལས་གཉན་སྐྲན་ཟེར་བ་དང་། འགའ་ཤས་ཀྱིས་འབྲས་སྐྲན་ཞེས་འབོད་པ། སྐོར་ཞིག་གིས་སྐྲན་རོ་ནག་པོར་འབོད་པའི་ནུབ་ལུགས་གསོ་རིག་གིས“癌症”ཞེས་པ་ལྟ་བུ་ཡིན་པ་རེད། འདི་ནི་རང་རེའི་དཔལ་ལྡན་རྒྱུད་དུ་གཞན་དབང་སྔོན་ལས་ནད་བརྒྱ་རྩ་གཅིག་ཅེས་པའི་ཁོངས་གཏོགས་ཡིན་པ་དང་། འཚོ་བ་གསུམ་ཟད་འདུ་བ་གཤེད་དུ་བབས། །སྦྱོར་བ་མཚུངས་དང་གནད་དུ་བབས་པ་དང་། །དུས་འདས་རླུང་ནད་སྲོག་རྟེན་ཆད་པ་དང་། །ཚ་བ་ལ་འདས་གྲང་བ་གཏིང་འཁར་བ། །ཟུངས་ཀྱིས་མི་ཐུབ་རྣམ་པར་འཚེ་བ་རྣམས། །འབྲས་བུ་སྲོག་གཅོད་ནད་དགུ་ཞེས་སུ་བཤད། །ཅེས་པའི་འབྲས་བུ་སྲོག་གཅོད་ཀྱི་ནད་ལྟ་བུའང་གཞན་དབང་སྔོན་ལས་ཀྱི་ནད་ཅེས་ན་ཆོག་པར་སྙམ། གཞན་དབང་སྔོན་ལས་ཀྱི་ནད་ཡིན་ན་དེ་ལས་དབང་རེད་ཅེས་འདུག་པ་ལས་ཐབས་ཅི་ཡང་ཧ་ཅང་དཀོན་པོ་རེད། ཡིན་ན་ཡང་། ཨེ་ཙི་དང་རེག་དུག་ནི་སྔ་མོ་ནས་སྔོན་འགོག་བྱས་ན་མི་འགོ་བས་དེ་ལ་འགོ་མི་འགོ་ལས་དབང་རེད་ཅེས་བསྡད་ན་ནོར་འཁྲུལ་ཆེན་པོ་རེད།