༄༅། །ནད་ལྕི་མོར་གྱུར་ཚེ་རོགས་སྐྱོར་བྱེད་པ་ལས་ནད་མ་བྱུང་གོང་ནས་སྔོན་འགོག་བྱེད་རྒྱུ་གལ།

       བོད་པ་མང་ཆེ་བ་ལས་རྒྱུ་འབྲས་བརྩི་ཞིང་བྱམས་སྙིང་རྗེ་ཆེ་ལ། ཆེ་བཀུར་ཆུང་བྱམས། ཁ་མིག་ཡར་ལྟ་དང་ཉམ་ཐག་པར་རོགས་རམ་བྱེད་པར་དགའ་བ་ཞིག་ཡིན། གནའ་ནས་ད་བར་དུ་ནད་པ་ལྕི་མོ་ཞིག་བྱུང་ནས་དེ་གའི་ཁྱིམ་ཚང་གི་རྒྱུ་ནོར་ཡོད་ཚད་ཟད་ལ་ཉེ་བ་ཞིག་མཐོང་ཚེ་ཚང་མས་ཡོད་པོས་བརྒྱ་འབུལ་སྟོང་འབུལ་དང་མེད་པོས་མེ་ཏོག་མཆོད་མཇལ་གྱིས་སྙིང་ཉེ་ཉེ་དང་ཤ་ཚ་ཚས་རོགས་ཅི་ཐུབ་གང་ཐུབ་བྱེད་པ་རེད། དུས་རབས་འདིར་མཚོན་ན་ཡང་དེ་འདྲ་རེད། ད་སྐབས་སྐད་འཕྲིན་གྱི་ཚོགས་པ་ཆེ་མ་ཆུང་གསུམ་མང་པོ་བཙུགས་ཡོད་དེ། དཔེར་ན། ང་རང་གི་ཁ་པར་དུ་འཁོད་པ་དག་བཤད་ནའང་། བེེ་སྔོན། གཡུ་ཐོག་སྨན་གླིང་། སྔོ་སྨན་ངོས་འཛིན། ལུང་ཁྲིད་ཚོམས། གསོ་རིག་དཔེ་ཁང་། ཚེ་རིག་གླིང་། བོད་སྨན་འཛིན་གྲྭ་བཞི་བ། རྒྱལ་ཡོངས་བོད་ལུགས་སྨན་རྫས་ཟབ་སྦྱོང་འཛིན་གྲྭ་དང་གསོ་རིག་དྲི་གླིང་སོགས་གསོ་རིག་གི་ཚོགས་པ་དང་། གཞན་ཡང་རང་ཁྱིམ་གླིང་། དུང་བརྡ་དམངས་རྩོམ་ཆེད་དེབ། སྒྲ་དབྱངས་གླིང་། སྐྱེས་མའི་ཁེ་ཕན། རྩོམ་གྲོགས་གླིང་། གཡག་རྭ་རུ་ཁག། འདྲེ་སྒྲུང་གླིང་། རྫ་ཁའི་གཞས་ར། རྒྱུགས་བཤེར་གླིང་སོགས་ཆེད་ལས་མི་འདྲ་བ་དང་ལས་རིགས་མི་གཅིག་པ། ས་གནས་མི་མཚུངས་པ་སོགས་ཀྱི་སྐད་འཕྲིན་ཚོགས་པ་ཤིན་ཏུ་མང་བ་མ་ཟད། ཚོགས་པ་ལ་ལར་མི་གྲངས་ལྔ་བརྒྱ་ཙམ་ཡོད་པ་རེད། དེ་ལྟར་ཚོགས་པ་སོ་སོར་ནད་པ་ལྕི་མོ་ནད་བབ་ཚབས་ཆེན་ཅན་གྱི་འདྲ་པར་དང་ཡང་ན་བརྙན། ཡང་ན་གསལ་བཤད་ཡི་གེ་ལ་བདེན་དཔང་ཐམ་ག་བརྒྱབ་ནས་ནད་པའི་དངུལ་བྱང་སོགས་བསྐུར་ནས་རོགས་རམ་གྱི་སྒོར་མོ་འཛོམས་ཚོད་བསྡུས་ཏེ་མཐུན་རྐྱེན་ཅི་ནུས་བསྐྲུན་བཞིན་ཡོད་པ་རེད། རྒྱལ་ཁབ་ཀྱི་སྲིད་ཇུས་ལྟར་ས་གནས་སྲིད་གཞུང་གི་འབྲེལ་ཡོད་སྨན་ཁང་སོ་སོས་སྨན་ཡོན་བརྒྱ་ཆའི་མང་ཤོས་རོགས་རམ་བྱེད་པ་དང་