ཐེམ་ཆེན་རྫོང་བོད་སྨན་ཁང་གིས་སྨན་རྩྭ་འཐུ་བའི་བྱ་འགུལ་སྤེལ་བ།
ཐེམ་ཆེན་རྫོང་བོད་སྨན་ཁང་གིས་སྨན་རྩྭ་འཐུ་བའི་བྱ་འགུལ་སྤེལ་བ།
ཐེམ་ཆེན་རྫོང་བོད་སྨན་ཁང་གིས་སྨན་རྩྭ་འཐུ་བའི་བྱ་འགུལ་སྤེལ་བ།
ཐེམ་ཆེན་རྫོང་བོད་སྨན་ཁང་གིས་བོད་པའི་སྲོལ་རྒྱུན་གྱི་སྨན་རྩྭ་ངོས་འཛིན་དང་། གསོ་བ་རིག་པར་འཇུག་པའི་ཕྱི་རབས་པ་མང་པོ་ཞིག་གིས་སྨན་གྱི་སྡེབ་སྦྱོར་སོགས་ཚད་ལྡན་ཡང་དག་ཅིག་ཤེས་ཆེད་དུ། ལོ་རེའི་བོད་ཟླ་ལྔ་བའི་ནང་། བོད་སྨན་ངོས་འཛིན་གྱི་བྱ་འགུལ་སྤེལ་བཞིན་ཡོད།
ད་ལོའི་བོད་ཟླ་ལྔ་བའི་དུས་ཚིགས་འདི་དང་བསྟུན་ནས། ཐེམ་ཆེན་རྫོང་བོད་སྨན་ཁང་གིས་རྩ་འཛུགས་བྱས་ཏེ། སྨན་པ་དག་གིས་ས་ལ་དགེ་བཅུ་ཚང་ཞིང་སྨན་སྣ་ཕུན་སུམ་ཚོགས་པའི་ཐེམ་ཆེན་རི་བོའི་རྒྱབ་ལུང་དུ་བོད་སྨན་ངོས་འཛིན་གྱི་བྱ་འགུལ་སྤེལ། བྱ་འགུལ་འདི་ནི་ཐེམ་ཆེན་རྫོང་བོད་སྨན་ཁང་གིས་ལོ་རེར་ཐེངས་རེ་སྤེལ་བཞིན་ཡོད་ལ། བྱ་འགུལ་འདི་སྤེལ་བའི་ཐད་ནས་ཐེམ་ཆེན་རྫོང་བོད་སྨན་ཁང་གི་འགོ་གཙོ་ཟླ་བ་ལ་བཅར་འདྲི་བྱེད་དུས་སུ་ཁོས་བཤད་དོན། བོད་སྨན་ངོས་འཛིན་གྱི་བྱ་འགུལ་འདི་ནི་ཐེམ་ཆེན་རྫོང་བོད་སྨན་ཁང་གིས་ལོ་ངོ་མང་པོའི་སྔོན་ནས་སྤེལ་བའི་བྱ་འགུལ་ལེགས་པོ་ཞིག་ཡིན་ལ། བོད་སྨན་ངོས་འཛིན་གྱི་བྱ་འགུལ་འདི་བརྒྱུད་ནས་ཕྱི་རབས་པ་དག་གིས་སྨན་རྩྭ་རེ་རེའི་ངོ་བོ་དང་། ཕན་ནུས་སོགས་ལག་ལེན་དངོས་ལས་ཤེས་པར་ཕན་ངེས་ཅན་ཐོགས་ཡོད་ཟེར།