། ད་དུང་ནད་པ་ལྕི་མོ་ཡིན་ན་དམངས་སྲིད་ཅུའུས་མཛོ་ཁལ་ལུག་ཁལ་གྱིས་ཁ་གསབ་བྱས་པའི་སྟེང་། ཚོགས་པ་དང་མི་སྒེར་གྱིས་ཀྱང་འདི་ལྟར་རོགས་རམ་བྱེད་པ་ནི་ཤིན་ཏུ་དགའ་འོས་པའི་བྱ་བ་ཞིག་ཅི་ལ་མིན། ཁྱིམ་ཚང་གཉོམ་ཆུང་དང་ནད་པ་ཉམ་ཐག་ཅིག་ལ་མཚོན་ན་དངོས་གནས་བརྐོ་མ་དགོས་པའི་གྲོ་མ་རྟ་མགོ་ལྟ་བུ་ཞིག་གནམ་ནས་བབས་པ་རེད་ཡ། ཡིན་ན་ཡང་། ང་རང་ལ་འདི་དུས་བསམ་ཚུལ་ཞིག་བྱུང་བ་ནི་བོད་པ་འདི་དག་གིས་ནད་བྱུང་ནས་ཡུན་ལོན་ཏེ་ཚབས་ཆེན་དུ་གྱུར་བ་སྟེ། རྒྱུད་བཞི་ལྟར་སྨྲས་ན་འབྲས་བུ་སྲོག་གཅོད་ནད་དགུ་ཡི་དུས་སུ་སླེབས་པ་ན་ད་གཟོད་མི་བདག་གཞན་གཉིས་ཀའི་སྙིང་རླུང་སྟོད་ལ་འཚངས་པ་དང་། སྙིང་རྗེའི་སྤྱན་ཆབ་བསིལ་གྱིན་ནད་པའི་གམ་དུ་བྱ་རྒོད་ཐོད་ལ་འཚོགས་འཚོགས་བྱེད་པ་ལས། ནད་མ་བྱུང་བའི་སྔོན་ནས་དེ་ལ་སྔོན་འགོག་གི་འདུ་ཤེས་དྲགས་པོ་ཞིག་དང་བརྩོན་པ་མཐར་ཐུག་ཅིག་མེད་པ་ནི་ཅི་འདྲའི་ཡིད་སྐྱོ་བ་ཞིག་རེད་ཨང་། ནད་གསོ་བ་ལས་སྔོན་འགོག་གཙོ་བོ་ཡིན་པ་ནི་འཛམ་གླིང་གི་འགྲོ་སྟངས་དང་། རང་རེའི་རྒྱལ་ཁབ་ཀྱི་མངག་བཅོལ་ལགས་ལ། དེང་དུས་འབྲེལ་ཡོད་འཕྲོད་བསྟེན་ལས་ཁུངས་རྣམས་ཀྱིས་བོད་ཁུལ་དུ་སྒྲུབ་ཀྱིན་པའི་ལས་འགན་ཡང་རེད།
       དཔལ་ལྡན་རྒྱུད་བཞི་རུ་ཡང་། མི་ན་བ་གནས་བར་འདོད་པ་དང་ན་བ་གསོ་བར་འདོད་པའི་གང་ཟག་གིས་གསོ་བ་རིག་པའི་མན་ངག་ལ་བསླབ་པར་བྱའོ། །ཚེ་རིང་བར་འདོད་པའི་གང་ཟག་གིས་གསོ་བ་རིག་པའི་མན་ངག་ལ་བསླབ་པར་བྱའོ། །ཞེས་གསུངས་པའི་དགོངས་དོན་ལས་ཀྱང་ནད་མེད་པར་ལུས་ཐ་མལ་དུ་གནས་རྒྱུ་དང་ཚེ་རིང་བ་ནི་གལ་ཆེན་ཡིན་པ་བསྟན་ཡོད་པ་མིན་ནམ། དེ་བས་ནད་མ་བྱུང་བའི་སྔོན་ནས་དེ་འགོག་པའི་ཐབས་ཤེས་ལེགས་པོ་གང་ནུས་ཅི་ལྕོགས་ཀྱིས་སྒྲུབ་རྒྱུ་ནི་ཧ་ཅང་གལ་ཆེ་མོད། ང་ཚོ་བོད་པའི་སྤྱི་ཚོགས་སུ་ད་དུང་དེ་ནི་གལ་ཆེན་ཞིག་ཡིན་པ་ལར་ནས་རྟོགས་ཀྱིན་མི་འདུག། དེ་མ་ཤེས་པས་ནད་སྣ་ཚོགས་ཀྱི་སྔོན་འགོག་འདུ་ཤེས་ཆུང་ཞིང་གོམས་གཤིས་དམན་པ་རེད། སྔོན་འགོག་གི་འདུ་ཤེས་ཞན་པས་ནད་ཕོག་པར་མཐུན་རྐྱེན་བསྐྲུན་པ་རེད། སྔོན་འགོག་ལ་དོ་སྣང་མ་བྱས་པར་གལ་ཏེ་ནད་ཚབས་ཆེན་འཛམ་གླིང་ཐོག་བཅོས་ཐབས་བྲལ་བ་བྱུང་ཚེ། མི་བདག་གཞན་ཀུན་གྱིས་བྱམས་སེམས་ཀྱི་གཤོག་རུ་བརྐྱངས་ཏེ་སྙིང་རྗེ་ཡི་རིལ་བུ་འབབ་རྒྱུ་ཡིན་ནམ། སྐབས་དེར་ཅི་བྱས་ཀྱང་ཕན་ཐོགས་དཀའ་ལ། དེས་ན་ཅི་བྱེད་དགོས་གང་སྒྲུབ་དགོས་ཤེ་ན། ལས་ལ་བརྩོན་ཞིང་གཞུང་རྒྱུད་དྲང་བ། བྱམས་དང་སྙིང་རྗེའི་བདག་ཉིད་ཅན་གྱི་བོད་པ་ཚོས། ནད་པ་ཚབས་ཆེན་ལ་རོགས་རམ་བྱེད་པ་ཇི་བཞིན་དུ་ན་ཚ་ཅི་རིགས་སྔོན་འགོག་གི་ཕྱོགས་ལ་ཧུར་ཐག་འབད་ཐག་བྱ་དགོས་ཏེ། དཔེར་ན། ས་གནས་སྲིད་གཞུང་གིས་འགོས་རིམས་སོགས་ཀྱི་ཤེས་བྱ་དྲིལ་སྒྲོག་བྱེད་པར་ནན་ཏན་གྱིས་ཉན་པ་དང་། སྨན་པ་རྣམས་ཀྱིས་བདེ་ཐང་གི་བསླབ་བྱ་གནང་བར་མཐོང་ཆེན་བྱེད་པ། སྤྱི་ཚོགས་ཀྱི་མི་སྣ་ལྷག་བསམ་ཅན་དང་དང་བླངས་པ་སོགས་ཀྱི་མངག་བཅོལ་ལ་དང་གུས་བྱེད་པ། དེ་དག་གི་བྱ་བར་ཐོག་མཐའ་བར་གསུམ་དུ་རྒྱབ་སྐྱོར་དང་ཡི་རངས་བྱ་དགོས།
       མདོར་ན། ནད་རིགས་སྔོན་འགོག་གི་བྱ་བ་ནི་འབྲོག་ཁུལ་གྱི་རྟ་རྒྱུགས་དང་། རོང་ཁུལ་གྱི་མདའ་རྩེད་ལས་ཀྱང་གལ་ཆེན་ཏུ་བརྩིས་ཏེ། དེ་ལ་མདོ་དབུས་ཁམས་གསུམ་སྤྱི་དང་། བྱེ་བྲག་ས་ཁུལ་སོ་སོ་དང་སྡེ་བ་རེ་རེ་བྱས་ཏེ་མི་ཤུགས་དང་དངོས་ཤུགས་གཉིས་ཀ་བཏོན་ནས་འབད་བརྩོན་བྱེད་དགོས་ཤིང་། དེ་ལྟར་བྱས་ཚེ་ན་ཚ་ཕོག་པའི་ཉེན་ཁ་ལས་བཤོལ་ཐུབ་ཅིང་ཐར་སྲིད་པ་ཡིན། ནད་ངན་གདུག་པ་ཅན་མ་བྱུང་ན། ད་གཟོད་ད་ལྟ་ནང་བཞིན་དུ་ཁྱིམ་ཚང་འཆམ་མཐུན། བཟའ་ཚང་འགྲིག་མཐུན། སྤྱི་ཚོགས་བདེ་འཇགས། འཚོ་བ་ཡར་རྒྱས། མི་ལུས་བདེ་ཐང་། གཅེས་ཕྲུག་ནད་མེད། ཚེ་རིང་ཁམས་བདེ་བཅས་ཀྱི་བདེ་སྐྱིད་ལ་ལོངས་སྤྱོད་ཐུབ་པ་གདོན་མི་ཟ་བས། ན་ཚ་མ་བྱུང་གོང་གི་སྔོན་འགོག་ལ་གཙིགས་ཆེན་དང་ནན་ཏན་བྱ་རྒྱུ་ནི་ཅི་ལས་ཀྱང་གལ་ཆེའོ། །