ཐེམ་ཆེན་རྫོང་བོད་སྨན་ཁང་གིས་ལོ་འདི་གའི་རིང་ལ་ནད་པར་སྨན་བཅོས་བྱེད་པའི་ཞབས་ཕྱི་དང་། ལག་རྩལ་སོགས་སྔར་ལས་འཕེལ་རྒྱས་སུ་བཏང་ཡོད་ལ། གྲལ་དག་པའི་སྨན་ལུམས་ཚན་ཁག་དང་། དངོས་བཅོས་ཁང་། སྨན་སྦྱོར་ཁང་། བསྐུ་མཉེ་ཁང་། ཞག་སྡོད་ཚན་ཁག་སོགས་སྔར་ལས་ཇེ་ལེགས་སུ་བཏང་ནས་ནད་པ་མང་པོ་ལ་ཞབས་ཕྱི་གང་ལེགས་སྒྲུབ་ཀྱིན་ཡོད།
ད་སྐབས་སྨན་ཁང་འདིའི་སྨན་སྦྱོར་ཁང་གིས་ཁོ་ཚོ་རང་ཉིད་ཀྱིས་སྨན་རྩྭ་སྣ་ཚོགས་འཐུས་ཏེ་རིན་ཆེན་མང་སྦྱོར་དང་། རིན་ཆེན་བཙོ་བཀྲུ་ཟླ་ཤེལ། རིན་ཆེན་གཡུ་རྙིང་ཉེར་ལྔ་སོགས་སྨན་སྣ་ཉིས་བརྒྱ་ལྷག་སྡེབ་སྦྱོར་བྱེད་བཞིན་ཡོད་ལ། དབྱར་ཟླ་ལྔ་བ་ནི་དུས་ཚིགས་དང་ནམ་ཟླ་གང་གི་ཐད་ནས་སྨན་རྩྭ་འཐུ་བའི་དུས་ཚོད་ལེགས་ཤོས་ཤིག་ཡིན་པས། བོད་སྨན་ཁང་གི་སྨན་པ་དག་གིས་སྨན་ནི་སྐྱེ་སར་སྐྱེ་བ་དང་དུས་སུ་བཏུ་བའི་དུས་ཚིགས་བཟང་བོ་འདི་དང་བསྟུན་ནས་སྨན་སྣ་སྣ་ཚོགས་འཐུ་གིན་ཡོད། དེ་ལ་ཐེམ་ཆེན་རྫོང་བོད་སྨན་ཁང་སྨན་སྦྱོར་ཚན་ཁག་གི་འགོ་གཙོ་བསྟན་པ་བཟང་བོ་ཡིས་བཤད་དོན། ད་སྐབས་ང་ཚོ་ཡོད་ས་འདི་ནི་ཐེམ་ཆེན་རི་བོའི་རྒྱབ་ལུང་ཡིན་ལ། གནས་ཀྱི་བཀོད་པ་ཕུན་སུམ་ཚོགས་པའི་ཡུལ་གྲུ་འདི་རུ་སྲོ་ལོ་དམར་པོ་དང་། འཛིན་པ། བོང་དཀར། ཨུག་ཆོས་དམར་པོ་སོགས་སྨན་སྣ་རིགས་དྲུག་ཅུ་ལྷག་ཡོད་ཟེར། ཐེམ་ཆེན་རྫོང་བོད་སྨན་ཁང་གིས་སྔ་ཕྱིར་མཚོ་ངོས་ལས་རྨིད4000ཡན་ཡོད་པའི་མེ་ཏོག་ལུང་བ་དང་། ཨ་མྱེས་བོ་རོའི་ལུང་བ་སོགས་ནས་སྨན་རྩྭ་གང་མང་འཐུ་སྒྲུབ་བྱས་ལ། ལག་ལེན་དངོས་ནས་སྨན་རྩྭ་འཐུ་སྒྲུབ་དང་སྨན་གྱི་ངོ་བོ་སོགས་ལ་ཞིབ་འཇུག་བྱས་པ་འདིས། བོད་སྨན་གྱི་ཤེས་བྱ་ཇེ་ལེགས་དང་བོད་སྨན་འཕེལ་རྒྱས་སུ་གཏོང་བར་ནུས་པ་གང་ལེགས་ཐོན་ཡོད།
